ئەڤرو نیوز : کاروان باعەدرێ:
بو ئێکەم جار کچەکا ئێزدی ل عیراق و کوردستانێ خوە بەربژێردکەت بو وەرگرتنا تاجا شاھجوانیێ.
ژێدەرەکێ ل ھولا مەسنوور دیارکر کو سوبەھی دێ رێورسمێن بەریکانەیا شاھجوانا عیراقێ ھێتەکرن و بۆ ئەڤرۆ نیوز: (بو ئێکەمین جار ل عیراقێ کچەکا ئێزدی بناڤێ ” لیدیا ئەلشێخ ” وەکو بەربژێر بو وەرگرتنا پوشتێ شاھجوانیا عیراقێ پشکدارە کو دێ ل ئوتێلا مەنسور ل بەغدا ھێتە ئەنجامدان)
زێدەتر گۆت: (ئەڤ کچە خەلکا باشیکێ یا سەر ب پارێزگەھا موسلە و ب رەگەز کوردە و ئێزدی یە)
ئه‌ڤرۆ نیۆز،زنار تۆڤى:
ئێك ژ تابلۆیێن گران بوها یێن وێنه‌كێشێ جیهانى یێ بناڤوده‌نگ پابلۆ بیكاسۆى ب نرخه‌كێ گه‌له‌كێ مه‌زن هاته فروتن و ڤێ چه‌ندێ ناڤه‌ندێن هونه‌رى دلگران كرینه.
ئاژانسا (بى بى سى) یا عه‌ره‌بى به‌لاڤكریه،كو تابلۆیه‌كێ وێنه‌كێشێ جیهانى یێ بناڤوده‌نگ پابلۆ بیكاسۆى ب 45 ملیۆن دۆلارێن ئه‌مریكى هاتیه فروتن و ناڤێ وى تابلۆى(رۆلى گوریس) ه،كو وێنێ ئێك ژ نێزیكترین هه‌ڤالێن وى یه،كو ئه‌و ژى وێنێ ژنه‌كێ یه ب جلكێن شین ل سه‌ر كوسیه‌كێ روونشتییه.
هه‌روه‌سا وێ ئاژانسێ ئاماژه ب هندێ دایه،كو ئه‌ڤ تابلۆیه ژلایێ نازیان ڤه ل سالێن جه‌نگێ جیهانیێ دویێ هاتبوو دزین،به‌لێ شه‌ركه‌رێن فرنسا شیان جاره‌كادى ڤى تابلۆى ببینن و بپارێزن.
پابلۆ بیكاسۆ وێنه‌كێش و شێوه‌كارێ ئیسپانییه،ئێكه ژ مه‌زنترین هونه‌رمه‌ندێن سه‌دێ بیستێ،هه‌روه‌سا كارێن وى یێن هونه‌رى دبێ هه‌ڤركن و د ئاسته‌كێ بلندانه و د جیهانێ دا گرنگیه‌كا تایبه‌ت پێ دهێته‌دان،پشتى مرنا وى تابلۆیێن وى ب بوهایێ ده‌هان ملیۆن دۆلاران دهێنه فروتن.
ئەڤرو نیوز ، بێوار حسێن :
رێڤەبەریا گەشت و گوزارێ ل قەزا ئاکرێ وەکو بەرھەڤیەک بو مێھڤان و گەشتیاران دەست ب پاقژ و سەخبێرکرنا جھێن گەشت و گوزاری ل قەزا ئاکرێ کر ، و ددەتن دیارکرن کو ئەڤ سالە ١٧ کومپانیێن گەشت و گوزاری دێ گەشتیاران بو جھێن گەشت و گوزاریێن ئاکرێ ئینن.
دڤی واریدا مێڤان رەشید بەرپرسێ راگەھاندنا رێڤەبەریا گەشت و گوزارێ ل قەزا ئاکرێ بۆ ئەڤرۆ نیوز گۆت: (ب مەرەما پێشوازیکرنا مێھڤان و گەشتیاران ، رێڤەبەریا گەشت و گوزارێ ل قەزا ئاکرێ ب ھەڤکاریا رێکخراوا GiZ یا ئەلمانی دەست ب ھەوەکا سەخبێری و پاقژکرنا ھەموو جھێن گەشت و گوزاری ل سەنتەرێ قەزا ئاکرێ کر و ئەڤ ھەوە ژی دێ چەند رۆژان یا بەردەوام بیت)
زێدەتر گۆت: (وەسا بریارە ئەڤ سال ١٧ کومپانیێن گەشتیاری کو ھندەک ژ وان بو ئێکەمین جارە دێ گەشتیاران بو باشوورێ کوردستان و پارێزگەھا دھوکێ ئینن ، دێ گەشتیاران بۆ ھاڤینگە و جھێن گەشت و گوزاریێن سنوورێ قەزا ئاکرێ ئینن کو ئەڤ یەک ژی دێ ڤەژانا کەرتێ گەشت و گوزاری ل دەڤەرێ بەر ب پێشڤە بەتن ، ژبەرڤێ ھەر ژ نوکە ئەم دێ دەست ب پێشوازیکرنا گەشتیاران کەین)
ئەڤرو نیوز ، بێوار حسێن :
ب ھەلکەفتا ھاتنا مەھا رەمەزانا پیروز و شورەشا گولانێ ھولەکا تازیان و چوار مزگەفت ل سنوورێ ناحیا دینارتە یا سەر ب قەزا ئاکرێ ھاتنە ڤەکرن.
دڤی واریدا شەعبان خەلیل رێڤەبەرێ ناحیا دینارتە بۆ ئەڤرو نیوز گۆت: (ب ھەلکەفتا ھاتنا مەھا رەمەزانا پیروز و شورشا گولانێ ھولەکا تازیان و چوار موگەفت ل سنوورێ ناحیا دینارتە ھاتنە ڤەکرن کو ژلایێ خێرخوازان ڤە ھاتبونە چێکرن)
زێدەتر گۆت: (ئەو مزگەفت ژی دکەڤنە گوندێن گیرەی، سەرکەندالا ، مەزرینگانێ و کانیا توزێ ، دێ خزمەتەکا باش بو خەلکێ دەڤەرێ کەن تایبەتی د رێڤەچوونا روژانێن بەھی و مەھا رەمەزانێ)
ئەڤرو نیوز :
سپێدەیا ئەڤرۆ بەرێز “نێچیرڤان بارزانی ” سەرۆکی حکومەتا ھەرێما کوردستانێ پشکداری د کونفرانسێ زانستیێ زانکویا کوردستان ل ھەولێرێ کر و د گوتارەکێ دا دیارکر کو کوردستان ل قوناغێن دوماھیێ یێن قەیرانا دارایی یە و تنێ ریفراندوم ژی مە ھەمووان کومڤە دکەت.
بەرێز نێچیرڤان بارزانی دیارکر کو ئەو د قوناغا ئاگرێ قەیرانا دارایی رزگاربوون و گۆت: (دەستپێکێ سەرەخوشیێ ل کەس و کار و حکومەتا بەریتانیا دکەین بو وێ کریارا تیرورستی یا ل باژێرێ مانچستەر رویدای و شەھید و بریندار درۆست بووین ، ئەڤە نوشانە کو تیرور دیاردەیەکا جیھانێ یە و پێدڤی یە ھەموو جیھان ژی پێکڤە کار بکەن بو ژناڤبرنا تیرورێ چو ژلایێ سەربازی و چەک و شەری بیت یان ژی ژلایێ ھزری بیت و ئەم وەکو ھەرێما کوردستانێ د پێشرەویا جیھانێ روو ب روویێ تیرورێ بوینە و ھەزاران شەھید و بریندار مە داینە)
زێدەتر گۆت: (سەربەخویا ھەرێما کوردستانێ بابەتەک گرنگە و گەلێ کورد بو کار دکەت و تنێ ریفراندوم و سەربەخویی یە مە ھەمووان پێکڤە کوم دکەت ، نھا دەمێ وێ یەکێ ھاتیە کو دەست ب ئاڤاکرنا دەولەتا سەربەخوە ل عیراقێ بکەین ، ل کوردستانێ ناکوکیێن سیاسی چوو جاران دوماھی ناھێن ، بەلێ ئەم دکارین پێکڤە کار بکەین ب رێیا دانوستاندن چارەسەریا ئاریشەیێن خوە بکەین ، سەربەخویی و ریفراندوم ژی ژی بکەینە دەستپێکەک بو چارەسەرکرنا ئاریشەیێن خوە)
نێچیرڤان بارزانی سەرۆکی َحکومەتا ھەرێما کوردستانێ دیارکر ژی کو ھەڤسنووری بوون ل گەل عیراقێ باشترین چارەسەریە دناڤبەرا مە و عیراقێ کو بەردەوام وەکو کرێچی ل گەل ھەڤ بمینین و گۆت ژی: ( سیستەمی بایومەتری دێ شێت تا رادەیەکێ باش رێکخستنا موچەی ل کوردستانێ کەت )
جھێ ئاماژە پێکرنێ یە کو کونفرانسا زانکویا کوردستان ل ھەولێر لژێر ناڤ و نیشانێن ” بارودوخێ سیاسیێ کوردستان و روۆھەلاتا ناڤەراست ” دەست پێ کر و ژ چەند روویەکان ڤە دانوستاندنێ لسەر کومەکا بابەت و تەوەر و پرسێن کوردستان و عیراق و رۆژھەلاتا ناڤەراست کەن و ژلایێ بسپور و کەسێن تایبەتمەند ڤە ھێنە گەنگەشەکرن.
ئه‌ڤرۆ نيوز:
نێچيرڤان بارزانى، سه‌رۆكێ حوكمه‌تا هه‌رێما كوردستانێ، د ده‌مێ پێشكێشكرنا گۆتاره‌كێ د ناڤ كۆنفرانسه‌كێ زانستى يێ زانكۆيا كوردستان ل هه‌ولێر دا، راگه‌هاند: ئاڤاكرنا په‌يوه‌نديێن باش ل گه‌ل به‌غدا، باشتره ژ هه‌بوونا په‌يوه‌نديه‌كێ كو وه‌كو يا د ناڤبه‌را كرێچى و خودانێ خانێ دا بيت.
سه‌رۆكێ حوكمه‌تێ د گۆتاره‌كێ دا به‌حس ل سيسته‌مێ بايومه‌ترى كر و راگه‌هاند كو ئێك ژ وان چاكسازيێن ل گه‌ل قوباد ته‌له‌بانى جێگرێ سه‌رۆكێ حوكمه‌تێ ده‌سپێكرى و گرێدايى بجهئينانا وێ نه.
ده‌باره‌ى سه‌ربه‌خۆيێ ژى نێچيرڤان بارزانى گۆت: “سه‌ربه‌خۆيى هه‌موويان كۆم ڤه دكه‌ت و ب درێژاهيا مێژوويێ وه‌كو نوكه ده‌رفه‌ت بۆ كوردستانێ نه‌هاتيه پێش”، گۆتژى: “هه‌كه چاره‌سه‌ريه‌كا بنبڕ ژى نه‌بيت، رێيه‌كه به‌ر ب چاره‌سه‌ريێ”.
ئه‌ڤرۆ نيوز:
پشتى ماوه‌كێ كێم ژ دياركرنا وى وه‌كو ئاخفتنكه‌رێ فه‌رميێ ئێكه‌تى نشتيمانى كوردستان، حاكم قادر حه‌مه‌جان، د روونكرنه‌كێ دا راگه‌هاند كو ئه‌و ئێدى ئاخفتنكه‌رێ ب ناڤێ ئێكه‌تيێ نينه.
د روونكرنه‌كێ دا نڤيسينگه‌ها راگه‌هاندنا حاكم قادر حه‌مه‌جان راگه‌هانديه كو حاكم قادر حه‌مه‌جان ئه‌ندامێ ده‌سته‌يا كارگێرى يا مه‌كته‌با سياسى يا ئێكه‌تى نشتيمانى كوردستان ئاخفتنكه‌رێ فه‌رميێ ئێكه‌تيێ نينه، هه‌كه به‌رى نوكه ئه‌و پۆست ژ لايێ هه‌ر جهه‌كى ڤه ب خه‌له‌تى خستبيته سه‌ر ناڤێ وى، “ئه‌م د رێيا ڤێ په‌يامێ دا بۆ هه‌موو كه‌نال و ده‌زگه‌هێن راگه‌هاندنێ روون دكه‌ين كو هه‌ڤال حاكم قادر حه‌مه‌جان، ب تنێ ئه‌ندامێ ده‌سته‌يا كارگێريا مه‌كته‌با سياسى يا ئێكه‌تى نشتيمانى كوردستانه”.
ئه‌ڤه د ده‌مه‌كى دايه، 29ى نيسانا 2017ێ د كۆمبوونا مه‌كته‌با سياسى يا ئێكه‌تيێ دا، حاكم قادر حه‌مه‌جان وه‌كو ئاخفتنكه‌رێ ب ناڤێ ئێكه‌تى نشتيمانى كوردستان هاتبوو دياركرن، پاشان ژى ميديا فه‌رمى يا ئێكه‌تيێ وه‌كو ئاخفتنكه‌رێ حزبێ ناساند بوو.
گۆمان ل وێ چه‌ندێ دهێته كرن كو ده‌ست ژ كاركێشنا حاكم قادر گرێدايى هه‌بوونا گه‌له‌ك ده‌نگێن جودا يێن ناڤ ئێكه‌تى نشتيمانى كوردستان بيت كو هه‌موو خودان هه‌لويست و بۆچوونێن جودانه.
ئەڤرۆ نیۆز،زنار تۆڤی:
پشتی کو دڤێ گەشتێ دا سەرەدانا وەلاتێن سعودیێ و ئیسرائیلێ و فەلەستینێ کری،ئەڤرۆ رۆژا چارشەمبی 24.5.2017 سەرۆکێ ئەمریکا دۆنالد ترەمپ گەهشتە ڤاتیکان و بریارە سەرۆکێ ئەمریکا ل گەل پاپایێ ڤاتیکانێ کۆمبیت و بەحسێ چەندین تەوەرێن گرنگ بکەن،هەروەسا پشتی وەلاتێ ڤاتیکانێ ترەمپی ل بەرە سەرەدانا چەندین وەلاتێن دی یێن جیهانی بکەت.
ئه‌ڤرۆ نيوز:
ڤه‌كۆلينه‌كا ئه‌مريكا ماده‌كى سرۆشتى يێ ناڤ زه‌يتونێ ئاشكه‌را كر كو د شيان دايه رێگريێ ل دروستبوونا زارۆيى بكه‌ت وه‌كو حه‌بێن رێگريكه‌ر بهێته ب كارئينان.
نوشدارێن زانكۆيا بێركلى ل ئه‌مريكا دبێژن: “ماده‌كێ سرۆشتى يێ د ناڤ زه‌يتونێ دا ڤه‌ديتى، دشيان دايه رێگريێ ل سپێرمى بكه دا كو نه‌گه‌هيته هێكێ، ئه‌و روون دكه‌ن ژى خوارنا گه‌له‌ك زه‌يتونان نه‌شێت رێگريێ ل دووگيانێ بكه‌ت، به‌لێ خوارنا پێكهاتێ كيمياوى ب ره‌نگێ حه‌بێ دێ شێت رێگريێ كه‌ت.
سه‌رۆكا تيما ڤه‌كۆله‌ران، د. پۆلينا ليشكۆ دبێژيت: “هه‌ردو ره‌گه‌ز دشێن ڤان حه‌بان ب كار ئينن بۆ رێگرتن ل زارۆبوونێ، كارتێكرنێن لاوه‌كى ژى يێن حه‌بان وه‌كو به‌رى نوكه كو دبنه ئه‌گه‌رێ تووشبوونێ ب نه‌خۆشيێن دلى و كلۆبوونا خوينێ و خه‌مۆكيێ نينن”.
د. پۆلينا خۆيا ژى دكه‌ت كو ماددێ ليوپۆل و پرايميسترينى يێ ناڤ زه‌يتونێ دشێت سپێرمان ب راوه‌ستينيت و ئه‌وێ هێزێ كێم بكه‌ت كو دشێت د وێ رێ دا بچته ناڤ هێكێ، هه‌ر ديسا دده‌ته زانين ئه‌ڤ ماددێ كيمياوى يێ د ناڤ “مانگۆ، ترى و ئه‌لۆڤێرايێ دا هه‌يى”.
سه‌رۆكا تيما ڤه‌كۆله‌ران دبێژيت: “ماددێ كيمياوى يێ بۆ خانێن سپێرم نه‌يێ ژه‌هراوى يه، سپێرم دشێت پشتى هنگى ژى ب لڤن، به‌لێ هه‌مان كارتێكرن نامينيت”، د ده‌مه‌كى دا كو ئه‌ڤ حه‌بێن دهێنه به‌رهه‌مئينان دشيان دايه پشتى پێنج ده‌مژمران ل سه‌ر بۆرينا سكسى ژى بهێنه بكاربينن و كارتێكرنا رێگريێ ل سه‌ر زارۆبوونێ دێ هه‌بيت.
ڤه‌كۆله‌رێن ئه‌مريكى ب هيڤى نه ئه‌و ده‌رمانێ نوو د ماوێ دو سالێن دى دا بكه‌ڤيته به‌ر ده‌ستێ ژن و زه‌لامان كو دشيان دايه به‌رى و پشتى سكسى ب كار بينن.
ئەڤرۆ نیۆز،زنار تۆڤى:
ئەڤرۆ رۆژا سێشه‌مبى 23/5/2017 د رێوره‌سمه‌كێ ژ هه‌ژیدا لیژنا ناوچا كانى ماسێ یا پارتى ل ژێر چاڤدێریا عه‌مه‌ر ئۆره‌یى به‌رپرسێ لقا 18 یا پارتى دیمۆكراتى كوردستان،بیره‌وه‌ریا شۆره‌شا گۆلانێ ب به‌رهه‌ڤبوونا هژماره‌كا مه‌زن یا پێشمه‌رگێن شۆره‌شا گۆلانێ ئه‌ڤ بیره‌وه‌ریه ب چه‌ندین چالاكیێن جۆدا ل كانى ماسێ ساخكر،هه‌روه‌سا چه‌ندین هه‌لبه‌ست ژلایێ چه‌ندین هه‌لبه‌ستڤانێن پێشمه‌رگه هاتنه خواندن و چه‌ندین پێشمه‌رگه‌یان به‌حسێ سه‌ربۆرا ژیانا خوه یا پێشمه‌رگایه‌تیێ ژى كر و هه‌روه‌سا ئالایه‌كێ مه‌زنێ كوردستانێ ژى ب ڤێ هه‌لكه‌فتێ ل سێریانا كانى ماسێ هاته بلندكرن.
عه‌مه‌ر ئۆره‌یى به‌رپرسێ لقا 18 یا پارتى دیمۆكراتى كوردستان ل سه‌ر ڤێ بیره‌وه‌ریێ بۆ ئه‌ڤرۆ نیۆز دیاركر:شۆره‌شا گۆلانێ تایبه‌تمه‌ندیا خوه هه‌بوو،چونكى پشتى شكه‌ستنا سالا 1975 حوكمه‌تا عێراقێ یا وى سه‌رده‌مى ب هه‌موو باوه‌ریا خوه دگۆت ئێدى شۆره‌شا كوردى ب دوماهى هات،لێ شۆره‌شا گۆلانى هه‌ر زوو ده‌ستپێكر و ئه‌ڤه په‌یامه‌ك بوو بۆ دۆژمنێن مه،كو كورد یێن ماین و دێ مینن ژى،هه‌روه‌سا گۆلان په‌یامه‌ك بوو بۆ دوستێن مه ژى كو ئه‌م یێن ماین و دێ شۆره‌شێ كه‌ین،له‌ورا شۆره‌شا گۆلانا پێشكه‌فتنخواز ب شێوێ پارتیزانى ده‌ستپێكر و شیا د ده‌مه‌كێ كورتدا سه‌ركه‌فتنێن مه‌زن تۆمار بكه‌ت،هه‌روه‌سا گۆت ژى:ژبه‌ركو گه‌له‌ك جاران بیروه‌ریا شۆره‌شا گۆلانێ ل ده‌ڤه‌را كانى ماسێ هاتیه ساخكرن،له‌ورا مه ژى به‌رده‌وامى دایه ڤێ چه‌ندێ و هه‌روه‌سا ئه‌ڤ ده‌ڤه‌ره لاندكا هه‌ردو شۆره‌شێن ئیلۆن و گۆلانێ یه و دیسان ژى ل سه‌ر ده‌مێ شۆره‌شا گۆلانێ ئێك ژ مه‌زنترین داستانێن وێ شۆره‌شێ كو داستانا كانى ماسێ بوویه ل ڤێرێ هاتیه تۆماركرن،له‌ورا وه‌كو رێزگرتن بۆ شه‌هیدێن ڤێ داستانێ هه‌ر سال ئه‌م ڤێ بیره‌وه‌ریێ ل ڤێرێ ساخ دكه‌ین،دیسا ئه‌و پێشمه‌رگێن ئه‌ڤرۆ ژى ئاماده‌بووین پرانیا وان پشكدارى د داستانا كانى ماسێ دا كریه.
عه‌مه‌ر ئۆره‌یى زێده‌تر گۆت:ده‌مێ ئه‌ڤرۆ ئه‌ڤ پێشمه‌رگه ژ چیاى هاتینه خوار و رێزبووین وه‌كو بیرهاتن بۆ ئه‌نجامدانا چالاكیه‌كا له‌شكرى،بیرهاتنێن شۆره‌شا گۆلانێ هه‌موو هاتنه پێش چاڤێن من و روندكێن گریێ ژ چاڤێن من هاتن،چونكى ئه‌ڤرۆ گه‌له‌ك هه‌ڤال و هه‌ڤچه‌په‌رێن مه یێن شۆره‌شا گۆلانێ ل گه‌ل مه نه‌بوون و شه‌هید بووینه،له‌ورا هندى ئه‌م بشێین دێ ڤان بیره‌وه‌ریان ساخكه‌ین و دێ ب ره‌نگه‌كێ به‌رفره‌هتر ژى ئه‌نجامده‌ین،چونكى ئه‌ڤه وه‌فاداریه‌كه بۆ وان پێشمه‌رگه و شه‌هیدێن ڤێ شۆره‌شێ،هه‌روه‌سا بلندكرنا مه‌زنترین ئالا ل كانى ماسێ رامانا هندێ دده‌ت،كو ب زووترین ده‌م ئه‌ڤ ئالایه دێ بیته ئالایێ ده‌وله‌تبوونێ.
ل دوماهیا بیره‌وه‌ریا شۆره‌شا گۆلانێ ل كانى ماسێ پێشمه‌رگه‌یان چه‌ندین ده‌وات و دیلانێن كورده‌وارى ل به‌ر ده‌نگێ سترانبێژ مێهڤان بێدۆهى كرن.
نيشاندان