ئه‌ڤرۆ نیوز ، نه‌وزاد هلۆرى:
سپێده‌یا ئه‌ڤرۆ هێزێن پێشمه‌رگه‌ى ل سنوورێ ناحیا عیازیه‌ یا سه‌ر ب قه‌زا ته‌له‌عفه‌ر شیان پلانه‌كا چه‌كدارێن داعش ژناڤ ببه‌ن كو دڤیا دناڤ رێزێن پێشمه‌رگه‌ى خوه‌ بته‌قینن و رێكێ ڤه‌ بكه‌ن چه‌كدارێن دن یێن داعش بگه‌هن سووریا.
دڤى واریدا “نه‌قیب بێدار زێبارى ” ژ هێزا پێشمه‌رگێ پاراستنا ژینگه‌ها دهۆك یا سه‌ر ب وه‌زاره‌تا پێشمه‌رگه‌ى بو ئه‌ڤرۆ نیوز گۆت: ( ئه‌ڤرۆ سپێدێ ژماره‌كا چه‌كدارێن داعش كو ژ 16 خوكوژان پێكدهاتبوون دڤیا خوه‌ بگه‌هینن سه‌نگه‌رێن پێشمه‌رگه‌ى و خوه‌ بته‌قینن و رێكێ ڤه‌ بكه‌ن بو چه‌كدارێن دن یێن داعش كو خوه‌ بگه‌هینن سووریا ، به‌لێ پلانا وان ژلایێ هێزێن پێشمه‌رگه‌ى هاته‌ ژناڤبرن و كوشتن و گرتن ، و چوار ژى ژ وانان درژدبوون كو خوه‌ بگه‌هینن سووریا ، به‌لێ هێزێن پێشمه‌رگه‌ى رێك ب وان نه‌دا و نه‌رچابوون خوه‌ بته‌قینن)
زێده‌تر گۆت: ( سوپاس بو خودێ هێزێن پێشمه‌رگه‌ى چوو زیان نه‌بوون ، به‌لێ هێشتا هژماره‌كا چه‌كدارێن داعش ل بلنداهیێن ناحیا عه‌یازیه‌ یێن مایى و دڤێت خوه‌ بگه‌هینن سوریا و پرانیا جاران ژى لده‌ما شه‌ڤێ و سپێده‌یا زوو دیاردبن)

ئەڤرۆ نيوز:
ھەرسێ حزبێن کوردستانی بزاڤا ئیسلامە و حزبا سوسیالیست و حزبا کومەنیستا کوردستانێ پشتەڤانیا خوە بۆ سیستەمێ کۆمارا فێدرالیا پەرلەمانی راگەھاندن، د ھەمان دەمدا پشتەڤانیا خوە بۆ پرۆژێ سەرۆک بارزانی راگەھاندنی دیارکرن، کو ل سەرانسەری وەلاتێن جیھانی سیستەمێ فێدرالی دھێتە بجھئینان و دەستھەلات د ناڤبەرا حوکمەتا ناڤەندی و ھەرێماندا دھێتە بەلاڤکرن.
پەیڤدارێ بناڤێ بزاڤا ئیسلامی (کامل مەحمود) بۆ رۆژناما ئەڤرۆ راگەھاند، بزاڤا ئیسلامی یا کوردستانێ پشتەڤانیا پرۆژە و سیستەمێ کۆرمای فێدرالیا پەرلەمانی دکەت، کو ئەڤرۆ حوکمڕانیا دونیایێ ب سیستەمێ فێدرالیا پارێزگەھان دھێتە پەیڕەوکرن، ل پرَانیا وەلاتێن جیھانێ دەستھەلات د ناڤبەرا حوکمەتا ناڤەندی و ھەرێما دھێتە بەلاڤکرن، لەورا ئەم پشتەڤانیا وێ پرۆژەی دکەین و دێ دھاریکاربین بۆ بجھئینانا وی پرۆژەی یێ سەرۆک (مەسعود بارزانی) راگەھاندی.
ناڤبری ھەروەسا گۆت: نوکە ئەم مللەتێ کوردستانێ، کو بەر ب ریفراندۆمێ و جودابوونا ژ عیراقێ دچین، پێنگاڤان بۆ دەولەتبوونێ دھاڤێژین، کو وەکی مللەتێ کوردستانێ مافێ مە ھاتیە پێشێلکرن ژ ئالیێ حوکمەتا عیراقێ ڤە، لەورا دڤێت ل دەولەتا کوردستانێ مافێن ھەموو پێکھاتێن کوردستانی بھێنە بەردەستکرن، دا ببینە دەولەتەکا نموونەیی یا پێکڤە ژیانێ ل دەڤەرێ.
ھەروەسا پەیڤدارێ بناڤێ حزبا سوسیالیستا دیموکراتی یا کوردستانێ (بەختیار کەمال) بۆ رۆژناما ئەڤرۆ گۆت: ئاشکراکرنا سیستەمێ حوکمڕانیا دەولەتا کوردستانی ژئالیێ بەرێز سەرۆکێ ھەرێما کوردستانێ ڤە د جھێ خوەدابوویە، ب تایبەتی کو سیستەمێ کۆماری فێدرالی پەرلەمانی یە، کو ب باوەریا مە وەک حزبا سوسیالیست سیستەمەکێ باشە و پشتەڤانیا وی رەنگێ سیستەمی دکەین، کو دەستھەلات دناڤبەرا حوکمەتا ناڤەندی و پارێزگەھاندا بھێنە بەلاڤکرن، زێدەباری سیستەمی روتین دێ ھێتە کێمکرن و دامودەزگەھێن حکومەتێ ب سیستەماتیک دێ کارێ خوە کەن.
ھەروەسا بەختیا کەمال راگەھاند، ب باوەریا مە دڤێت دەمێ ئەم ریفراندوما سەربخوەیی ئەنجامددەین دڤێت ب چاڤ ڤەکری ل حوکمڕانیا وەلاتێ بنێرین لەورا ئەو سیستەمێ سەرۆکێ ھەرێمێ راگەھاندی، دێ بیتە قورتال بوونا ڕێڕەوا حوکمڕانیا پاشەرۆژا کوردستانێ و کومکرنا ھەموو دەنگ و رەنگان ل ژێر چادرا دەولەتێ، ھەموو کێشە و ئاریشان دێ ئێکلا کەت.
ژ ئالیێ خوەڤە ئەندامێ مەکتەبا سیاسی یا حزبا کومەنەیستا کوردستانێ (شوان حەسەن) گۆت: ئەو سیستەمێ بەرێز کاک مەسعود بارزانێ راگەھاندی بۆ پاشەرۆژا دەولەتا کوردستانی جھێ رازیبوونا مەیە وەک حزبا شیوعی کوردستانی، پێدڤیە ل پاشەرۆژا ل دۆر رەنگێ سیستەمێ حوکمڕانیا، ل گەل تورکمان و عەرەب دڤێت دانوستاندن بھێنە کرن ددەمێ برێڤەبرنا ریفراندۆمێ ب تایبەتی وان دەڤەرێن دەرڤەیی ئیدار ھەرێما کوردستانێ، داکو پتر بەر ب ریفراندۆمێ ڤە بھێن و ددەولەتا کوردستانێ ژ مافێن خوە پشتراست ببن.
ئەو بەرپرسێ حزبا شیوعی ھەروەسا دیارکر، سیستەمێ فێدرالیێ پارێزگەھان بۆ پاشەرۆژا حوکمڕانیا کوردستانێ سیستەمەکێ باشە، کو ل پارێزگەھان بشێن دەستھەلاتا ئابووری سیاسی فەرھەنگی ھەبیت، و بشێن بە ھەڤڕا ل گەل حوکمەتا ناڤەندی کو ل ھەولێرێ کاروبارێن پارێزگەھان بھێنە برێڤەبرن، داکو بشێین خزمەتگوزاریێن ژ ھەژی ب وەلاتیان پێشکێش بکەین.

ئه‌ڤرۆ نيوز:

بەرپرسێ راگەھاندنا نڤیسینگەھا بابە شێخ، مەرجەعێ بلندێ ئاینێ ئێزدیان دیار کر، تەرمێ وان رەڤاندیێن ئێزدی یێن ژلایێ تیرۆرستێن داعش ڤە ھاتینە رەڤاندن ل 3ى ته‌باخا 2014ێ د کارەساتا شنگالێ دا ژ ئەنجامێ تۆپبارانکرنا بارەگایێن تیرۆرستێن داعش ل مووسل ھاتینە کوشتن دێ بۆ چیایێ شنگال ھێنە ڤەگۆھاستن و ڤەشارتن.

ھادی بابە شێخ، بەرپرسێ راگەھاندنا نڤیسینگەھا بابە شێخ مەرجەعێ بلندێ ئاینێ ئێزدیان بۆ ئەڤرۆ دیار کر، ھەتا نوکە ئەم ل سەر دیتنا تەرمێ دو کچان یێن ھاتینە ئاگەھدارکرن، ئەو ژی نوکە تەرمێ کچەک ژ وان ل نوژداریا داد ل پارێزگەھا مووسل دانایە، ل دووڤ پێزانینان ژی ناسنامەیێن وان ئاشکرا نەبووینە، ئەڤە ژ ئەنجامێ تۆپبارانکرنا بارەگایێن تیرۆرستێن داعش ل مووسل ھاتیە کوشتن و تەرمێ کچا دی ژی ل نوژداریا داد ل پارێزگەھا دھۆک یە.
زێدەتر دبێژیت: ئەم یێن ھاتینە ئاگەھدارکرن ل سەر ھەبوونا تەرمێ کچەکا ئێزدی یا رەڤاندی ل نوژداریا داد دھۆکێ، ئەو کچا رەڤاندی ل دەڤەرا عیازیە ژ ئەنجامێ خوە پەقاندنا تیرۆرستەکێ داعش ھاتیە کوشتن د ناڤ ئاوارێن تەلەعفەری دا، ڤێ کچا ئێزدی ھەولدان کرینە خوە رزگاربکەت، لێ تیرۆستەکێ خوە پەقاندیە، د ئەنجام دا ئەڤ کچا رەڤاندی ھاتیە کوشتن.
بەرپرسێ راگەھاندنا نڤیسێنگەھا بابە شێخ مەرجەعی بلند ئاینێ ئێزدیان گۆت: نوکە ئەم کاردکەین جەنازێ وێ کچا ئێزدی یا نوژداریا داد ل مووسل بۆ پارێزگەھا دھۆک بھێتە ڤەگوھاستن، لێ ھێشتا نەھاتیە ڤەگوھاستن، رەنگە ڤان چەند رۆژان بگەھیتە دھۆکێ. مە ھەموو ئامادەکاری ژی کرینە د ڤان رۆژان دا د رێ و رەسمەکێ مەزن دا ب ئامادەبوونا ریە سپی و مەزنێن ئێزدیان و بەرپرسین دەڤەری و جەماوەری تەرمێ ھەردو کچێن رەڤاندی ل چیایی شنگال بەر مەزارگەھی شەفەردین بھێنە ڤەشارتن.
ھادی بابە شێخ ئاماژە دا وێ چەندێ ژی، ل مەزارگەھێ شەرفەدین گۆرستانەک یا ھاتیە دروستکرن، بەری نوکە ژی رۆڤاتێن چەند کەسان ژ گۆرێن بکۆم ئینانە دەر ل وی جھی ھاتنە ڤەشارتن، ئەڤ ھەردو کچێن رەڤاندی ژی یێن ھاتیە کوشتن دێ وی گۆرەستانی ھێنە ڤەشارتن دێ رێزگرتنەکا تایبەت ل وان ھێتە گرتن، چونکو تیرۆرستان ب غەدر برن و خیانەت وان کرن.
زێدەتر گۆت ژی: ھەتا نوکە ئەم دو رەڤاندیێن ئێزدی دەستێ تیرۆرستێن داعش دا یێن ھاتینە کوشتن و تەرمێ وان یێ گەھشتیە نوژداریا داد ل مووسل و دھۆکێ ئەم بەرھەڤین بۆ خوشک و دایک و زارۆیێن خوە یێن رەڤاندی ھەر چ بیت بکەن تیرۆرستێن داعش کچێن ئێزدی ناڤ بارەگایێن خوە دکرن، یان ژی ئینا بەراھیا شەری بۆ وێ یەکی تیرۆرست خوە پێ رزگاربکەن و فرۆکەیان ژی جە و بارەگایێن تیرۆرستێن داعش ژناڤبرن و تیرۆرست کوشتن ب مخابنی ڤە ل مووسل کچەکا رەڤاندی ھاتیە کوشتن ژ ئەنجامێ تۆپبارانکری، نھا جەنازێ وێ ھێشتا ل مووسلێ مایە نوژداریا داد ل ڤان چەند رۆژان دێ گەھیتە مە دێ ل جھێن باب و باپیرێن وێ ھێتە ڤەشارتن.

ئه‌ڤرۆ نيوز:

وەلاتیێن شەبەک گازندان ژ نەبوونا خزمەتکاریان دکەن و دبێژن دەرمان و بنگەھێن ساخلەمیێ نینن و ئاڤا ڤەخوارنێ ژی ل گۆندان نینە و جادە و پارک و باخچە نینن. سەرۆکێ دەستەیا راوێژکاریا شەبەکان بۆ ئەڤرۆ دیار کر، شەبەکێن ل سالا 1988 ل سەر گۆندێن خوە ھاتینە دەرکرن، ھێشتا چو ژێ نەھاتینە قەرەبووکرن و داخوازێ دکەن بھێنە قەرەبووکرن و ئاڤا ڤەخوارنی بھێتە دابینکرن بۆ گۆندین شەبەک و دەرچوویێن وان ژی بھێنە دامەزراندن و ھۆلێن ھەلکەفتا بھێنە چێکرن و گۆرەپانێن وەرزشی بۆ لاوان بھێنە چێکرن و پێشینەیا ئاڤاھیا و ژنھینانێ ژ شەبەکان بگریت.

وەلاتی مەحمود یاسین دیار کر، ھەتا نوکە ل گەلەک گۆندێن شەبەکان بنگەھێن ساخلەمیێ نینن و خەلک بۆ چارەسەریێن خوە قەستا نەخۆشخانێن دھۆک و ھەولێر دکەن، ئەڤە ژی دبیتە بارگرانی ل سەر وەلاتیان و ئاڤا ڤەخوارنێ ژی نینە ل گەلەک گۆندان و د ناڤ گۆندان ژی جادە گەلەک دخرابن، ئانکو ب شیوەیەکێ گشتی گۆندێن شەبەکان ھاتنیە بێ بەھرکرن ژ خزمەتکاریان و سال ل دووڤ سالێ ژی رێژا وەلاتیان بەر ب زێدەبوونێ دچیت و ل بەرامبەر خزمەتکاری نینن، ب تایبەتی ژی گەلەک گرنگە نەخۆشخانەک بھێتە چێکرن و ھەموو پێدڤیێن پزیشکی و دەرمان تێدا بھێنە دابینکرن.
سالم محەمەد جومعە سەرۆکێ دەستەیا راوێژکاریا شەبەکان دیار کر، دبیاڤێ ساخلەمیێ دا گۆندین شەبەکان د رێژا چنە دانە و ل سالا 2003 ھەتا 2013 رێژا 30% پرۆژە ل دەڤەرێن شەبەک نەھاتینە چێکرن و رێژا پرۆژەیان ناگەھیتە 50% بەرامبەر ھندەک دەڤەرێن دی یێن ب سەر مووسل ڤە، ل سالا 2014 ئەم ب ھیڤینە پتر پووتە ب دەڤەرێن شەبەکان بھێتە دان، چونکو جڤات د دەستێ کوردان دایە، نوکە سالا 2014 ھێشتا کارەب ل گۆندێن شەبەکان یا لاوازە و ئاڤا ڤەخوارنێ ژی ل گەلەک گۆندان نینە.
ناڤبری ئەو ژی خویا کر، ب تنێ دو یان سێ گۆندان بنگەھێن ساخلەمیێ ھەنە و 45 گۆندێن شەبەک د بێ بنگەھێن ساخلەمیێ نە و رێژەکا مەزن یا وەلاتیان تێدا د ئاکنجی نە، دەمێ کەسەک نەخۆش دبیت قەستا نەخۆشخانێن دھۆک و ھەولێر دکەت، ئەڤە ژی دبیتە بارگرانی ل سەر وەلاتیان کو ل مووسل نەخۆشخانا ھەنە، لێ خەلک نەشێن قەستا مووسل بکەن، چونکو چەندین جاران تیرورست گەڤا ل وەلاتیێن شەبەک دکەن، ھەروەسا دووراتیا رێ بۆ نەخۆشان مەزنترین ئاستەنگە ب تایبەتی ژی بۆ ژنێن دووگیان.
سەرۆکێ دەستەیا راوێژکاریا شەبەکان گۆت ژی: جادە د ناڤ گۆندان دا نینن، ب تنێ جادە ھاتینە چێکرن، ھەتا ل نێزیک گۆندان نە برینە د ناڤ گۆندان دا و ل وەرزێ زڤستانێ وەلاتی ژبەر تەقنێ نەشێن ھاتن و چوونێ بکەن و ل ھاڤینێ ژی ھەموو دبیتە تۆز، ھەر 45 گۆندێن شەبەک پێدڤی ب چێکرنا جادەیان ھەنە، ب راستی ژی خزمەتکاری گەلەک نە دباشن ل گۆندین شەبەک، حوکمەتا عیراقێ ل سالین بۆری دا چوو پووتە ب گۆندێن شەبەک نەدایە، ئەم ب ھیڤینە ئەڤ سالا 2014 پووتەکێ مەزن ب گۆندێن شەبەک بھێتە دان، چونکو سەرۆکێ جڤاتێ و ھژمارەکا ئەندامێن جڤاتا پاریزگەھا مووسل کوردن.
سالم محەمەد سەرۆکێ دەستەیا راوێژکاریا شەبەکان ئەو ژی خۆیا کر، خزمەتکاری ل دەڤەرێن شەبەک گەلەک دکێمن، ئەم ژی نەشێین داخوازا خزمەتکاریان ژ حوکمەتا ھەرێما کوردستانێ بکەین، چونکو دەڤەرێن شەبەک لێ د ئاکنجی ب سەر مووسل ڤەنە، پێدڤیە حوکمەتا عیراقێ و کارگێریا پارێزگەھا مووسل پووتەی ب گۆندێن شەبەک بدەن، ئەم چاڤەرێ بجھئینانا مادێ 140 دکەین بھێنە ب سەر ھەرێما کوردستانێ ڤە دێ پتر پووتە ب دەڤەرین شەبەک ھێتە دان، شەبەک ھێشتا نە ل سەر ھەرێما کوردستانێ ڤە نە، بێی جوداھی حوکمەتا ھەرێمێ گەلەک پرۆژێن خزمەتکاری ل دەڤەرێن شەبەک ئەنجامداینە، ھەر دەمێ مادێ 140 بجە بھێت، دێ بوودجەیا شەبەکان ژ دەستێ مووسل دەرکەڤیت و دێ ھەرێما کوردستانێ شێت باشتر گرنگیێ ب شەبەکان دەت، ھەر چەندە پێشمەرگەە و ھێزێن ئێمناھیێ یێن سەر ب حوکمەتا ھەرێما کوردستانێ ڤە کۆنترۆلا ئەمنی یا کری ل ھەموو دەڤەرێن شەبەکان پەیداکری، ئەم سوپاسیا حوکمەتا ھەرێمی دکەین بۆ پووتەدانا وێ ب گۆند و دەڤەرێن شەبەک لێ دژین، چونکو ھەتا شەبەک نەھێنە ب سەر ھەرێما کوردستانێ ڤە ئازاد نابن.