ئەڤرۆ نيوز:

ھەلبژارتنێن سەرۆک کۆماریێ ل ئیرانێ ڤێ ھەفتیێ برێڤە دچن و پرانیا پارتێن سیاسی یێن رۆژھەلاتێ کوردستانێ ئەو ھەلبژارتن بایکۆت کرینە و چاڤدێرێن سیاسی یێن رۆژھەلات دبێژن ھەتا نھا گەلەک ھەلبژارتن ل ئیرانێ ھاتنە کرن و چو کاریگەری ل چارەکرنا پرسا کوردی ل وی وەلاتی نەھاتیە کرن ژ بەر ھندێ ژی باشترە کورد پشکداریێ د وان ھەلبژارتنان دا نەکەن.

عەبدوللا حجاب چاڤدێرێ سیاسی یێ رۆژھەلاتێ کوردستانێ ل دۆر ھەلبژارتێن ئیرانێ ل بەرپەرێ خوە یێ فەیسبووکێ دیار دکەت کو ریفورمخواز یان ژی ئالیێن دی یێن کو ھەتا نھا ل ئیرانێ ھاتنە سەر دەستھەلاتێ چو بۆ کوردان نەکرینە، پرسا کوردی ھەر وەکو خوە مایە و ژ بەر ھندێ ژی ئەزموونێن بەری نھا بۆ مە دسەلمینن کو پرسا کوردی ب رێیا ھەلبژارتنێن سەرۆک کۆمارێ چارە نابیت و ھەلبژارتنێن نھا وەکو شانۆگەریەکێ نە بۆ خاپاندنا رایا گشتی و چو کاریگەریێ ل سیاسەتا ئیرانێ ل ھەمبەر کوردێن رۆژھەلات ژی ناکەت.

ل ئالیێ دی خالد عەلیپور چاڤدێرێ سیاسی یێ رۆژھەلاتێ کوردستانێ ژی دیار دکەت کو ئەڤ ھەلبژارتن ل دەمەکێ دھێنە کرن کو رۆژانە لاوێن کورد دھێنە سێدارەدان و کوردان ئێک رۆژنامە و کۆڤار ل ئیرانێ نینن و زۆلم و زۆرداریا رژێما ئیرانێ ل سەر کوردان زێدە دبیت، ژ بەر ھندێ ژی دڤێت کورد ب چو رەنگەکێ پشکداریێ د ھەلبژارتنێن سەرۆک کۆماریێ دا نەکەن چونکو ئەو ھەلبژارتن بۆ کوردان ناھێنە کرن، فارس دشێن پشکداریێ بکەن و سەرۆکەکێ نوو بۆ خوە ھەلبژێرن ئەو ئاریشا وانە، لێ نابیت کورد پشکداریێ د وان ھەلبژارتنان دا بکەن، دڤێت ھەموو تاکێ کورد ھەلبژارتنێن سەرۆک کۆماریێ ل ئیرانێ بایکۆت بکەن دا رایا گشتی یا جیھانێ بزانیت کو کورد خوە پشکەک ژ ئیرانێ نزانن، چونکو سیستەمێ سیاسی یێ نھا ل ئیرانێ نوونەراتیا گەلێ کورد ناکەت و گۆت: (رۆژانە کۆلبەر ل سەر سنۆران ب گوللەیێن سەربازێن ئیرانێ دھێنە کوشتن، ل رۆژھەلاتێ کوردستانێ بێکاری ھەیە خەلک برسی یە و بەرپرسێن ئیرانێ شەرمێ ناکەن و نھا ژی داخوازا پشکداریا کوردان د پرۆسێسا ھەلبژارتنان دا دکەن، دڤێت کورد ھەلبژارتنێن سەرۆک کۆماریا ئیرانێ بایکۆت بکەن چونکو ئەو ھەلبژارتن چو کاریگەریێ ل چارەنڤیسێ مە کوردان ناکەت).

ناڤبری د پشکەکا دی یا ئاخڤتنا خوە دا دبێژیت ئەحمەدی نەژادی ٨ سالان گەلەک لاوێن کورد ل سێدارەدان و رەوشا رۆژھەلاتێ کوردستانێ خراب بوو، پشتی کو رۆحانی ھاتە سەر دەستھەلاتێ وی سۆز دانە کوردان دێ رەوشا رۆژھەلاتێ کوردستانێ باش بکەت، لێ مخابن رەوش خرابتر لێ ھات و د سەردەمێ دەستھەلاتا رۆحانی دا ب سەدان لاوێن کورد ھاتنە سێدارەدان و ب ھزاران لاوێن کورد نھا ژی ل زیندانێ دانە و چارەنڤیسێ وان دیار نینە، ژ بەر ھندێ ژی دڤێت کورد پشکداریێ د ھەلبژارتنێن سەرۆک کۆماریێ ل ئیرانێ نەکەن چونکو ئەو ھەلبژارتن چو گرێدانا خوە ب کوردان ڤە نینە.

چاڤدێرێن سیاسی ل رۆژھەلاتێ کوردستانێ دبێژن ھەرچەندە ھەموو پارتێن سیاسی یێن رۆژھەلاتێ کوردستانێ ھەلبژارتن بایکۆت کرینە لێ چونکو ئەو پارتێن سیاسی ل دەرڤەی سنۆرێ رۆژھەلاتێ کوردستانێ نە نەشیاینە وەکو پێدڤی کاریگەریێ ل خەلکی بکەن و ژ بەر ھندێ ژی دڤێت ھەموو پارتێن رۆژھەلاتێ کوردستانێ پێکڤە بەرەیەکێ دروست بکەن و جارەکا دی ڤەگەرنە ڤە ناڤ خەلکی و دەست ب قۆناغەکا نوو یا خەباتێ بکەن دا بشێن کاریگەریێ ل دەستھەلاتا نھا بکەن، ھەتا کورد نەبنە ھێز دەستھەلاتا نھا یا ئیرانێ ژی چو تشتەکێ بۆ کوردان ناکەت و دێ زۆلم و زۆرداریا وان یا ل سەر خەلکی ژی بەردەوام بیت.

ھەژی ئاماژەپێدانێ یە کو ١٩ ڤێ مەھێ ھەلبژارتنێن سەرۆک کۆماریێ ل ئیرانێ برێڤە دچن و ل گۆر پێشبینیا گەلەک چاڤدێران دێ جارەکا دی رۆحانی وەکو سەرۆک کۆمارێ ئیرانێ ھێتە ھەلبژارتن، چونکو یێن ھەڤرکیێ ل گەل رۆحانی دکەن خوەدان جەماوەریەکێ مەزن نینن و ھەروەسا خەلکێ فارس پشتەڤانیێ ل سیاسەتا رۆحانی دکەن و دبێژن رۆحانی دشێت ئیرانێ ژ قەیرانا سیاسی و ئابووری قورتال کەت.