ئەڤرۆ نیوز ، نەوزاد ھلۆری:

وەکو دەستپێشخەریەک جوتیارەکێ گوندەکێ قەزا بەردەرەش ل سنوورێ پارێزگەھا دھۆک ئەڤ سالە رێژەیەکا گژنیژان چاندینە ، و ل گورەی ئاخفتنێن وی بەرھەمئینانا گژنیژان لسەر ئاخا کوردستانێ ب گشتی یا سەرکەفتی یە.

دڤی واریدا رێنجبەر زێباری ئەو جوتیارە دیارکر کو ئەوان وەکو دەستپێشخەری ئەڤ سالە رێژەیەکا گژنیژان ل گوندێ دولێجان یا سەر ب قەزا بەردەرەش ل سنوورێ پارێزگەھا دھۆکێ چاندنیە و بۆ ئەڤرۆ نیوز گۆت: (گژنیژ ل دەستپێکا وەرزێ بوھارێ دھێنە چاندن و ل وەرزێ ھاڤینێ ژی دھێنە دورین ، چاندنا گژنیژان ژی جورە جوداھیەک ل گەل دەرامەت و چاندنێن دن ھەیە و پشتی کو توڤێ گژنیژان دھێتە ھاڤێتن بو ناڤ زەڤیێن چاندنێ دوڤدا دێ ھێتە خرماشەکرن داکو ب تەمامی بن ئاخ ببیت و شوون ببیت)
زێدەتر گۆت: ( گژنیژ ھەتاکو شوون دبیت پشت بەستنێ ب ھاتنا بارانان دکەت واتە ب دەست ناھێتە ئاڤدان بەلکو ب بارانان تێر ئاڤ دبیت و چەند باران زورترن بەرھەمی َوان ژی باشترە ، و ھەردەما گژنیژ شوون بوو ، دیسان بەردەوام پێدڤی ب سەخبێریەکا تایبەتە مینا بژاردنا بەرھەمێ وێ ژ ھەر تشتێ کو دناڤ دا شوون دبیت وەکو گژ و گیا )
جوتیارێ ناڤبری د درێژاھیا ئاخفتنێن خودا دیارکر ژی کو گژنیژ ل ھەموو جھان دھێنە چاندن بەلێ پرانیا جاران خەلکێ گوندان دچینن و مەرەما وان ژی بو فروتنێ نینە و گۆت ژی: (گژنیژ بو سەر نانی و قەلاندن و ناڤا کێک و پسکێتا و بریانی و چەند شێوازەکێن دن دھێنە بکارئینان و خوارن و تامەکا خوش ھەیە ، پرانیا جاران ھەر کەسەک بو خوە بتنێ دکەت ، بەلێ ھەند جاران ژی بو فروتنێ دھێنەکرن ، و نھا کیلویا گژنیژان ب سێ ھزار دیناران دھێتە فروتن ، سەرەرای کو گژنیژێ گرنگیەکا زور ھەیە و زەڤی و ئاخا کوردستانێ گەلەک یا گرنگ و باشە ، بەلێ ھەتا نھا حکومەت و جھێن پەیوەندیدار و ھەتا خوە خەلکی ژی چوو گرنگی ب گژنیژ و چاندنا وان نەدایە مینا دابینکرنا توڤی و نەبوونا کوگەھان بو وەرگرتنا بەرھەمێن وان و نەبوونا چوو کاریگەھان بو بکارئینانا وان وەکو پسکێت و کێک و شیریناھیان)
رێنجبەری دیارکر ژی کو ئەگەر حکومەت ھەڤکاریا وی بکەت ئەو دێ ل سالێن بھێت زێدەتر گرنگیێ ب چاندنا گژنیژان دەتن و گۆت ژی: (وەکو دەستپێشخەری من ئەڤ سالە ھندەک گژنیژ چاندن و بەرھەمەکێ باش ھەبوو، و پشکەک ژ وان گژنیژان دێ فروشم و پشکەکێ ژی دێ ھەر بو مال ھێلم )