ئەڤرۆ نیۆز،تۆڤی:

بزاڤا گۆران رەزامەندی ل سەر پرۆژێ پارتی دیموکراتی کوردستان و ئێکەتیا نیشتمانیا کوردستانێ بۆ ڤەگەریان و ئاسایکرنا پەرلەمانێ کوردستانێ رازی دبیت،بزاڤا گۆران ژی بریار دایە،بزڤریتە پەرلەمانێ کوردستانێ.

ئەڤەژی پشتی وێ کۆمبوونێ دهێت کو ل رۆژا دوشەمبی 21/8/2017 دناڤبەرا گۆرانێ و پارتی هاتیە ئەنجامدان و تێدا پارتی پاکێجەکا 6 خالی پێشکێشی گۆرانێ کریە،هەروەسا دوهی مەکتەبا سیاسی یا ئێکەتیێ کۆمبوونا خوە ئەنجام دایە و جەخت ل کاراکرنا پەرلەمانی کریە.

ژێدەرەکێ دیارکریە کو گۆرانێ بریاردایە ب پرۆژێ پارتی و ئێکەتیێ رازی ببیت و جارەکادی ڤەگەرنە ناڤ پەرلەمانی و پەرلەمانێ کوردستانێ ئاسایی بکەنەڤە ”ئەڤەژی ب تایبەتی ل ژێر مەرج و گوشارێن ئێکەتیێ دابوویە“.

وی ژێدەری گۆتیە ژی،کو دناڤبەرا گورانێ دا دو بۆچوونێن جۆدا دروست بووینە، بۆچوونا ئێکێ دبێژن هەکە بتنێ ئێکەتی فشارێ ل سەر گۆرانێ دروست بکەت،نوونەرێن گۆرانێ بۆ پەرلەمانی ڤەناگەرن،بەلێ بۆچوونا دویێ دبێژن،پشتی وان لێدوان و هەلویستێن ژلایێ (ئەمریکا، ئێران، تورکیا و عێراقێ) بەرامبەری ریفراندۆمێ هاتینە راگەهاندن،هەروەسا بریارا دوهی یا ئەنجومەنێ بلند یێ ریفراندۆمێ کو جەخت ل هندێ کریە ،کو ریفراندۆم ناهێتە پاشخستن و دێ د دەمێ خوەدا هێتە کرن، ”هەلگرێن ڤێ بۆچوونێ ژ سەرکردە و هەلسۆراوێن گۆرانێ دبێژن،دوورکەفتنا بزاڤا گۆران دڤی دەمی دا ئینتیحاریەکا سیاسییە“.

ئەڤە د دەمەکێ دایە کو دوهی چارشەمبێ 23/8/2017، فرانک بێیکەر، بالیۆزێ بریتانیا ل عێراقێ، ل پێگەهێ تایبەتیێ خوە ل تۆرا جڤاکیا (توویتەر) ی دا بەلاڤکریە کو کۆمبوونا وی ل گەل عومەرێ سەید عەلی، رێکخەری گشتی یێ بزاڤا گۆران ئەنجام دای،دەربارەی ڤەگەریانا گۆرانێ بۆ پەرلەمانێ کوردستانێ و کۆمبوون ژی ب ”بەرهەمدار“ وەسف کریە.

ئەڤرۆ نیۆز،زنار تۆڤی:

هێمن هه‌ورامى،بەرپرسێ کاروبارێن سیاسی و پەیوەندی یێن گشتی یێن مەکتەبا سەرۆک بارزانی چه‌ند زانیارییه‌كا دەربارەی كۆمبوونا دناڤبەرا مه‌سعود بارزانی سه‌رۆكێ هه‌رێما كوردستانێ و مه‌ولود چاوشئۆغلوی وه‌زیرێ ده‌رڤە یێ توركیا بەلاڤ دکەت.

هه‌ورامی د‌ په‌یجێ تایبه‌تی یێ خوە دا ل‌ تۆرا جڤاکی یا فێسبووكی دا نڤێسیە کو بارزانی ب روونی ب وەزیرێ دەرڤە یێ تورکیا راگەهاندیە کو بریارا ریفراندۆمێ مافەکێ ئاسایی و یاسایی یێ گەلێ کوردستانێ یە و مە هیچ ئومێد و متمانە ب عیراقێ نەمایە.

هێمن هه‌ورامی ئاماژه‌ ب هندێ ژی کریە کو بارزانی ب وه‌زیرێ ده‌رڤە یێ توركیا راگه‌هاندیه‌ کوردستانێ سەلماندیە کو فاکتەرێ سەقامگیریا ڤێ دەڤەرێیە و ریفراندۆم بۆ رێگریکرنێیە ل خوین رژتنا ئایندەی.

بەرپرسێ کاروبارێن سیاسی و پەیوەندیێن گشتی یێن مەکتەبا سەرۆک بارزانی ئەو ژی گۆتیە،کو د كۆمبوونا وەزیرێ دەرڤە یێ تورکیا دا چەندین جاران دوپاتیکریە‌ کو نەهەقی هەمبەری گەلێ کوردستانێ هاتیەکرن و وی گۆتیە بارزانی گازندێن هەوە ژ بەغدا د جهێ خوە دانە و مە گۆتیە عێراقێ دڤێت گوتۆبێژ د بەردەوام بن.

هه‌ورامی نڤێسیە ژی سەرۆک بارزانی جەخت ل هندێ کریە،کو جارەکادی ل سەر فیدرالیەتێ و پۆستەکێ ویزاری گفتوگۆیێ ناکەین و دڤێت دو جیرانێن باش یێن ئێک بین.

ئێڤاریا چارشەمبی(23-8-2017) مەسعود بارزانی سەرۆكێ هەرێما كوردستانێ پێشوازی ل مەولود چاوشئۆغلوی وەزیرێ دەرڤە یێ توركیا و شاندەکێ ل گەل دا كریە و ل دووڤ دا كۆمبوون ئه‌نجامدایە.