ئەڤرۆ نیوز ، هلۆری:
سەرۆکێ هەرێما کوردستانێ د بەرسڤا کومکارا عەرەبی دا راگەهاند کو زۆر سەدەم یێن هەیی کو ئەوان پالدەت ریفراندۆمێ بو سەربخۆیا کوردستانێ ئەنجام بدەن و دیارۆر ژی و مانهڤا ل گەل عیراقێ یا ب مەترسیە.
مەسعود بارزانی سەرۆکێ هەرێما کوردستانێ د بەرسڤا ئەحمەد ئەبو غەیت کومکارێ عەرەبی دیارکر کو زۆر سەدەم یێن هەی کو ئەو دنهادا ریفراندۆمێ بو سەربخویا کوردستانێ ئەنجام بدەن و گۆت: ( گەلێ کورد د دوو قوناغان دا ل گەل عیراقێ ژیایە کو ئەو ژی قوناغا دەستپێکا دامەزراندنا دەولەتا عیراقێ هەتاکو ئازادیا عیراقێ بوویە و قوناغا دن ژی ژ ئازادیا عیراقێ هەتا نها بوویە ، و دهەردوو قوناغان دا گەلێ کورد توشی چەندین کاڤلکاری و نەخۆشی و کێمیاباران و ئەنفال و جینوسایدان بویە ، ئەڤە سەرەرای کو د دەستوورێ عیراقێ دا کوردان پشکداری کریە و پشکداری دگەلەک حکومەتێن عیراقێ ژی دا کریە ،
بەلێ هەموو ئەو ماددەیێن کو پەیوەندی ب هەرێمێ ڤە هەین هاتینە پنپێکرن ژ وانان ژی ماددا 140 و کێمکرنا رولێ کوردان د دامەزراندنێن سەربازی دا وەکو سوپاس ، ئاسایش و بەرەڤانی و پنپێکرنا هەموو وان رێکەفتنێن سیاسی دناڤبەرا هەرێم و عیراقێ)
زێدەتر گۆت: (زیدەباری هەموو وان پنپێکرنێن سەری د هەمان دەم دا دژاتیا هێزێن پێشمەرگەی ژی کرینە ، و چوو مەشق و راهێنان ب وان نەکرینە و بێ پشک کرینە ژ پێدڤیێن سەربازی و چەکی و ئەڤە د دەمەکێ دایە کو پێشمەرگە پشکەک بویە ژ سوپایێ عیراقێ ، دیسان 17% ژ پشکا بودجا عیراقێ ژی بری بێی کو بو دەستووری بزڤرن)
سه‌رۆكێ هه‌رێما كوردستانێ د درێژاهیا بەرسڤا خودا دبێژیت: (ئاریشێن دناڤبەرا بەغدا و هەولێر نابنە سەدەم بو برسیکرنا خەلکی ب گشتی و بێ بەهرکرنا زاروکان ژ شیر و هەموو پێدڤیێن خوارنێ ، برینا پشکا بودجا هەرێمێ ب پێنوسێ کەسەکێ بوویە کو چوو دەستهەلاتێن دەستووری و قانونی نینن ، و کارتێکرنێن وێ کێمتر نینن ژ بوردومانێن کیمیا و شەرێن ئابووری لسەر گەلێ مە ، بەلێ زیدەباری ئەڤان هەموو ئاریشان چوو جاران ژی مە سکالا تومارنەکرینە)
د شەرێ داعشێ دا چوو هاریکاریین سەربازی و ئابووری بو هەرێمێ ژلایێ عیراقێ ڤە نەهاتینەکرن ، ئەڤە د دەمەکێ دایە کو هەرێمێ ملیون و 800 ئاوارێن عیراقێ حەواندینە و پێشمەرگەیان ژی ب هەموو رەنگانڤە هەڤکاریا سوپایێ عیراقێ کریە ، بەلێ بەردەوام بوون لسەر پەیوەندیێن بڤی رەنگی ل گەل عیراقێ یا ب مەترسیە و دێ بەر ب ململانێیێن زیدەتر چیت ، ژبەرڤێ داکو رێگری ل ئەڤان کاران و ململانێ یێن نوو بهێتەکرن و گەلێ مە ب ئاشتی بژیت ئەم دێ کار لسەر گوهرینا ئەوان ململانێیان کەین، هیڤیا مە ئەوە کو هون ژی هەڤکاربن بو دانوستاندن ل گەل بەغدا داکو بگەهنە باشترین ئەنجامان کو د بەرژەوەنیا گەلێ مە و بهێزکرنا پەیوەندیێن ل گەل نەتەوەیێن عەرەبی دا بیت ، بارزانی هوسا گۆت.

ئه‌ڤرۆ نیوز:
كۆمسیۆنا نه‌ته‌وه‌یێن ئێكگرتی یا لێكۆلینێ ل دۆر سووریێ ژ جڤاكا نێڤده‌وله‌تی خواست ئه‌و تاوانێن داعشێ ل شنگالێ دژی كوردێن ئێزدی كرین، ب جینۆساید بناسینن.
هه‌روه‌سا كۆمسیۆنا نه‌ته‌وه‌یێن ئێكگرتی ژ ئالیێن شه‌ری دژی داعشێ دكه‌ن خواست پلانا رزگاركرنا ئێخسیرێن دده‌ستێ داعشێ دا هه‌بیت.

ئەڤرۆ نیوز ، نەوزاد هلوری
سیاسەتمەدارێ کورد مەحمود عوسمان دیارکر کو لسەر ئاستێ جڤاکێ نیڤدەولی کارەساتا شنگال ب جینوساید هاتیە نیاسین.
مەحمود عوسمان ب هەلکەفتا دەربازبوونا سێ سالان لسەر قوربانیێن کارەساتا شنگالێ و وان کەسانێن کو هەتا نها د دەستێ داعشێ دانە هەڤخەمیا خوە دەربری و بو ئەڤرۆ نیوز گۆت: ( کارەساتا شنگالێ کارەساتەک مەزن و بێ میناک بوویە و هەموو جیهان هژاند ، ژبەر مەزناهیا وێ نها ب رەنگەک بەرفرەه ئەڤ کارەساتە ب جینوساید هاتیە حسابکرن ژلایێ جڤاکێ نیڤدەولی)
زێدەتر گۆت: (پێدڤی یە لایەنێن شولەژێ بزاڤێن خورت بکەن بو رزگارکرنا ئەوان کەسانێن کو هەتا نها د دەستێ داعش دا مایی و ئەوێن کو وەکو بەندە هاتینە حسابکرن و سەرەدەری ل گەل دهێتەکرن ، و پێدڤی یە قەرەبو و هەڤکاری هەموو قوربانیێن کارەساتا شنگالێ بهێتەکرن ، دیسان هەموو بزاڤ بهێنە خورتکرن بو ژناڤبرنا ئێکجاری یا داعشێ ل عیراق و سووریا و هەموو جیهانێ پشتی سەرکەفتنا وان ل موسل و رەقە)
سیاسەتمەدارێ کورد لسەر پێگەهێ پەیچێ خوە دیارکر ژی کو پێدڤی یە ل گەل رێزگرتنا کارەساتا شنگال د هەمان دەم دا پێدڤی یە رێز ل قوربانیدان و خەبات و خوونا پێشمەرگێن قارەمان ژی بهێتەگرتن.