ئەڤرۆ نیۆز،زنار تۆڤی:
بەروڤاژی وان گۆتنێن دبێژن کو دێ مەترسی ل سەر ئابوورێ هەرێما کوردستانێ دروست بن،ل دەمێ ئەنجامدانا ریفراندۆما سەربەخۆیا کوردستانێ،پەرلەمانتارەکێ کوردستانێ راگەهاندیە کو دێ ریفراندۆما سەربەخۆیا کوردستانێ پەیوەندیێن ئابووری یێن دناڤبەرا تورکیا و کوردستانێ دا بهێزتر لێکەت.
دلشاد شەعبان جێگرێ سەرۆکێ لیژنا پیشەسازی وزێ و ژێدەرێن سرۆشتی ل پەرلەمانێ کوردستانێ دیارکریە، بەروڤاژی هەموو وان دەنگێن نەشاز یێن کو دبێژن تورکیا دێ سنۆرێن خوە ب روویێ هەرێما کوردستانێ گریت،هەروەسا تورکیا پەرەپێدانێ ب پەیوەندیێن خوە یێن ئابووری ددەت و دەرگەهێن زێدەتر دێ دناڤبەرا هەرێمێ و تورکیا دا ڤەکەت،نموونا زیندی ژی ڤەکرنا دەرگەهێ سەرزێریە ل سنوورێ قەزا ئامێدیێ.
دلشاد شەعبانی هەروەسا گۆتیە ،ئەنجامدانا ریفراندۆمێ هیچ کاریگەرییەکا نەرێنى نائێخیتە سەر پەیوەندیێن ئابووری یێن دناڤبەرا هەرێما کوردستانێ و تورکیا دا،بەروڤاژی بەلکو دێ پەیوەندیێن مە ب هێزتر لێهێن، چونکی هەرێما کوردستانێ ژێدەرەکێ گرنگە بۆ دابینکرنا وزەیێ بۆ تورکیا، نۆکە ژی د شیانێن هەرێمێ دایە کو زێدەتر ژ 50٪ یا پێدڤیێن ژێدەرێ وزەیا تورکیا پڕ بکەت،دیسا ئارمانجا تورکیا یە کو ببیتە ژێدەرێ کۆمکرنا وزێ.
هەروەسا گوتیە تورکیا ل سالا 1990 ل دەمێ کۆچا ملیۆنى یا گەلێ کورد، پشتا خوە نەدا خەلکێ هەرێما کوردستانێ، وەکی پەنابەران دەرگەهێ خوە ب روویێ خەلکێ هەرێمێ دا ڤەکر و کەمپ بۆ ڤەکرن و چەندین خزمەتگوزارى بۆ پێشکێشکرن،لەورا هەکە نوکە دەنگەکێ نەشاز هەبیت بانگەشا هندێ بکەت کو تورکیا دێ سنوورێ خوە ب روویێ هەرێما کوردستانێ دا گریت،ئەڤە دەنگۆیەکێ نە راستە.
دلشاد شەعبانی ئەو ژی گۆتیە،کو هەرێما کوردستانێ هیچ دەمەکێ نابیتە هێرەش بۆ سەر ئاسایشا وەلاتێن جیران،لێ بەروڤاژی دێ بیتە ژێدەرەکێ ئارامى و ئاڵوگۆرکرنا بازرگانیێ و ئابووریێ.
نيشاندان
