ئەڤرۆ نیۆز،زنار تۆڤی:

هێلی لۆڤ ئەو کچا هونەرمەندا کوردە،کو د ماوەیەکێ کێمدا،ب چەند ڤیدیۆ کلیپەکێن جوان و سەرنجراکێش، چاڤێ هەموو یان بۆ لایێ خوە راکێشایە،د دو کلیپێن وێدا حەژێکرنا کوردستانێ و هەستێن مرۆڤایەتیا وێ ب تەمامی تێدا دەردکەڤیت،ڤێجا چو ب پەیڤان یان ژی ب دیمەن و لۆکێشنان بیت.

هێلی لۆڤ ئێک ژ وان کچێن کوردە ل غەریبیا،کو ب ماندیبوونا خوە ل دەرڤەی وەلاتی شیا بگەهیتە ئاستەکێ بلند،هەروەسا ڤەگەریانا وێ بۆ کوردستانێ و وێنەگرتنا وان دو ڤیدیۆ کلیپا،گرێدان و حەزا خوە بۆ ڤی وەلاتی نیشان دایە، کو ب زارۆکینی و ژ نەچاری بجه هێلایە،هەر چەندە ب هژمار کار و بەرهەمێن وێ د کێمن،بەلێ ژلایێ کوالێتیێ ڤە،د ئاستەکێ بلند دانە.

هێلی لۆڤ کچەکا هونەرمەندا ناڤدارا کوردە،کو ناڤێ وێ(هێلان عه‌بدولا)یە،ل 16\11\1988 ل‌ باژێرێ (ئۆرمیێ) ل كوردستانا رۆژهه‌لات ژ ‌دایك بوویه‌،د سالێن نۆتان دا، هێلى لۆڤ و خێزانا خوە،ئۆرمیێ بجه دهێلن و دهێنە باژێرێ دهوکێ ل هەرێما کوردستانێ،پشتی چەند سالەکان ل دهوکێ،دچنە وەلاتێ تورکیا،پشتی هنگێ هێلى لۆڤ و خێزانا خوە،بەرەف ئورۆپا ڤە دچن و ل وەلاتێ‌ فینله‌ندا وەک پەنابەر دهێنە وەرگرتن، هەروەسا خێزانا وێ ئێکەمین خێزانا کورد بوو،کو ل فینله‌ندا خوەجهبووین.

هێلی لۆڤ هەر ژ زارۆکینا خوە حه‌زەکا زۆر ل سەر سترانگۆتنێ هه‌بوو،ئه‌ڤ حەزە بەردەوام ب گۆتنا سترانان دەردبری،هەروەسا ب رێیا ژەنینا پیانوویێ ژی، پشتی چه‌ند سالان حه‌زا سه‌ماكرنێ ژی ل دەف دروست بوو،پشتی دەلیڤە بۆ هاتیە رەخساندن بۆ پشکداریکرن د پێشبرکا سه‌ماكارێن ئورۆپا دا،هەروەسا هێلى لۆڤ دیزاینەرا سه‌مایێ یە‌ و ئه‌كته‌رە‌ و د مۆدێلسازیێ ژی دا كار دکەت.

هەر ژ زارۆکاتیا خوە حەزا سترانگۆتنێ ل دەف هێلی لۆڤێ هەبوو،هەر ل گەل مەزنبوونا وێ،ڤێ حەزێ ژی گەشەکر،د ژیێ گەنجاتیا خوە دا ده‌ست ب بەلاڤکرنا كارێن خوە یێن‌ هونه‌ری دکەت،ل دەستپێکێ چەند سترانەک ل تۆرێن کۆمەلایەتی دا ب تایبەتی ل (یۆتیۆب) و (ماى سپه‌یس) بەلاڤکرن،هەڤدەم ل‌ وارێ سینه‌مایێ ژی دا دەست بکار دبیت.

هەروەسا ل سالا 2006 هێلى لۆڤێ بریار دا،ل دووڤ خه‌ونێن خوە دا بکەڤیت و بچیتە لۆس ئەنجلۆس ل ئه‌مریكا،دیسا بەری ڤەگەریتە فینله‌ندا،نامەیەک ژ مالپەرێ (ماى سپه‌یس)بۆ هێلی لۆڤێ هات،ژلایێ براوەیا (گرام) بۆیە باشترین ریكۆردکەری،ل دووڤ دا ده‌رهێنه‌ر (لۆس ده‌ مایسترۆ) ل ‌گه‌ل كۆمپانیا به‌رهه‌مهێن گرێبەستەک واژۆ کر، ئه‌ڤێ ژی رێک ل بەردەم هێلى لۆڤێ دا ڤەکر،هەتاکو بشێت ل گەل (زه‌ دریم) خودانێ دیاریا (گرام) بۆ باشترین سترانبێژ و باشترین نڤێسەرێ سترانێدا كار بكەت.

ل زڤستانا سالا 2013 هێلى لۆڤێ گرێبەستەکا مۆزیکێ ل گەل گاواین (G2) براسى 2 و (G2) گرووپێ مۆزیکێ، واژۆ کر،دڤێ گرێبەستێ دا سترانا (ریسك ئیت ئۆل) ژێ  بەرهەم ئینا،کو‌ نێزیکی 3 ملیۆن كه‌سان بینەر هەبوون، ب هەمان رەنگ وێ گرێبەستێ ئێکەمین ئەلبووما وێ ژی دەرێخست،وێ ئه‌لبوومێ ژی نێزیکی هه‌موو كارێن وێ ژلایێ گاواین (G2) براسى 2 هاتنە جێبەجێکرن.

سترانا (ریسك ئیت ئۆل) ل سەر ریتمەکا تێکەل ب لاتینی و رۆژهەلاتی ڤە و ب ستایلەکێ پۆپ یێ جیهانى گۆتیە،ڤێ سترانێ سه‌رنجا نێزیکی هه‌موو خه‌لکێ فینله‌ندا راكێشایە،كو د حەفتیا ئێکێدا ل رێزبەندیا سترانێن (ئاى تونز) ئه‌پل، كو‌ ڕكابه‌ریا سترانا (دایمۆند) یا ریهانا یێ دکر.

ل سالا 2014 هێلى لۆڤ، بەختێ هندێ بۆ هاتە رەخساندن کو ببیتە ئێک ژ قارەمانێن فلمێ سینەمایی یێ (مەردان) كو ژلایێ ده‌رهێنه‌رێ ناڤدارێ کورد كورد و جیهانی (به‌همه‌ن قوبادى)،هەروەسا(به‌تین قوبادى) کو کارێ دەرهێنانێ بۆ کربوو، هێلى لۆڤ د وی فلمیدا،رۆلێ (له‌یلا) یێ دیتبوو،سالەکێ پشتی پشکداریا هێلی لۆڤێ د وی فلمیدا،بۆ فیستەڤالا نێڤدەولەتی یا تۆرۆنتۆ یا سینه‌مایى هاتیە بانگهێشتکرن و ئێکەمین ئه‌كته‌را كورد بوو،کو پشکداری د وێ فیستەڤالێ‌دا بكەت.

ل سالا 2015 پشتی ل بەرەیێن شەرێ پیشمەرگەی ل دژی تیرۆریستێن داعش سترانا (ریڤیۆلێشن) کلیپ کری، کو کارێ وێنەگرتنا ڤێ کلیپێ ب دووراتیا 3 کیلۆمەتران ل سەنگەرێن داعشێ ئەنجام دابوو، هێلی لۆڤێ ناڤودەنگیەکا مەزن پەیدا کر و نێزیکی 7 ملیۆن كه‌سان ئەو ڤیدیۆ کلیپە دیتیە.

ل سالا‌ 2014 هێلى لۆڤ كۆمه‌لا (لۆڤ هاوس) دامه‌زراند کو یا تایبەتە بۆ هاریکاریا مرۆڤ و گیانەوەران ل‌ هه‌رێما كوردستانێ و ده‌وروبه‌ران،هەروەسا ل هاڤینا هەمان سال هێلی لۆڤێ سەرەدانا سەنگەرێن پێشیێ یێن پێشمەرگەیان ل نێزیک باژێرێ مۆسلێ کریە و د وێ سەرەدانێدا هێلی لۆڤێ خوارن بۆ پێشمەرگەیان بریە.