شروڤەکارەکێ وەرزشی: سلێمان رەمەزان پێدڤی ئەوان یاریزانایە یێن ل دویڤ ڤەلسەڤا وی
رۆژنامەڤانەکێ وەرزشی: راھێنەرێ زێرەڤانی دێ شێت جارەکا دی ناسناڤان بۆ پارێزگەھێ ڤەگەرینت
ئاشتی موستەفا: پێدڤی یە راھێنەر خوە ژ کومکرنا ستێران دوربێخیت

سلێمان رەمەزان: مە ل بەرە تیمەکێ دروست بکەین و پاش ھزر ل ئارمانجا خوە بکەین

ئەڤرو ؛ قەیس وەیس :
پشتی ل گەل یانا زێرەڤانی شیای سێ ناسناڤێن خولا ھەرێما کوردستانێ ب دەستخوڤە توماربکەت ھەردیسان کاسا ھەرێمێ و سوپەرا کوردستانێ ل گەل ناسناڤێ قارەمانیا ھەرێمان ل مارسیلیا و پشتی ئەڤان دەستکەفتیان ل وەرزێ ٢٠١٥-٢٠١٦ راھێنەرێ یانا زێرەڤانی سلێمان رەمەزان ژلایێ دەستەیا کارگێریا یانا زێرەڤانی ھاتە دورخستن و ھەڤبەستا ئەوی ھاتە ھەلوەشامدن و کارگێریا زێرەڤانی بۆ وەرزێ بوری پشت بەستن ل سەر راھێنەرێ سەمیر بابوی کر ب ئارمانجا ئەوێ چەندێ بشێن جارەکا دی ناسناڤان ل یانێ زێدەبکەن سەرەرای ئەوێ پشتەڤانیا مەزن ل تیما زێرەڤانی ھاتیەکرن ل وەرزێ بوری یانا زێرەڤانی دەستڤالە و ب ئەنجامێن لاواز خول ب دووماھی ئینا و پشتی کارگێریا یانا زێرەڤانی یا بەری نوکە ھاتیە گوھورین دەستەیا نوو یا ڤێ یانێ جارەکا دی پشت بەستن ل سەر راھێنەرێ خوە یێ بەری نوکە سلێمان رەمەزان کر ئەوێ شەش ناسناڤ د سێ سالان دا بۆ تیما ئێکێ ب دەستخوڤە ئیناین.
شروڤەکارێ وەرزشی قاسم سالح دەستپێکێ بۆ رۆژناما ئەڤرۆ گوت: سلێمان رەمەزان راھێنەرەکێ خودان شیانە و شارازایەکا باش دخولا کوردستانێ دا ھەیە و ھەردیسان پێزانین ل سەر ھەمی یاریزانێن خولێ ھەیە باوەرم دێ شێت جارەکا دی ناسناڤان ڤەگەرینت بۆ ڤێ یانێ لێ پێدڤی ب زەحمەتەکا مەزنە .
ناڤبری دیارکر ژی پێدڤی یە ل سەر راھێنەرێ نوو ئەوان خالێن لاواز یێن یانا زێرەڤانی پار سال بوو ئەڤ سالە چارەسەربکەت ھەردیسان گوھورینێ د پێکھاتیێ تیمێ دا بکەت ژبەرکو ڤی راھێنەری شێوازەکێ تایبەت ھەیە و ئەو پێدڤی ئەوان یاریزانایە یێن ڤەلسەڤا ئەوی ب جە بینن و خالەکا دی یا گرنگ راھێنەرێ زێرەڤانی دێ مفایەکێ باش ژی وەرگریت ئەوژی بەری نوکە یانا ب چاڤێ قارەمان بەرێ خوە دا زێرەڤانی ھەڤرکی ل گەل کر لێ ئەو ناڤ دو سالا ئەنجام نە ئیناینە و دێ یاریەکا نورمال ھەمی یانە بەرامبەر کەن و گڤاشتن ل سەر نابن بوو وەرزێ بھێت .
رۆژنامەڤانێ وەرزشی مەحمەد سادق ژلایێ خوڤە گوت: من باوەرە ب ھەبوونا سلێمان رەمەزان دێ جارەکا دی ناسناڤ ڤەگەرنە پارێزگەھا دھۆکێ، لێ پێدڤی یە گوھورین ل تیمێ دا بھێنەکرن ژبەرکو ئەو یاریزانێن نوکە ل گەل تیمێ ھەر ئەو یاریزان بوون ئەوێن ب زوری خوە قورتالکری ژ داکەفتنا خولێ.
راھێنەرێ یانا دھۆک ئاشتی موستەفا ژی ھەمان بووچون ھەبوون کو تیم پێدڤی گوھورینا یە ژلایێ یاریزان ڤە و باوەری ب شیانێن راھێنەرێ زێرەڤانی ھەیە دێ یێ سەرکەفتی بیت لێ یا دروست ئەوە گەلەک یاریزانێن ستێر ل تیمێ کوم نەکەت و پشت بەستنێ ل سەر کومەکا یاریزانێن گەنج بکەت د گەل چەند یاریزانێن خودان شارەزا دێ باشتر بیت و سلێمان و کارگێریا یانێ ئەڤ سالە ھزر ل دروستکرنا تیمەکێ بکەن و وەرزێ دویڤدا ھزر ل ناسناڤی بکەن دێ گەلەک باشتر بیت .
ل دووماھیێ راھێنەرێ یانا زێرەڤانی سلێمان رەمەزان گوت: بەری ھەر کارەکی بکەین پێدڤی یە ئارمانج و پلان بوو بھێتە دانان ل دویڤ شیانێن یانێ مە ژی ل بەرە کار بکەین ، ھەردیسان ھەر تشتەکێ ل ناڤا تیما زێرەڤانی یا بەری دو سالان ھاتیە گوھورین کو تیم ژ تیمەکا قارەمان نوکە بوویە تیمەکا نورمال و ئەم پێدڤی گەلەک کاری نە و ئارمانجا من یا سەرەکی ئەوە بشێن تیمەکێ دروست بکەین ژ ئێک خێزان ئێک گیان پێکھاتی بیت .
راھێنەرێ زێرەڤانی سەبارەت ھەڤرکیێ ل سەر ناسناڤێ خولێ گوت: ھیڤی و راستی گەلەک ژێک جودانە و ئەو یانە دو سالان مەترسیا داکەفتنێ ل سەر ھەبیت و نوکە ھزر ل ناسناڤێ خولێ بکەین دێ یا ب زەحمەت بیت ئارمانجا مە دەستپێکێ دروستکرنا تیمەکێ یە و پاش ھزر ل ئارمانجا خوە بکەین بۆ خولێ .

ئەڤرۆ، محەمەد عەلی:
تیما پایسلڤانێن یانا دھۆک بەرھەڤیێن خوە خورتر لێکرینە ژبۆ پشکداریێ بۆ قۆناغا دوێ یا قارەمانیا عیراقێ بۆ یانێن دەڤەرا ھەرێمێ لسەر ئاستێ پێشکەڤتیان ئەوا دھێتە چاڤەرێکرن ھەڤرکیێن وێ ل دوماھیا ھەیڤا بھێت ئێک ژ پارێزگەھێن کوردستانێ بھێنە ئەنجام دا.
ئەمجەد ئەحمەد راھێنەرێ تیما یانا دھۆک بۆ رۆژناما ئەڤرۆ گۆت: ئەڤە زێدەتری ھەیڤەکە یاریزانێن تیما یانا دھۆک بەرھەڤیان دکەن وبەرنامەکێ رێک و پێک یێ راھێنانان دانایە بۆ قۆناغا دوێ یا قارەمانیا عیراقێ لسەر یانێن ھەرێمێ کو دێ ب پشکداریا چار یاریزانان بیت ئەوژی سلێمان سامی، ھونەر عەبدولرەزاق، ئاری ئەدھم و چوڤان تۆم کو دھێتە پێشبینیکرن ھەڤرکیێن قۆناغا دوێ ل پارێزگەھا دھۆکێ یان ھەولێرێ بھێنە کرن. ھەروەسان ناڤھاتی دیارکر کو نوکە بەرھەڤیێن وان خورتر لێھاتینە ژبۆ پشکداریەکا سەرفەراز و دەربازبوون بۆ یاریێن دوماھیا قارەمانیێ و گۆت: د قۆناغا ئێکێ دا شیابووین لسەر ئاستێ ھەشت یانێن پشکدار لرێزا سێیێ بھێن بتنێ کێمتریا سێ چرکا ژ خودانا رێزا دوێ، بۆ قۆناغا دوێ رژدی و ھیڤیێن ھەڤرکیێ بۆ رێزێن پێشیێ بھێزتر لێھاتینە و دێ ھەموو شیانێن خوە ئێخینە کار ژبۆ بلندکرنا ناڤێ یانا دھۆکێ و پارێزگەھێ.
ژلایەکێ دیڤە ئەمجەدی ئەوچەندە ژی دازانین کو ھەرچار یاریزان خەلکێ باژێرێ ھەولێرێ نە و بێی بەرامبەر یاریزانێن یانا دھۆکێ نە و گۆت ژی: ھەموو یاریزان خودان شیانێن و دێ بزاڤێ کەن وەکو یاریزانێن ھەلبژارتیێ عیراقێ بن و دیسا بزاڤێ بکەن یانا دھۆکێ بەرەب رێزێن پێشیێ بەن.
دھێتە زانین ھەردو یانێن دھۆک خودانا رێزێا سێیێ و ئامێدیێ ئەوا ل رێزا ھەشتێ ھاتی د قۆناغا ئێکێ دا نوونەرێن پارێزگەھێ نە د قارەمانیا عیراقێ دا

ئەڤرۆ، قەیس وەیس :
کچا باژێرێ دھۆکێ و یانا سەنحاریب ئاتا داود دوھی بەر ب باژێرێ سلێمانیێ ڤە چوو بۆ پشکداری کرنێ د کەمپا راھێنانی یا ھەلبژارتیێ عیراقێ یێ باسکت بولێ بۆ خوبەرھەڤکرن بۆ قارەمانیا عەرەبی ئەوا بریارە ل دەستپێکا مەھا بھێت ل وەلاتێ مسرێ بھێتەکرن.
دیدارەکا کورت دا یاریزانا باژێرێ دھۆکێ ئاتا داود بۆ رۆژناما ئەڤرۆ گوت: گەلەک یا کەیفخوشحالم ھاتیمە داخوازکرن بۆ پێکھاتیێ ھەلبژارتیێ عیراقێ کو ماندیبوونا من بێ بھا نە چوو پشکداری کرن د قارەمانیا عەرەبی دا دێ مفایەکێ باش گەھینتە من ژبەرکو دھێتە ھژمارتن ژ قارەمانیێن بەرنیاس ل سەر ئاستێ عەرەبی.
ئاتا ئاماژە ب وێ چەندێ ژی کر کەمپا ئەوان یا باژێرێ سلێمانیێ دێ یا بەردەوام بیت ھەتا چاری مەھا بھێت و پاش دێ بەر ب وەلاتێ مسرێ ڤە چن بۆ پشکداری کرنێ د قارەمانیا عەرەبی دا .
یاریزانا سەنحاریب کو بۆ جارا گەلەکێ یە ھاتیە داخوازکرن بۆ پێکھاتیێ عیراقێ زێدەتر گوت: بتنێ ئەز وەکو یاریزانا کچ ژ باژێرێ دھۆکێ ژی ھاتیمە ھەلبژارتن دێ ھەمی بزاڤا کەم ئاستەکێ بلند دڤێ قارەمانیێ دا ل گەل ھەلبژارتیێ عیراقێ پێشکێش بکەم ژبوو وێ چەندێ ناڤێ پارێزگەھا خوە بلند بکەم و ھەردیسان ئەڤ قارەمانی یە دێ بیتە پالدەرەکێ مەزن بۆ من بۆ پتر شارەزایێ وەربگرم و بۆ پێشخێستنا ئاستێ ڤێ یاریێ ل سەر ئاستێ کچان کو نوکە ل گەل ستاڤێ قوتابخانەیا سەنحاریب ژی کاردکەم باوەرم پشکداریا من دڤێ قارەمانیێ دا دێ شێم شارەزایەکا باش وەربگرم و بیتە مفا بۆ ئاستێ پێشخستنا وەرزشا پارێزگەھێ.

ئەڤرۆ، محەمەد عەلی:
ئێکەتیا تەپاپێ یا عیراقێ داھاتیێ ڤەگۆھاستنا یاریێن خولا پلا نایابا ئەوێن برێیا تلفزیونی بۆ ھندەک یانێن پشکدار د وەرزێ ٢٠١٤ -٢٠١٥ پارڤەکرن کو ئەڤ داھاتیە قستێ مایی بوو د دەمێ خولێ دا.
ئێک ژ رۆژنامێن عیراقێ دیارکریە کو ئێکەتیا تەپاپێی ١٣ ھزار دولار بۆ ژمارا حیسابی ل بەنگا رافیدەین یا یانا زەورا ھنارت بشێوەیێ دو قست، ھەروەسا لدویڤ ھەمان رۆژنامە کو یانا زاخۆ ١١ ھزار دۆلار ژ ئێکەتیا تەپاپێ وەرگرتینە، ژلایەکێ دیڤە دیارکریە کو ھندەک یانە حەتا نوکە داھاتیێ ڤەگۆھاستنێ بۆ نە ھاتیە پارڤەکرن ژ بەر ئەگەرێن جودا و دیسا یانە یێن ھەین حسابا بەنکێ نەبوویە و ھندەک یانێن دی داخازکرینە ھەموو داھاتیێن مایی وەربگرن و ئەگەر بشێوێ قست ژی بیت و دڤێت کۆژمە بھێتە زێدەکرن چنکو نە لدویڤ رێژا سەدێ یا داھاتیێ ڤەگۆھاستنێ.
رۆژنامێن بەغدایی ھوسا دازانین کو ئەڤ پێنگاڤە ھاتە ھاڤێتن پشتی یانێن مفادار ژ داھاتیێ ڤەگۆھاستنێ نەرازیبوونا خوە دیارکربوو لسەر نە وەرگرتنا داھاتیێ وەرزێن بۆری و گەڤێن نەکرنا یاریێن خولێ لسەر ئێکەتیێ دابوون یان ھەر یاریەکا بھێتە ڤەگۆھاستن دڤێت برێیا کارگێریێن یانێن نەرازبووی بن.