ئەڤرۆ نيوز:

ژێدەرەکی ژ سەرۆکاتیا ھەرێما کوردستانێ دداخۆیانیەکێ دا بۆ رۆژناما ئەڤرۆ، راپۆرتەکا سایتێ (الخلیج اونلاین) یێ قەتەری ل دۆر پێشکێشکرنا ھەرێما کوردستانێ ھژمارەکا مەرجێن سیاسی و ئابووری بۆ بەغدا ب مەرەما مانا ھەرێما کوردستانێ دچارچۆڤێ عیراقێ دا ب نەراست ھژمارت و دیارکر کو چو راستی بۆ وان مەرجان نینن و تنێ پرۆپاگندەکە جوقا ب سەر نوری مالکی ڤە دکەت.

سایتێ (الخلیج اونلاین) یێ قەتەری ل رۆژا 21 ڤێ مەھێ بابەتەک بەلاڤکریە ل دۆر ئاشکراکرنا مەرجێن کوردان بۆ مانا ھەرێما کوردستانێ دچارچۆڤێ عیراقێ دا، وتێدا ئاماژێ ددەت کو ژێدەرەکێ نێزیک ژ ئێکەتی نیشتمانی کوردستان پێ راگەھاندیە کو حزب و لایەنێن کوردی 9 مەرجێن سیاسی و ئابووری داناینە ل بەردەم حوکمەتا عیراقێ کو بجھبینیت ھەتاکو ھەرێما کوردستانێ دچارچۆڤێ عیراقێ دا بمینیت، ژوان مەرجان مەسعود بارزانی بۆ دەمێ ھەشت سالان پۆستێ سەرۆکاتیا کۆمارا عیراقێ وەرگریت ودەستھەلاتێن سەرۆکێ کۆمارێ بھێنە بەرفرەھکرن و بەھرا ھەرێما کوردستانێ ژ بودجا گشتی یا عیراقی بھێتە زێدەکرن ل دووڤ وێ سەرژمێریا ل بەرە نەتەوێن ئێکگرتی ئەنجام بدەت و بودجا تایبەت ب پێشمەرگەی ڤە بھێتە زێدەکرن ژوان ژی گرێبەستێن پرچەککرنێ کو پێشمەرگە ببیتە پشکەکێ سەرەکی ژ ھێزێن چەکدار یێن عیراقی و باژێرێ ھەولێرێ نیڤا بۆدجا باژێرێ بەغدا وەرگریت وھشیار زێباری بۆ پۆستێ وەزیرێ دارایی ڤەگەریت و لێبۆرینەکا فەرمی بھێتە پێشکێشکرن ژبەر وان تۆمەتێن ئاراستەی وی ھاتینە کرن و وەزارەتەکا ئێمناھیێ ب کوردان بھێتە دان، ل دۆر مەرجێن ئابووری ھاتیە کو گرێبەستێن کۆمپانیێن گەھاندنێ ( ئاسیا سیل و کورەک) بۆ دەمێ 10 سالان بھێنە درێَژکرن ژلایێ وەزارەتا گەھاندنا عیراقێ ڤە، زێدەباری زێدەکرنا وەبەرھێنانێن کوردی ل بەغدا و پارێزگەھێن دی.

کیفاح شنگالی شیرەتکارێ راگەھاندنێ یێ سەرۆکاتیا ھەرێما کوردستانێ بۆ (ئەڤرۆ) دیارکر کو چو راستی بۆ ھەبوونا وان مەرجان نینە و تنێ ئەڤە پرۆپاگندەکە ژلایێ جوقێ ب سەر نوری مالکی وحزبا وی ڤە دھێتە کرن و بەری نوکە ژی ھەر ھەمان بابەت ب ناڤێ سەرۆک وەزیران حەیدەر عەبادی بەلاڤکربوو، کو وی دەمی ئۆفیسا عەبادی و پەیڤدارێ وی بلەز ئەو چەندە رەتکری و ب درەو دەرخستی، د ئەنجامدا ئێک ژ جوقێن مالکی ب ناڤێ (سەعد موتەلبی) ئەندامێ جڤاتا پارێزگەھا بەغدا داخۆیانیەکا ب ھەمان شێوە و رامان دا ئەوا حزبا دەعوە و مالکی ب ناڤێ سەرۆک وەزیران دەرکری.

دیارکر ژی، مالکی ویێن دی ئەوێن بوویە ئەگەرێ ژناڤبرنا عیراقێ و دزینا دراڤێ وێ وشکاندنا پرۆژێ ئاڤاکرنا دەولەتەکا مەدەنی یا ھەڤچەرخ پشتی 2003 ێ، نوکە دژی پرۆژێ کوردستانی یێن راوەستیاین وھەموو رێیان بکاردئینن بۆ رێگریێ و شکاندنا بزاڤێن ھەرێما کوردستانێ، بەلێ ھەرێم ل گەل ھەڤڕکیا خویناوی نینە، بەلکو ل گەل دانوستاندنێ یە ل گەل عیراقێ بۆ گەھشتنێ بۆ پەیوەندیێن باش کو ئێمناھی و ئاشتیێ ل دەڤەرێ و عیراقێ و کوردستانێ دابین بکەت.

شنگالی ئاماژە دا کو شاندێن ھەرێما کوردستانێ دێ ئەنجامێن ریفڕاندۆمێ گەھینن ھەموو پایتەختێن جیھانێ دا نیشابدەن کا گەلێ کوردستانێ چ دڤێت، ئەو گەلێ ھژمارا وی ژ شەش ملیۆن کەسان دبۆریت و ئەزموونەکا 25 سالی د سەربخوەیێ دا ھەی وشیای پەیوەندیێن باش ل گەل وەلاتێن جیران پەیدا بکەت و چیڤانۆکا داعشێ ژناڤببەت و پتر ژ دو ملیۆن ئاواران د رەوشەکا ئابووری یا سەخت دا بپارێزیت.