ئەڤرۆ نیۆز،هشیار دۆبانکی:
ئەڤرۆ ئێڤارێ ئاگر بەربوو ئۆتێلا جەمال ل باژێرێ زاخۆ ل نێزیک گۆرەپانا سالح يوسفى و جەمال سەليم خودانێ ئۆتێلا جەمال بۆ ئەڤرۆ نیۆز دياركر،کو ئاگر بەربوویە رێڤەبەریا ئۆتێلێ و پاشی بەربوویە ئۆتێلێ لێ هەر زوو ترۆمبێلێن ئاگر ڤەمراندنێ گەهشتینە جهێ روودانێ ئاگر کونترۆلکریە و زیان گەلەک نەبووینە،گۆتیە ژی،لێ هەتاکو نوکە ئەم ئەگەرێ ئاگر بەربوونێ نزانین.
ئەڤرۆ نیوز:
وەزارەتا خوێندنا بلند و ڤەکۆلینێن زانستی دیارکر کو ئەوان ب کوژمێ شەش ملیون ٤٦٥ ھزار ٥٤٩ دولارێن دن بو قوتابێن تواناسازی مەزاختینە ، ئەڤە د دەمەکێ دایە کو بەری نھا ژی چوار ملیون دولار مەزاخت بوون ، ئەڤرۆ نیوز ژی ناڤ ونیشانێن خوێندکار و جھێ وەرگرتنا پارەی بەلاڤ دکەت.
دڤی واریدا عەباس ئەکرەم ئاخفتنکەرێ وەزارەتا خوێندنا بلند و ڤەکۆلینێن زانستی دیارکر کو لژنەیەک بو چەوانیا مەزاختنا ٣٠ ملیون دیناران ب سەر خوێندکارێن تواناسازی ھاتیە پێکئینان و گۆت: ( وەزارەتا خوێندنا بلند و ڤەکۆلینێن زانستی دەست ب دابەشکرنا قوناغا حەفت یا پارێن کو ھاتینە مەزاختن بو قوتابێن تواناسازی کر کو ئەو ژی شەش ملیون ٤٦٥ ھزار ٥٤٩ دولار بوون و تایبەتە ب کریا خواندن ، دەرمالەیێن ژیانێ ، دەرمالەیێن ھەڤژینیێ ، بێمەیا ساخلەمی و ھاتن و چوونێ کو ئەو ژی دێ ١٧٩ خوێندکار مفاداربن )
زێدەتر گۆت: (قوتابێن تواناسازی ل ھەر ئێک ژ زانکویێن وەلاتێن ئەمریکا ، بەریتانیا ، ئوسترالیا ، سوێد ، ھولەندا ، روسیا ، ئیسپانیا ، مالیزیا ، تورکیا ، فەرەنسا ، دانیمارک ، مسر و ئیرانێ دخوونن ، ئەو قوتابێن کو ناڤێن وان د لیستا ھژمار ١٧ یا سالا ٢٠١٧ ھاتین دکارن سەرەدانا ژورا ھژمار ئێک ٥٦ یا دیوانا وەزارەتا خوێندنا بلند و ڤەکۆلینێن زانستی بکەن بو وەرگرتنا چەکێ مەزاختنا پارەی)
ل گورەی زانیاریێن کو ژلایێ وەزارەتا خوێندنا بلند و ڤەکۆلینێن زانستی ھاتینە بەلاڤکرن پێدڤی یە قوتابى ل گورەی رێزبەندا ناڤێن خوە سەرەدانا جھێ ناڤبری بکەن بڤی رەنگی.
- رێکەفتی ٢٥-٧-٢٠١٧ زنجیرا ھژمارە (١) ھەتا (٥٠) سەردانا وەزارەتێ بکەن بۆ وەرگرتنا چەکی .
- رێکەفتی ٢٦-٧-٢٠١٧ زنجیرا ھژمارە (٥١) ھەتا (١٠٠) سەردانا وەزارەتێ بکەن بۆ وەرگرتنا چەکی .
- رێکەفتی ٣٠-٧-٢٠١٧ زنجیرا ھژمارە (١٠١) ھەتا (١٥٠) سەردانا وەزارەتێ بکەن بۆ وەرگرتنا چەکی .
- رێکەفتی ٣١-٧-٢٠١٧ زنجیرا ھژمارە (١٥٠) ھەتا (١٧٩) سەردانا وەزارەتێ بکەن بۆ وەرگرتنا چەکی .
وەرگرتنا پارەی ل بەنکا کوردستان دێ بڤی رەنگی بیت
- ڕێکەفتی ٢٥-٧-٢٠١٧ل زنجیرا ھژمارە (١) ھەتا (٣٦) دشێن سەردانا بانکا کوردستان بکەن بۆ وەرگرتنا پارەری.
- ڕێکەفتی ٢٦-٧-٢٠١٧ل زنجیرا ھژمارە (٣٧) ھەتا (٧٢) دشێن سەردانا بانکا کوردستان بکەن بۆ وەرگرتنا پارەری.
- ڕێکەفتی ٢٧-٧-٢٠١٧ل زنجیرا ھژمارە (٧٣) ھەتا (١٠٩) دشێن سەردانا بانکا کوردستان بکەن بۆ وەرگرتنا پارەری.
- ڕێکەفتی ٣٠-٧-٢٠١٧ل زنجیرا ھژمارە (١١٠) ھەتا (١٤٦) دشێن سەردانا بانکا کوردستان بکەن بۆ وەرگرتنا پارەری.
– ڕێکەفتی ٣٠-٧-٢٠١٧ل زنجیرا ھژمارە (١٤٧) ھەتا (١٧٩) دشێن سەردانا بانکا کوردستان بکەن بۆ وەرگرتنا پارەری.
پێدڤیێن کو قوتابى یان بریکارێ وی ل گەل خوە ببەت ئەڤەنە
ئەگەر قوتابى خوە سەرەدانا وەزارەتێ بکەت پێدڤی یە وێنەیەکێ رەنگاو رەنگ ژ پاسەپورتا خوە ل گەل خوە ببەت.
ئەگەر بریکارێ وی پێش ویڤە بچیت ، پێدڤی یە وێنیەکێ رەنگاو رنگێ بریکارناما خوە ” وەکالەتا گشتی ” ببەت کو یا باوەرپێکری بیت و ل سالا ٢٠١٧ ھاتبیتە موسەدەقکرن ، دیسان وێنەیەکێ رەنگاورەنگ یی َناسنامێ یان رەگەزناما خوە ژی ببەت.
ئەگەر ئێک ژ وان سەرەدانا وەزارەتێ کر پێدڤی یە ل گورەی زنجیرەیا ناڤێ خوە بھێت.
چەکێ مەزاختنێ ژی تنێ دێ ل بەنکا کوردستان تایێ پێشەوا ل ئوتێل چوار چرا ل ھەولێر ب شێوەیێ کاش ھێتە مەزاختن
ئه‌ڤرۆ نيوز:
ئه‌و كه‌سێ، كوشنى ترۆمبێلا وان پيس بووى و خه‌ما وێ چه‌ندێ دخۆن كو دپيسن و دڤێت پاقژ بكه‌ن، رێيه‌كا گه‌له‌ك باش و ب مفا هه‌يه و دێ ژ وێ ئاريشێ رزگار كه‌ت.
هه‌كه كوشنێ ترۆمبێلا ته پيست “جلد” بيت رێيه‌كا ب ساناهى يا هه‌يى بۆ پاقژكرنێ چو پيس ببن يان ژى ره‌نگێ وان وه‌كو به‌رێ نه‌مابيت و بۆ ڤێ رێ ژى پێدڤى ب زه‌يتا زه‌يتونا و خه‌لا سێڤێ و ئاڤێ هه‌يه.
ده‌سپێكێ دێ پيچه‌كا زه‌يتا زه‌يتونا كه‌يه سه‌ر پارچه‌كا ئيسفه‌نجێ پاقژ، پاشان ب ئيسفه‌نجى كوشنا پاقژ كه‌يى، پاشان پشتى پێنج ده‌قيقان دێ دو كه‌چكێن نانخوارنێ يێن خه‌لا سێڤا ل گه‌ل په‌رداغه‌كا ئاڤێ تێكه‌ل كه‌يى و پاشان پارچه‌كا پاتێ نه‌رم كه‌يه د ناڤ دا، پاشان دێ ب وێ پارچا پاته‌ى كوشنێن ترۆمبێلێ پاقژ كه‌ى.
ب ئه‌نجامدانا ڤێ رێ و ژ به‌ر خه‌لێ، روون ل سه‌ر كۆشنا نامينيت، ديسا چو پيساتى ژى پێڤه نامينيت و ره‌نگێ وان ژى دێ جوانتر لێ هێت.
ئەڤرۆ نیوز ، ھلۆری:
پشتی کو ١٥ مەلەڤانگەهـ ژبەر نەبوونا مەرجێن تایبەت ب کاری ڤە ھاتینە گرتن ، دھێتە پێشنیارکرن کو مەلەڤانگەھێن تێکەل بو ( ژن و مێران ) پێکڤە بھێنە ڤکرن.
دڤی واریدا نادر روستایی ئاخفتنکەرێ دەستەیا گەشت و گوزار بو شەفەق نیوز گۆت: (مە وەکو دەستەیا گەشتوگوزار بریار دا کو ھەڤکاریا کەرتێ تایبەت بکەین ب ڤەکرنا مەلەڤانگەھێن تێکەل ب مەرەما راکێشانا زێدەتر و پالدانا گەشتیاران بو ھەرێما کوردستانێ).
حکومەتا ھەرێما کوردستانێ بزاڤێ دکەت کو زێدەتر گرنگیێ ب کەرتێ گەشتوگوزارێ بدەت ب تایبەتی پشتی کو شەرێ دژی داعش و قەیرانا دارایی ل دەڤەرێ پەیدا بوین.
ھەرێما کوردستانێ ب ھەبوونا چەندین جھێن گەشتوگوزار یا ناڤدارە، ئەڤ یەک ژی بوویە سەدەم کو پتر گرنگی دڤی بیاڤی دا بھێتەکرن بۆ پێشوازیکرنا گەشتیار و مێڤانان ب تایبەتی ژی یێن ناڤەراست و باشوورێ عیراقێ.
ئه‌ڤرۆ نيوز:
نورى مالكى ب سه‌ره‌دانه‌كێ ئه‌ڤرۆ رۆژا ئێكشه‌مبى گه‌هشته وه‌لاتێ رۆسيا و بڕياره د گه‌شته‌كا چار رۆژى دا ل گه‌ل سه‌رۆكێ وه‌لات و په‌رله‌مان و وه‌زيرێ ژ ده‌رڤه كۆم ببيت.
ب گۆره‌ى ئاژانسا نۆڤۆستى، نورى مالكى سه‌رۆك وه‌زيرێ به‌رێ يێ عيراقێ ب سه‌ره‌دانه‌كێ ئه‌ڤرۆ گه‌هشته رۆسيا و دێ ل گه‌ل فلاديمێر پۆتن يێ سه‌رۆك و سه‌رۆكا په‌رله‌مانى ڤالنتينا ماتفينكۆ و سيرگى لاڤرۆڤ وه‌زيرێ ژ ده‌رڤه كۆم بيت.
ب گۆره‌ى ئاژانسێ د ڤێ سه‌ره‌دانا چار رۆژى دا دێ بزاڤێ كه‌ت كار ل سه‌ر ب هێزكرنا رۆلێ رۆسيا ل رۆژهه‌لاتا ناڤه‌راست كه‌ت و كار ژ بوو ب هێزكرنا په‌يوه‌نديێن له‌شكرى و ئابوورى و سياسى د ناڤبه‌را رۆسيا و عيراقێ دا.
ئه‌ڤرۆ نیۆز،زنار تۆڤى:
ماموستایێ زانستێن سیاسى ل زانكۆیا سه‌لاحه‌دین عه‌بدولحه‌كیم خسرۆ د دیداره‌كێدا بۆ ئه‌ڤرۆ نیۆز دیاركر:به‌رى سه‌رۆكێ هه‌رێما كوردستانێ سه‌ره‌دانا ئێكه‌تیا ئورۆپى بكه‌ت،تێگه‌هشتنه‌ك ل ده‌ف وه‌لاتێن ئێكه‌تیا ئورۆپا دروست ببوو ده‌رباره‌ى هه‌رێما كوردستانێ،لێ وان ترسه‌ك هه‌بوو،كو ئه‌ڤ قه‌یران و ئاریشێن ل رۆژهه‌لاتا ناڤین هه‌ین،دێ كوورتر بن،چونكى گه‌له‌ك ژ خه‌لكێ سووریێ و عێراقێ ژ ئه‌گه‌رێ شه‌رى ئاواره بووینه و قه‌ستا ژ ده‌رڤه كریه،دیسا وان هزر دكر كو هه‌كه ریفراندۆم ل كوردستانێ بهێته ئه‌نجامدان و كوردان سه‌ربه‌خۆیى راگه‌هاند،دبیت قه‌یرانه‌كا دژى ل رۆژهه‌لاتا ناڤین دروست ببیت و شه‌ره‌كێ هه‌رێمى ل ڤێ ده‌ڤه‌رێ روو بده‌ت و ئه‌ڤه تێگه‌هشتنا ئێكه‌تیا ئورۆپا بوو،له‌ورا پێدڤى بۆ ئه‌ڤ تێگه‌هشتنه بهێته چاره‌سه‌ركرن،ژبه‌ر هندێ په‌یاما سه‌رۆك بارزانى ل ئێكه‌تیا ئورۆپا به‌رۆڤاژى تێگه‌هشتنا وان بوو،هه‌روه‌سا بۆ وان دیاركر هه‌كه كوردستان نه‌بیته ده‌وله‌ت،هنگێ دێ شه‌ره‌كێ خوینا وى دروست بیت،هه‌روه‌سا سه‌رۆك بارزانى ئه‌ڤ په‌یامه وه‌كى خوه و زۆر ب كورتى گه‌هانده وان،چونكى ئه‌م دزانین ل عێراقێ ده‌وله‌ت یا شیعانه،هه‌روه‌سا نوكه كۆمه‌لگه‌هێ نێڤده‌وله‌تى ژى هه‌موو هاریكاریا دده‌ته عێراقێ و پرچه‌ك دكه‌ت ژى،له‌ورا ده‌مێ پشتگیریا عێراقێ دهێته‌كرن،بتنێ شیعه بهێز دكه‌ڤن،له‌ورا كوردستان نه‌شێت دچارچۆڤێ عێراقێ دا چ رێككه‌فتن و گرێبه‌ستان ل گه‌ل وه‌لاتێن جیهانى ئیمزا بكه‌ت،هه‌روه‌سا نوكه مه چه‌ندین كێشه ل گه‌ل عێراقێ هه‌نه و رۆژانه سه‌ركردێن عێراقێ هێرشا ل مه دكه‌ن،دیسا نوكه ده‌ڤه‌رێن سوننه‌یان ژناڤچووینه و وان چ ده‌ستهه‌لات ل عێراقێ نه‌مایه و نوكه بتنێ كوردستان مایه.
ناڤهاتى دیاركر ژى:بارزانى بۆ ئێكه‌تیا ئورۆپا دیاركریه كو هه‌كه هه‌وه بڤێت چ ئاریشه دروست نه‌بن،پێدڤیه هوون پشتگیریا ده‌وله‌تا سه‌ربه‌خۆیا كوردستانێ بكه‌ن،یان ژى هه‌ڤكاریا مه بكه‌ن بۆ دانوستاندنه‌كا ئاڤاكه‌ر ل گه‌ل به‌غدا و دڤێت هوون رۆلێ خوه ژى ببینن،هه‌روه‌سا ئه‌مریكا ژى دشێت ل ده‌مێ دانوستاندنا دا هاریكاریا مه بكه‌ت،هه‌ر چه‌نده ئه‌مریكا و ئورۆپا گۆتیه،نوكه ده‌مێ سه‌ربه‌خۆیا كوردستانێ نینه،ئه‌رێ پا كه‌نگى ده‌مه؟،لێ وان به‌رسڤا ڤێ پرسیارێ نینه،له‌ورا ئه‌م دێ بۆ خوه ده‌مى دانین،چونكى هه‌بوونا ده‌وله‌تا كوردستانێ دێ بیته هوكاره‌ك كو كێشه‌یا كوردان ل پارچێن دى ژى ب رێكێن ئاشتیانه بهێته چاره‌سه‌ركرن،ژبه‌ركو نوكه ره‌وشا كوردا ل باكۆر و رۆژهه‌لات یا باش نینه و ل رۆژئاڤا ژى چاره‌نڤیسێ وان نه‌یێ دیاره،له‌ورا نابیت باشۆرێ كوردستانێ ژى دوێ ره‌وشێ دابیت و دڤێت په‌ناگه‌هه‌كێ ئارام وه‌كو ده‌وله‌ت بۆ كوردان هه‌بیت،سه‌رۆك بارزانى ئه‌ڤ په‌یامه گه‌هاندیه جڤاكێ نێڤده‌وله‌تى،هه‌روه‌سا گۆتیه وان ئه‌م ملله‌ته‌كین ئه‌م دشێن خوه بخودان بكه‌ین،هه‌كه هێرش ل سه‌ر مه نه‌بن،دیسا ئێكه‌تیا ئورۆپى ژى دڤێت چاڤدێریه‌كا هوور ل پرۆسا ریفراندۆما كوردستانێ بكه‌ت،چونكى هه‌كه ئه‌م نه‌بینه ده‌وله‌ت دێ ئایینده‌یێ كوردستانێ و پێكهاتێن وێ به‌ره‌ف چاره‌نڤیسه‌كێ نه‌دیار ڤه‌چیت،ئه‌و ژى گۆت: هه‌تاكو نوكه چ دپلۆماتكاران راستوخۆ نه‌گۆتیه ئه‌م پشتگیریا سه‌ربه‌خۆیا كوردستانێ دكه‌ین،چونكى هه‌ر ده‌وله‌ته‌كا په‌یوه‌ندیه‌كا دبلۆماسى ل گه‌ل ده‌وله‌ته‌كا دیتر هه‌بیت،دڤێت رێزێ ل ئێكپارچه‌یا ئاخا وێ ده‌وله‌تێ بگریت،ئه‌م چاڤه‌رێى هندێ ژى نابین كو پشتگیریه‌كا راسته‌خۆ بۆ مه بهێته‌كرن،لێ د دۆرهێلى دا تشته‌كێ دیتر هه‌یه.
ناڤهاتى خویاكر ژى:تێگه‌هشتنا سه‌ركردێن عێراقێ بۆ بابه‌تێ سه‌ربه‌خۆیێ د جۆدانه،هنده‌ك دبێژن كورد نه‌شێن سه‌ربه‌خۆیێ وه‌ربگرن،ژبه‌ر دو ئه‌گه‌را و ئه‌گه‌رێ ئێكێ په‌یوه‌ندى ب ده‌وله‌تێن هه‌رێمى ڤه هه‌یه،كو ده‌وله‌تێن هه‌رێمى ناهێلن كورد ببنه ده‌وله‌ت،ئه‌گه‌رێ دویێ ژى ئه‌وه دبێژیت،كوردستان ژلایێ پێگه‌هێ جۆگرافى و لایه‌نێ ئابوورى و فاكته‌رێ سیاسى،یێ هاریكار نینه وه‌كو ده‌وله‌ت ل سه‌ر ئاستێ نێڤده‌وله‌تى مامه‌له ل گه‌ل بهێته‌كرن،له‌ورا ئه‌و ژى پشت راستن كو كوردستان نابیته ده‌وله‌ت،لێ هنده‌ك سه‌ركردێن عێراقى ب جددى به‌رێ خوه دده‌نه ڤى بابه‌تى،ئه‌ڤه لایه‌نه‌كێ عه‌قلانیه ل به‌غدا ژلایێ سیاسى ڤه،هه‌روه‌سا ئه‌ڤ لایه‌نه دبێژن،هه‌كه ئه‌م رێككه‌فتنێ ل سه‌ر ئاڤێ و نه‌فتێ و سنۆرێن كوردستانێ و ده‌ڤه‌رێن ده‌رڤه‌ى ئیدارا هه‌رێمێ بكه‌ین،دڤێت رێككه‌فتنه‌كا ئاشتیانه هه‌بیت،بێى كو ل داهاتى ئه‌گه‌ره‌كێ بهێلین بۆ ململانا سیاسى و شه‌ر و پێكدانان،چونكى نه جڤاكێ عێراقێ و نه ژى جڤاكێ كوردستانێ یێ به‌رهه‌ڤه هنده‌ك زیانێن دى بده‌ت،له‌ورا دڤێت په‌یوه‌ندیه‌كا عه‌قلانه دناڤبه‌را كوردستانێ و به‌غدا دا هه‌بیت،پێدڤیه به‌غدا رازى بیت ل سه‌ر سه‌ربه‌خۆیا كوردستانێ و دڤێت پشتگیریا مه ژى بكه‌ت،لێ دڤێت به‌رژه‌وه‌ندێن عێراقێ ژى بهێنه پاراستن،هه‌روه‌سا ئه‌ڤ ده‌نگێ عه‌قلانى رۆژ ب رۆژ یێ زێده دبیت،دیسا لایه‌نێ ته‌كنۆكرات ژ هه‌موو لایه‌نان پتر گرنگیێ ب ڤى بابه‌تى دده‌ن،دیسا ئه‌و شاندێ به‌غدا یێ سه‌ره‌دانا هه‌رێمێ ژى كرى ته‌كنۆكرات بووینه،هه‌روه‌سا دیاركر:ژبه‌ركو مه رێككه‌فتنێن ته‌كنیكى هه‌نه ل سه‌ر بابه‌تێ نه‌فتێ و غازێ و ئاسایشێ ل گه‌ل عێراقێ،هه‌روه‌سا هه‌كه مه دانوستاندن ل گه‌ل به‌غدا كرن بۆ بابه‌تێ سه‌ربه‌خۆیێ،ل وى ده‌مى دێ كه‌سانێن ته‌كنیكى پتر شێن چاره‌سه‌ریا بابه‌تان كه‌ن،نه‌كو كه‌سانێن سیاسى،هه‌روه‌سا به‌رى نوكه ژى ئێك ژ بابه‌تێن سه‌رنه‌كه‌فتنا رێككه‌فتنان ل گه‌ل عێراقێ ئه‌و بوو،كو سیاسى رێكدكه‌فتن ل سه‌ر بابه‌تان،لێ ژلایێ ته‌كنیكى ڤه ل گه‌ل ئێك رێكنه‌دكه‌فتن،له‌ورا پێدڤى بوو،به‌رى هنگێ لایه‌نێن ته‌كنیكى دیراسه‌تا بابه‌تان كربا و چاره‌سه‌رى بۆ كربا،ژنوو لایه‌نێن سیاسى بریارا خوه ل سه‌ر دابا،له‌ورا چێبوونا ڤان په‌یوه‌ندیێن ته‌كنیكى دناڤبه‌را به‌غدا و هه‌رێما كوردستانێ دا گه‌له‌ك یا گرنگه،ئه‌ڤه دێ بیته ئه‌گه‌ر كو مه دانوستاندنه‌كا سه‌ركه‌فتى ل گه‌ل به‌غدا هه‌بیت.
ماموستایێ زانستێن سیاسى زێده‌تر گۆت:دیمستۆراى راپۆرته‌ك ل سه‌ر عێراقێ چێكریه،كو هه‌موو وار ب خوه‌ڤه گرتینه و راپۆرته‌كا تێروته‌سه‌ل بوویه،هه‌ر چه‌نده مه چه‌ندین تێبینى ل سه‌ر هه‌نه و ئه‌م دشێن وان تێبینیان بۆ وان بده‌ینه دیاركرن و راستڤه‌كه‌ین،هه‌ر چه‌نده عێراق ده‌وله‌ته و ژى ئه‌م دێ بینه ده‌وله‌ت،لێ كیشێن سنۆرى دێ میننه هه‌لاویستى،دێ بیته پشكه‌ك ژ دانوستاندنا،لێ هه‌كه مه بڤێت ئه‌م نوكه چاره‌سه‌ركه‌ین،دڤێت ژلایێ ته‌كنیكى ڤه دیراسه‌ته‌كا هوور ل سه‌ر بهێته‌كرن،داكو ئه‌ڤ كێشه زوو بهێنه چاره‌سه‌كرن،هه‌روه‌سا ئه‌ڤ راپۆرته دبنه بناغه‌یه‌كێ قانوونى د داهاتى دا،هه‌كه هات و سنۆر دناڤبه‌را مه و به‌غدا دا هاته دانان.
هێشتا دبێژیت:پێدڤیه نوكه هنده‌ك لیژنه بهێنه دانان،هه‌ر چه‌نده لیژنا بلندا ریفراندۆمێ هاتیه دانان،لێ پێدڤیه مه دامه‌زراوه‌ك بۆ سه‌ربه‌خۆیێ هه‌بیت و ئه‌ڤ دامه‌زراوه د چارچۆڤێ حوكمه‌تا هه‌رێمێ دابیت،حوكمه‌ت وه‌كو لیژنه كار بكه‌ت،پشكه‌كێ ژ وێ دامه‌زراوێ په‌یوه‌ندى ب سنۆرى ڤه هه‌بیت و ئێكێ په‌یوه‌ندى ب رێككه‌فتنێن نێڤده‌وله‌تى ڤه هه‌بیت،چونكى نوكه ب ده‌هان رێككه‌فتنێن نێڤده‌وله‌تى دناڤبه‌را عێراقێ و توركیا دا هه‌نه و ئه‌م دێ بینه وارسێن وان رێككه‌فتنان،له‌ورا پێدڤیه لژنه‌یه‌ك هه‌بیت بۆ دیراسه‌تكرنا ڤان رێككه‌فتنان،هه‌روه‌سا چه‌ندین رێككه‌فتن دناڤبه‌را ئیرانێ و عێراقێ ژى هاتینه ئه‌نجامدان و ئه‌و رێككه‌فتنێن بۆ مه باش ئه‌م دشێین هه‌لبگرین و ئه‌وێن مه تێبینى ل سه‌ر هه‌ین،ئه‌م دشێین راستڤه‌كه‌ین،هه‌ر چه‌نده كارێن باش هاتینه‌كرن ژلایێ حوكمه‌تا هه‌رێمێ ڤه،هه‌روه‌سا مه وه‌زاره‌ت هه‌نه و ئه‌و وه‌زاره‌تێن مه‌عنى دشێن ڤان كاران بكه‌ن،له‌ورا مه پێدڤى ب لژنێن نوو نینه،چونكى ئه‌م خودان دامه‌زراوه و ده‌ستهه‌لاتین،مه هه‌موو بنه‌مایێن ده‌وله‌تێ هه‌نه،لێ دڤێت ژلایێ ته‌كنیكى ڤه ئه‌م خوه باشتر به‌رهه‌ڤ بكه‌ین،عه‌بدولحه‌كیم خسرۆ زێده‌تر دبێژیت:چ پارتێن سیاسى ل كوردستانێ دژى سه‌ربه‌خۆیا كوردستانێ نینن،بتنێ خیلافه‌ك هه‌یه ل سه‌ر شێوه‌یێ ئه‌نجامدانا ریفراندۆمێ،لێ ئه‌و خیلافه ژى دێ هێته چاره‌سه‌ركرن،چونكى ئه‌نجامدانا رێفراندۆمێ مه‌زنتره ژ ده‌ستكه‌فتێن حزبایه‌تى،هه‌ر چه‌نده ریفراندۆم دێ زۆرینه‌یا ده‌نگان ب ده‌ست خۆڤه ئینیت،لێ باشتره هه‌موو پارت و لایه‌ن پشكداریێ تێدا بكه‌ن،چونكى ل داهاتى دێ مه دانوستاندنه‌كا چروپر ل گه‌ل به‌غدا هه‌بیت.
هه‌روه‌سا دیاركر ژى:هه‌موو پێكهاتێن كوردستانێ دناڤ لیژنا بالا یا ریفراندۆمێ دا هه‌نه،له‌ورا پێدڤیه لیژنا ریفراندۆمێ ل گه‌ل هه‌موو پێكهاتێن هه‌رێما كوردستانێ كۆمبیت سه‌باره‌ت ئه‌نجامدانا ریفراندۆمێ،هه‌روه‌سا چوونا سه‌رۆك بارزانى بۆ كه‌ركوكێ ژى دێ گه‌له‌كا گرنگ بیت،ژ پێخه‌مه‌ت په‌یاما ریفراندۆمێ بگه‌هینیته هه‌موو پیكهاتێن كه‌ركوكێ ب كورد و عه‌ره‌ب و توركومان و مه‌سیحیان ڤه،هه‌روه‌سا دێ بۆ وان دیاردكه‌ت كو ئه‌و ده‌وله‌تا دروست دبیت،دێ ناڤێ وێ ده‌وله‌تا كوردستانێ بیت،نه‌كو ده‌وله‌تا كوردى،دێ ل سه‌ر بناغێ ده‌وله‌تا هه‌ڤپشكیێ هێته دانان و كه‌ركوكێ ژى دێ تایبه‌تمه‌ندیا خوه هه‌بیت،له‌ورا پێدڤیه ئه‌و بهێنه پشتراستكرن ل سه‌ر چارنڤیسێ خوه،یا دویێ ژى دڤێت ئه‌و گرنتیه‌كا زێده‌تر بۆ پاراستنا خوه وه‌ربگرن،هه‌روه‌سا وان چ داخوازى هه‌بن ژى دێ سه‌ركردایه‌تیا كوردستانێ بۆ وان بجه ئینیت.
ده‌رباره‌ى كوردێن فه‌یلى ژى گۆت:هه‌كه كوردستان ببیته ده‌وله‌ت،ئه‌و كوردێن فه‌یلى یێن ل به‌غدا دژین،چ هێرش و مه‌ترسى ناكه‌ڤنه سه‌ر ژیانا وان،چونكى هه‌مبه‌رى هندێ گه‌له‌ك عه‌ره‌ب ژى نوكه ل كوردستانێ و ده‌ڤه‌رێن كوردان دژین،هه‌روه‌سا گه‌له‌ك ژ وان عه‌ره‌بان دێ میننه ل كوردستانێ و نه‌ڤێت ڤه‌گه‌رن،هه‌ر چه‌نده پشكه‌كا وان ئاواره‌نه و دێ ڤه‌گه‌رن،لێ عه‌ره‌بێن ئه‌سلى هه‌نه و دێ میننه ل سه رجه و وارێن خوه،له‌ورا چ كریارێن نه‌رێنى هه‌مبه‌رى فه‌یلیان ل به‌غدا ناهێنه ئه‌نجامدان،لێ هه‌كه كاره‌كێ هوسا بهێته ئه‌نجامدان ژى بتنێ دێ بۆ فتنه‌یه‌كێ بیت،دێ بۆ هندێ بیت كو كوردان ژى هه‌مان هه‌لویست هه‌بیت،ژ پێخه‌مه‌ت هندێ كو پرۆسا ریفراندۆمێ و سه‌ربه‌خۆیا كوردستانێ برێڤه نه‌چیت،لێ دڤێت مه هشیارى ل سه‌ر ڤێ پیلانێ هه‌بیت،هه‌ر چه‌نده ئه‌ڤ چه‌نده چو جاران رووناده‌ت،عێراق ژى چو جاران نه‌شێت كوردێن فه‌یلى ژ به‌غدا ده‌ربێخیت.
ئه‌ڤرۆ نيوز:
ستێرا ناڤدارا لوبنانى ئيليسايێ كليپه‌كا نوو بۆ ئێك ژ تراكێن خوه يێن ئه‌لبۆما نوو چێكر و د ماوه‌كێ كێم دا جه‌ماوه‌ره‌كێ گه‌له‌ك زێده ته‌ماشه كر.
ئيليسايێ د رێيا تۆڕا جڤاكيا يۆتيۆبى دا كليپا سترانا “عكس اللي شايفينها” به‌لاڤكر كو ئێك بوو ژ تراكێن ئه‌لبۆما “سهرنا يا ليل” كو ڤێ سترانبێژێ ل سالا بۆرى به‌لاڤكربوو.
ئه‌ڤ كليپه ژ لايێ جه‌ماوه‌رێ وێ ڤه گه‌له‌ك هاته پێشوازيكرن و د ماوێ سێ رۆژان دا نێزيكى دو مليۆن و نيڤان ته‌ماشه كريه.
ئەڤرۆ نیوز ، ھلوری:
ناڤەندە سەربخوی یا کوردستانێ راگەھاندنەک بەلاڤکر و تێدا پشتەڤانیا خوە بو ریفراندۆمێ دەربری و دیارکر کو ئەو دێ ب حەفت ئارمانجان پالپشتیا سەرئێخستنا ریفراندۆمێ کەن کو ژ کومەکا چالاکڤان و رەوشەنبیر و کەساتیێن جودا پێکدھێت.
د راگەھاندنا ئەوان دا هاتیە : (سەربخوی داخوازیەکا رەوایا گەلێ کوردە و پێدڤی یە بو گەھشتنا وێ ھەموو پێکڤە ھاریکاربين داکو ئێدی گەلێ کورد ژی ژ پاشکویاتی و دوخێن ئالوزێن سیاسی و دەولەتێن عەرەبی و کەڤنە پەرستان دویر بکەڤن)
زێدەتر ھاتیە: (ئەم وەکو ناڤەندا سەربخوی بو پالپشتیکرن و ب رێیا فشارێن جەماوەری سەر دێ کار بو سەرئێخستنا ریفراندۆمێ کەین )
ناڤەندا ناڤبری ب ئەڤان رێک و ئارمانجان دێ پشتەڤانیا ریفراندۆمێ کەت
١- رێڤەچوونا ریفراندۆمێ ب شێوەیەکێ ئازاد و رسمی ، و بجھکرنا ئەنجامێن وێ ب ئاشکرای کو ئەو ژی سەربخوی یا کوردستانێ یە.
٢- رێک نەھێتەدان ب حزبێن خودان پێگەە کو ئەنجامێن ریفراندۆمێ بو مەرەمێن سیاسی بکاربینن و نەکەنە بابەتەکێ سەوداگەری ل گەل عیراق و وەلاتێن جیھانێ.
٣- رێگرتن ل وێ یەکێ کو داخوازیا سەربخویێ خەلکی ببیتە قوربانیا حزباتیێ ، و کارکرن بو وێ یەکێ کو ھەموو لایەنەک لدوف ریفراندۆم و سەربخویێ بچیت.
٤- بزاڤێ بکەن کو نەتەوەیێن ئێکگرتی سەرپەرشتیا ریفراندۆمێ بکەن ژ ناڤخوەیێ ھەرێمێ و دەڤەرێن ڤەقەتیایی و دەرڤەیێ ھەرێمێ ب شێوەیەکێ فەرمی.
٥- راکێشانا پشتەڤانیا پەرلەمان و حزب و حکومەت و ئەندامێن پەرلەمانی و رێکخراوێن نیڤدەولی.
٦- رێکخستنا کارێن جەماوەری بەرامبەر ھەرەشەیێن وەلاتێن دەوروبەر و بەرسینکگرتنا ھەب بزاڤەکێ کو دژی سەربخویێ بیت.
٧- دێ بەشداربین ب بزاڤێن جەماوەری داکو ب دەستوور و یاسا و دام و دەزگەھان و کارێن سەربخویی یا دەولەتا کوردستانێ ، دەولەتەکا سیکولاری بھێـەدانان و مافێن وەلاتیان ب ئێکسانی بھێنە دابینکرن بێی بەرچاڤ وەرگرتنا ھزر و بیر و جودایێن نەتەوەیی و ئاینی و رەگەزی و زمان و دەڤەران.
ھەولێر، قائید میرۆ:
سکرتێرێ ئێکەتیا زەلامێن کوردستانێ ئاماژە بڤێ چەندێ دکەت کو، ئەڤ سالە رێژەیا توندوتیژیێن ھەمبەر زەلامان زێدە کریە و بتنێ د ھەیڤێن بۆری دا یێن ئەڤ سالە 413 سکالا ھاتینە تۆمارکرن و دو زەلام ژلایێ ھەڤژینێن وانڤە ھاتینە کوشتن، ھەروەسا دیار کر کو، ئەگەرێ بلندبوونا رێژەیا توندوتیژیێ ل ھەمبەر زەلامان بۆ قەیرانا ئابوری و ئاریشەیێن جڤاکی ڤەدگەڕیت.
بورھان فەرەج، سکرتێرێ ئێکەتیا زەلامێن کوردستانێ د داخویانیەکێ دا گۆت: (ل دەستپێکا ئەڤ سالە ھەتا ھەیڤا ئەیارا بۆری 413 جۆرێن سکالا و توندوتیژیێ دژی زەلامان ل سنورێ کار و چالاکیێن لقێن رێکخراوا مە ھاتینە تۆمار کرن و 25 حالەتێن خوە کوشتنا زەلامان ھاتینە تۆمار کرن و دو زەلام ژی ژلایێ ژنانڤە ھاتینە کوشتن، ئەگەرێ خوە کوشتنا پشکەکا زۆرا زەلامان بۆ ڤێ قەیرانا دارایی ڤەدگەڕیت، چونکی ل گورەی شەریعەتی و ئایینێ پیرۆزێ ئیسلامێ زەلام بەرپرسە ل دابینکرنا پێدڤیێن ژیانا رۆژانە و بێگومان دەمێ زەلام نەشیا چ ب دەست خوەڤە بینیت بۆ دەرباز کرنا ژیانا خوە، ژلایێ جڤاکی ڤە دێ تووشی لومە و سفکاتیێ بیت، لەوڕا زەلام ھندەک جارا نەچار دبن خوە بکوژن).
بۆرھان گۆتژی: (ھەروەسا پشکەکا دیا ئەڤان توندوتیژیا بۆ ئاریشەیێن کۆمەلایەتی ڤەدگەڕیت بتایبەتی خیانەتا ھەڤژینیێ ھەرچەندە خوە کوشتن دیاردەیەکا جیھانیە، چونکی زۆر جارا دەمێ زەلام تووشی ئاریشەیەکێ دبیت یان ژی ھندەک زەلام ژلایێ دەروونیڤە نەساخ دبن و ددەمێ ھەبوونا ھەر ئاریشەیەکێ دا خوە ژناڤ دبەن).
بورھان فەرەج گۆتژی: (ل گورەی ئامارا و زانیاریێن لبەردەستێ مە ئەڤ سالە رێژەیا پێشێلکاریان ھەمبەر زەلاما زێدە کریە، بەلێ ب رێیا گێڕانا وورکشۆپ و سمینارێن تایبەت بزاڤێن ڤێ چەندێ دکەن کو توندوتیژیا ھەمبەر زەلاما بھێتە کێم کرن، چون توندوتیژیا جەستەیی ھەمبەر زەلاما دھێتە کرن و زۆرجارا زەلام ھەبویە ژ ئەگەرێ بەرەنگاربوونێ ل گەل ھەڤژینا خوە تووشی ئەشکەنجەیا جەستەیی بویە و بشێوەیەکی ھەتا جھێ ئەشکەنجەدانێ شین بویە و دیار بویە، لەوانەیە حالەتێن وەسا د کێم بن لێ ھەر ھەنە و روو داینە).
نيشاندان