ئەڤرۆ نیوز ، نەوزاد ھلۆری:
دبێژن ئەگەر تە بڤێت رەزامەندیا ژنێ دەستخوڤە بینی گەلەک ئاخفتنێن خوش بو بێژە ئەڤجا ھەر چوو ئاخفتن بیت درۆستە ، دبەرامبەر دا ژن دڤێت چاڤێت زەلامی تێر بکە ، و ئەڤە بویە سەدەم کو ھەردوو رەگەز پەنایێ بو ھندەک درەوان ببەن ، و شارەزایەکێ جڤاکی ھندەک ژ وان درەوێن ژن و زەلامان ئاشکرا دکەت.
سولین شیمال کچەکا گوندێ بالندا یا سەر ب دەڤەرا بارزانە دیارکر کو درەو ب چوو مەرەم بھێتەکرن سالوخەتەک نەجوانە و گۆت : ( دژیانێ دا گەلەک جاران رەگەزێ مێی ب گشتی و کچ ب تایبەتی ھەڤروشی درەوان بویە ژلایێ رەگەزێ بەرامبەر و پرانیا جاران ژی کوران ڤیایە ب رێیا ھندەک ئاخفتنێن درەو خوە بگەھینیت کچان و دانوستاندن و سوحبەتان ل گەل بکەت ، بەلێ دیسان ئەڤ یەک ژی نابیتە سەدەم کو رەگەزێ نێر پەنایێ بو درەوان ببەت ژبەرکو ئەگەر کچەکێ رێ دایە کورەکێ ل گەل ب ئاخڤیت ئەو دێ لسەر بنەمایێ راستگویێ پتر دەلیڤێ دەتێ ، و ھەردەما ھەڤژینیی لسەر ڤی بنەمایی ھاتە پێکئینان پشتی بورینا دەمەک کێم دێ زور ئاریشە بو درۆست بن )
مەلا جیھاد موستەفا گوتاربێژێ مزگەفتا گوندێ ھلورا لسەر بابەتی گۆت : ( ب چوو رەنگان د ئاینێ ئیسلامێ ھەتا خوە د جڤاکی ژی دا درەو یا قبولکری نینە ئەگەر خوە ب سوحبەت ژی ڤە بھێتە کرن ژ بەرکو درەو ب تایبەتی ئەگەر دووبارە دووبارە ببیت دێ بیتە سەدەما وێ یەکآ کو مرۆڤ باوەریا خوە ب راستیێن وی کەسی ژی نەئینیت و ژلایەکێ دنڤە درەو دبیتە سەدەم کو راستی بھێتە بەرزەکرن ، و دیسان یا دروست ژی نە ژ رەوشت و سالوخەتێن مرۆڤایە کو دروان بکەت )
گوت ژی : ( پێغەمبەر د چەند فەرمودەیەکان دا ئاماژە دکەت کو چێدبیت مرۆڤ یێ قەلس و رەزیل و چریک بیت بەلێ نابیت مرۆڤ یێ درەوین بیت ژبەرکو درەو دبیتە سەدەم مرۆڤ بچتە ئاگری و ژیانا جڤاکی وێران بکەت و درە و درەوێ دکێشیت ، و ئەگەر درەو بەردەوام بوون دێ زەلام و ژن بەرامبەر ھەڤدوو رەش بن ، ژبەرڤێ پێدڤی یە مرۆڤ ھەردم راستگوبیت )
ماموستا یاسین محەمەد وەکو شارەزایەکێ جڤاکی ل گوندێ بازێ یا سەر ب دەڤەرا بارزان دیارکر کو درەو مەزنترین خالا ھەرفاندنا پەیوەندیێن جڤاکی نە و گۆت : ( رەگەزێ نێر بەرامبەر رەگەزێ مێ پتر درەوان دکەت ژلایەکێ ڤە رەگەزێ نێر خوە بالا دەست دبینیت بەرامبەر رەگەزێ مێ ، و ژلایەکێ دنڤە ئەوی دڤێت ب ھندەک بھانەیان خوە بگەھینیت رەگەزێ مێ کو ئەڤ یەک ژی رەوشتەک نەجوانە ژبەرکو چوو کەسەک ژ رەگەزێ نێر ب ئەڤان سالوخەتان رازی نینە کو ل گەل بھێنەکرن ب تایبەتی ئەگەر ئافرەت بیت واتە ب چوو رەنگان رەگەزێ نێر قبول ناکەت رەگەزا مێ درەوان ل گەل بکەت بەلێ لسر خوە قبول دکە تکو دەھان درەوان ل گەل بکەت ، و ئەڤە د ژیانا نورمال دا ، و ژلایەکێ دنڤە ھندەک دبێژن پێدڤی یە ژن چاڤێت زەلامی ب رەوشت و دیتنا لەشێ خوە تێر بکەت ، و بەرامبەر دا زەلام گوھێن ژنێ ب ئاخفتنێن خوەیێن نازک پر بکەت ئەڤە تا رادەیەکێ پێنگاڤەک باشە بەلێ نابیت بو بەرژەوەندیێن کەسایەتی و رازیکرنەکا ب سەر ڤە بھێتەکرن )
گوت ژی : ( پرانیا ئەو درەوێن کو رەگەزێ نێر بەرامبەر رەگەزا مێ دکەت درەوێن وەکو تو ئەڤرۆ ژ ھەموو رۆژان جوانتری ، سەنگاتە گەلەک ھاتیە خوارێ ، سووز بیت ئەگەر تو رازی بی پشتی ھەڤژینیێ ژی ئەز ل گەل تە ھەریا باش و راستگوبم ، ئەز رەوشتێ خوە چوو جاران ناگوھرم و من بەردەوام کەیف ب ئاخفتنێن نازک و جوان و راستگو دھێت ، تو ئێکەمین کچی کو من حەژێکری ، من تو پتر ھەموو کەسان دڤێی ، ئەز نکارم پشتی تە سەحا چوو کچێن دن بکەم و تو جوانترین کچی لسەر روویێ عەردی و ئەڤە و چەندین درەوێن دن بو رازیکرنا کچان دھێنە گوتن ژلایێ رەگەزێ نێرڤە کو د راستی دا چوو بنەما بوو نینە و دبەرامبەر ژی داک چ ژی ھەروەسا ، و ھەر چەندە پرانیا جاران رەگەزێ نێر ھزر ناکەت کو ئەڤ یەک درەون بەلێ د راستی دا درەون ، و یا فەرە بێژین کو رەگەزا مێ ژی ئەڤان درەوان دکەت بەلێ وەکو مە گوتی رەگەزا مێ ئەو دەستھەلات نینە زور بچیتە دناڤ ئەڤان پەیڤان دا و گەلەک نازکە و دلنادەتن کورا ب خاپینیت ب تایبەتی کچێن کورد کو لسەر ژنێن ب رەوشت ھاتینە پەروەردەکرن و کێمتر دچنە د جیھانا تەکنولوژیایێ دا )
ددرێژاھیا ئاخفتنێن خودا گۆت ژی : ( چوو جاران رەگەزێ نێر نکاریت لسەر ئێک پەیڤ بەرامبەر چوو کەسان خوە بگریت بەلکو ئاخفتنا وی قابیلێ گوھرینێ یە و رەگەزێ نێر د ھەر قوناغەکا ژیێ خوەدا لسەر ھندەک ئاخفتنان دچیت و ئەڤە نورمالە ژ بەرکو بەرپرسیارەتیا خێزانی لسەر ملێن وی یە و رەنگە گورانکاریێن ژیانێ ببنە سەدەم کو گورانکاری بکەڤنە کریار ئاخفتنێن وی بەرامبەر ژنێ ژ بەرڤێ دڤێت ھندەک جاران ژن ژی یا قوربانیدەر و تێگەھشتی بیت و بارودوخێن زەلامی بزانیت داکو چوو ئاریشە بو ھەردوان درۆست نەبن )