ئەڤرۆ نیۆز،تۆڤی:

خیانه‌تكرنا ژنان ل‌ هەڤژینێن وان بتنێ ئێک جۆر نینه‌،لێ ل دووڤ دەمی جهی و جۆرێ وێ خیانەتێ دهێتە گوهۆرین،ئەڤە چەندین جۆرێن بەربەلاڤ یێن خیانەتا ژنانە د جیهانێدا:

1.خیانه‌تا سۆزداریێ:ئەڤ جۆرێ خیانه‌تێ زێدەتر د وی دەمیدایە،كو دەمێ وێ ژنێ‌ هه‌ست و سۆز و حەز ژێکرن بۆ كه‌سەكێ دیتر‌ هه‌بیت،ئەڤە د دەمەکێ دا‌یە کو ئەو ل ‌گه‌ل مێرێ خوە ژی دژیت.

2.خیانه‌تا سكسی:ئەڤ جۆره‌ خیانه‌ته‌ د وی دەمی دایه‌ كو وێ ژنێ‌ چ كێشه‌ ل گەل مێرێ خوە نینە، به‌لێ ب مه‌به‌ستا زێدەتر یا تێربوونا سكسی خیانه‌تێ ل هەڤژینێ خوە دکەت.

3- خیانه‌تا تۆلڤەکرنێ:ئەڤ جۆره‌ خیانه‌ته‌ د وی دەمیدا یە،كو دەمێ ژن هەست پێ دکەت،کو هەڤژینێ وێ خیانەتێ لێ دکەت،لەورا بۆ تۆلڤەکرنێ ئەو ژن ژی دێ خیانەتێ لێ کەت.

4.خیانه‌تا سه‌رخۆشیێ:ئەڤ جۆره‌ زێدەتر ل دەف وان ژنان هەیە،یێن کو ڤەخوارنێن کحولی ڤەدخۆن و ئاگەه ژ خوە نامینیت،ل دووڤ دا بێی حەزا خوە خیانەتێ ل هەڤژینێ خوە دکەن،(لێ ئەڤە زێدەتر دناڤا ژنێن رۆژئاڤا دا رووددەت،چونکی ئەو ڤەخوارنێن کحولی گەلەک ب کار دئینن).

5.خیانه‌تا ناڤەندیا ته‌مه‌نی:ئەڤە‌ ل دەف وان جۆرێ ژنان دا روو ددەت،یێن کو هه‌ر ب‌ زارۆکینی داینە شوو،وان زارۆک ژی بووینە،پشتی هنگێ هەست ب هندێ دکەن،کو وان چ تام ژ ژیانا خوە یا ئافرەتینیێ نە دیتییە،لەورا ل دەرڤەی خێزانێ،بۆ ب دەست خستنا وان حەزان دگەرن.

6.خیانه‌تا ژنا خه‌یالی:گەلەک ژ وان ژنێن خۆدان خەیال،زەلامەک د مێشکێ واندا هەیە کو ب سیارچاکێ خەونێن خوە ب ناڤ دکەن،بەلێ پشتی شوو دکەن،دێ کەسەکێ نیاسن و دێ هەست پێ کەن،کو ئەو کەس ئەو سیارچاکە،لەورا دێ خیانەتێ ئه‌نجامده‌ن.

ئەڤرۆ نیۆز،زنار تۆڤی:

دەمێ قوتابیێن قۆناغا ئێکی یا (کۆلیژا نۆشداری) ب حەز و ڤیان چووینە هۆلا خواندنێ بۆ وەرگرتنا ئێکەمین وانە،دکتۆرەک هاتە دژوورڤە و پشتی سلاڤێ پیرۆزباهیا قۆتابیان کر بۆ وەرگرتنا وان ل وێ کۆلیژێ و گۆتێ:قوتابیێن بەرێز هەر قوتابیەک(ێ/ا) نەشێت ئەو پارێ کو ددەتە کۆلیژێ ل بەرامبەر دابینکرنا پەرتووک و جلکێن نۆشداری و پێدڤیێن تر دابین بکەت،بلا ناڤێ خوە ل ڤی لاپەری بنڤێسیت و ئەز دێ مەزاختنان بۆ دابین کەم،هەموو قوتابی تووشی سەرسورمانێ بوون و ئەڤە ل دەف وان زۆر یا سەیر بوو،قوتابیەکێ گۆتێ دکتۆرە ئاخر ئەڤ مەزاختنە گەلەکن و وێ گۆتێ کێشە نینە،ئێکێ دیتر گۆتێ دکتۆرە هەکە هوسا بیت قوتابیێن دەولەمەند ژی دێ ناڤێ خوە تۆمار کەن،دکتۆرێ گوتێ کێشە نینە،قوتابی زێدەتر سەرسورمان بوون و گۆتێ تۆ دشێی خوە بۆ مە بدەیە نیاسین،دکتۆرێ گوتێ بەلێ،لێ بەری ڤێ چەندێ،ئەز دێ بۆ هەوە چیرۆکێ ڤەگێرم،قۆتابیان گۆتێ فەرموو،دکتۆرێ گوتە وان:

نێزیکی 26 سالان بەری نوکە کچەکا هەژار کو ناڤێ وێ (فاتما ئەحمەد رەمەزان مستەفا)بوو،وەکی هەوە ل ڤێ کۆلیژێ هاتبوو وەرگرتن،زۆر ب حەز و ڤیان دەست ب خواندنێ کر،بەلێ ئەو رۆژا کو داخوازی ژێکری کو پێدڤیە بۆ سپێدێ 500 دۆلاران ئامادە بکەی،ل هەمبەری پێدانا کتێب و کەلوپەلێن دیتر،دونیا ل بەر چاڤێن وێ رەش بوو،چونکی بابێ وێ شۆفێرێ تەکسیێ بوو،هەروەسا مەحال بوو،کو ب شێت بۆ سپێدێ وی گۆژمێ پارەی ئامادە بکەت،ب دلشکەستی ڤەگەریا مال و داخوازیا خوە بۆ بابێ خوە گۆت،بابێ وێ گۆتێ کچا من خەما نەخۆ،مە 200 دۆلار ل مال هەنە،هەر نوکە دێ دەرکەڤم و ئەڤ شەڤە گەشتیار دزۆرن و هەتاکو سپێدێ دێ کارکەم و هەتاکو وی گۆژمێ پاران بۆ تە تەمام بکەم.

هەروەسا وێ رۆژێ باوباران بوو،گەشتیار دکێم بوون، هەتاکو نێزیکی نڤێژا سپێدێ بابێ من بتنێ 100 دۆلار کارکربوون،ل وی دەمێ کو ب دلشکەستی ڤەگەریایە مال،زەلامەکێ ئەفەندی دەستێ خوە بۆ راکر و ب شەپرزەیی ڤە گۆتێ بێزەحمەت ب لەز من بگەهینە مال،ژبەرکو دزیکەران ب رێڤە ترۆمبێل و پارەیێن من برینە و دێ ل مال پاران دەمە تە،لێ شۆفیری گۆتێ بۆ پارێن من هیچ کێشە نینە و بۆچی نەچین پۆلیسان ئاگەهدار بکەین؟،وی گوتێ نەخێر ل دەستپێکێ من دڤێت سەحا مالا خوە بکەم،چونکی نوکە دلێ وان ب من ڤەیە،ژبەرکوو ئەز گەلەک گیرو بوویمە،دەمێ گەهشتین، گۆتێ تۆ ل ڤێرێ چاڤەرێی من بە و ئەز دێ زوو هێمە ڤە و هەر ل گەل تە دێ چین بۆ تۆمارکرنا سکالایێ،ژ نشکەکێڤە کابرای کرە هەوار و گۆتێ برا ل تانا من وەرە،گۆتێ ژی بوریا گازێ ل مالا مە پەقیە و خێزانا من هەموو بێ هوش بووینە،ئەو ژی چوو تانێ و ب رێیا ترۆمبێلێ گەهاندنە نەخۆشخانێ،پشتی چارەسەریێ،وی زەلامی داخواز ژ شۆفێرێ تەکسیێ کر،کا هەقێ وی چەندە ب زێدەهی بدەتێ،لێ شۆفێری گۆتێ،برایێ من ئەڤ شەڤە ل ته قەومییە و ب هیچ شێوەیەکێ چ گۆژمێ پاران ژتە وەرناگرم و هەتاکو هەوە نە بەمە مالا هەوە،ئەز ناچمە مال.
برێڤە وی زەلامی گەلەک هیڤی کرن کو شۆفێر هندەک پاران ژێ وەربگریت،بەلێ وی سووند خوار کو هیچ پاران ژێ وەرنەگریت.

پشتی هەڤنیاسینێ و خواترخاستنێ، شۆفێر ڤەگەریا مال و ل دەمێ سپێدێ کچا خوە ژ خەوێ هشیارکر و چیرۆکا کابرای بۆ ڤەگێرا،لێ کچا وی گەلەک تورە بوو، گوتێ بابێ هێژا تۆ ب خوە دزانی کو من چەند پێدڤی یا ب پاران هەی،چاوا تە هەموو دەمێ خوە ل گەل وی زەلامی بر و تە چ پارە ژێ وەرنەگرتن،ئەی هەوار،لێ بابێ وێ گۆتێ کچا من خودێ ب خوە ئاگەه ژ نیازا دلێ من هەیە و من بۆ خودێ ئەڤە کریە و دلنیابە ئەو مە بێ هیڤی ناکەت،لەورا بابێ وێ 300 دۆلار کرنە د دەستێ وێدا و گۆتێ،کچا من ڤان پاران بدەڤێ و بێژێ ئەوێن دیتر دێ دو سێ رۆژێن دیتر ئامادە بن.
کچا وی ب دلشکەستی چوو کۆلیژێ و پارێ خوە دا و ل ناڤەراستا وانا دویێ،کارمەندەک هات و گۆتێ(فاتما ئەحمەد رەمەزان مستەفا) بلا بچیتە دەف راگرێ کۆلیژێ بۆ کارەکێ پێدڤی،کچ ژی گەلەک ب شەپرزەیی چوو و ترسا هندێ هەبوو،کو راگری ئەو گۆژمێ پاران زانیبیت و هێرشا دەرکرنێ لێ بکەت.

پشتی سلاڤێ..راگری ب خێرهاتنەکا گەرم لێکر و گۆتێ تۆ( فاتما ئەحمەد رەمەزان مستەفا)ى؟.
گۆتێ:بەلێ
گۆتێ: بابێ تە شۆفێرێ تەکسیێ یە،وەسایە؟

گۆتێ: بەلێ،تۆ چاوا دزانی؟

گۆتێ:جارێ ئەڤە 300 دۆلارێن تە و ئەڤەژی هەموو پێدڤیێن خواندنا تە یێن ڤی کۆرسی،کو هەموو ل سەر منە.
گۆتێ:ئەڤە چاوا چێبوو؟،زۆر سوپاس،لێ بابێ من دێ چەند ڕۆژێن دیتر دێ پارێن مایی ژی دابین کەت.

راگری گۆتێ:سلاڤ و رێزێن من بگەهینە بابێ خوە و بێژێ ئەو زەلامێ کو تە ب شەڤ هەلگرتی وهاریکایا وی کری،راگرێ کۆلیژا نۆشداری بوو.

ل وی دەمی دا رووندک ژ چاڤێن قوتابیان هاتنە خوار و دکتۆر ژ وان پرسی،نوکە هەوە دڤێت خوە بۆ هەوە بدەمە نیاسین؟.

هەموویان پێکڤە گۆتێ:بەلێ

وێ ژی گۆتێ:ناڤێ من دکتۆرە(فاتما ئەحمەد رەمەزان مستەفا) یە.