ئەڤرۆ نیوز ، نەوزاد ھلۆری:
رۆژ بو رۆژێ ل ھەرێما کوردستانێ کچ و ژن د بیاڤێن جودایێن ژیانێ دەرکەڤن و ھەتا نھا گەلەک قوناغێن ھەستیار ژی برینە ، نھا ب رەنگەک گشتی ئەڤ یەک گەھشتیە تورێن جڤاکی و رێژەیەکا زورا کچ و ژنان ب ناڤ و نیشانێن ئاشکرا تورێن جڤاکی بکاردئینن و ھەموو چالاکیێن خوە تێدا بەلاڤ دکەن ، چالاکڤانەک ژی نھا کار لسەر پرۆژێ چێروکێن سەرکەفتنا کچ و ژنێن کوردستانێ دکەت د ھەموو بیاڤان دا و دێ د پرتووکەکێ دا بەلاڤ کەت.
شلێر بارزانى ھەلبەستڤان و شانوڤان دیارکر کو ئەو زور خوشحالە کو د پرۆژەی دا پشکداربیت و بۆ ئەڤرۆ نیوز گۆت: ( ئەز بخوە ئێکم ژ وان ژنێن کوردستانێ کو مفایەکێ زور ل تورێن جڤاکی دبینم بو بەلاڤکرنا چالاکیێن خوە د وارێ ھەلبەست و نڤیسانێ دا ، وێنێن خوە ژی ل گەل ددانم ، ب دیتنا من ئافرەت جوانترین چێکریا خودێ یە و نابیت ئەڤ یەک بھێتە ڤەشارتن ، ب رەنگەک شارستانی و جوان و ب باوەری بخوە بوون ئەڤێ یەکێ دکەم )

شلێر زێدەباری کو ھەلبەستڤان و شانوڤانە د ھەمان دەم دا وەکو رۆژنامەڤان ل رادیویا ھێلین و ، و بەرپرسا ئافرەتێن شێروانا مەزن و ئەنداما تیپا کانی بوت یا ھونەری یە ل پشکا فلکلوری و ل رێکخراوا کەڤنار ژی ئەندامە

زێدەتر گۆت: ( پێدڤی یە کو ھەر کەسەکێ ب تایبەتی ژی کچ و ژن ب شارەزایەکا باشتر خوە فێری تورێن جڤاکی بکەن ، ھەند وەکو مفا ، ھەند ژی وەکو رێیەک بو بەلاڤکرنا چالاکیێن خوە ، نابیت مروڤ تورێن جڤاکی بکەتن سەدەم کو کەس و کارێن خوە ژ بیر بکەت بەلکو ل پال نیاسین و خورتکرنا پەیوەندیان مفای ل تورێن جڤاکی ژی وەربگرین )

ژلایێ خوڤە ئاڤان فارس جاف رۆژنامەڤان و چالاکڤان دوارێ ژنان دا دیارکر کو ئەوێ دەست ب پرۆژیەکێ کومکرنا چێروکێن سەرکەفتنا کچ و ژنان کریە و بۆ ئەڤرۆ نیوز گۆت: (ژن پێکھاتەیەکا ھەستیار و نازکە ل کوردستانێ و ماف ھەیە د ھەموو بیاڤان دا مفایی وەربگریت و کار بکەت و روولێ خوە ببینیت ، ژبەرڤێ نھا ھژمارەکا زور یا کچ و ژنان دبیاڤێن جودا دەرکەفتینە و ھەتا نھا چێرۆکێن زێدەتری ٥٠ کچ و ژنێن سەرکەفتی من تومارکرینە و دەمەک نێزیک دێ د پرتوکەکێ دا ھێنە بەلاڤکرن)

زێدەتر گۆت: (مەرەما سەرەکی یا کومکرنا ئەڤان چێروکان ئەوە کو ئەڤ کچ و ژنە بو ھەموو کچ و ژنێن دن ببنە نموونە و رێنیشاندەر کو ئەو ژی بەھرە و شیانێن خوە بەرچاڤ بکەن ب تایبەتی لسەر تورێن جڤاکی مینا فێسبووک و ئەنستاگرام )
چالاکڤانا بوارێ ژنان دیارکر ژی کو ل پشت ھەر کچ و ژنەکێ چێروکەکا سەرکەفتنی َھەیە بەلێ کەس چوو ژێ نوزانیت و گۆت ژی: (پێدڤی یە رۆژەک ل رۆژان ئەو چێرۆک بھێنە ئاشکراکرن ، من وەکو دەستپێشخەریەک دەستپێکریە و ھەر کچ و ژنەکێ بڤێت دکاریت پشکداربیت)