ئەڤرۆ نیۆز،زنار تۆڤی:
هەژاری ئێک ژ وان دەردێن گرانە و هندەک جاران،ژ پێخەمەت قورتالکرنا ژیانا خوە،مرۆڤان ژیانا خوە ئێخستیە د مەترسیێ دا و کارێن سەیر ئەنجامداینە،داکو ب شێن بەردەوامیێ ب ژیانێ بدەن،هەروەسا بۆ پەیداکرنا پاریێ ژیانا رۆژانە مرۆڤان گولچیسکێن خوە فروتینە.
ئێک ژ وان نموونان گوندێ (هۆسکی) یە،کو ب گوندێ گولچیسک فرۆشان دهێتە نیاسین،ئەڤ گوندە دکەڤیتە باشۆرێ “نیپال”و خەلکێ ڤی گوندی هەژارترین مرۆڤن ل جیهانێ،ژبەرکو پتریا خەلکێ وی گوندی ژ ئەگەرێ هەژاریێ،گولچیسکەکا خوە فروشتییە.
ئەڤرۆ نیوز ، نەوزاد ھلۆری:
ئێڤاریا ئەڤرۆ د دوو روودانێن ھاتن و چوونێ دا سنوورێ پارێزگەھا دھۆک سی َکەسان گیانێ خوە ژ دەست دا ، و ئێک ژ وان کەسێن گیانێ خوە ژ دەستدایی بەرپرسەکێ پارتی بوویە.
دڤی واریدا رائید ئازاد تەھا بەرپرسێ راگەھاندنا رێڤەبەریا گشتی یا ھاتن و چوونا دھۆکێ بو ئەڤرۆ نیوز گۆت: ( ئەڤرۆ ئێڤاری ل دوو جھێن ژێکجودا ل سنوورێ پارێزگەھا دھۆک د دوو روودانێن ھاتن و چوونێ دا سێ کەسان گیانێ خوە ژ دەست دا)
زێدەتر گۆت: ( رودانا ئێکێ دناڤبەرا ئەڤریک و شێخان ل نێزیک گەلیێ رومان دناڤبەرا دوو ترومبێلێن تایبەت درۆست بوویە و دوو کەسان گیانێ خوە ژ دەستدایە ، و روودانا دوویێ دناڤبەرا باگێرا و سیارەتیکا ل نێزیک گوندێ سارکێ لسەر جاددا گشتی درۆست بوویە کو ئەو ژی وەرگەریانا ترومبێلەکا مونیکا بوو ، و لە دەما وەرگەریانا ترومبێلێ ئێکسەر ئاگر بەردبیتە ترومبێلێ و شوفێرێ وێ بناڤێ زوبێر کانیکی گیانێ خوە ژ دەستدا)
ل گورەی زانیاریێن ئەڤرۆ نیوز ئەو کەسێ ژ ئەنجامێ روودانا ترومبێلا دناڤبەرا باگێرا و سیارەتیکا گیانێ خوە ژدەستدایی بەرپرسێ لژنا ناوچا بامەرنێ یا پارتی دیموکراتی کوردستانە.
ئەڤرۆ نیوز، نەوزاد ھلۆری:
ماددێن بێھوشکەر ل سەرانسەرێ جیھانێ بویە دیاردەیەکا مەترسیدار بو سەر ژیانا وەلاتیان ، و کوردستان ژی یا بێ بەھر نینە ژ بکارئینان و بارزگانیکرن ب وان ، بو نەھێلانا وان سالانە ل سەرانسەرێ جیھانێ د رۆژەکا وەکو ئەڤرۆ ( 26/6 ) دا چەندین چالاکی دھێنەکرن ، ل گورەی زانیاریێن ئەڤرۆ نیوز سنوورێ قەزا سۆران ل پارێزگەھا ھەولێر زورترین رێژەیا بکارھێنەر و بارزگانیکرن ب ماددێن بێھوشکەر ل ھەرێما کوردستانێ ھەیە ، قایمەقامێ قەزا سوران ژی ددەتن دیارکر کو بارزگانیکرن ب ماددێن بێھوشکەر ل قەزا سوران بەر ب کێمبوونێ ڤە دچیت و دماوەیێ بوری دا ھژمارەکا زور یا بکارھێنەرێن وان گرتینە.
دڤی واریدا کرمانج عیزەت قایمقامێ قەزا سوران تایبەت بۆ ئەڤرۆ نیوز گۆت: (دماوەیێ چەند سالێن بوری ھەتا نھا زێدەتری 500کەسان ل سنوورێ قەزا سۆان یا سەر ب پارێزگەھا ھەولێر سەرا بارزگانیکرن و بکارھێنەرێن ماددێن بێھوشکەر ھاتینەگرتن و رەوانەیی َدادگەھێ ھاتینەکرن و سزایێن قانونی ب سەر دا ھاتینە سەپاندن ، ئەڤە سەرەرای کو ھژمارەکا زور یا کەرستە و ماددێن بێھوشکەر ژی ھاتینە گرتن و ژناڤبرن ، ب ھژمارا تبلێن دەستی نەبن ئەوکەسێن ھاتینەگرتن خەلکێ قەزا سوران و دەروبەر نینە)
زێدەتر گۆت: (سنورێ قەزا سوران گەلەک بەرفرەیە و بوشایەکا زور ل گەل کومارا ئیسلامیا ئیرانێ ھەیە و ئێکە ژ وان دەڤەرێن کوردستانێ کو زورترین دەرگەھێن بارزگانی و خالێن سنووری ب ھەردوو رێیێن قانونی و نەقانوونی ھەنە و ھندەک ژ وان دەڤەرا ناکەڤنە ژێر کونترولا کارگێریا قەزا سوران ژبەرھەبوونا ھندەک ھێزێن دن یێن نەقانونی ل دەڤەرێ ب تایبەتی ژی دەڤەرا کێلەشین ، ژبەرڤێ پرانیا جاران ژی بکارئینان و بارزگانیکرن ب رێیێن نەقانونی دھێتە سنووێ قەزا سوران کو ئەڤێ یەکێ ژی رەنگڤەدانەکا نەجوان و شارستانی ب سەر دەڤەرێ دا ئینایە)
قایمقامێ قەزا سوران دیارکر ژی کو ئەوان چەندین تیمێن لێگەران و دوڤچوون بو نەھێلان و بکارئینانا ماددێن بێھوشکەر پێکئیناینە و زێدەتر گۆت: (تیمێن مە د دەمێ بوری دا رولەکێ بەرچاڤ بو نەھێلان و بکارئینانا ماددێن بێھوشکەر کریە و شیایە رێژەیا وان زور کێم بکەت و نھا ب رەنگەکێ بەرچاڤ بکارئینان و بارزگانیکرن ب ماددێن بێھوشکەر بەر ب کێمبوونێ ڤە چوویە کو ئەڤ یەک ژی بو کارابوونا زێدەتر یا دەزگەھێن ئەمن و ئاسایش و کارگێریا دەڤەرێ دزڤریت و نھا ھژمارەکا زور یا بکارھێنەرێن وان ھاتینە داخوازکرن و ھژمارەک ژی ھاتینە بن چاڤکرن و ھژمارەکا زور ژی گومان لسەر ھەیە و تیمێن مە دێ بەردەوام بن و ھەر کەسەکێ ببین نکو جھێ گومانێ یە دێ ب زوترین دەم ھێنە گرتن و رەوانەیێ دادگەھێ ھێنەکرن)
ئەڤرۆ نیوز، نەوزاد ھلۆری:
دەمەک بەری نوکە قایمقامێ بەرێ یێ قەزا چومان یا سەر ب پارێزگەھا ھەولێرێ ژ ئەگەرا نەخوشیەکا گران ل دەرڤەیێ کوردستانێ وەغەکر.
دڤی واریدا کرمانج عیزەت قایمقامێ قەزا سوران بۆ ئەڤرۆ نیوز گۆت: ( دەمەک بەریا نھا ل وەلاتێ ئوستراليا ” عەبدولواحد گوانی ” قایمقامێ قەزا چومان یا سەر ب پارێزگەھا ھەولێر ژ ئەگەرا نەخۆشیەکا گران وەغەرا داویێ کر)
زێدەتر گۆت: ( د ماوەیێ بوری دا عەبدولواحد گوانی 14 سالان وەکو قایمقامێ قەزا چومان بەرپرسیارەتی وەرگرتیە و رولەکێ بەرچاڤ د رێکخستنێن پارتی دیموکراتی کوردستان ھەبوویە و چەندین سالان ژی پێشمەرگە بوویە و چەندین بەرپرسیارەتیێن کارگێری ل سنوورێ قەزا چومان وەرگرتینە ، بەلێ ژ بەر ئەگەرا نەخوشیێ ماوەیێ چەند سالایە ژ قایمقامەتیا چومان دورکەفتیە و ب دەست نەخوشیێ دنالیت و ئەڤرۆ وەغەرکر)
ئەڤرۆ نیۆز،زنار تۆڤی:
ئیڤانکا کچا دۆنالد ترەمپێ سەرۆکێ ئەمریکا ژلایێ کۆمپانیەکا ئیتالی ڤە سکالا ل دژی وێ هاتیە تۆمارکرن و یا هاتیە گازیکرن بۆ دادگەهێ.
ئاژانسا( CBSNEWS) ل ڤی باری دا بەلاڤەکریە،کو کۆمپانیا ئیتالی (ئاکوازوار) ل سالا بوری ب ئەگەرێ هندێ کو ئیڤانکا یێ ژ پێلاڤێن وێ کۆمپانیایێ کۆپیەک چێکریە،لەورا وان ژی سکالا ل دژی وێ تۆمار کریە.
ئەو مۆدێلا پێلاڤان یاکو ئەو کۆمپانیا ئیتالی بەرهەم دئینیت، هەر جووتەکێ وێ ب 785 دۆلاران دهێنە فرۆت،د دەمەکی دا کو مۆدیلا پێلاڤێن کۆمپانیا (ئای تی کالکشن ئێل ئێل) کو یا ئیڤانکا ترەمپە کو ب پێلاڤا (هتی) هاتیە ناڤدارکرن،کو هەر جووتەک ب 130 دۆلاران دهێته فرۆتن و کۆپی کریا هەمان کۆمپانیا ئیتالییە،لەورا سکالایەکا یاسایی ل دژی وێ هاتیە تۆمارکرن.
دڤی واری دا داخوازکارێ گشتی یێ ئەمریکا ئاشکراکریە کو دڤێت ئیڤانکا ترەمپ بۆ بەرسڤدانێ ل دادگەهێ دا ئامادە ببیت.
ئەڤرۆ نیۆز،زنار تۆڤی:
سەرۆکێ بەرێ یێ “ئاژانسا هەوالگیریا ناوەندی یا ئەمریکا” یا ناسیار ب سی ئای ئەی دبێژیت،کوردان ژی مافێ هندێ هەیە کو دەوڵەتا خوە یا سەربەخۆ هەبیت، بەلێ دڤی دەمیدا سەربەخۆیی یا ب ساناهی نینە.
دەیڤد پیترایۆس د چافپێکەفتنەکێدا ل گەل میدیایا ئۆسترالیا دبێژیت،حوکمەتا هەرێما کوردستانێ بریاردایە کو ریفراندۆمێ بۆ سەربەخۆیێ ئەنجام بدەت،بەلێ نوکە زەحمەتە بشێن سەربەخۆبن.
پیترایۆس ئاماژێ ب هندێ دکەت، ئەو دەمێ ئەو سەرۆکێ سی ئای ئەی بوو،ووان هەڵسەنگاندنەک کربوو بۆ وان روون ببوو،کو حوکمەتا هەرێما کوردستانێ رۆژانە پێدڤی ب هنارتنا 800 هزار بەرمیلێن نەفتێ هەیە بۆ دەرڤە،کو نرخێ هەر بەرمیلەکێ 105 دۆلار بیت بۆ هندێ بشێت دەوڵەتێ برێڤە ببەت.
سەرۆکێ بەرێ یێ سی ئای ئەی هێشتا دبێژیت،نوکە حوکمەتا هەرێما کوردستانێ د رۆژانێن بێ کێشەدا 800 هزار بەرمیلێن نەفتێ بەرهەم دئینیت،پشکەکێ ژ وێ نەفتێ دهنێریتە دەرڤە و نرخێ هەر بەرمیلەکێ ژی دناڤبەرا 40 تاکو 50 دۆلاران دایە، لەورا وان پێدڤی ب هندەک تشتان هەیە کو ژ بەغدا وەربگریت.
دەیڤد پیترایۆس دیارکریە ل دۆخێ سەربەخۆیێ دا، دڤێت حوکمەتا هەرێما کوردستانێ هەول بدەت ل گەل بەغدا و ئەنقەرێ بگەهیتە رێککەفتنەکا باش،بۆ هندێ کو جۆدابوونەکا ئاشتیانە ل گەل عێراقێ رووبدەت.
دەیڤد پیترایۆس ل ئیلۆنا سالا 2011 تاکو چریا دویێ یا سالا 2012 سەرۆکێ سی ئای ئەی بوو، ل سالا 2008 تاکو 2010 فەرماندێ ناوەندی یێ سوپایێ ئەمریکا بوو، ل سالا 2007 تاکو 2008 سەرۆکێ هێزێن هەڤپەیمانان بوو ل عێراقێ.
ئەڤرۆ نیۆز،زنار تۆڤی:
فەرماندێ پۆلیسێن فیدرالی یێن عیراقێ راگەیاند،کو ئەڤرۆ ٢٦ خزیرانا ٢٠١٧ ھێزێن مە ل باژێرێ مۆسلا کەڤن هێرشەکا داعشێ تێکشکاندیە و چار چەکدارێن خوەکوژ ژی کوشتینە.
فەریق رائید شاکر جەودەت فەرماندێ پۆلیسێن فیدرالی یێن عێراقی دادیارکرن،کو هێزێن پۆلیسێن عێراقی هێرشەکا داعشێ ل باژێرێ کەڤن ل مۆسلێ تێکشکاندیە و 4 خوەکوژ ژی کوشتینە و دو ماتۆرسکلێن مینرێژکری ژی ژناڤبرینە،هەروەسا هێزێن وان شیاینە کونترۆلێ ل سەر هێزێن داعشێ ل دەڤەرا سەرچخانە بکەن.
هەروەسا گۆتیە ژی،هێزێن ئەندازەیا سەربازی ژی شیاینە جادا نەینەوا بۆ پرا کەڤن ڤەکەن و ئەو دەڤەرە ب تەمامی ژ مین و تی ئێن تی یان هاتیە پاقژکرن.
فەرماندێ پۆلیسێن فیدرالی هەروەسا دیارکریە،کو هێزێن وان 4 رێکێن ئێمناهیێ بۆ خەلکێ ڤەکرینە داکو خوە ژ داعشێ قورتال بکەن،دیسا هێزێن شەرکەرێن شەڤێ ب هاریکاریا نیشانشکێنا شیاینە دربێن مەزن ل داعشێ بدەن.
ئەڤرۆ نیوز ، ھلۆری:
دوھی روژا شەمبی ل پارێزگەھا موسل ئێکەم رۆژا جەژنێ بێی داعش ب رێڤەچوو ، ئەڤە پشتی سێ سال و شەش جەژنان کو لژێر دەستێ داعشێ ھاتینەکرن ، سەرەرای کو ل ناڤەندا موسل شەر بەردەوامە ، بەلێ ھژمارەکا زورا وەلاتیان ژی جەژن ل ھەڤدوو پیروزکرن.
زێدەباری کو پشکەکا زۆر یا خانو و مال و جھێن گشتی ھاتینە تێکدان و وێرانکرن ، بەلێ زاروکێن سەنتەرێ موسل ب گور و تینەکا زور سەرا ئەوان مالان کر یێن کو ھەتا نھا ل سەنتەرێ موسل مایی و نەھاتینە چول و وێرانکرن و شیریناھی کوم دکرن ، و ھێزێن ئێمناھیێن دەڤەرێ ژی سەر و مال و ژیانا وەلاتیان دپارێزن.
سەروکوەزیرێن عیراقێ پیروزباھیا تەڤایا گەلێ عیراقێ ب ھەلکەفتا جەژنا رەمەزانا پیروزکر و دیارکر کو ئەو دێ ددەمەکێ نێزیک دا مزگینیا سەرکەفتنا ھێزێن عیراقی ب سەر داعش راگەھینن.
ژلایەکێ دنڤە ھێزێن عیراقی دیارکر کو ھێزێن وان بەر ب پێشڤەچوونێ دانە و تنێ ١% یا پارێزگەھا موسل مایە کو بھێتە کونترولکرن و ئەڤرۆ رۆژا دوویێ یا جەژنێ شەر و پەڤچوون ل موسلا کەڤن بو دەرکرنا داعش یا بەردەوامە.
ئەڤرۆ نیوز ، نەوزاد ھلۆری:
کومپانیا dji یا درۆستکرنا Mavic Pro نووترین بەرھەمێ خوە بەلاڤکر کو کومەکا سالوخەتێن نوو بو زێدەکرینە ژ وانا چوو جاران ل تە بەرزە نابیت و ئەگەر دویر کەفتە ژی بخوە دێ تە ئاگەھدار کەت کو زێدەیێ قەبارێ خوە چو داکو تو بزڤرینی.
ل گورەی زانیاریێن کومپانیا ناڤبری فروکەیا Mavic Pro کو یا تایبەتە ب کارێن ھونەری و وێنەگرتنێ ڤە کومەکا سالوخەتێن دی لسەر زێدەکرینە ژ وانان ژی: (دانانا 4 سنسور ل پێش و خوارا فروکێ ، شیانێن فرینا 8 کیلومەتران ھەنە بێی کو توشی ئاریشیەیان ببیت ، کامیرایەکا 18 مێگا پێکسل ب کوالیتیا 4K کو ئێکە ژ جوانترین سالوخەتێن نھایێن ڤیدیویی و وێنەیانە و دشێت زور لسەر خوە وێنەیان و ڤیدیویان ب شێوەیێ slow motion بگریت ، شیانێن مانەڤا 28 خولەکان لە ئەسمانی ھەیە و قەبارەیێ وێ زور بچوک ھاتیە چێکرن و دشێی ل گەل خوە بو ھەر جھی ببەی )
کومپانیا ناڤھاتی دیارکر ژی کو ریمودکونترولەکا تایبەت ل گەل ھەیە بو دیتنا روودانان و گۆت: (سیستەمێ GPS لسەر ھاتیە بجھکرن و شیانێن لڤاندن و کونترولکرنا وێ ل جھێن دویر ژی ھەیە و تومارکرن و رێکخستنا وێ ب شێوەیەکێ ئوتوماتیکی یە و دشێت پەخشێ ئێکسەر ب کوالێتیا HD بکەت ، ھەروەسا چوو جاران ل مروڤی بەرزە نابیت و ب سیستەمێ GPS دزانی ل کیڤەیە و چەند ل تە دویرە و ئەگەر گەلەک دویر کەفت ژ وی قەبارێ بو ھاتیە دیارکرن دی َبخوە تە ئاگەھدار کەت داکو بزڤریت ڤە )
ل بارا بھایێن ئەڤێ Mavic Pro کومپانیا dji دیارکر ژی کو بھایێ وێ 1950 دولارێن ئەمریکی نە و زێدەتر گۆت: (3 پاتری ل گەل دا ھەنە و 8 پەروانە ژی ھەنە و بارگەیا ناڤ ترومبێلێ و قاعیدەیێ وان و جانتەکا تایبەت ژی ل گەل دا ھەیە )
نھا ل بازارێن ھەرێما کوردستانێ ھەنە و دشیێ دەستخوڤە بینی
ئەڤرۆ نیوز ، نەوزاد ھلۆری:
بنکێ گیایی جورەکێ گیایێ بوھاری یە ، بەلێ ل دەستپێکا وەرزێ ھاڤینێ دھێتە فروتن ل گورەی ھندەک زانیاریێن ئەڤرۆ نیوز بنکێ گیایی کەرستەیێ ئێکانەیێ درۆستکرنا ماددێن بێھوشکەرە ،ل کوردستانێ راستەوخۆ بو وەلاتێن بیانی دھێتە رەوانەکرن ، وەلاتی دخوازن کو جھێن شولەژێ دوڤچونەکێ لسەر راستیا بابەتی بکەن.
فەیسەل باشووری وەلاتیەکێ دێرەلووکێ یا سەر بە قەزا ئامێدێ یە بۆ ئەڤرۆ نیوز گۆت: (بنکێ گیایی درۆستێ خوە دا ل وەرزێ بوھارێ چێدبیت بەلێ پرانیا جاران ل وەرزێ ھاڤینێ دھێتە فروتن ، و ئەگەر کەسەک ل وەرزێ بوھارێ سپێدێ ھەتا ئێڤاری ل بنکێ گیایی بگەریێت رەنگە ھەتا دوو کیلویان ژی بکەت و ئەگەر بنکێ گیایی ب شێوەیەکێ جوان و رێک و پێک بھێتە کەلاندن و ھشککرن کیلوی اوی دناڤبەرا ١٠٠ ھزار بو ١٥٠ ھەزار دیناران دھێتە فرۆتن)
زێدەتر گۆت: (ھەر چەندە دناڤا خەلکی دا زێدەتر ھاتیە بەلاڤکرن کو بنکێ گیایی بو ھێڤێنکێ دوندورمێ دھێتە بکارئینان و کەرستەیێ ئێکانەیە ، بەلێ د راستی دا بڤێ بھانەیێ گەلەک بنکێ گیایی دھێتە رەوانەکرن بو تورکیا، ئوستورالیا ، ئەمریکا ، لوبنان ، رۆژھەلاتا ناڤەرست و پشکەک ژ وەلاتێن ئەوروپی و ئەڤ یەک ژی ب رێیا ھەردوو وەلاتێن تورکیا و ئیرانێ دگەھیتە وان وەلاتان)
شێخ زادە یاسین دانعەمرەکێ دەڤەرا دینارتە یا سەر ب قەزا ئاکرێ یە دیارکر کو ئەوی د وەختێ خودا نێزیکێ ٣٠ سالان بنکێ گیایی فرۆتیە و بۆ ئەڤرۆ نیوز گۆت: (بنکێ گیایی ئێکە ژ گیایێن وەرزێ بوھارێ و چەندین رەنگ و جور ھەنە و ب بھاترین گیایێ وەرزێ بوھارێ دھێتە نیاسین و سالانە خەلکەکێ زور دچیتە چیایی ب مەرەما کومکرنا وی)
ل بارا چەوانیا چێکرن و بەرھەڤکرنا ئەڤی جورە گیایی بۆ فرۆتنێ ناڤبری گۆت: ( پشتی کوب بنکێ گیایێ ل چیایی دگەھیتە مال ، دێ کابانیێ، مالێ یان ژی ئەو کەسێ بنکێ گیایی دئینیت دی َھەمو ئەو تیڤلێ ب سەرڤە ژێڤەکەن ھەتاکو ب رەنگەک سپی دەربکەڤیت ، پاشان دێ ل گەل شیرێ چێلان یان بزان لسەر ئاگری ب پلەیا ھەتا ١٨٠ گەلینن ھەتاکو رەنگێ وێ تەمام دھێتە گوھرین بو رەنگەکێ سپی و زێرینی ، پاشان دێ ئینن دەرێ و دانن بەر تیشکێن رۆژێ ھەتاکو ھشک دبیت بڤی رەنگی بۆ فروتنێ بەرھەڤ دبیت)
زێدەتر گۆت: ( د بەرێ دا بکر ل گوندان مال ب مال دگەریان بو کرینا بنکێ گیایی ، ھەتا خوە نھا ژی جار جار دگەریێن ، لگورەی زانیاریێن مە ئەڤ جورە گیایە بو دەرڤە دھێتە رەوانەکرن و دبێژن کەرستەیێن بێھوشکەر ژێ دھێنە درۆستکرن بەلێ ئەڤ یەک ھەتا نھا نەھاتیە پشتراستکرن ، بەلێ ئەڤ جورێ گیایی تامەکا تیژ و نەخوش ھەیە و ئەگەر مرۆڤ بخوت دێ پێ گێژ بیت ، بەلێ ئەڤ گیایە ناھێتەخوارن)
فەیسەل دخوازە کو جھێن شولەژێ دوڤچوونەکێ بو راستیا بابەتی بکەن و ئەگەر راستە بلا رێکێ نەدەن کو ئەڤ یەک بھێتەکرن و ئەگەر نە راستە ژی بلا رونکرنەکێ بو خەلکی بدەن داکو وەلاتی بکارن ب رەنگەکێ ئازادە و بێی گومان ئەڤی جورە گیایی بکەن و بفرۆشن و گۆت ژی : ( ھندەک ژ خەلکی ژبەر گونەھێ ناچنە ئەڤی جورە گیایی وناخوازن ھاریکاریا ماددێن بێھوشکەر بکەن ، بەلێ ئەگەر بو خەلکی بھێتەکرن رەنگە ھژمارەکا زێدەتر یا خەلکی بچنە ئەڤی جورە گیایی)
ل گورەی زانیاریێن ئەڤرۆ نیوز ئەڤ جورێ گیایی ب رێیا دەرگەھێن سنووری بتنێ ب ھشکی رێکپێدایە کو بھێتە رەوانەکرن ، بەلێ ھەند جاران ب رێیێن قاچاخ ب تەری دھێتە رەوانەکرن.
نيشاندان