ئەڤرۆ نیوز :
ھونەرمەندا لوبنانی حەسنا مەتر بو جەژنا رەمەزانێ دێ ئاھەنگەکێ ل پارێزگەھا سلێمانیێ ئەنجام دەتن.
حەسنا مەتەر لسەر پەیچێ تایبەتیێ خوە ل تورا جڤاکی یا فێسبوکێ دیارکر کو ئەو دێ ل گەل ھونەرمەند ئەحمەد خەلیل ل رۆژا سێیی ژ جەژنا رەمەزانا پیروز ل باژێرێ سلێمانیێ ئاھەنگەکێ ئەنجامدەت.
زێدەتر گویتە کو دێ ئاھەنگ ل رۆژا سێشەمبی ل ئێک ژ ئوتێلێن سلێمانیێ ھێتە گێران.
ئەڤرۆ نیوز :
پشتی نیڤرویا ئەڤرۆ مەسرور بارزانی راوێژکارێ ئەنجومەنا ئاسایشا ھەرێما کوردستانێ پێشوازی ل بەرێز جان کوبیس نوونەرێ تایبەتی سکرتێرێ گشتیێ رێکخراوێن نەتەوەیێن ئێکگرتی ل عیراقێ و شاندێ ل گەل دا کر ، و د دیدارەکێ دا پێشکەفتنێن دەڤەرێ و دوماھی روودانێن جیھان و عیراق و ھەرێما کوردستانێ ھاتنە بەحسکرن ژ وانان ئەنجامدانا ریفراندۆمێ بو سەربخویی یا ھەرێما کوردستانێ.
نوونەرێ تایبەتی سکرتێرێ گشتیێ رێکخراوێن تەوەیێن ئێکگرتی پشتەڤانیا خوە بو ریفراندۆما ھەرێما کوردستانێ دەربری د ھەردوو قوناغێن بەرا ئەنجامدانا ریفراندۆمێ و پشتی ئەنجامدانا ریفراندۆمێ و ھیڤی خواست کو ھەرێما کوردستانێ ب رەنگەکێ ئاشتیانە لسەر ھەموو ئاریشەیێن خوە زال بیت و چارەسەر بکەت.
ژلایەکێ دی یێ کومبوونا وان مەسرور بارزانی راوێژکارێ ئەنجومەنا ئاسایشا ھەرێما کوردستانێ دیارکر کو ریفراندۆمێ میکانیزم و پروسەیەکا دیموکراسی یە بو زانینا حەز و ڤیانێن وەلاتیان و ل نھا و ئایندە ھەرێما کوردستانێ دێ پشکەک بیت ژ چارەسەرکرنا ئاریشەیێن دناڤبەرا عیراق و ھەێما کوردستانێ ب رەنگەک ئاشتیانە و بو ئەنجامدانا ریفراندۆمێ ژی دێ ل گورەی قانون و دەستووری کاروبارێن خوە ب رێڤەبەن.
ئەڤرۆ نیوز ، نەوزاد ھلوری:
وەزارەتا نافخو یا حکومەتا ھەرێما کوردستانێ 15 ترومبێلێن پێشکەفتی تایبەت دوارێ ھاتن و چۆنێ دا بۆ رێڤەبەریا گشتی یا ھاتن و چۆنێ ل پارێزگەھا دھۆکێ دابینکرن.
دڤی واریدا عەمید فەخری ئەحمەد رێڤەبەریا گشتیێ ھاتن و چۆنێ ل پارێزگەھا دھۆکێ بۆ ئەڤرۆ نیوز گۆت: (وەزارەتا نافخو یا حکومەتا ھەرێما کوردستانێ 15 ترومبێلێن پێشکەفتی تایبەت دوارێ ھاتن و چۆنێ دا بۆ رێڤەبەریا گشتی یا ھاتن و چۆنێ ل پارێزگەھا دھۆکێ دابینکرن و ڤان رۆژێن بھێت دێ لسەر ھەموو بنگەە و رێڤەبەریێن ھاتن و چۆنێ ل سنوورێ پارێزگەھا دھۆک ب ھەموو قەزایێن خوڤە دابین کەت)
زێدەتر گۆت: (ب رێیا ئەڤان ترۆمبێلان دی َخزمەتەکا باشتر بو رێکخستنا ھاتن و چۆنێ ل پارێزگەھا دھۆکێ ھێتەکرن)
ئەڤرۆ نیوز ، مەحمود نھێلی
ژ بۆ پتر خزمەتکرنا خێزانێن شەھیدێن شەرێ دژی داعش سەروکاتیا ساخلەمیا قەزا ئامێدیێ پرۆژەیەک بەردەست کریە کو دێ بێ بەرامبەر خزمەتێن ساخلەمیێ پێشکێشی وان که ن.
دکتور نەجیب سەعید رێڤەبەریێ ساخلەمیا قەزا ئامێدیێ بۆ ئەڤرۆ نیوز دیارکر، کو ئەڤ پرۆژەیە ژ پێشنیارا وی بوویە و رازیبوونا ھەموو دکتورێن تایبەت مەندێن دەڤەرێ ل سەر ڤی پرۆژەی وەگرتیە و گۆت: ( ئەڤ پرۆژەیە پێک دھێت ژ پێشکێش کرنا خزمەتێن ساخلەمیێ بۆ خێزانێن شەھیدێن شەرێ دژی داعش کو پێک دھێن ژ سەرەدانا نوژداری و گرتنا پشکنینێن تاقیگەھا و تیشک و سونەر و خوە ھەتا دەرمان ژی ب بێ بەرامبەر دێ ب وانا ھێنە بەخشین).
ناڤبری دیارکر ژی کو ئەڤ پرۆژەیە ب ھەڤکاری ل گەل رێڤەبەریا شەھید و ئەنفالکریان ل ئامێدیێ و لقێ ھەژدە یێ پارتی دێ ب رێڤەچیت و گۆت: ( ھەر کەسەکی کارتا باوەرپێکری کو ژلایێ رێڤەبەریا شەھیدان ل ئامێدیێ ھاتیە چێکرن دگەل دا بیت دێ بێ بەرامبەر ل کومەلگەھا نوژداریا شێلادزێ ھێتە ب رێڤەبرن).
وخویاکر، کو ھەر چەندە ئەڤە خزمەتەکا کێمە کو ژلایێ ساخلەمیێ ڤە بۆ خێزانێن ڤان شەھیدان دھێتە کرن بەلێ ھەر چ نەبیت دێ شێن وەک ئەرکەکی نەتەوەیی و مروڤایەتی چارەسەریا وانا بێ بەرامبەر ھێتە کرن.
ئەڤرۆ نیوز ، ئیقبال عومەر:
لقێ 18 یێ پارتی دیموکراتی کوردستان ل دەڤەرا ئامیدیێ سەرەدانا خێزانێن سەر بلندێن شەھید و پەککەفتێن شەرێ داعش کر ھاریکارییێن دارایی ب سەر وان دا دابەشکرن.
عومەر ئورەی بەرپرسێ لقێ 18 یێ پارتی دیموکراتی کوردستان بۆ ئەڤرو نیوز گۆت: ( مە ژ نێزیک سەرەدانا ھەمو وان خێزانێن سەر بلندێن پێشمەرگەیان کر ئەڤێن کو د شەرێ دژی داعشێ دا شەھید و بریندار و پەکەفتی بوین ، ب ھەلکەفتا جەژنا رەمەزانا پیروز ھاریکارێن دارایی ب سەر وان دا دابەشکرن )
زێدەتر گۆت: ( دڤێ ھەوا مە وەکو لقێ 18 یێ پارتی ھاریکاریێن دارایی ب سەر 86 مالباتێن شەھید و بریندار و پەککەفتیێن شەرێ داعش دابەشکرن و بەرنامەیێ ھاریکاریکرنا وان دێ بەردەوام بیت ب تایبەتی پشتی جەژنا ەرمەزانێ)
ئه‌ڤرۆ نیۆز،عه‌زیز ره‌سول عه‌زیز:
رێڤەبەرێ كومه‌لگەها باشماخ راگه‌هاند پشتی پشكنین بۆ 35 تا‌نكه‌رێن بانزینێ هاتینەکرن كو ژ وەلاتێ ئیرانێ هاتبوونە هاورده‌کرن بۆ هه‌رێما كوردستانێ هاتنە ڤەگەراندن،چونکی ماددێ ژەهراوی د ناڤ وان 35 تانکێن بانزینێ دا هەبوو،بۆ ساخلەمیا وەلاتیان یا خراب بوو،لەورا مە دەست ب سەردا گرت و هەموو ڤەگەراندە ڤە وەلاتێ ئیرانێ.
رێڤەبەرێ كۆمه‌ڵگەها باشماخ بۆ ئه‌ڤرۆ نیۆز گوتیە کو ئه‌ڤرۆ 20-6-2017 پشكنین بۆ (35)تا‌نكه‌رێن بانزینێ هاتیەکرن تێدا ده‌رکەفت كو بانزینا وان یا ژه‌هراوییه،لەورا ما بانزینا وان هەموو زڤراندیە و ئەم دێ پێرابوونێن یاسایی هەمبەری وان کەسان وەرگرین یێن کو بانزینا خراب د ئیننە هەرێما کوردستانێ.
بۆ چه‌ندین جاران ل هه‌ردو ده‌روازێن كۆمه‌ڵگەها باشماخ و په‌روێزخان ب دەهان تا‌نكەرێن بانزینا ژه‌هراوی هاورده‌ی هه‌رێما كوردستانێ كرینە،لێ پشتی هاتینە پشکنین،جارەکادی هاتیە ڤەگەراندن بۆ وەلاتێ ئیرانێ،چونکی بۆ ساخلەمیا زەلامان یا خراب بوو.
ئەڤرۆ نیوز، مەحمود نھێلی:
پشتی ئامیرێ ڤاڤارتن و تەعقیمکرنا گلێش و بەرمایکێن ساخلەمیێ ل ئامێدیێ ھاتیە دانان دڤان رۆژاندا دێ دەست ب کار بیت و ئێدی مەترسیا گلیشی ل سەر ژینگەھێ و ساخلەمیا مروڤان نامینیت.
دکتور نەجیب رێڤەبەرێ ساخلەمیا قەزا ئامێدیێ بۆ ئەڤرۆ نیوز دیارکر، کو ھەتا نوکە گلێش و بەرمایێک ساخلەمیێ ل سەرانسەرێ قەزایێ بۆ ناڤ گلێشێ باژێرڤانیان دھاتە شاندن ئەڤێ ئەکێ ژی مەترسی ل سەر ژینگەھێ و ژیان و ساخلەمیا مرۆڤی ھەبوو ل دەڤەرێ و خویاکر، ژ بۆ چاسەرکرنا ڤێ ئاریشەیێ ئامیرەک ژلایێ رێکخراوەکا بیانی ڤە بۆ ساخلەمیا قەزا ئامێدیێ ب کوژمێ ٢٢٠ ھزار دولارا ھاتیە دابینکرن و گۆت: ( کارێ ڤی ئامیرەی ئەوە دێ رابیت ب ژناڤبرن و تەعقیمکرنا گلێش و بەرمایێکێن ساخلەمیێ و پاشان ب بشت راستی دێ ئەڤ گلێشە بێ ئاریشەو بێ مەترسێ ھێـتە شاندن ناڤ گلێشێ گشتی یێ باژێرڤانیێ).
ناڤبری دیار ژی کر کو بەرمایک و گلێشێ تەڤایا نەخوشخانا و بنگەھێن ساخلەمیا ل سەرانسەرێ قەزا ئامێدیێ دێ ل ئامێدیێ ھێتە کومکرن و پاشان دێ ھێتە ژناڤبرن و ئاشکرا کر کو ئەڤ ئامیرە دشێت ئێک دەژمێر دا ٣٠ تا ٤٠ کیلویێن گلێشی ژناڤ ببەت.
و دیارکر، کارمەندێن وان یێن ساخلەمیێ بەشداری خولێن فێکرنێ بووینە و دێ د ڤان رۆژان ئەڤ ئامیرە دەست ب کار بیت.
ئەڤرۆ نیوز :
ژبەر سەدەما پوتەنەدان ب ژیانا وەلاتیان و درۆستکرنا خزمەتگوزاریان ژلایێ حکومەتا ھەرێما کوردستان و کارگێریا خوجھی یا سلێمانیێ سەرجەم رێڤەبەرێن دام و دەزگەھێن حکومەتێ ل قەزا کفری یا سەر ب کارگێریا دەڤەرا گەرمیان ل پارێزگەھا سلێمانیێ دەستکارکێشا.
ئەڤ دەستکارکێشانا ھەموو رێڤەبەرێن قەزا کفری پشتی دەستکارکێشانا قایمقامێ قەزا کفری ھات ل بارا پوتنەدان ب دەڤەرا کفری و دەروبەران ژلایێ حکومەتا ھەرێما کوردستانێ ڤە
ئەڤرۆ نیۆز،زنار تۆڤی:
وه‌كو پووته‌دان ب مالباتێن خێزانێن شه‌هیدێن شه‌رێ دژی تیرورستێن داعش و ژپێخه‌مه‌ت باشكرنا ژیارا خێزانێن وان ئه‌ڤرۆ 20-6-2017 ل هولا كونفرانسان ب ئاماده‌بونا فه‌رهاد ئه‌تروشی پارێزگه‌رێ دهوكێ و چه‌ند به‌رپرسێن حزبی و ئیداری وله‌شكری و مالباتێن شه‌هیدێن شه‌رێ دژی تیرورستێن داعش رێورسمه‌كێ تایبه‌ت هاته ئه‌نجامدان و هاریكاری ل سه‌ر(150) خێزانێن شه‌هیدان ل سه‌نته‌رێ دهوكێ هاتنه به‌لاڤكرن.
ل ده‌ستپێكێ پارێزگه‌رێ دهوكێ په‌یڤه‌ك پێشكێشكر بناڤێ كارگێریا پارێزگه‌ها دهوكێ ده‌ست خوشی ل ده‌زگه‌هێ بارزانی یێ خێرخوازی كر و سوپاسیا فه‌رمانده شێخ سیروان بارزانی كر كو ئه‌ڤ ده‌ستپێشخه‌ریه كریه كو هاریكاریێن دراڤی ل سه‌ر هه‌موو شه‌هیدێن شه‌رێ تیرورستێن داعش به‌لاڤكه‌ت.
پارێزگه‌رێ دهوكێ ته‌كه‌زكر كو خێزانێن شه‌هیدا پێدڤی ب هاریكاریا هه‌موو لایه‌كی هه‌یه و ئه‌ركه‌كێ نه‌ته‌وه‌یی و نیشتمانی و ئاینی یه ل سه‌ر مللێن هه‌موویان کو هاریكاریا وان بكه‌ن و ئاماژه دا دو خالا یا ئێكێ بابه‌تێ ئه‌نجامدانا ریفراندومێ كو دڤێت هه‌موو لایه‌ن پشكداربن چونكی بابه‌ته‌كێ نیشتیمانی ونه‌ته‌وه‌یی یه و ملله‌تێ كورد گه‌له‌ك قوربانی ژبۆ ئازادی و سه‌رخوه‌بوونێ داینه و ئەڤە یا گرێدایه ب هه‌موو خه‌لكێ كوردستانێ ڤه و ژ كه‌ڤندا ملله‌تێ كورد گه‌له‌ك قوربانی بۆ ئازادی و سه‌رخوه‌بوونا كوردستانێ داینه.
هه‌روه‌سا گوت:دڤێت خه‌لكێ كوردستانێ ب خوە بریارێ ل سه‌ر چاره‌نڤیسێ خوە بده‌ن،لێ جهێ داخێ یه هنده‌ك دبێژن ریفراندۆم بابه‌ته‌كێ كه‌سوكی و حزبی یه و ئه‌م دبێژین ئه‌ڤه بریارا خه‌لكێ كوردستانێ یه و گه‌ل دێ قه‌ستا سندوقێن ده‌نگ دانێ كه‌ت و برێكێن ئاشتیانه چاره‌نڤیسێ خوە دیاركه‌ت و مافێ خوە بده‌ستڤه ئینیت .
پاشی په‌یڤا رێڤه‌به‌ریا گشتی یا شه‌هید و ئه‌نفالا و پێشمه‌رگێ كوردستانێ و ئێكه‌تیا زانایێن ئاینی ئیسلامی كوردستان لقێ دهوك و په‌یڤا بنه‌مالێن شه‌هیدا و په‌یڤا ده‌زگه‌هێ بارزانی یێ خێرخوازی هاتنه خواندن، هه‌موویان په‌سنا رولێ شه‌هیدان و قوربانیدانا هێزێن پێشمه‌رگێ كوردستانێ ل دژی تیرورستان كر و داخواز ژ ده‌وله‌مه‌ند وخودان شیانان كر كو چاڤ ل ده‌ستپێشخه‌ریا فه‌رمانده سیروان بارزانی بكه‌ن و هاریكاریكاریا مالباتێن شه‌هیدان بكه‌ن،هه‌روه‌سا داخواز ژ خه‌لكێ كر كو ل رۆژا 25-9-2017 قه‌ستا سندوقێن ده‌نگدانێ بكه‌ن و دەنگی ب بەلێ بۆ سه‌رخوه‌بوونێ بدەن وجانێ شه‌هیدان شاد بكه‌ن.
پاشی ده‌ست ب به‌لاڤكرنا هاریكاریا ل سه‌ر خێزانێن شه‌هیدان هاته كرن.
هه‌ژی گوتنێ یه پتریا شه‌هیدێن شه‌رێ داعش ل سنورێ پارێزگه‌ها دهوكێ نه، وه‌كو ده‌ست پێشخه‌ری فه‌رمانده سیروان بارزانی بریار دایه کو هاریكاریه‌كا دراڤی یا ئێك ملیۆن دیناری بۆ هه‌موو شه‌هیدێن دژی تیرورستێن داعش ب رێیا ده‌زگه‌هێ بارزانی یێ خێرخوازی به‌لاڤكه‌ت،هەروەسا سوبه‌هی ودوزبه ژی به‌رده‌وامی ب لاڤكرنا ڤان هاریكاریا دێ هێته‌دان ل ده‌ڤه‌رێن ئامێدیێ وزاخو و ئاكرێ و به‌رده‌ره‌ش و دێ پتری 1410 خێزانان ژڤێ هاریكاریێ سودمه‌ندبن.
ئه‌ڤرۆ نیۆز،زنار تۆڤى:
ل شه‌ڤێن ره‌مه‌زانێ دا ل باژێرێ زاخۆ چه‌ندین چالاكیێن هه‌مه‌جور بۆ گه‌نجێن ڤى باژێرى هاتینه پێشكێش كرن و هه‌ر شه‌ڤ گه‌نجان ژى ب رێژه‌یه‌كا باش پشگدارى د ڤان چالاكى و به‌ریكانان دا كریه.
حه‌مید سه‌لمان خۆرشید به‌رپرسێ ناڤه‌ندا بالا یا ئێكه‌تیا لاوێن دیمۆكراتا كوردستانێ بۆ ئه‌ڤرۆ نیۆز دیاركر:هه‌ر ژ شه‌ڤا ئێكێ یا ره‌مه‌زانا پیرۆز ناڤه‌ندا بالا یا ئێكه‌تیا لاوێن دیمۆكراتا كوردستانێ ب هه‌ڤكارى ل گه‌ل شاره‌وانیا زاخۆ،ل ناڤا پاركا شه‌هیدان ل باژێرێ زاخۆ چه‌ندین به‌ریكانێن زانستى و ره‌وشه‌نبیرى و هونه‌رى و ئایینى بۆ گه‌نجێن زاخۆ رێكخستینه و د هه‌ر شه‌ڤه‌كا ره‌مه‌زانێ دا ب سه‌دان گه‌نجێن زاخۆ پشكدارى د ئه‌ڤان چالاكیان دا كرینه و گۆت ژى:د شه‌ڤێن ره‌مه‌زانێ دا گه‌نجێن زاخۆ ب خواندنا هه‌لبه‌ستان و ب گۆتنا سترانان شه‌ڤێن مه گه‌رمتر لێكرینه،هه‌روه‌سا چه‌ندین گه‌نج شیان به‌رهه‌م و به‌هره‌یێن خوه دناڤا ڤان شه‌ڤان دا دیار بكه‌ن و شیان خۆ بۆ خه‌لكێ بده‌نه نیاسین و ده‌لیڤه بۆ وان په‌یدابوویه كو ئه‌و بشێن به‌رده‌وامیێ بده‌نه كارێ خوه،هه‌روه‌سا باوه‌ریه‌كا مه‌زن ژى بۆ وان گه‌نجان چێبوویه،ناڤهاتى دیاركر ژى:مه به‌ریكانێن فلكلۆرى یێن كورده‌وارى ژى هه‌بوون و ئه‌م شیان ب رێیا ڤان شه‌ڤان یاریێن كورده‌وارى ژى بۆ گه‌نجێن خوه بده‌ینه دیاركرن،هه‌روه‌سا مه چه‌ندین برگێن ب كه‌نى ژى بۆ گه‌نجێن خوه پێشكێش كرینه،دیسا ل هه‌موو شه‌ڤان رێژه‌یه‌كا مه‌زن یا گه‌نجان ژى پشكدارى دڤان به‌ریكانان دا كریه،ئه‌ڤه بوویه هوكاره‌ك كو گه‌نجێن مه نه میننه دناڤا بازارى دا و قه‌ستا ڤێ پاركێ بكه‌ن،هه‌روه‌سا هه‌تاكو ده‌مێ پاشیڤێ مه هه‌ر شه‌ڤ چالاكى ئه‌نجامداینه و شه‌ڤ بۆ شه‌ڤێ پتر گه‌نج به‌رهه‌ڤبووینه،دیاركر ژى:هه‌ر چه‌نده مه گرنگى ب به‌ریكانێن زانستى ددا و لێ دیسا شه‌ڤه‌كێ ژى مه یاریا گۆستیلانێ كریه،زێده‌بارى ڤێ چه‌ندێ ئه‌و ناڤه‌ندێن دى یێن ب سه‌ر زاخۆ ڤه مه چه‌ندین خۆلێن ته‌پاپێ و یاریێن گۆستیلانێ بۆ گه‌نجێن وان ژى ئه‌نجامداینه،هه‌روه‌سا مه خۆله‌كا سه‌رتراشینێ ژى بۆ 85 قوتابیان د ره‌مه‌زانێ دا ڤه‌كریه و ئه‌م دێ به‌ردوام بین ل سه‌ر ڤان خزمه‌ت و چالاكیان بۆ گه‌نجێن باژێرێ خوه.
نيشاندان