ئه‌ڤرۆ نیۆز،زنار تۆڤى:
ماموستایێ زانكۆیا دهوكێ و شاره‌زا د كاروبارێن وه‌لاتێ توركیا دا زێره‌ڤان به‌روارى ده‌رباره‌ى هه‌لویستێ توركیا هه‌مبه‌رى ریفراندۆمێ ل هه‌رێما كوردستانێ بۆ ئه‌ڤرۆ نیۆز گۆت:توركیا سیاسه‌تا خوه‌ هه‌مبه‌رى فاكته‌رێ كوردى ل ده‌ڤه‌رێ گوهۆریه‌ و زێده‌تر گرنگیێ ب به‌رژه‌وه‌ندیێن خوه‌ یێن ئه‌منى دده‌ت،ب تایبه‌تى پشتى هه‌ڤكاریا ئه‌مریكا ل گه‌ل یه‌په‌گێ و به‌رفره‌هبوونا رۆلێ نێڤده‌وله‌تى ل سووریا،هه‌روه‌سا ریفراندۆم ل هه‌رێما كوردستانێ وه‌ك فاكته‌رێ به‌رفره‌هبوونا ناسیۆنالیزما كوردى دهێته‌ خواندن ژلایێ توركیا ڤه‌ ب تایبه‌تى ژلایێ جه‌هه‌پێ و مه‌هه‌پێ ڤه‌،دیسا ئاكپارتى ژى ژبۆ پاراستنا به‌لانسا سیاسى ل گه‌ل لایه‌نێن ئوپۆزسیۆنا توركیا هه‌ول دده‌ت كارتا ناسیۆنالیزما توركى ب كار بینیت ل گه‌ل كوردان،داكو رێكێ ل پرۆژێن كوردى بگریت ل ڤێ ده‌ڤه‌رێ،هێشتا دبێژیت:هه‌لویستێ توركیا یێ نه‌رێنى یه‌ هه‌مبه‌رى ریفراندۆما هه‌رێما كوردستانێ،لێ ب گشتى دڤێت خواندنا لایه‌نێ سیاسى و میدیایى بهێته‌ ژێك جوداكرن،ژبه‌ركو توركیا هه‌ول دده‌ت به‌رژه‌وه‌ندیێن خوه‌ ل گه‌ل هه‌رێمێ ب پارێزیت ب رێیا دروستكرنا گڤاشتنان ل سه‌ر هه‌رێما كوردستانێ بۆ قۆناغا پشتى ریفراندۆمێ،لێ گرنگه‌ بهێته‌ زانین كو توركیا ژ وان ده‌وله‌تێن هه‌رێمى یه‌،كو هه‌رێما كوردستانێ دشێت ل سه‌ر پره‌نسیپێن جیۆسیاسى و ئه‌منى رێككه‌فتنێ ل گه‌ل ئه‌نقه‌ره‌ بكه‌ت،بۆ رازیكرنا توركیا ل سه‌ر ڤى بابه‌تى،چونكى بێى رازیبوونا توركیا دێ گه‌له‌ك یا ب زه‌حمه‌ت بیت كو هه‌رێما كوردستانێ بشێت ل قۆناغا پشتى ریفراندۆمێ سه‌قامگیریا خوه‌ یا ئابوورى و سیاسى ب پارێزیت.
زێره‌ڤان به‌روارى زێده‌تر دیاركر:سیاسه‌تا توركیا ل گه‌ل عێراقێ و سووریا و ئیرانێ ل سه‌ر ئێك پارچه‌یا ئاخا ڤان وه‌لاتان هاتیه‌ دارێژتن ژبۆ پاراستنا ئێك پارچه‌یا ئاخا توركیا،هه‌روه‌سا رێككه‌فتنێن ئه‌منى یێن توركیا ل گه‌ل عێراقێ به‌رى سالێن نۆتان ل سه‌دێ بورى ل سه‌ر ڤى تێگه‌هى هاتبوونه‌ دارێژتن،له‌ورا هه‌لویستێ توركیا ل گور ئێك پارچه‌یا ئاخا عێراقێ بریاره‌كا نوو نینه‌،لێ یا سه‌یر ئه‌وه‌ كو ئیراده‌یا ئاكپارتى كه‌فتیه‌ ژێر كارتێكرنا ناسیۆنالیزما توركى ب تایبه‌تى لایه‌نێن چه‌پ یێن وى وه‌لاتى،هه‌روه‌سا توركیا پێدڤى ب سه‌قامگیریا هه‌رێمێ هه‌یه‌ ل گه‌ل عێراقێ ژبۆ پاراستنا به‌رژه‌وه‌ندیێن خوه‌،ب تایبه‌تى پشتى ئالۆزبوونا كێشه‌یا سووریێ و كارتێكرنا وێ ل سه‌ر سیاسه‌تا ده‌رڤه‌ یا توركیا،ماموستایێ زانكۆیێ هێشتا دبێژیت:هه‌كه‌ توركیا رازى نه‌بیت كو ریفراندۆم ل هه‌رێمێ بهێته‌ ئه‌نجامدان،دێ شێت ژ هه‌موو ده‌وله‌تێن دى پتر گڤاشتنێ و كارتێكرنى ل سه‌ر هه‌رێما كوردستانێ كه‌ت،ژبه‌ركو هه‌رێما كوردستانێ تێكه‌لیێن سیاسى و ئابوورى ل گه‌ل توركیا هه‌نه‌،هه‌روه‌سا هه‌رێمێ ژى به‌رژه‌وه‌ندیێن ئابوورى و سیاسى ل گه‌ل توركیا هه‌نه‌،نه‌رازیبوونا توركیا دێ ڤه‌رێژێن نه‌رێنى هه‌بن د وارێن سیاسى و ئابوورى و ئه‌منى دا ل هه‌رێمێ،لێ د هه‌مان ده‌مدا هه‌بوونا ئه‌زموونه‌كا كوردى ل باشۆر ب سه‌ركردایه‌تا پارتێن كوردى دێ زێده‌تر به‌رژه‌وه‌ندیێن توركیا پارێزیت ژ هه‌ژموونا ئیرانێ و حوكمه‌تا به‌غدا.
به‌روارى ئه‌و چه‌ند ژى دیاركر:توركیا هه‌ست ب كارتێكرنه‌كا نه‌رێنى دكه‌ت د پرسا ریفراندۆمێ دا،ب تایبه‌تى د وارێ به‌رفره‌هبوونا رۆلێ كوردان دا و هه‌روه‌سا به‌رفره‌هبوونا داخوازیێن سیاسى ل باكۆرێ كوردستانێ بۆ چاڤلێكرنا باشۆرى،هه‌روه‌سا په‌یوه‌ندیێن كوردستانێ ل گه‌ل ده‌وله‌تێن ب هێز دێ باندۆره‌كا جیۆسیاسى ل سه‌ر توركیا دروست كه‌ت،ده‌رباره‌ى هندێ كو توركیا ئه‌و كارتێكرن هه‌یه‌ كو نه‌هێلیت وه‌لاتێن ده‌وروبه‌ر و وه‌لاتێن كه‌نداڤى و یێن ئورۆپى ژى ل دژى ریفراندۆمێ و سه‌ربخۆیا كوردستانێ راوه‌ستن،زێره‌ڤان به‌روارى گۆت:توركیا وه‌كى به‌رێ كارتێكرنا هه‌رێمى نینه‌ و نوكه‌ یا د حاله‌تێ به‌رگریا سیاسى دا ل گه‌ل ئێكه‌تیا ئورۆپى و هه‌روه‌سا گه‌له‌ك ده‌وله‌تێن كه‌نداڤى ژى،دیسا پرسا ئالۆزبوونا سیاسى ل قه‌ته‌رێ پتر كارتێكرن ل سه‌ر رۆلێ توركیا دروست كریه‌،له‌ورا بتنێ توركیا دشێت ل گه‌ل ئیرانێ هه‌ڤكاریێ بكه‌ت،هه‌كه‌ یا رژد بیت ل سه‌ر دژایه‌تیكرنا بریارا خه‌لكێ كوردستانێ بۆ ریفراندۆمێ.