ئەڤرۆ نیۆز،زنار تۆڤی:
وه‌كو قوناغا سیێ‌ یا دانا پارێ‌ پرۆژان بۆ به‌لێنده‌رێن پارێزگه‌ها دهوكێ‌ حوکمه‌تا هه‌رێما كوردستانێ‌ كوژمێ‌ 611 هزار دۆلاران ته‌رخان كرینە بۆ پارێزگه‌ها دهوكێ‌.
ئه‌ندازیار ئۆسمان یۆنس جێگرێ‌ پارێزگه‌رێ‌ دهوكێ‌ بۆ كاروبارێن ته‌كنیكی دیاركریە:وه‌كو قۆناغا سییێ‌ حوکمه‌تا هه‌رێما كوردستانێ‌ كوژمێ‌ 611 هزار دۆلاران ژ بوودجا تایبه‌ت یا پترو دۆلاری بۆ پرۆژێن ده‌ڤه‌را شنگال و زومار ته‌رخانكرینه‌ و گوت:ل رۆژا 14/ 6 دێ‌ ده‌ست ب بەلاڤكرنا وان پارا هێته‌ كرن بۆ به‌لێنده‌رێن دهوك و هه‌ر به‌لێنده‌ره‌ك ب رێژا 6% ژ پارێ‌ پرۆژێ‌ وی دێ بۆ هێته‌ مەزاختن و ئه‌ڤ پاره‌ دێ‌ به‌رده‌وام هێته‌ مەزاختن قۆناغ ب قۆناغ.
ناڤهاتی گوت ژی:پارێ‌ به‌لێنده‌را یێ‌ ڤان پرۆژێن ده‌ڤه‌را شنگال و زومار سه‌رجه‌مێ‌ وان دگەهیتە‌ 9 ملیون دۆلارێن ئەمریکی.

ئه‌ڤرۆ نیۆز،زنار تۆڤى:
ده‌ڤه‌را به‌روارى بالا دهێته‌ هژمارتن ئێك ژ وان ده‌ڤه‌رێن هه‌ره‌ گرنگ بۆ گه‌شتوگۆزارێ ل پارێزگه‌ها دهوكێ،ژبه‌ركو ئه‌ڤ ده‌ڤه‌ره‌ دڤه‌ره‌كا زه‌نگینه‌ ب ژێده‌رێن ئاڤێ و هه‌روه‌سا سه‌قایه‌كێ گه‌له‌ك خۆش و هوین لێ هه‌یه‌،سه‌ره‌راى هندێ كو سرۆشته‌كێ جوان و ره‌نگین هه‌یه‌،زێده‌بارى هندێ ل ڤێ ده‌ڤه‌رێ رێژه‌یه‌كا مه‌زن یا داروبارێن چاندنێ هه‌یه‌،كو ئه‌ڤه‌ژى سه‌رنجا گه‌شتیاران رادكێشیت،هه‌روه‌سا هه‌بوونا چیا و گه‌لى و نهالان ژى هوكاره‌كێ گرنگه‌ بۆ هه‌بوونا گه‌شتوگۆزارێ.
فه‌رسه‌ت عومه‌ر وه‌لاتیه‌كێ ڤێ ده‌ڤه‌رێیه‌ بۆ ئەڤرۆ نیۆز دبێژیت:هه‌ر چه‌نده‌ د وارێ گه‌شتوگۆزارێ دا وه‌كو پێدڤى خزمه‌تا ڤێ ده‌ڤه‌رێ نه‌هاتیه‌كرن،هه‌روه‌سا هه‌بوونا باره‌گایێن په‌كه‌كێ ل ڤێ ده‌ڤه‌رێ ژلایه‌كێ ڤه‌ و ژلایه‌كێ دیڤه‌ بۆمبه‌بانكرنا تۆپخانه‌ و فرۆكێن سوپایێ توركیا وه‌كریه‌ كو خه‌لك قه‌ست نه‌كه‌نه‌ ڤێ ده‌ڤه‌رێ ب مه‌ره‌ما گه‌شتوگۆزارێ،چونكى پرانیا جهێن گۆزارى په‌كه‌كه‌ لێ هه‌نه‌ و ئه‌ڤه‌ بوویه‌ ئه‌گه‌ر كو د ئه‌ڤ ساله‌ دا بزاڤا گه‌شتكرنێ ل ڤێ ده‌ڤه‌رێ لاواز ب بیت و گۆت ژى:ڤێ چه‌ندێ زیانه‌كا مه‌زن گه‌هاندیه‌ كه‌رتێ گه‌شتوگۆزارێ و ئه‌و بزاڤا به‌رى چه‌ند سالان هه‌ى ژى نوكه‌ نه‌مایه‌،چونكى خه‌لك ژ ترسا بوردۆمانكرنێ ئێدى نه‌وێرن ژ جادا گشتى ده‌ركه‌ڤن و قه‌ستا جهێن گه‌شتیارى یێن مینا گه‌لیێ بێشیلێ و كانى ره‌شێ و چه‌ندین جهێن دى یێن گۆزارىو شوونه‌وارى بكه‌ن،هه‌روه‌سا خه‌لك ئێدى نه‌شێن په‌ره‌پێدانێ ب ڤى كه‌رتێ گرنگ بده‌ن ل ده‌ڤه‌را به‌ورارى بالا،سه‌ره‌راى هندێ كو ده‌رگه‌هێ سه‌رزێرى ژى ل ڤێ ده‌ڤه‌رێ دناڤبه‌را هه‌رێما كوردستانێ و وه‌لاتێ توركیا دا هاتییه‌ ڤه‌كرن.
رێڤنگ محه‌مه‌د وه‌لاتیه‌كێ دییه‌ دبێژیت:ل گه‌له‌ك جهێن خۆش و گه‌شتیارى په‌كه‌كێ باره‌گایێن خوه‌ لێ چێكرینه‌ و هه‌روه‌سا ل گه‌له‌ك جهان ژى په‌كه‌كێ خالێن پشكنینێ داناینه‌ و ناهێلن خه‌لك زوو ب زوو قه‌ستا وان جهان بكه‌ن بۆ گه‌ریان و گه‌شتكرنێ و هه‌روه‌سا بۆ بوراندنا ده‌مێن خۆش،له‌ورا ئه‌ڤه‌ بویه‌ رێگریه‌ك ل هه‌مبه‌رى خه‌لكێ و هه‌روه‌سا ژ ترسا بوردۆمانكرنا توركیا ژى خه‌لك نه‌شێن ب چنه‌ گه‌له‌ك جهێن گه‌شتیارى،هێشتا دبێژیت:نوكه‌ په‌كه‌كه‌ به‌رژه‌وه‌ندیا خه‌لكێ مه‌ ل به‌رچاڤ وه‌رناگریت و بۆ وان خه‌م نینه‌ كو خه‌لكێ مه‌ مفاى ژ كه‌رتێ كه‌شتوگۆزارى وه‌رگریت و هه‌روه‌سا جاره‌كادى ئه‌ڤ كه‌رته‌ جوره‌ ڤه‌ژاندنه‌كێ ب خوه‌ڤه‌ ب بینیت،دیسا یا ژڤێ خرابتر ئه‌وه‌ كو پتریا رۆژان توركیا ب تۆپ و فرۆكان ب به‌هانه‌یا په‌كه‌كێ ده‌ڤه‌ر و گوندێن مه‌ بومبه‌باران دكه‌ت،له‌ورا ژ بلى ده‌نگێ تۆپ و فرۆكان مه‌ ئاگه‌ه ژ چ دى نینه‌ و خه‌لكێ مه‌ ژى ئاگه‌ه ژ گه‌شتوگۆزارێ ژى نه‌مایه‌،له‌ورا گه‌شتیار ژى ئێدى قه‌ستا ده‌ڤه‌را مه‌ ناكه‌ن ب مه‌ره‌ما گه‌شتكرنێ.

ئەڤرۆ نیۆز،زنار تۆڤی:
عومەر تاها رێڤه‌به‌رێ گشتى یێ په‌روه‌ردێ ل پارێزگه‌ها دهوكێ ب وه‌كاله‌ت بۆ ئەڤرۆ نیۆز دیارکر:کو سوبەهی 14.6.2017 دێ ئەزموونێن نیشتیمانی یێن قوناغا (9) بنه‌ره‌ت یێن خولا ئێكێ بۆ سالا خواندنێ 2016/2017 و ل ده‌م ژمێر (08:30) سپێدێ دێ هێنه‌ ئەنجامدان و دێ 41 هزار قوتابى پشكدار بن دڤان ئه‌زموونێن نیشتیمانى دا كو ل سه‌ر (574) بنگه‌هان ل سه‌رانسه‌رى پارێزگه‌ها دهوكێ هاتینه‌ به‌لاڤكرن و گۆت ژی:وه‌زاره‌تا په‌روه‌ردێ پێنگاڤه‌كا دى بو سه‌رئێخستنا پرۆسا ئه‌زموونان هاڤێتیە د ئەڤ سالەدا ئەو ژی ئەوە كو دێ رێڤه‌به‌رێن بنگه‌هێن ئه‌زموونان ل پارێزگه‌هێن هه‌رێما كوردستانێ هێنه‌ ئالوگوركرن و (30) رێڤه‌به‌رێن بنگه‌هان ژ پارێزگه‌ها هه‌ولێر وسلێمانیێ دێ هێنە دهوکێ و پتریا وان دێ چنە وان بنگەهان یێن کو قوتابیێن دەرەکی لێ ئەزموونان دکەن و د به‌رامبه‌ر دا (30) رێڤه‌به‌ر ژپارێزگه‌ها دهوكێ ب هه‌مان شێوه‌ دێ ل پارێزگه‌هێن دى یێن كوردستانێ ب كارێ رێڤه‌به‌رێن بنگه‌هێن ئه‌زموونان رابن .
هەروەسا دیارکر ژی:وەزارەتا پەروەردێ ل گەل وەزارەتا گەهاندنێ ل هەرێما کوردستانێ گەهشتینە هندێ کو ل رۆژانێن ئەزموونان بۆ ماوێ سێ دەمژمێران هێلێن ئینتەرنێتێ دێ هێنە برین،هەروەسا گۆت ژی ل رۆژا 15.6.2017 دێ تاقیکرنێن پۆلا 12 ئامادەیی هێنە ئەنجامدان و ژ وان 19 هزار و 39 قوتابی ل پشکا زانستینە و 14 هزار و 293 قوتابی ل پشکا وێژەیی نە و هەروەسا 450 قوتابی ژی ل پشکا پیشەیی ئیسلامینە و ئەڤ قوتابییە ل سەر 664 بنگەهان هاتینە بەلاڤکرن و هەروەسا مە هەموو بەرهەڤی یێن خوە کرینە،ژ پێخەمەت ئەڤ پرۆسەیە ب رەنگەکێ سەرکەفتیانە ب رێڤە بچیت و دیسا دێ رابوونێن توند ژی هەبن،هەمبەری هەر پێشێلکاریەکا د ئەزموونان دا بهێتە ئەنجامدان.