ئه‌ڤرۆ نيوز:

د راگەھاندنەکێ دا کوردێن جوھی ل ھەرێما کوردستانێ و ل دەرڤە پشتەڤانیا خوە بۆ ئەنجامدانا ریقراندۆمێ ل دۆر سەربخوەیا کوردستانێ دەردبرن و دیاردکەن پشتی 100 سالێن بن دەستیێ، دەلیڤە یا ھاتی کوردان دەولەتا خوە یا سەربخوە ھەبیت، لەوما پێدڤیە ئەم ھەموو ب بەلێ دەنگی بۆ سەربخوەیا کوردستانێ بدەین.

کوردێن جوھی ل کوردستانێ وجڤاکا کوردێن جوھی ل ئیسرائیلێ وجڤاکا کوردێن جوھی ل دەرڤە و نوونەراتیا کوردێن جوھی ل ھەرێما کوردستانێ د راگەھاندنەکێ دا دبێژن” پشتی 100 سالێن بێ وەلاتیێ وبن دەستیێ، ئەڤرۆ دەلیڤە یا بوو گەلێ کوردستانێ پەیدابووی کو دەولەتا خوە یا سەربخوە ھەبیت وکوردێن جوھی ب گەرمێ پێشوازیێ ل ریفراندۆمێ بۆ سەربخوەیا کوردستانێ دکەن”.
د پشکەکا دی یا راگەھاندنا کوردێن جوھی دا ھاتیە” پشتی وان سالێن درێژ ل بن دەستیێ وستەم وزۆرداریێ ژلایێ رژێم وحوکمەتێن کوردستان ل سەر ھاتیە دابەشکرن، کو بوویە ئەگەرێ پێشکێشکرنا ب دەھان ھزار قوربانیان، ژبلی بکارئینانا سیاسەتا حەلاندنا رەگەزی کو ب درێژیا سەدان سالان دژی گەلێن کوردستانیچ و پێکھاتێن وێ ئەنجام دابوو، ئەڤرۆ گەلێن کوردستانێ دخوازن ئێدی حوکمێ دکتاتۆری یێ بیانی حوکمڕان نەبیت، لەوما مافەکێ رەوا ودروستێ ھەموو گەلێن کوردستانێ یە کو دەنگ ب سەربخوەیا خوە بدەن”.
جوھێن کورد ئاماژێ ددەن کو جوھیێن کوردستانێ و عیراقێ ب تایبەتی ئایینێ ئێکێ بوون تووشی فەرھودێ وجینوسایدێ وتالانکرنێ ورەشەکۆژیێ وبن ئاخکرنا ب ساخی بووین و ل دووماھیێ ژی ب نەچاری ژ وەلاتێ خوە وجھێن باب وباپیرێن خوە ھاتن دەرکرن ومال ومولکێن وان ھاتن دەستەسەرکرن وھەتاکو مافێ ھاولاتیبوونێ ژێ ھاتە ستاندن ودیارە ئەو پرۆسا نەمرۆڤانە ژ مە جوھیان یا دەستپێکری و ل جینوسایدا کوردێن ئێزدی ب دووماھی ھاتیە”.
ھەر د راگەھاندنێ دا خویا دکەن”ئەم کوردێن جوھی ل کوردستانێ و ل ئیسرائیلێ و دەرڤە پشتەڤانیێ ل ریفراندۆمێ بۆ سەربخوەییێ دکەین و کوردستان ئاخا میدیان و ئاخا پێغەمبەرێن مە ناحۆم ودانیالی یە، چونکی ئایینێ مە دبێژیت، ھەکە ئەسمان مولکێ تە نەبیت، ئایین و ئیراد وزمانێ تە ژی مولکێ تە نابیت، لەوما پێدڤیە ئێک دەنگ و ھەلویست بین دمولکداریا ئاخ وئاڤ وداھات و ئەسمانێ خوە بین دچارچۆڤێ کوردستانەکا سەربخوە دا”.
ل دووماھیا راگەھاندنا خوە دا کوردێن جوھێ دبێژن” ئەم ب ناڤێ ھەموو کوردێن جوھی ل کوردستانێ و ل دەرڤە داخوازێ ژ گەلێن ئازاد و ئایینێن رەسەن یێن میزۆبۆتامیا وکەسایەتیێن خودان پێگەە وھەموو لایەنێن سیاسی وجڤاکی دکەین کو ئەم ھەموو پێکڤە دەنگ ب (بەلێ) بۆ سەربخوەیا کوردستانێ ژبۆ راگرتنا مالوێرانیێ وکۆمەلکۆژیێ وبوھژاندنا رەگەزی وداگیرکاریێ وشێواندنا شارستانیەت ودیرۆک وھەبوونا مە بۆ وێ چەندێ نەڤیێن مە یێن داھاتی بشێن دوەلاتەکێ ئاشتی وئارام دا زێدەتر خزمەتا مرۆڤ ومرۆڤایەتیێ بکەن”.