ئەڤرۆ نیۆز،زنار تۆڤی:
سعودیە و مسر و ئیمارات و بەحرێن لیستەکا تیرۆرێ بەلاڤە دکەن کو ناڤێ 59 کەسان و 12 رێکخراو و کۆمەلان ب خوەڤە دگریت.
ئەو کەسێن دناڤا وێ لیستێ دا، خەلکێ قەتەرێ و وەلاتێن دی یێن عەرەبینە و وەک تیرۆریستان مامەلە دێ ل گەل هێتەکرن.
ئێک ژ وان کەسێن دیار یێن دناڤ وێ لیستێ دا،کو ل بەرێ سپێدەهیا رۆژا ئەینی 9.6.2017 هاتیە بەلاڤەکرن یوسف قەرزاوییە،کو سەرۆکێ ئێکەتیا زانایێن ئاینێ ئیسلامێ یە ل جیهانێ و ب رێبەرێ بلند یێ رەوتێ ئیخوان موسلمین دهێتە نیاسین.
بەشەک ژ وان کۆمەلێن ئێخستینە ناڤ وێ لیستا تیرۆرێ دا کو قەتەر ب پشتەڤانیکرنا وان دهێتە تۆمەتبارکرن، گرووپێن شیعی یێن بەحرەینێ نە.
رۆژا دوشەمبی 5.6.2017 ب ئەگەرێ هەبوونا پەیوەندیێن قەتەرێ ب کۆمارا ئیسلامیا ئێرانێ و دروستکرنا مەترسیا تیرۆرێ و توندڕەویێ بۆ سەر وەلاتێن وان، هەر چار وەلاتێن سعودیە، میسر، ئیمارات و بەحرەینێ بڕیار دا کو هەموو پەیوەندیێن خوە ل گەل قەتەرێ ببرن.
پشتی وان چار وەلاتێن عەرەبی،حوکمەتا هەلبژارتیا یەمەنێ و لیبیا و دوورگەیا مالدیڤ ژی بڕیار دا کو پەیوەندیێن خوە ل گەل قەتەرێ ببرن.
ئەڤەژی ئەو کەس و کۆمەڵە و گرووپن یێن،کو مسر، سعودیە، بەحرێن و ئیماراتێ ئێخستینە ناڤ لیستا تیرۆرێ دا.

ئەڤرۆ نیۆز،زنار تۆڤی:
ئه‌ڤرۆ ئه‌نجامێن دوماهیێ یێن هه‌ڵبژاردنێن په‌رله‌مانێ به‌ریتانیا دێ هێنە راگەهاندن و ل دووڤ ئەنجامێن بەراهیێ یێن هەلبژارتنێن پەرلەمانێ بریتانیا پارتیا تیرێزا مەی زۆرینه‌یا ره‌ها ژ ده‌ستدایە‌،ب رەنگەکی کو پارتیا پارێزگاران 312 كورسى مسۆگه‌ر کرینە و‌ پارتیا كرێكاران 260 مسۆگه‌ركرینە،هەروەسا هەر پارتەک بۆ پێكئینانا حوکمه‌تێ دڤێت 326 كورسیان ب ‌ده‌ستڤە بینیت.
دوهی 8 خزیرانا 2017 بریتانی بۆ ده‌نگدانێ ل هه‌ڵبژاردنێن پێشوه‌خت بۆ ئه‌نجومه‌نێ گشتی یێن وەلاتێ خوە كو هژمارا كورسییان 650 كورسینە،‌ چووینە سه‌ر سندوقێن ده‌نگدانێ.
بۆ ڤان هه‌ڵبژاردنان 46.9 ملیۆن كه‌سان ناڤێ خوە ل تۆمارێن ده‌نگده‌راندا تۆماركربوون.
ل گۆرەی رێژه‌یا ده‌نگێن هه‌ڵبژاردنێن بەرێ، پارتا پارێزگارێن بریتانی ل‌ سەرجەمێ 650 كورسیێن ئه‌نجومه‌نی گشتی (331 كورسی) ب ‌ده‌ستڤە ئینابوون، رێژه‌یا پشکداریا ده‌نگدەران ژی 66.4% تێپه‌ڕاندبوو.
زۆریا بنگەهێن ده‌نگدانێ ل‌ ناڤا قوتابخانه‌ و بنگەهێن كۆمه‌ڵایه‌تی و هۆلێن كڵێسەیان دا دانابوون،بەلێ پێشتر بتنێ ل‌ پۆلێن ناڤ قوتابخاناندا هاتبوونە دانان.
بۆ هندێ کو رێژه‌یا زۆرینه‌یا كورسیێن ئه‌نجومه‌نی ب ده‌ستڤە بینیت، پێدڤیە‌ ئێک ژ وان پارتیان 326 كورسیان ب‌ ده‌ستڤە بینیت.
هێشتا 3 سال مابوون بۆ دەمێ ئه‌نجامدانا هه‌ڵبژاردنێن ئه‌نجومه‌نێ گشتی، به‌لێ تیرێزایێ داخوازکر کو هه‌ڵبژاردنێن پیشوه‌خت بهێنەکرن‌،چونكی وێ دڤیا پارتیا خوە بكەتە خۆدانا زۆرترین كورسیێن ره‌ها د وی ئه‌نجومه‌نی دا،داکو ل دەمێ ده‌ست ب دانوستاندنێن ڤە كێشانێ‌ ژ ئێکەتیا ئورۆپا دکەت ب‌ هێزەکا زێدەتر ل گەل بروکسل دابنیشیت.