ئەڤرۆ نیۆز،عه‌زیز ره‌سول هه‌ورامانی:
پۆلیسێن سلێمانیێ ڕاگه‌هاند کو شەڤا‌ بوری مه‌فره‌زه‌کا وان‌ ل دەمێ دناڤ باژێری دا دگەریان،زارۆکەکێ نوو ژ دایکبووی دبینن،کو هاتبوو هاڤێتن.
رێڤەبەرێ پۆلیسێن سلێمانیێ بۆ ئه‌ڤرۆ نیۆز ئاشكراکریە كو شه‌ڤا ‌بوری دەمێ پۆلیسان کارێ لێگەریانێ دناڤ باژێری دکر زارۆکەکێ کو تازە ژ دایکبووی کو کورە دیتیە کو هاتبوو هاڤێتن.
رێڤەبەرێ پۆلیسێن سلێمانێ زێده‌تر گوتیە ئەو زارۆیێ کور ل‌ گه‌ڕه‌گا ئیبراهیم پاشا ل باژێرێ سلێمانیێ هاتبوو هاڤێتن و لەورا هەر زوو وان ئەو زارۆک‌ ڕه‌وانه‌ی نه‌خۆشخانا باژێری و بەشێ زارۆیان کریە‌،هەروەسا ڤەکۆلینان ده‌ست پێكریه‌،بۆ ئەگەرێن هاڤێتنا وی زارۆیێ تازە ژ دایکبووی.

ئەڤرۆ نیۆز،زنار تۆڤی:
نڤێسینا ئینسكلوپیدیا پارێزگه‌ها دهوكێ ئێكە ژ پروژێن هەرە گرنگ بۆ ڤێ پارێزگه‌هێ و ئەڤە چار سالە کار د ڤی پرۆژەی دا دهێتەکرن و ژ چه‌ندین به‌رگان پێك دهێت و نوکە ئەڤ پرۆژە یێ دقوناغا دیزاینێ دا و د ئەڤ سالەدا دێ کەڤیتە بەر دەستێ خواندەڤانان.
سه‌رنڤیسه‌ر و سه‌رپه‌رشتێ گشتی یێ پرۆژێ ئینسكلۆپیدیا پارێزگه‌ها دهۆكێ موسەدەق تۆڤی بۆ ئەڤرۆ نیۆز دیارکر:ئەڤە چار سالە ئەم کار دڤی پرۆژەی دا دکەین و نوکە ئەڤ پرۆژە یێ د قۆناغا دیزاینێ دا،هەروەسا هەتاکو نوکە پێنج بەرگ یێن هاتینە دیزاینکرن و هه‌موو مژارێن گرێدایی ب پارێزگه‌ها دهۆكێ ڤه‌ هه‌ین تێدا هاتینە بەحسکرن،وەکی جوگرافیا پارێزگەهێ و هەروەسا مێژوویا كه‌ڤن و نوو و یا هەڤچەرخ و یا ئیسلامى تێدا هاتینە بەحسکرن،هەروەسا شوونوار و ئه‌ده‌بیات و فولكلۆر و كه‌لتۆر و هۆنه‌ر ب هەموو جۆرێن خوەڤە تێدا هاتینە بەحسکرن،دیسا مێژوویا په‌روه‌رده‌کرن و فێركرنێ و یا رۆژنامه‌ڤانى و راگه‌هاندنێ و مێژوویا كارگێرى و پێكهاتێن كارگێرى و پێكهاتێن ئایینى و نه‌ته‌وه‌یى و هۆزی یێن پارێزگه‌ها دهوکێ تێدا هاتینە دیارکرن،هەروەسا بابه‌تێن ئه‌ندازییارییا ئاڤاكرنى و مژارێن قانوونى یێن په‌یوه‌ندى ب پارێزگه‌هێ ڤه‌ هه‌ین یێن هاتینە چێکرن،هەروەسا وێنە و نەخشە و دکیۆمێنت و داتایێن پارێزگەهێ ژی تێدا هەنە.
ناڤبری گوت ژی:باده‌كه‌كا به‌رفرەه‌ بۆ هه‌ر قه‌زا و ناحیه‌كێ و هەروەسا گوندێن سه‌ر ب وان ڤە هاتیە تەرخانکرن‌،دیسا ئینسکلۆپیدیا ب گشتی ژ 9 به‌رگان پێک دهێت و هه‌ر به‌رگه‌ك دێ دناڤبەرا 500- 550 به‌رپه‌ران دا بیت‌،هەموو بەرگ دێ بنە پتر ژ 4500 به‌رپه‌ران و هه‌موو پێكڤه‌ دێ هێنه‌ چاپكرن و به‌لاڤكرن،هەروەسا‌ ب پشته‌ڤانییا رێڤه‌به‌رییا گشتى یا ره‌وشه‌نبیرى و هونەری ل پارێزگەها دهوکێ مه‌ ده‌ست ب ڤی پرۆژەی كریه‌، لێ پتریا كاری مه‌ ب ره‌نگه‌كێ خوە به‌خش کریە.
موسەدەق هێشتا دبێژیت:پتر ژ 100 مامۆستایێن زانكۆیێ و چه‌ندین نڤیسكار و هۆنه‌رمه‌ند و ڤه‌كۆله‌ران پشكدارى د چێکرنا ڤی پرۆژەی دا کریە‌،هەروەسا پشتی رەمەزانێ ب دو هەیڤان دێ کارێ دیزاینێ ب دوماهی هێت و د ئەڤ سالەدا ئەڤ پرۆژە دێ کەڤیتە بەر دەستێ خواندەڤانان و دێ به‌لاڤبیت،هەروەسا مە ل بەرە دڤێ قۆناغێدا 2000 دانەیان ژێ چاپ بکەین.