ئەڤرو نیوز:
پاشەکەوتکرنا موچەیێ فەرمانبەران زورترین ئاخفتن لسەر ھاتینەکرن ، ل گورەی دوماھی زانیاری وەسا دھێتە پێشنیارکرن کو تنێ موچەیێ بنەرەتی بو فەرمانبەران بھێتە مەزاختن.
ئاراس خوشناو سەرۆکێ سەنتەرێ پێزانین و ڤەکولینێن ستراتیجی ل کوردستانێ دیارکر کو ل ھەرێما کوردستانێ ژ سەرجەمێ ئەو پارەیێ بو موچەیان دھێتە دان ٤٣% و گۆت: (ئەو موچەیێ کو نھا بو فەرمانبەران دھێتەدان ٥٧% ژ وێ ژ دەرمالەیان دھێتەدان ، ژبەرڤێ نھا پێشنیارەک ھەیە کو تنێ موچەیێ بنەرەتی بو فەرمانبەران بھێتەدان )
زێدەتر بو باس گۆت: (پشکەکا زور یا وان پارەیێن وەکو دەرمالە بو فەرمانبەران دھێتەدان ، گرنگ و پێدڤی نینە ، ئەگەر ئەڤ پێشنیارە سەر بگری تدێ موچەیێ فەرمانبەران ٣% بلند بیت ژ موچەیێ کو نھا دھێتەدان )

ئەڤرو نیوز ، ھلوری:
ئێڤاریا ئەڤرو دەمژمێر ٥ رێزدار نێچیرڤان بارزانی سەرۆکێ حکومەتا ھەرێما کوردستانێ ل گەل ھژمارەکا بەرپرسێن حزبی و حکومی ل مالا خوە کوم بو و دکومبوونێ دا بەحس ل سەرەدانا شاندنێ حکومەتا ھەرێما کوردستانێ بو روسیا و گرێبەستێن ل گەل کومپانیا روسنەفتا رووسی ھاتەکرن ، ل دوماھیا کومبوونێ کونگرەیەکێ رۆژنامەڤانی ئەنجام دا و تێدا ھەموو ھورکارێن گرێبەستا کومپانیا ناڤبری و حکومەتی ئێخستنەبەر چاڤ.
ل دەستپێکا کونگرەیێ رۆژنامەڤانی دار ێزدار نێچیرڤان بارزانی دیارکر کو گرێبەستا ئەوان ل گەل کومپانیا روسنەفتا روسی د سێ واران دا دەرباز بیت و کو ئەو ژی گەشەپێدانا بیرێن پەرتولێ و ژێر خانا ئابووری و وزیەیێ بوویە و گۆت: ( روسنەفت دێ پەترۆلا ھەرێما کوردستانێ کریت و ڤەگوھێزین بو پالاوتگەھێن ئەلمانیا ، و مە تنێ یاداشتەکا لێکتێگەھشتنێ دناڤبەرا خوە دا ئیمزاکریە کو ٥٠% ژلایێ روسیان ڤە دێ ھێتە ب رێڤەبرن و ئەو کومپانی دێ کارێن وەبەرھێنانێ ل بیرێن پەترولێ کەن و گرنگیێ ژێرخانا ئابووری یا ھەرێما کوردستانێ دەتن و ماوەیێ دوو سالان کوپانیا ناڤبری دێ پەترولا ھەرێما کوردستانێ کریت کو ئەڤ یەک ژی دبیتە ئێکەمین جار پەترول ب کومپانیەکا حکومی بھێتە فروتن و بەری نھا بتنێ بازرگانان دکری ، قەبارێ گرێبەستا حکومەتێ ل گەل روسنەفت ژی سێ ملیار دولارە کو ئەڤ یەک ژی تشتەک نوێ و گرنگە بو ھەرێما کوردستانێ و تا رادیەکێ باش دێ ئاریشەیێن قەیرانێن ھەرێما کوردستانێ چارەسەر کەت )
زێدەتر گۆت: (ئەو بوریێن کو نھا ل ھەرێما کوردستانێ بو بەندەرێ جیھان دچیت دێ ھەمان بوری بن بو ڤەگوھاستنا پەترولا روسنەفت ژی ژبەرکو ھەرێما کوردستانێ تنێ شیانێن ھنارتنا ٧٠٠ ھزار بەرمیلان ھەیە د روژەکێ دا ، فروتنا نەفتێ ب رێیا روسنەف ژی بابەتەکێ قانونی یە ل گورەی قانونا نەفت و گازێ یا سالا ٢٠٠٧ کو ئەو ژی پەرلەمانی ئەنجومەنەک دامەزراندیە و ھەموو دەستھەلات داینە دوارێ فروتنا پەترولێ دا ئانکو مە چوو ئاریشەیێن قانونی نینن)
ل بارا ئاریشەیا دناڤبەرا حکومەتا ھەرێما کوردستانێ و کومپانیا دانەغاز ، سەرۆکێ حکومەتا ھەرێما کوردستانێ گۆت: (ھەموو لایەک دزانیت بابەتێ دانەغاز ب فیتکا کێ ھاتیە د روژەڤێ دا ، نھا بزاڤ دھێنەکرن بو ئێکلاکرنا دوسیا دانەغاز و ب ئەنجامێن وێ دلخوشین ، دڤێت لایەنێن سیاسێن ھەرێما کوردستانێ ئەڤێن کو پشکدارێ حکومەتا بنکە فراوانن خوە ئێکلا بکەن یان دڤێت ل گەل حکومەتێ بمینن یان ژی بلا ببنە ئوپوزسیون ھەموو لایەنێن سیاسی د حکومەتێ نونەرێن خوە ھەنە بەلێ ژبلی ئێکەتی نیشتمانی کوردستان لایەنێن دن یێن سیاسی گەلەک د لەزبوون و دەلیڤە نەدا ھەتاکو شاندنێ حکومەتێ ڤەگەرێتە ھەرێما کوردستانێ و نابیت حزبێت کوردستانێ ببنە حزبێت فێسبوکێ کو ئەڤ یەک دبیتە دوریاتی و سەردابرنا خەلکی ، بەلێ خەلکێ ھەرێما کوردستانێ ھوشیارە و ھەموو دزانن کا چ ھەیە و لایەنێن سیاسی چوو نیەت ھەنە)
ل بارا سەرەدانا خوە بو عیراقێ ، ناڤبری گۆت: ( چوو ژڤانێن دیارکری نینن بو چوونا بەغدا و کومبوون ل گەل بەرپرسێن حکومەتا عیراقێ ، بەلێ کومبوون ل گەل حکومەتا عیراقێ ب تشتەک گرنگ دبینم و ئەگەر ژڤانەک ھەبیت ژی پێخوشحالین ل گەل ھەڤدوو کوم ببین )