ئه‌ڤرۆ نیوز; ڤه‌ده‌ر نهێلی:
هه‌رێما كوردستانێ د گه‌ل مه‌زنه‌ كۆمپانییا رۆسی رۆزنه‌فت پێنج رێككه‌فتن ئیمزا كرن كو لێگه‌ریان و به‌رهه‌مهینانا نه‌فتێ ب خوه‌ ڤه‌ دگریت و ل گۆری میدیا رۆسی ئه‌ڤ رێككه‌فتنه‌ مه‌زنترین رێككه‌فتنه‌ رۆزنه‌فت د كۆربه‌ندێ سان پترسبۆرگ دا هه‌تا نها كری.
رۆزنه‌فت دێ شێت كار ل سه‌ر سیسته‌مه‌كێ مه‌زن یێ ڤه‌گۆهاستنا نه‌فتێ كه‌ت كو شیانێن وێ رۆژانه‌ 700 هزار به‌رمیلن و پلان هه‌یه‌ هه‌تا داوییا 2017ێ بگه‌هیته‌ پتری ملیۆن به‌رمیلان.
به‌لگه‌نامه‌یێن رێككه‌فتنێ به‌ری كۆمبوونا سه‌رۆكوه‌زیرێن هه‌رێما كوردستانێ نێچیرڤان بارزانی و سه‌رۆكێ رۆسیا ڤلادیمێر پۆتین هاتنه‌ ئیمزا كرن.
رێڤه‌به‌رێ بجهئینانێ یێ رۆزنه‌فتێ ئیگۆر سێچین و وه‌زیرێ سامانێن سرۆشتی یێ هه‌رێما كوردستانێ ئاشتی هه‌ورامی د چارچووڤه‌یێ كۆربه‌ندێ سان پترسبۆرگ 2017 دا رێككه‌فتن ئیمزا كرن.
كۆمپانیا رۆزنه‌فت راگه‌هاند: كۆمپانییا مه‌ دێ رێ پێ هێته‌ دان بگه‌هیته‌ هه‌رێمه‌كێ كو باشترین هه‌رێمه‌ دنها دا د بازارێ گه‌شه‌كرنێ دا ژ ئالیێ وزه‌یێ ڤه‌، كو پێشبینی دهێته‌ كرن یه‌ده‌گا وێ دۆرێن 45 ملیار به‌رمیلێن نه‌فتێ و 5.66 ترلیۆن میترێن سێجا یێن گازا سرۆشتی بن ( ل گۆری وه‌زاره‌تا سامانێن سرۆشتی یا هه‌رێمێ)”
په‌یڤدارێ رۆزنه‌فت، میخائێا لیۆنتیێڤ گۆت: رێككه‌فتن پێنج رێككه‌فتنێن پارڤه‌كرنا به‌رهه‌مئینانێ (PSA) ب خوه‌ڤه‌ دگریت، به‌رهه‌مئینان ژی د گه‌ل دایه‌، پشكداریكرنه‌ د ژێرخانه‌یێ دا.. گرێبه‌سته‌كا تا راده‌كی مه‌زنه‌ و ب مه‌رجێن باش بۆ رۆزنه‌فتێ. ژ ئه‌نجامێ رێككه‌فتنێ رۆزنه‌فت دێ شێت خوه‌ گه‌هینیته‌ بۆریه‌كا مه‌زن یا نه‌فتێ كو ژ هه‌رێما كوردستانێ دچیته‌ توركیا، گرێبه‌ست بۆ 20 سالانه‌”
لیۆنتیێڤ گۆت ژی: وه‌به‌رهێنانه‌كا ستراتیژییه‌ ل هه‌رێمه‌كا ستراتیژی كو د وه‌راركرنێ دایه‌، ئه‌مریكا و وه‌لاتێن دی ژی دخوازن بگه‌هنێ، كوردستان گه‌له‌ك یا ب مفایه‌ ژ ئالیێ به‌رهه‌مئینانا نه‌فتێ ڤه‌، كوردستان دخوازیت به‌رهه‌مێن خوه‌ هه‌مه‌جۆر بكه‌ت.