ئەڤرۆ نيوز:
بەرپرسێ پەیوەندیێن تورکیا ل حوکمەتا ھەرێما کوردستانێ بۆ رۆژناما ئەڤرۆ ئاشکرا کر، بڕیارە ل دەمەکێ نێزیک وەزارەتا دەرڤە یا تورکیا ب رێیا کەرتێ تایبەت ڤیزێن تورکیا ل دھۆکێ ڤەکەت و دبێژیت: قۆنسلخانا تورکیا ل ھەرێما کوردستانێ بڕیار دایە ژبلی دانا ڤیزا نوونەراتیا خوە ل دھۆکێ ڤەکەت و ھەموو دەستھەلات ژی وەکو قونسۆلخانە دێ ھەبن.
ئەڤرۆ نيوز:
پەیڤدار وسەرکردێ حەشدا شەعبی، کەریم نوری، بۆ ئەڤرۆ دیارکر کو کریارێن لەشکری یێن حەشدا شەعبی دژی داعشێ بەر ب سنۆرێ سووریێ یە و نەدژی پێشمەرگەیە، بەلکو ئەم و پێشمەرگە و کورد د ئێک خەندەکێ داینە دژی داعشێ و گۆت ژی بەری بچینە دناڤ گۆندێ کوچۆ دا، چەکدارێن داعشێ ئێزدیێن دناڤ ویندانا وێ دا ل گەل خوە برینە.
ل دۆر داخۆیانیێن جەواد تلێباوی پەیڤدارێ (عێائیب ئەھلولحەق) کو گرۆپەکێ ب سەر حەشدا شەعبی ڤەیە کو راگەھاندبوو ( بریارا چوونا حەشدا شەعبی بۆ دەڤەرێن ب سەر شنگالێ ڤە ددەستێ حەیدەر عەبادی دایە وەکو فەرماندێ گشتیێ ھێزێن چەکدار وپێدڤی ب رازیبوونا سەرکردێن کوردی نینە و ھەکە درازی ژی نەبن، بلا سەرێ خوە ل دیواری بدەن). کەریم نوری دبێژیت” ئەم ب چ شێوەکی ل گەل ڤان جۆرە داخۆیانیان نینین کو پتر ئازراندن یا تێدا”.
خۆیاکر ژی” پێدڤیە رەوشا ھەموو دەڤەرێن ل پارێزگەھا نەینەوا بۆ بەری 2014 بزڤریت، ئانکو بەری ھاتنا داعشێ و ئەم ل گەل دەست ب سەر داگرتنا ھەر دەڤەرەکێ دا نینین وکورد دزانن کو دستوورێ عیراقێ و مادێ 140 گرەنتیا وان دەڤەران دکەت”.
گۆت ژی” چەکدارێن داعشێ ل کیرێ بن دێ شەڕێ وان کەین و ب دووڤ کەڤین و شەڕێ مە ل گەل داعشێ ل ھندەک دەڤەرێن ئاسێ وەکو بەعاج وشنگالێ و باشوورێ شنگالێ دبەرژەوەندیا مە وکوردان دایە و چو ھەستیاری نینە و دخوازم کورد بزانن کو کار و ئارمانجا مە تنێ داعشە نە چو کەس و لایەنەکێ دی یە”.
ل دۆر دەڤەرێن ژدەستێ داعشێ ھاتینە ئازادکرن، پەیڤدارێ حەشدا شەعبی گۆت” مە گوندێن عەدنانیە (سیپا شێخدرا) وکوجۆ و رەمبوس یا رۆژھەلات و رەمبوس یا رۆژئاڤا یێن کونترۆلکرین زێدەباری گرتنا رێیا سەرەکی دناڤبەرا قەحتانیە (گرعزێر) عەدنانیە (سیبا شێخدرا)، ل کوجۆ مە زیندانەک دیت کو دبیت ئێزدی تێدا ددەستەسەرکری بوون و دەمێ ئەم چووینە دناڤ دا یا ڤالابوو ئانکو چەکدارێن داعشێ دەستەسەرکریێن ئێزدی ل گەل خوە برینە بەری حەشدا شەعبی بچیتە د ناڤ گوندی دا، ل دووڤ پێزانینێن مە ژی رێکخستیا داعشێ سەرکردایەتیا خوە یا لەشکری ژ بەعاجێ بۆ سەر سنوورێ سووریێ یێ ڤەگوھاستی”.
کەریم نوری رەتکر کو حەشدا شەعبی ل وان دەڤەران بمینیت پشتی ژناڤبرنا داعشێ و گۆت” دەمێ ئەم پشت راست دبین ژ دووبارە نەھاتە تێرۆرستان، دێ وان دەڤەران رادەستێ خەلکێ وان کەین، بەلێ پێدڤیە دەرگەھێن باژێر وباژێرکان ھێزێن ھەڤپشک ژ زێرەڤانێن سنۆری و حەشدا شەعبی لێ ھەبن و ھەکە ھەتاکو پێدڤی ب حەشدا شەعبی نەبیت بۆ پاراستنا وان دەڤەران، ئەم لێ نامینین”.
سەبارەت شەڕێ داھاتی دژی داعشی ل تلەعفەرێ، دبێژیت” ژھەموو رەخان مە یا دۆرپێچکری و ھەردەمێ فەرمان بھێت، دێ ھێرشێ کەینە سەر و ھەموو پێشبینی ژی دچاڤەڕێکرینە”.
ئەڤرو نیوز ، نەوزاد ھلوری:
پرۆژێ مونومێنتا قوربانیێن کومکوژیا جینوسایدا بارزانیان ئەڤە شەش سالە دەست پێ کری و ژبەر قەیرانا دارایی ئەڤە چوار سالە ھاتیە راگرتن و کار لسەر ناھێتەکرن ، ئەڤ یەک ژی بویە جھێ دلگرانیا وەلاتی و رێڤەبەریا شەھید و ئەنفالکریێن بارزان.
رێبوار رەمەزان رێڤەبەرێ رێڤەبەریا شەھید و ئەنفالکریێن بارزان بۆ ئەڤرو نیوز گۆت: (ل سەردەمێ کابینا ” دکتور بەرھەم سالح ” بریار لسەر چێکرنا مونومێنتەکێ بو کومکوژی و قوربانیێن جینوسایدا بارزانیان ل گوندێ بارزان دەرچویە ، خوشبەختانە پشتی ماوەیەکێ دەست ب چێکرنا وێ ھاتەکرن و پشکەکا زور ژی ھاتیە چێکرن، بەلێ ئەڤە شەش سال بورین و ھێشتا پروژە نەھاتیە تەمام کرن و ئەڤە چوار سالەژی ب ئێکجاری ھاتیە راگرتن کو ئەڤ یەک ژی جھێ داخێ یە)
زێدەتر گۆت: (مونومێنتا جینوسایدا بارزانیان مەزنترین وەفاداری و رێزگرتنە بۆ شەھیدێن جینوسایدا بارزانیان و مافەکێ گرنگ یێ کەس و کارێن وایە کو ژ نێزیک ئەو بەلگە نامە و وێنە و کەل و پەل و پاشماوەیێن پشتی شەھیدبوونا ھەڤژین و کور و برایێن خوە ماین ببینن ، ئەڤە د دەمەکێ دایە کو مونومێنت بۆ ھەموو کومکوژی و جینوساید و ئەنفالکریێن کوردستانێ ھاتینە چێکرن مینا ھەلەبچە و گەرمیان و چەمچەمال و بادینان بەلێ ھەتا نھا جینوسایدا بارزان یا بێ بەھرە ژ مونومێنتێ و ھەموو ئەو کەل و پەلێن کو ل پشت وان ماین و دەست مەڤە کەفیتین مە ل جھەکێ نەگونجای ھەلگریتنە و د پارێزین ، ژبەرڤێ مە داخوازی ل سەروکێ ھەرێمێ کر و ئەوی سووزدایە کو ھەڤکاربیت بو تەمامکرنا پرۆژێ مونومێنتا جینوسایدا بارزانیان)
دھێتە زانین کو ل ٣١/٧/١٩٨٣ ژلایێ رژێما بەعس ھەشت ھزار بارزانی دناڤبەرا ژیێ ١٠ بو ٧٠ سالیێ ھاتنە رەڤاندن و گرتن ، پاشان ب کریارەک ھوڤانە ل بیابانێن نوگرە سەلمان ل باشوورێ عیراقێ ب ساخی ھاتنە بن ئاخکرن ، و چەند سالێن بوری ژلایێ حکومەتا ھەرێما کوردستانێ ڤە تەرمێ نێزیکێ ٦٠٠ ژ وان جینوسایدکریان بو گوندێ بارزان ھاتنە ڤەگوھاستن و ل گورستانەکا تایبەت دا ھاتنە ڤەشارتن.
ئەڤرۆ نيوز:
بریارە ئەڤرۆ نێچیرڤان بارزانی سەرۆک وەزیرێن ھەرێما کوردستانێ سەرەدانا وەلاتێ رۆسیا بکەت و ل گەل وەزیرێ دەرڤە یێ وی وەلاتی کۆم ببیت.
ژێدەرەکی ژ جڤاتا وەزیرێن ھەرێما کوردستانێ بۆ وار راگەھاند، سەرۆک وەزیرێن ھەرێمێ دێ پشکداریێ د کۆنگرێ ئابووری یێ جیھانی ل باژێرێ سان پێترسبۆرگ دا کەت و ھەر د چارچۆڤێ وی کۆنگرەی دا، ل گەل سێرگیۆ لاڤرۆڤ، وەزیرێ دەرڤە یێ رۆسیا و ھژمارەکا بەرپرسێن وەلاتێن جیھانێ کۆم بیت.
کۆنگرێ ئابووری یێ جیھانی یێ 21 ل دەستپێکا ھەیڤا بھێت ل باژێرێ سان پێترسبۆرگ دێ ھێتە ئەنجامدان.
ئه‌ڤرۆ نيوز:
بریارە ئه‌ڤرۆ جڤاتا وەزیرێن هەرێمێ کۆم ببيت و دانوستاندنان ل دۆر سیستەما بایۆمەترى و نەخشەرێیا پێشڤەبرنا کەرتا ئاڤ و ئاڤەرۆیا هەرێمێ بكه‌ت.
سەمیر هەورامى، سکرتێرێ ڕۆژنامەڤانیێ جێگرێ سەرۆکێ حکومەتا هەرێمێ و پەیڤدارێ پرۆژێ سیستەما بایۆمەترى دياركر “کۆمبوونا جڤاتا وەزیرێن هەرێمێ بەرى نیڤرۆ دێ ده‌ست پێ كه‌ت و تێدا دو مژارێن سەرەکى دێ هێنه گه‌نگه‌شه‌كرن كو دێ راپۆرەکێ دەربارێ پرۆژێ سیستەمێ بایۆمەترى ژ دەستپێکا پرۆسەسێ ڤە هەتا نوكه ده‌ته دياركرن و مژارا دوێ دێ به‌حسێ رەشنڤیسا نەخشەرێیا پێشڤەبرن و چاکسازیکرن د کەرتێ ئاڤ و ئاڤەرۆیا هەرێمێ دە هێته كرن.
ئەڤرو نیوز :
سپێدەیا ئەڤرو تەقینەکا ب ھێز بەغدا ھژارند و د ئەنجام دا کەسەک ھاتە کوشتن چەند کەسە ژی بریندار بوون ، ئەڤە د دەمەکێ دایە کو شڤێدی ژی ل بەغدا تەقینەک روویدابوو و چەندین کوشتی و بریندار پێکەفت بوون.
ژێدەرێن راگەھاندنێن عیراقی ددەت دیارکرن کو تەقین ژ جوورێ ترومبێلەکا تی ئێن تی کری بوویە و ل ناڤەراستا بەغدا بەرامبەر فەرمانگەھا گشتی یا خانەنشینیێ تەقیە و کەسەک ھاتیە کوشتن و پێنج کەسێن دن ژی ھاتینە بریندارکرن.
ھەر ل گورەی راگەھاندنێن عیراقی ھژمارەکا زورا ھێزێن ئەمنی ل جھێ روودانێ بەرھەڤبوینە و بریندارێن روودانێ بو نەخوشخانەیێ فرێکرینە.
دھێتە زانین کو شڤێدی ژی ل دەڤەرا بناڤ کەرادە ل بەغدا تەقینەکا دن روویدابوو و د ئەنجام دا ١١ کەش ھاتبونە کوشتن و ٤٧ کەسێن دن ژی بریندارببوون و ئەڤە سەرەرای کو زیانەکا زورا ماددی بەر ترومبێل و بارزا و جھێن گشتی و بازارگانی ژی کەفتبوون.
ئەڤرۆ نیۆز،زنار تۆڤی:
خوان لاپۆرتا سەرۆکێ بەرێ یێ یانا بەرشەلۆنا هێرشێ دکەتە سەر جۆزێپ ماریا بارتۆمیۆی سەرۆکێ نوکە یێ بەرشە،پشتی وی کۆنگرێ رۆژنامەڤانی یێ بۆ راگەهاندنا ناڤێ ئێرنێستۆ ڤالڤێردی وەک راهێنەرێ نوو یێ یانێ ئەنجامدای.
ل وی کۆنگرێ رۆژنامەڤانی دا، سەرۆکێ یانا بەرشەلۆنا گۆتیە،بەرشە ل سەر دەمێ خوان لاپۆرتای دا پارەیەکێ زۆر مەزاختیە،ئەڤێ ژی لاپۆرتا توڕەکریە و وی ژی بەرسڤا بارتۆمیۆی دایە.
خوان لاپۆرتای ل سەر ئەکاونتێ فەرمی یێ خوە ل سەر تۆڕا جڤاکی یا توویتەرێ نڤێسییە،مێژوو بڕیارێ ددەت کو من چ مفا گەهاندیە بەرشەلۆنا،بەلێ بارتۆمیۆ هەموو گاڤا درەوا دکەت و داخوازێ ژێ دکەت دەست ژ کارێ خوە ب کێشیت.
ئەڤرۆ نیۆز،زنار تۆڤی:
چەند ژێدەران ل نزیك حەشد شەعبی ئاشكراکریە کو موقتەدا سەدر سەرۆكی رەوتا سەدر گرووپەکێ چەكداری یێ نوو ب ناڤێ میلیشیاتێن بەرسڤدانا ب لەز پێكئینایە و راستەوخۆ ب خوەڤە گرێداینە و دێ چەند کارێن جۆراوجۆر پێ جێبەجێ کەت.
ژێدەرێن عێراقی دبێژن ئەڤ میلیشیاتێن نوو ژ میلیشیاتێن سەرایا ئاشتی هاتینە پێکئینان كو ب بالێ بهێز و هژمارەکا زۆر یا میلیشیاتێن سەر بە سەدر دهێتە دانان و هەر هەموو ژی بۆ سوپایێ مەهدی ڤە دگەرن كو سەدری ل سالا 2007 دا راگرتبوون.
ئەڤ میلیشیاتێن نوو یێن سەدری کو چ جوداهی ل گەل میلیشیاتێن دیتر دا نابیت،بتنێ ژلایێ ناڤی و سەركردایەتکرنێ و ئەو دەڤەرە نەبیت یاکو تێدا دهێنە بەلاڤکرن،هەروەسا ل دەڤەرا تاجی و موشاهدە و ل نێزیك بەغدا و باژێرێ سامەرا ل پارێزگەها سەلاحەدین دێ هێنە بەلاڤەکرن و دێ ئەرکێن هەوالگیریێ و ئاسایشێ ب رێڤەبەن.
هەروەسا ئەندامێن ڤێ میلیشیاتێ هەمان ئەندام و چەكدارێن سەرایا ئاشتیێ نە و ئەندامێن وێ ل دووڤ شیان و لایەنگری و شیانێن شەركردنێ هاتینە هەلبژارتن.
ئەڤرۆ نیۆز،زنار تۆڤی:
کۆمسیۆنا هەڵبژارتن و راپرسیێ ل کوردستانێ،دێ پرۆسه‌یا دەنگدانێ ل هەرێما کوردستانێ کەتە ئەلەکترۆنی و ل دووڤ ڤێ چەندێ د ماوێ 24 دەمژمێران دا دێ ئەنجامێن بەراهیێ یێن دەنگدانێ هێنە ئاشکراکرن.
هه‌روەسا كوردستان 24 دیارکریە،کو حوکمه‌تا بەغدا یا ئامادە نینە تۆمارێن دەنگدەران بدەتە ھەولێرێ،لەورا لایەنێن سیاسی یێن کوردستانێ ژی داخواز دکەن کو تۆمارێن بایۆمەتری یێن دەنگدەران بهێنە پاقژکرن.
نيشاندان