ئەڤرو نیوز ، نەوزاد ھلۆری:
ل گورەی قانونا پەرلەمانێ عیراقێ ھەر پەرلەمانتارەکێ ژبەر ئەگەرەک ژ ئەگەران وەکو پەرلەمانتار نەمینیت ، بەربژێرێ پتر ھەمووان دەنگ دەستخوڤە ئینایی ل ھەمان لیست دێ بیتە پەرلەمانتار ، بڤی ئاوایی فەرزندە زوبێر زێباری دێ جھێ خسرو گۆران گریت و بیتە ئەندامێ پەرلەمانێ عیراقێ.
عەرەفات کەریم سەرۆکێ فراکسۆنا پارتی ل پەرلەمانێ عیراقێ دیارکر کو ل گورەی قانونێ فەرزندە زوبێر زێباری ماف ھەیە جھێ خسرو گۆران بگریت و بۆ ئەڤرو نیوز گۆت: (دەستکارکێشانا خسرو گۆران ھاتیە پەسەندکرن و پەرلەمانێ داخواز ژ کومسیونا بلندا سەربەخویا ھەلبژاردنان کریە کو بەربژێرەکێ دن بو پەرلەمانێ عیراقێ بھێتە دیارکرن ل جھێ خسرو گۆران ، ژبەرڤێ ل گورەی قانونێ ئەڤ پوستە دێ بو فەرزندە زوبێر زێباری بەربژێرێ لیستا پارتی دییوکراتی کوردستان ل سنوورێ پارێزگەھا دھۆک بو پەرلەمانێ عیراقێ بیت ، ئەم ژی ناخوین بدەینە کەسێ دن ژبلی فەرزندەی ژبەرکو ل گورەی قانونێ ئەڤ یەک دبیت مافێ وی)
فەرزندە زوبێر زێباری ل سالا ١٩٥٦ ل ئاکرێ ژ دایک بوویە و باوەرناما بەکالوریوس ب قانونێ ھەیە و د ھەلبژاردنێن بوریێن پەرلەمانێ کوردستانێ خوە ب ھژمارە ١٩ خوە بەربژێرکر بوو ، بەلێ دەرنەچوو ، و وەکو بەربژێرێ یەدەک ھاتە دیارکرن.

ئەڤرو نیوز ، نەوزاد ھلۆری:
چالاکڤانەکا کریستان دیارکر کو ھێزێن سەر ب حەشدا شەعبی ل دەشتا نەینەوا تاوانێن دژی مرۆڤایەتی تایبەتی بەرامبەر کریستیانان ئەنجامدانیە، و ھەتا نھا حکومەت و پەرلەمانێ عیراقێ لسەر ئەوان تاوانان بێدەنگە.
لارا یوسف چالاکڤانا کریستانی بۆ ئەڤرو نیوز گۆت: (حەشدا شەعبی و ھێزێن عیراقی تاوانێن دژی مرۆڤایەتی ل دەشتا نەینەوا ئەنجامدانیە ب تایبەتی بەرامبەر کریستیانان و ناخوازن کو ئاوارێن کریستیان بو سەر دەڤەرێن خوە بزڤرن ، بەلێ یا کو جھێ داخێ و پرسیارێ یە بوچی حکومەت و پەرلەمانێ عیراقێ بێدەنگن)
زێدەتر گۆت: (حەشدا شەعبی بارەگایێن خوە ل دەشتا نەینەوا درۆستکرینە داکو ئاوارە نەزڤرین سەر ملک و جھێن خوە ب تایبەتی کریستیان ب تایبەتی تر بو دەڤەرێن بەرتلە و قەرەقوش و کرێمل و تلکێفێ ، بەروڤاژی ئەو دەڤەرێن کو ژلایێ ھێزێن پێشمەرگەی ڤە دھێتە پاراستن پیچ پیچە خەلکێ وان دزڤرن سەر ملک و مال و جھێن خوە)
لارایێ د درێژاھیا ئاخفتنێن خودا دیارکر ژی کو و چەندین خانویێن کریستیانان ژلایێ حەشدا شەعبی ھاتینە خراپکرن و سووتن و گۆت ژی: (ھەر چەندە ھەتا نھا قەبارێ زیانێن حەشدا شەعبی بەرامبەر کریستیانان ل دەشتا نەینەوا ناھێتە زانین ، بەلێ بێدڤی یە سنوورەک بو ئەوان بھێتەدانان ئەگەر دێ تاوانێن وان زێدەتر بن)