ئەڤرۆ نيوز:
جێگرێ سەرۆک کۆمارێ عیراقێ نوری مالکی، ھوشداری سەبارەت بجھئینانا فیدرالیێ دان، ھەڤدەم ئەو کار ب رێیا بەر ب پارچەکرنا عیراقێ یا تائیفەگەری ھژمارت، ھەروەسا ئاماژدا ھندێ، عیراق ل گۆڕ دستورێ نوو وەلاتەکێ ئێکگرتی یە ناھێتە پارچەپارچەکرن.
د کونگرەکێ رۆژنامەڤانی دا ل پارێزگەھا بابل ب ئامادەبوونا سەرۆک ھۆزێن وێ پارێزگەھێ، نوری مالکی گۆت: ھندەک بزاڤ بۆ پەیداکرنا فتنێ ل د ناڤا عیراقێ دا ب ئارمانجا تێکدانا ئێکگرتنا عیراقێ و ل ژێر ھندەک ناڤان دھێنە کرن، دیسا ھندەک بزاڤ ژ ھندەک ئالیان بۆ بدەستڤەئینانا راگەھاندنا عیراقێ و مالپەرێن جڤاکی یێن حوکومی ب مەرەما شەکەستنا عیراقێ دقۆناغا بھێت دا و ڤەگەراندنا وێ بۆ قوناغێن بۆری دھێنە کرن.
جێگرێ سەرۆک کۆمارێ عیراقێ ھەروەسا دیارکر، عیراق نو یا بەرب قوناغەکا گرنگ دەرباز دبیت، دڤێ قوناغا ھەستیار دا دێ ئاڤەدانکرن و ھەلبژارتنێن پەرلەمانی یێن نوو ھێنە ئەنجامدان، ل گۆڕ دیتن و خواندنا کەتواری ژئالیێ تایبەتمەندان ڤە، دڤێت حوکمەتا پڕانیێ ب پشتبەستنا ل سەر ھێزا پەرلەمانی بھێتە دانان، ھەروەسا رونکر، ھەر کەسێ بەرھنگاری وی حوکمەتێ بیت، دشێت ئالیێ بەرھنگاریێ ھەلبژێریت و ئەڤە ل ھەموو دونیایێ ھاتیە روودان.
نوری مالکی ھوشداری ل دۆر بابەتێ گیروکرنا ھەلبژارتنان ژی دان، و گۆت: ھندەک ئالی بزاڤا بۆ گیروکرنا ھەلبژارتنان و ھەلێخستنا دەلیڤەکێ بۆ وەلاتێن بیانی دکەن، حوکمەتەکا ل گۆڕ پیڤەرێن خوە بدانن، کو نوونەریا وانا بکەت، نوونەریا مللەتی نەکەت، کو دبیت عیراقێ بەر ب رێیەکا مەترسیدار و تۆنێلەکا گرتی ببەت.
جێگرێ سەرۆک کۆمارێ عیراقێ ئاشکراکر، چارەکرن بتنێ د ئێکگرتنا نیشتیمانی دا و گرتنا ھەموو ریێیان ل ھەمبەری مایتێکرنێن دەرەکی و ناڤخوەیێ یێن بزاڤا بۆ گیروکرنا ھەلبژارتنان دکەن.
نوری مالکە ھەروەسا داکوکێ ل سەر ھندێ ژی کر، عیراق یا بەرھەڤە بۆ ھاریکاریێ ل گەل ھەموو ئالیان یان وەلاتەکێ ھەبیت، ژبلی وەلاتێ ئیسرائیل، چونکی ھاریکاریا نێدەولی ھێزەکا زێدەتر بۆ وەلاتی پەیدا دکەت، ل دووماھی داخواز ژ جەماوەرێ پارێزگەھا بابل کر، بشێوەکێ بەرفرەە پشکاریێ د ھەلبژارتنان بھێت دا و پرۆسا سیاسی بۆ سەرکەفتنا عیراقێ بکەن.
مالكى بۆچوونا خوه ل سه‌ر فيدراليێ دياركر
نيشاندان