ئەڤرو نیوز ، نەوزاد ھلوری:
ب مەرەما کومکرنا گیایی و ئالیکی بۆ ئاژەلان ل وەرزێ زڤستانێ دا ، ئەڤرۆ شەمبی ل چەند گوندێن سنوورێ ناحیا دینارتە دەست ب دروینا گیایی ھاتەکرن ، دورینا گیایی زێدەباری کو کارەکێ گوندایە دھەمان دەم دا کەلتورەکێ کەڤنێ کوردایە و ھەتا نھا ژی ئەڤ یەک ل گوندان ھەیە.
دڤی واریدا خەلیل پرێسەی ئاکنجیێ گوندێ پرێسە یا سەر ب ناحیا دینارتە بۆ ئەڤرو نیوز گۆت: (ئەم وەکو وەلاتیێن گوندێ پرێسە ئەڤرۆ چوینە دەشت و جھێن نزمێن گوندی بۆ دروینا گیایی بۆ ئاژەلێن خومالی ل وەرزێ زڤستانێ ، و ئەو کەسێ کو نوکە ئالیکی و گیایی نەدوریتن دێ د وەرزێ زڤستانێ دا مینیتە مەتحل و نەچاربیت پاشان بکریت)
زێدەتر گۆت: (شێوازێ دورینا گیایی ھەر دکەڤن دا ب داس و تربانێ بویە ژبەرکو دەڤەرێن مە دەڤەرێن چیایی نە و دەراسە نکارن بگەھنە دەڤەرێن بلند ، بەلێ ھەر چەوا بیت پرانیا خەلکێ گوندی ب شێوازێ زوبارە ھەڤکاریا ھەڤدوو دکەن بۆ دورینا گیایی و دەخلودانی)

دورینا گیایی زێدەباری کو کارەکێ گوندایە ، دھەمان دەم دا ب کارەک کەلتوری و فۆلکلوری ژی دھێتە نیاسین ، شێخزادە ھلوری دانعەمرەکێ دەڤەرێ یە ڤی واریدا بۆ ئەڤرو نیوز دبێژیت: (دکەڤن دا بو دورینا گیایی و دەخلودانی کچ و کور دا ملێن خوە دەن ئێک و قەستا ناڤ زەڤیێن گیایی و دەخلودانی کەن ، و د بەرا ژی ستران و حەیرانوک و یاریێن کەلتوری دکرن ، و پاشان بو خوارنا نیڤرو دا ھەموو ل جھەکێ کومبن و دبەر خوارنێ ژی دا دیسان دەست ب ستران گوتنێ کەن و ھندەک جاران ژی کچ و کور دا ھاڤێژن بەر ئێک بۆ گوتن و یاری و سەرھاتیان و ئێڤاران ژی دا ئێک و پشتیێ گیایی ل پشتا خوە کەن و زڤرن مال)

زێدەتر گۆت: (ھەر چەندە ژیان ل وی دەمی یا ب زەحمەت بوو ، بەلێ تام و خوشیەکا تایبەت ھەبو ، بەلێ نھا ئەڤ یەک نەمایە و گەنجێن مە نکارن دوو دەمژمێران ل بەر گەرمێ گیایی و دەخلودانی ب دورن ئەڤە زێدەباری کو نھا دەراسە و تراکتور و ترومبێل ژی ھەنە بو ڤەگوھاستنا وان ، بەلێ د بەرێ دا گیا ب پشتێ دھاتە ڤەگوھاستن و ھەمووان گوھدرێژ نەبوون ، دیسان ب ھنجاری جوخین دکر و ب دەستی ددایە با)
شێخ زادەی ددرێژاھیا ئاخفتنێن خودا دیارکر ژی کو گیا دچەند قوناغەکان دا دبوریت و گۆت: (پشتی کو گیا دھێتە دورین دێ ل بەر گەرمێ ھێلن ھەتاکو ھشک دبیت ، پاشان دێ کەنە گورزە و رێسی و ل جھەکێ ھێنە خرڤەکرن دبێژنێ قوم ، پاشان ب رێیا پشتێ یان ترومبێلان ھێتە ڤەگوھاستن بو مال و ل جھەکێ تایبەت دانن و دبێژنێ نژاندنا گیشێ ، ل وەرزێ زڤستانێ دێ ھەر جارەکێ گورزە و رێسیەکێ ل گیشێ دەرئینن و دانن بەر ئاژەلان)