ئه‌ڤرۆ نيوز:
بەرپرسەکێ وەزارەتا پێشمەرگەی یا حوکمەتا ھەرێما کوردستانێ ئاشکرا کر کو نوکە دەست ب پڕۆسا چاکسازیێ د ناڤ وەزارەتا پێشمەرگەی دا ھاتیەکرن و شیرەتکارێن ئەمریکی و برێتانی و ئەلمانی ژی دگەل وەزارەتا پێشمەرگەی د ھاریکارن و گۆت: “بڕیارە پێداچوونەکا تمام د ژیان و مووچێ پێشمەرگەی دا بھێتەکرن و مووچێ وان بھێتە زێدەکرن”.
عەمید رۆکن ھەژار عومەر، ئەندامێ لیژنا چاکسازیێ ل وەزارەتا پێشمەرگەی یا حوکمەتا ھەرێما کوردستانێ بۆ رۆژناما ئەڤرۆ دیار کر کو پڕۆسا چاکسازیێ د ناڤ وەزارەتا پێشمەرگەی دا دەست پێ کریە و بڕیارە گھۆرینێن تمام د ناڤ ھەیکەلێ وەزارەتێ و ھێزێن پێشمەرگەی دا بھێنەکرن، بەلێ ھێشتا پڕۆسە نەکەفتیە د بیاڤێ بجە ئینانێ دا، بڕیارە لیژنا چاکسازی و پێداچوونێ دگەل سەرۆک بارزانی و نێچیرڤان بارزانی سەرۆکێ حوکمەتا ھەرێما کوردستانێ کۆمبیت و ئەو پێشنیارێن ھاتینەکرن دێ داننە بەر سەرۆکێ ھەرێما کوردستانێ و دڤێت سەرۆک ژی بووچوونا خوە ل سەر بدەت و پشتی پەسەندکرنێ دێ کەڤیتە د بوارێ بجە ئینانێ دا.
ناڤھاتی ئاماژە دا وێ چەندێ کو شیرەتکارێن ئەمریکی و برێتانی و ئەلمانی ژی بۆ رێکخستنا ھەیکەلێ وەزارەتێ دگەل وەزارەتا پێشمەرگەی د ھاریکارن و گۆت: ” ھەموو ھێزێن پێشمەرگەی دێ بنە ئێک ھێزا سەر ب وەزارەتێ ڤە، چونکی چەندین سالە دەست ب ئێکگرتنا یەکە یێن حەفتێ و ھەشتێ ھاتیەکرن و ھەموو ھێزێن پێشمەرگەی دچارچوڤێ وەزارەتێ دا دێ ھێنە رێکخستن و سەرەرایی ڤێ چەندێ مووچە و دەرمالێن پێشمەرگەی دێ ھێنە زێدەکرن و پێداچوونەکا تمام دێ د ژیانا پێشمەرگەی دا ھێتەکرن”.
ھەموو ھێزێن پێشمەرگەی دێ چنە ب سەر وەزارەتا پێشمەرگەی ڤە
نيشاندان