ئه‌ڤرۆ نيوز:

تەلەڤزیۆنا دھۆک ئەو تەلەڤزیۆنا ب دایک دھێتە نیاسین خودانا (17) پرۆگرانان، پتر ژ (100) کەسان کار دکەن، رۆژانە 10 دەمژمێران پەخشێ خوە دکەت، ھەتا 70 ھزار دەمژمێرێن ئەرشیفی ھەنە ب تنێ ب زمانێ کوردی، د ماوێ (25) سالان دا پتر ژ (500)کەس ژ ڤێ دەزگەھی دەرچووینە و گەلەک نوکە خودان پلە و پۆستێن حزبی و حکومی نە.

عەدنان یوسف، رێڤەبەرێ تەلەڤزیونا دھۆک بۆ رۆژناما ئەڤرۆ گۆت: د ڤان 25 سالان دا شانازیێ دبەین کو شیاینە ب زمانەکێ سادە و بێ تەکلیفە و زغرەفە پەیاما خوە پێشکێش بکەین، شیاینە دبیاڤێ زارۆیان دا پێشکەفتنێ بینین، د بیاڤێ ئافرەتان دا خزمەت کریە، شیایە گەلەک خزمەتا ھزرا نەتەوەیی بکەت، دکیومێنتا چێ کەت، خزمەتا دراما کوردی و ئەو کارێن دھۆک تیڤی ل سالێن 92 بۆ 96 کری گەلەک سەتەلایت ھەنە ھەتا نوکە نەشێن بکەن، ئێک کوردیکرنا پرۆگرامێ زارۆیان و دیسا دراما کوردی و تیپا مۆزیکێ مە ھەبوو و ب سەدان ستران ھەنە، نوکە مە شیان نینن و پێدڤی بوو ئەو سازیێن سەتەلایتێ ئەوێن ھاتین پێدڤی بوو تیپێن مۆزیکێ ھەبان، دراما کوردی و ئەڤە نەیا ب زحمەتە و دێ سپونسەر و ریکلام و داھات ھەبیت و نزانین بۆچی خوە لێ ناکەنە خودان و ئەگەر ژی ھەر دەزگەھێن راگەھاندنێ نە.
ناڤبری زێدەتر گۆت: دیسا دھۆک تیڤی پەیمانگەھا پێگەھاندنا راگەھاندکاران بوویە، چو دەزگەھێن راگەھاندنێ ل کوردستانێ نینن کەسەکی ل دەف مە کارکربیت و چوو بیتە وێرێ، دیسا گەلەکا کارکرینە و نوکە بووینە شرۆڤەگەرێن سیاسی و پەرلەمانتار و رێڤەبەرێن گشتی نە و مامۆستایێن زانکۆیێ نە و ئەڤە ل دەسپێکا وان بوویە و ئەندامێن سەرکرداتیا پارتی نە.
چەند رۆژە یێ رێزێ ل وان کەسان دگرین ئەوێن خزمەت د ماوێ 25 سالان دا کری و دێ بەردەوام ل سەر کارکەین و ھەتا نوکە گەھشتیە (500) کەسان و دێ ھێنە دکیومێنتکرن وەک پەرتووک کو مافێ کەسێ ناھێتە بەرزەکرن.
عەدنان یوسف ئاشکراکر، نوکە (17) پرۆگرام ھەنە و د پلانێ دایە پشتی ھەیڤا رەمەزانا پیرۆز ببنە (20) پرۆگرام، دیسا ب تنێ ب زمانێ کوردی پەیاما خوە دگەھینیت و ئەو ژی چونکو ب تنێ پەیامەکا نافخویی یە و بۆ دەڤەرەکا دیارکری ئەو ژی دەڤەرا بەھدینان، چو نڤسینگەە ل چ دەڤەران نینن.

پشتی 25 سالان دھۆک تیڤی ناگەھیتە ھەموو پارێزگەھا دھۆک

ناڤبری گۆت ژی: پەخشێ مە (10) دەمژمێرن و مە شیانێن کادری نینن، ئەگەر مە گەلەک تشت ھەنە دوبارە نابیت و دشێین پەخشی زێدەبکەین، دیسا ئەڤ دەمژمێرێن دھێنە پەخشکرن ھەموو خومالی نە و چو ژ سەتلائێتا ناھێنە وەرگرتن ، (90%) بەرھەمێ مە خومالی نە و یا دی (10%) درامایێن وەرگێراینە تورکی و عەرەبی بۆ کوردی نە، نامێن دکتورا و ماستەرێ ل سەر دھۆک تیڤی ھاتینە دیارکرن و دیسا دەرگەە بۆ ھەر قوتابیەکی یێ ڤەکریە و بەردەوام ژی دھێن و گەلەک جاران ژ ھەولێر و سلێمانیێ دھێنە ڤێرێ، زەنگینترین ئەرشیف ل کوردستانێ دھۆک تیڤی یە و ل دەسپێکا کوردستان تیڤی ھەر چو ئەرشیفێ مە ھەی مە دایێ و دیسا گەلەک کەنالێن دی ژی دھێن ئەم ھاریکاریێ بۆ دکەین ب دانا ئەرشیفی و ئەڤە چونکە بۆ خزمەتا خەلک و پارێزگەھا دھۆک بوویە، ھەتا (70) ھزار دەمژمێرێن ئەرشیفی مە ھەنە، باوەرناکەم بیاڤەک مابیت و مە خوە لێ نەدابیت.
خویاژی کر، نوکە پرۆگرامێ زارۆیان مە (30%)کریە زمانێ ئنگلیزی، چونکو ئەڤە (2017)یە و ئەگەر مە ل (1992) ئەڤە کربا دا گەلەکا بێ رامان بیت، لێ نوکە ئەنترنێت د ھەر مالەکێ ھەیە و دیسا پەروەردێ پەرتووکێن خوە کرینە زمانێ ئینگلیزی و دڤێت ئەم ل گەل بچین، دڤێت پەیام بھێتە گوھۆرین، لێ ب دیتنا مە نابیت بھێتە گوھۆرین.
ھێشتا گۆت: نوکە دیتن ھەموو ھاتینە گوھورین و نوکە (500) کەنال ھەڤرکیا تە دکەن و دیسا خەلکی کونترۆل د دەستی دایە و پێشتر تو ب تنێ بووی و تە چ ڤیا دا وی دەیە خەلکی نوکە نە خەلکی چو ڤێت دێ وێ دەیێ و دا ژ کەنالێ تەنە بەنە کەنالەکێ دی و تشتێ ئەم پێ سەرکەفتین و ئەوە ئەم گەلەکێ د ناڤ خەلکی دا و گەلەک سەروسیمایێ خەلکی ل سەر شاشا مە ھەیە، ل شوونا مێزگەردەکێ دو کەس دەردکەڤن، ئەم دێ چینە باغچەکێ زارۆیان یان سەیرانا زانکۆیەکێ یان سەیرانا گوندەکی دێ (100) کەس دەرکەڤن و ئەو ھندە مرۆڤ گەلەک مروڤێن وان ب خوە ڤەگرێدان، ھندی مە شیان ھەبن پەیامنێر و ترۆمبێل و کامیرە ھەبن ئەم دچینە ھەموو بزاڤێن دھۆک و ئەم نەدرازینە و مە دڤێت باشتربیت و ب باوەرین دێ باشتر ژی بیت.

كارمه‌ندێن دهۆك تى ڤى ل گه‌شتا خوه‌ يا ئه‌ڤ ساله‌ دا

رێڤەبەرێ دھۆک تیڤی ئەو ژی دیارکر کو پەخشێ دھۆک تیڤی دگەھیتە 90% ل پارێزگەھا دھۆک و ب تنێ ل ھندەک دەڤەرێن نزم ھەنە کو ھندەک گوند و کومەلگە ھەنە ناگەھیتێ و ھەموو بزاڤێ دھێنەکرن ئەو ژی نەمینن، پەخشێ دھۆک تیڤی دگەھیتە سەنتەرێ ھەولێر و سلیمانیێ و مووسل و دیسا پەخش ب گەلەک شێوازان دگەھیت، لێ ئەم نەرازینە ژ پەخشی و ئەڤە ئێکە ژ ئاریشێن مە یێن سەرەکی و ئەڤە ژ نەبوونا شیانانە و سالانە ئامیرێن پێشکەفتی دھێن مودێل و ھێز دھێنە گوھورین.
عەدنان یوسف رێڤەبەرێ تەلەڤزیۆنا دھۆک دیار کر، ژبەر نێزیکبوونا ھەیڤا رەمەزانا پیرۆز پرۆگرامێن تەلەڤزیۆنا دھۆک رەنگە ھەموو پرۆگرامێن خوە ب راوستینیت و ئەڤ سالە ب شێوازەکێ نوو بەرھەڤیێن ڤێ ھەیڤا پیرۆز ھاتینەکرن، دیسا ڤێ ھەیڤا پیرۆز گەلەک پووتە ب درامایێ ھاتیە دان، ژبلی دو درامایێن تورکی و عەرەبی کو ھاتینە وەرگێران بۆ زمانێ کوردی، بزاڤا دکەین درامایەکا خومالی یا کوردی ژی تێدا ھەبیت، ل سالا بوری مە (25) خەلەکێن دراما کوردی بەرھەڤ کربوون بۆ تەلەڤزیۆنەکا وەک دھۆک کو شیانێن وێ کێم شیا دراما کوردی ژی نیشا بینەرێ خوە بدەت.
رێڤەبەرێ دھۆک تیڤی ئاشکراکر ژی کو ھەر دھەیڤا پیرۆز دا دێ چەندین پرۆگرام ھەبن و دیسا دێ کەسانێن نوو ھێنە سەر شاشا دھۆک تیڤی و دیسا پرۆگرامێن ئاینی ب شێوازەکێ نوو باوەرکەین دێ جھێ رازیبوونا خەلکی بن.

کارمەندێن دھۆک تیڤی دزێدەنە و د ھندەک بیاڤان پێدڤی پێ ھەیە

ئەو ژی گۆت: گەلەک جاران تشتەکێ نوو ھاتیە د گۆرەپانێ دا و خەلکی قەست کریێ و پشتی ماوەکێ کێم ل مە زڤریە ڤە، دیسا ل سەرانسەری پارێزگەھا دھۆک ھەر کەسەکی بیرھاتنەک ل گەل تەڤزیۆنا دھۆک ھەنە و ھەر کەسەکێ دھۆک و کێمەک نەبن خوە ل ڤێ شاشێ دا دیتی یە و ئەڤە مەزنەھیەک و دەولەمەندیەک بۆ ڤێ تەلەڤزیۆنێ یە، ئەڤجا دبینم بۆ قوناغا پشتی (25) سالان چو بھێتەکرن و گرنگە چاڤ خشاندنەک ل شێوازێ پشتەڤانیا حزبێ بۆ دەزگەھێن سەر ب حزبێ ڤە بھێتەکرن و ڤەکۆلین بھێتەکرن و ئەو سازیێن راگەھاندنێ پێدڤی پێ نەبیت دبینم شەرم نینە بلا یان بگرن یان دروست بکەن و ھەتا دھۆک تیڤی ژی بیت و رێیێن دروستکرنێ ب ساناھی نە و نە ب زحمەتن، کادرێ زێدە و بێ شیان رێیەکا دی بۆ بھێتە دیتن، نابێژم مۆچە بھێتە برین، بەلکو شولێ وان نە راگەھاندبیت.
رێڤەبەری گۆت: مە ئاریشا پەخشی و ئامیران ھەیە، چونکە تەکنۆلۆژیا گەلەک بلەز یا دچیت و ئەم نەشێین خوە ئاپدێد بکەین، نوکە دێ کامیرەکێ کرم پشتی شەش ھەیڤان دێ جۆرەکێ دی ھێت و ب ڤی رەنگی ھەموو ئامیران و ژ بەر ڤێ چەندێ گەلەک جاران کارتێکرن ل کوالێتیا پەخشی و دەنگی و پرۆگرامان دھێتەکرن.
ئەو ژی گۆت: بۆ مێژوو ئەم ئێکەم کەنال بووین ل سەرانسەری کوردستانێ پەخشێ راستەوخۆ ھاتیەکرن، ل ھەیڤا حەفت سالا (1992) و پشتی بۆرینا (2) ھەیڤان ل سەر دەمەزراندنێ، پشتی ھاتنا جەنابێ سەرۆکی بۆ دھۆک پەیڤەک پێشکێشکر ل چاپخانا بلند ھنداڤ بازاری ھندەک بزاڤ ھاتنەکرن بۆ ڤەگوھاستنا راستەوخۆ و ئەو ب بزاڤ ب سەرکەفتن و راستەوخۆ پەیڤا سەرۆکی ھاتە ڤەگوھاستن و مە ئەرشیف ھەیە و مخابن نوکە مە ئەو شیان نینن.