ئه‌ڤرۆ نيوز:
نوشداره‌كێ ناڤدارێ ئيتالى بانگه‌شه‌يا وێ چه‌ندێ دكه‌ت كو ئه‌و كه‌سێن پشتى مرنێ مێشكێ وان ب ته‌كنيكا فشارا كوور “تجمد عميق” دهێته راگرتن، دشيان دايه د ماوێ سێ سالان زيندى بمينن.
پرۆفيسۆر سێرچيۆ كاناڤارۆ، رێڤه‌به‌رێ گرۆپێ نشته‌رگه‌ريێن پێشكه‌فتى ل كۆمه‌لا ده‌ماران ل تورينۆ، دڤێ د ماوێ 10 هه‌يڤێن بهێت دا، ئێك ژ دژوارترين نشته‌رگه‌رى ئه‌نجام بده‌ت، ئه‌و ژى چاندنا سه‌رى يه بۆ لاشه‌كێ دى، ئه‌و ژى نه‌خۆشه‌كێ رۆسى يه، كو هه‌موو لاشێ وى ئيفليج بوويه و ب تنێ سه‌رێ وى كار دكه‌ت.
ب سه‌ده‌هان كه‌س ل به‌ر مرنێ نه يان ژى تووشى ئيفليجا لاشى بووينه و بڕيار دايه ب ڤێ ته‌كنيكێ مێشكێ خوه هه‌لگرن و چاڤه‌رێ وێ چه‌ندێ بكه‌ن كو ئه‌و ته‌كنيك زێده‌تر پێش بكه‌ڤيت و جاره‌كا دى ڤه‌گه‌رنه ژيانێ، ئه‌ڤه ژى د پێناڤى رزگاربوون ژ نه‌خۆشيا ئيفليجێ.
ئه‌ڤ پرۆفيسۆره د وێ باوه‌رێ دايه كو د ماوه‌كێ نێزيك دا دێ ژياندنا مێشكێ ئێكێ يێ جه‌مه‌دگرتى ئه‌نجام ده‌ت.
كاناڤارۆ د چاڤپێكه‌فتنه‌كێ دا ل گه‌ل كۆڤارا “ئووم” يا ئه‌لمانى ئاشكه‌را دكه‌ت كو پرۆسا زيندوكرنا نه‌خۆشان، ل دامه‌زراوا “ئه‌لكۆر”ى ويلايه‌تا ئه‌ريزۆنا يا ئه‌مريكا ب رێڤه چيت.
دبێژيت: “ئێكسه‌ر پشتى وێ نشته‌رگه‌ريا چاندنا مێشكێ مرۆڤى و ڤه‌گوهاستنێ بۆ لاشه‌كێ دى، دشيان دايه ده‌ست ب زينديكرنا مێشكێ بكه‌ين”.
ئه‌و پرۆفيسۆر ته‌كستێ ل سه‌ر وێ چه‌ندێ دكه‌ت كو نشته‌رگه‌ريا چاندنا مێشكى، چو كێشێن لاوه‌كى نينن، ب تايبه‌ت كارڤه‌دانا لاشى بۆ ره‌تكرنا مێشكێ چاندى، ب گۆره‌ى گۆتنێن وى، چونكو سيسته‌مێ به‌ره‌ڤانيێ كاڤه‌دان نامينيت.
روون ژى كر كو چاندنا مێشكى دێ ده‌رفه‌ته‌كێ ئێخيته به‌ر سينگێ مرۆڤاتيێ دا كو بزانن پشتى مرنێ چو ژيانه‌كا دى هه‌يه، ل گه‌ل وێ چه‌ندێ ژى ئاماژه ب هه‌بوونا كێشێن دى يێن لاشى و ده‌روونى دكه‌ت كو پشتى نشته‌رگه‌ريێ روو دده‌ن.
كاناڤارۆ دبێژيت: “ئێك ژ كێشان ئه‌وه كو چو پشكه‌ك ژ لاشێ ده‌رڤه‌يێ مرۆڤى وه‌كو خوه نامينيت، خوه سه‌ر ژى، ب تنێ مێشك نه‌بيت، دێ چيته سه‌ر لاشه‌كێ جودا، ئه‌و ژى دێ هنده‌ك كاودانێن دى ئينيته پێش كو ب چو ره‌نگه‌كى ب ساناهى نينن”.
ل گه‌ل هندێ ژى كاناڤارۆ يێ رژد ل سه‌ر بزاڤێن خوه، به‌لێ نوشدارێن بريتانى گۆمان يا ل سه‌ر هه‌يى، كو ئه‌ندامه‌كێ ئالۆزێ لاشى وه‌كو مێشكێ مرۆڤى، پشتى به‌ستينى، جاره‌كا دى بكه‌ڤيته كارى و بهێته ژيانێ.
هه‌ر چه‌نده دادگه‌ها بلندا ئيتاليا ره‌زامه‌ندى ل سه‌ر هه‌لگرتنا لاشێ كچه‌كا سنێله دايه، به‌لێ نوكه شاره‌زا دبێژن، ئه‌گه‌رێن ڤه‌گه‌ريانا وێ كچێ بۆ ژيانێ، گه‌له‌ك د لاوازن.
پرۆفيسۆر كلايڤ كۆين، مامۆستايێ زانستێ كۆئه‌ندامێ ده‌ماران ل زانكۆيا كينگ ل له‌نده‌ن دبێژيت: “ئه‌وێن بانگه‌شێ بۆ وێ ته‌كنيكا نوو دكه‌ن، نه‌شێن چو ڤه‌كۆلنيان بينن كو گيانداره‌كێ شيرده‌ر، ب وێ ته‌كنيكى پشتى به‌ستنێ ڤه‌گه‌ريابيته ژيانێ، چ ئه‌و لاشێ گياندارێ شيرده‌ر د شله‌يا نايترۆجينى ژى دا هه‌لگرت بيت”.
پرۆفيسۆر كاناڤارۆ ل گه‌ل بزاڤێن نوشدارى بۆچوونه‌كا دى يا تايبه‌ت ب ژيانا مرۆڤان ڤه هه‌يه و دبێژيت: “هه‌كه چاندنا سه‌رێ مرۆڤى سه‌ربگريت، ئه‌ڤه دێ بيته ئاماژه‌كا دى يا كوور بۆ هشياريا ژيانا مرۆڤى و دێ كارتێكرن ل سه‌ر ئاينێ مرۆڤان ژى هه‌بيت.
كاناڤارۆ دبێژيت: “د ماوێ چه‌ند هه‌يڤه‌كێن كێم دا و د نشته‌رگه‌ريه‌كا كێم وێنه دا كو به‌رى نوكه نه‌هاتيه كرن، دێ سه‌رێ نه‌خۆشه‌كى ل سه‌ر لاشه‌كى جودا كه‌ين، كو ب چو ره‌نگه‌كى ژيانا د ناڤ وى سه‌رى دا نامينيت”.
دبێژيت ژى: “هه‌كه شياين ئه‌وى نه‌خۆشى ڤه‌گه‌رينينه ژيانێ، ئه‌ڤه دێ راپۆرتا ئێكێ يا راست وه‌رگرين ده‌رباره‌يى ژيانێ پشتى مرنێ، چاندنا سه‌رى بۆ جارا ئێكێ ده‌رفه‌تا وێ چه‌ندێ دده‌ت دياركرن دا كو بزانين ژيانه‌ك پشتى مرنێ هه‌يه يان نه؟”.
ئه‌و پرۆفيسۆرێ ئيتالى به‌رده‌واميێ دده‌ته گۆتنێن خوه و دبێژيت: “هه‌كه مه سه‌لماند كو مێشك زيندى دبيت، ئه‌ڤه ئاين بۆ هه‌تا هه‌تايێ نامينيت، چونكو مرۆڤى پێدڤى پێ نابيت و ژ مرنێ ناترسيت و مه‌رگ نامينيت، پێدڤى ناكه‌ت بچيته كه‌نيسه و مزگه‌فتان، ئه‌ڤه ژى دێ بيته خاله‌كا وه‌رچه‌رخان د مێژوويا مرۆڤاتيێ دا”.
نيشاندان