ئەڤرۆ نیوز:
زێرەڤان بەرواری ماموستایێ زانکۆیا دھوکێ یە و شارەزایە د سیاسەتا تورکیا دا د دیدارەکێ دا بۆ رۆژناما ئەڤرۆ دبێژیت:گوھۆرینێن رۆژھەلاتا ناڤین پشتی بوھارا عەرەبی ستراکچەرێ ئاسایشا ھەرێمێ گوھۆری و کارتێکرنا راستەخۆ ل سەر سیاسەتا دەرڤە یا ئەنقەرە ژی ھەبوویە،ژبەر کو ئەنقەرە ئەڤ گوھۆرینە ب ئاریشە بۆ سیاسەتا خوە یا دەرڤە دایە نیاسین،لەورا گوھۆرینا ھەلویستێن تورکیا حالەتەکێ نورمالە د مەیدانا سیاسی دا و بتایبەتی ل دەڤەرەکا وەکی رۆژھەلاتا ناڤین دا،ھەر چەندە ھەلویستێ تورکیا ھەمبەر ھەرێما کوردستانێ ب بوھارا عەرەبی کارتێکرن لێ ھاتە کرن،لێ نە بوو سەدەما گوھۆرینا ستراتیجیەتا تورکی ھەمبەری ھەرێما کوردستانێ،ژبەر بەرژەوەندیێن تورکیا ل گەل ھەرێما کوردستانێ،بتایبەتی راگرتنا بەلانسا ھێزێ بەرامبەری ئیرانێ،ھەروەسا ھەرێما کوردستانێ ژلایەکێ دیڤە گرنگیا بەردەوام ب تورکیا دا ژ پێخەمەت پاراستنا خوە ژ ھەژموونا ئیرانێ و گڤاشتنێن بەغدا کو جێبەجێکارا سیاسەتا ئیرانێ یە،زێدەتر گۆت:ھەلویستێ تورکیا بەرامبەر ھەرێما کوردستانێ و کەیسێ ئالایێ کوردستانێ ل کەرکوکێ ڤە دگەریت بۆ ئەگەرێن سەرەکی و ئێک ژ وانا بۆ پروپاگندا ریفراندۆما دستووریە ل تورکیا کو ب ڤان ھەلویستا ئاکەپە دێ ھەستا دەنگدەرێ ناسیۆنالیزما تورکی بتایبەتی لایەنگرێن جەھەپێ و مەھەپێ و ئاراستەکرنا وان وان بۆ دەنگدانا بەلێ ل سەر راستڤەکرنا دەستووری،کو ئاکپارتی پێدڤی ب دەنگان ھەیە بۆ گوھۆرینا سیستەمێ سیاسی و بجھئینانا پلانێن خوە،یا دویێ ژی ئەوە تورکیا ژ سیناریۆیێن پارتیێن دوور ژ پرۆژێ خوە دترسیت،لەورا ھەر کاودانەک ل ھەرێما کوردستانێ بۆ تورکیا جھێ خواندن و گرنگی پێدانێیە،لەورا تورکیا ھەلویستەکێ تۆند ھەبوو بۆ رێگرتن ل ھەولێن نەدیار و دژایەتکرنا تورکیا ب رێیا ئالۆزیێن ل کەرکوکێ.
زێرەڤان بەرواری ئەو ژی دیارکر:تورکیا دشێت گڤاشتنا ل سەر ھەرێما کوردستانێ بکەت بۆ دانوستاندنا ل گەل تورکیا بۆ ھەر پلانەکا کوردی بۆ قۆناغا پشتی داعش و بتایبەتی پاراستنا بەرژەوەندیێن خوە ل ھەرێما کوردستانێ بەرامبەر ھێزێن ھەرێمی و ھەروەسا پاراستنا بەرژەوەندیێن ئابووری،دیسا تورکیا کارتێن بھێز ھەنە بەرامبەر ھەرێما کوردستانێ و ژبەر نەچاریا حوکمەتا ھەرێمێ بۆ پەیرەوکرنا سیاسەتا نە سەربخۆ ل گەل ئەنقەرە،لەورا تورکیا دێ کارتێن ئابووری ل گەل کوردستانێ ب کار ئینیت،ھەکە بڤێت پرۆژێن کوردی ب راوەستینت یان ژی چ نەبیت د بەرژەوەندا خوە دا ل سەر وان پرۆژا رازی بیت،ھێشتا خویاکر:تورکیا دھێتە نیاسین نێزیکترین ھێزا ھەرێمی بۆ ھەرێما کوردستانێ و گوھۆرینێن داھاتی ل دەڤەرێ دێ ب رێیا تورکیا و ئیرانێ دروست بن،لەورا چارەنڤیسێ کوردان ل سە رھەلویستێ تورکیا و ئیرانێ یە و بتایبەتی دەولەتێن زلھێز وەکی بەرێ خوە ل کێشەیێن رۆژھەلاتا ناڤین ناکەنە خۆدان،ھەروەسا نوکە تورکیا کارتا سیاسی و ئەمنی و ئابووری د دەستدایە بۆ دروستکرنا گڤاشتنا ل سەر ھەولێرێ و دێ زێدەتر کارتا سیاسی و ئابووری ب کارئینیت،ھەکە یا رژد بیت ل سەر ھەلویستێ خوە بەرامبەری ھەرێمێ و کێشەیا کەرکوکێ،چونکی کەرکوک د فەرھەنگا ناسیۆنالیزما تورکی دا پارچەکە ژ دەڤەرێن کو بھێز ژ تورکیا ھاتینە دوورخستن و ھەبوونا تورکومانا ژی ئەڤ کاودانە زێدەتر ئالۆزکریە ل گەل ھەرێمێ.
ماموستایێ زانکۆیا دھوکێ ئەوژی دیارکر:دڤێت ھەرێما کوردستانێ د ئەڤان کاودانێن ئالۆز دا ب ژیواری سەرەدەریێ ل گەل تورکیا بکەت،بتایبەتی پشتی شەرێ مۆسل حوکمەتا ناڤەندی دێ پتر بھێز کەڤیت و میلیشیاتێن خوە وەک کارتا لەشکری دژی ھەرێمێ ب کارئینیت،لەورا ھەرێمێ پتر پێدڤی ب تورکیا ھەیە،لەورا تورکیا دشێت ژلایێ ئابووری ڤە دەست بەردارێ ھەرێما کوردستانێ بیت،ژبەر پەیوەندیێن خوە ل گەل وەلاتێ سعودیێ و قەتەرێ ژلایێ پەترۆلێ ڤە دشێت د کێشەیا کەرکوکێ دا پەیوەندیێن خوە ل گەل بەغدا موکومتر لێ بکەت،ھەروەسا تورکا ھەلبژاردە ل بەر ھەنە و ھەلبژاردەیێن کوردستانێ گەلەک کێمترن،لێ تورکیا ب ئێکجاری پەیوەندیێن خوە ل گەل ھەرێما کوردستانێ نابریت،ژبەرکو ئەڤرۆ تورکیا پرۆژەیەکێ ھەرێمی ھەیە بۆ راگرتنا بەلانسا ھێزێ ل گەل ئیرانێ،لەورا پێدڤی ب جیۆیۆلیتیکا ھەرێمی ھەیە،ھەروەسا ھەرێم دشێت ب رێیا کارتا سۆنیا ھەڤکاریەکا راستەوخۆ ل گەل تورکیا بکەت،د ھەمان دەمدا تورکیا مەترسیا بەلاڤبوون و بەرفرەھبوونا پەکەکێ ھەیە ل باشۆر و ئەڤ چەندە ل سەر ئەنقەرە د سەپینیت کو بەردەوامیێ بدەتە سیاسەتا خوە یا نەرم بەرامبەر ھەرێما کوردستانێ بۆ پاراستنا بەرژەوەندیێن خوە.