ئه‌ڤرۆ نیوز:
سه‌رۆكێ هه‌رێما كوردستانێ د كۆمبوونه‌كێ دا ل گه‌ل پارێزگار و جڤاتا پارێزگه‌ها مووسل راگه‌هاند ، هه‌رێما كوردستانێ نه‌شێت به‌رامبه‌ر پاشه‌رۆژا مووسل ته‌ماشه‌ڤان بیت و پێدڤیه‌ ل پاشه‌رۆژا پێكهاتێن وێ و پارێزگه‌ها نه‌ینه‌وا و ئاسایشا هه‌رێمێ پشت راست بین و ئێدى رێ نه‌هێته‌ دان كو كاره‌سات و مه‌ترسى دووباره‌ ببن.
سه‌رۆك بارزانى ئاماژه‌ دا وێ چه‌ندێ كو جڤاتا پارێزگه‌ها نه‌ینه‌وا نوونه‌رێن شه‌رعى یێن روونشڤانێن نه‌ینه‌وانه‌ و دووپات كر كو ئه‌و ئاگادارى ئێش و ئازارێن ئاكنجیێن پارێزگه‌ها نه‌ینه‌وایه‌ و هه‌ڤكاریكرنا ئاواران ژى ب ئه‌ركه‌كێ مروڤى و نیشتیمانى وه‌سف كر و ئاماژه‌ دا وێ یه‌كێ كو جڤاكا نێڤده‌وله‌تى و به‌غدا ل هه‌مبه‌ر هاریكاریكرنا ئاواران یا خه‌مسار بوویه‌.

ئه‌ڤرۆ نیوز:
هه‌ردو مه‌كته‌بێن سیاسى یێن پارتى دیموكراتى كوردستان و ئێكه‌تى نیشتمانى كوردستان، ب سه‌رپه‌رشتیا مه‌سعود بارزانى سه‌رۆكێ هه‌رێما كوردستانێ سه‌باره‌ت ره‌وشا كه‌ركووكێ و كێشێن د ناڤبه‌را هه‌ولێر و به‌غدا و ئه‌نجامدانا ریفراندومێ سوبه‌ بۆ سه‌ربخوییێ كۆم بن.
عه‌دنان موفتى ئه‌ندامێ مه‌كته‌با سیاسى یا ئێكه‌تیێ راگه‌هاند، بوچوونه‌كا وه‌سا هه‌یه‌ كو كۆمیته‌كا هه‌ڤپشك د ناڤبه‌را هه‌موو لایه‌نێن كوردستانێ بهێته‌ پێكئینان ب تایبه‌ت ئه‌و لایه‌نێن پشته‌ڤانیا سه‌ربخوییێ دكه‌ن.
موفتى دیاركر د چارچوڤێ به‌حسكرنا پرسا ریفراندومێ، پێدڤیه‌ به‌حسێ كاراكرنا په‌رله‌مانێ كوردستانێ بهێته‌ كرن چونكه‌ ئه‌و بابه‌ت پێدڤى ب قانوونێ هه‌یه‌.

ئه‌ڤرۆ نیوز:
سه‌رۆكێ جڤاتا پارێزگه‌ها كه‌ركووكێ راگه‌هاند، ئه‌و بڕیارا په‌رله‌مانێ عیراقێ ل دۆر داگرتنا ئالایێ كوردستانێ ل دام و ده‌زگایێن حكومى ل كه‌ركووكێ بجه نائینن و گۆت” بڕیارا په‌رله‌مانێ عیراقێ ، بڕیاره‌كا نه‌ دستوورى یه‌ ژبه‌ر كو ل دووڤ بڕیارا دادگه‌ها فیدرالى ئه‌ڤ ده‌ڤه‌ره‌ بخوه‌ دێ بڕیارێ ده‌ن و مادێ 115 یێ دستوورێ عیراقێ ده‌ستهه‌لات دایه‌ پارێزگه‌هان بۆ ده‌ركرنا بڕیارێن تایبه‌ت ب ده‌ڤه‌رێن خوه‌ڤه‌”.
رۆژا 28 ئادارا 2017، جڤاتا پارێزگه‌ها كه‌ركووكێ ب پرانیا ده‌نگان، بڕیار دا ب بلندكرنا ئالایێ كوردستانێ ل سه‌ر دام و ده‌زگایێن حكومى یێن پارێزگه‌هێ و دوهى په‌رله‌مانێ عیراقێ ئه‌و بڕیاره‌ ره‌تكر.