ئەڤرۆ ، قەیس وەیس :
یاریزانێ یانا گارە ھەوار حەسەن د دیدارەکا کورت دا بۆ رۆژناما ئەڤرۆ دیارکر ئەگەرێ سەرەکی یێ ئەنجامێن لاواز یێن تیما ئەوان دخولێ دا بۆ نەبوونا یاریزانێن خودان شیان و شارەزایە ژبەرکو یاریزانێن خودان شارەزا د ڤان جورە خولان دا پێدڤی نە باشترین گروڤەژێ ھەتانوکە ئەو نەشیاینە سەرکەفتنەکێ توماربکەن دخولێ دا پشتی بورینا دەە یاریان.
ھەردیسان ناڤبری دیارکر ژێ بارێ دارایی یێ زوربەیا یانێن پارێزگەھێ یێ لاوازە لێ ئەو شیان یاریزانێن خودان شیان و سەربور دخولێ دا ب دەستخوڤە بینن بەروڤاژی ئەڤ چەندە دناڤ تیما مە دا نەبوو راستە رەوشا دارایی گەلەک یا لاواز بوو لێ یانێ ل دەمێ مووچەیێ یاریزانان ژێ دایێ ھەمیا وەسا ھزر کر دێ ئەنجام باشتر بن لێ ھەر ب ھەمان شێوەبوون ئەڤەژی دبینت نەبوونا یاریزانێ خودان شارازا و نەبوونا ھژمارەکا یاریزانێن خودان شیان دناڤ تیمێ دا زڤریت.
یاریزانێ ھێلا بەرەڤانیا یانا گارە بەردەوامی دا ئاخفتنێن خوە زێدەتر گوت: گوھورینا راھێنەرێ تیمێ دڤیابا زیتر ھاتباکرن یان ژێ ل وی دەمی نە ھاتباکرن دا چ کارتێکرن ل سەر تیمێ نەکربان و ھەر چەندە ئەز ل گەل گوھورینا راھێنەری بووم لێ نە د وی دەمی دا دڤیابا زیتر ھاتباکرن .
ل دووماھیێ ھەوار گوت: مانا تیمێ د دەستێ مە دا بوون لێ مە ب خوە ژ دەستێن خوە ئینا دەرێ ل گەل خوە مە خالێن گرنگ ل یاریگەھا خوە ژ دەستدان و دبینت ئەو رەوشا نوکە تیم تێدا ھەژی داکەفتنێ ینە بۆ خولا پلا ئێک .

زاخۆ,ھشیار دوبانکی:
پشتی دەنگوباسێ دەست کارکێشانا سەروکێ یانا زاخۆ ل چەند رۆژێن بوری بەلاڤەبووی و دوھی ئەڤ دەنگوباسە تەکید بووی رۆژ بۆ رۆژێ چونا یاریزانێن یانا زاخۆ یێ بەر ب زێدەبوونێ ڤە دچن کو بتنێ نوکە پێنج یاریزان ماینە ل یانێ ژ تیما خولا عیراقێ و ھەر دوھی دەستەیا راھێنەریا رومانی ژێ تیم ب جە ھێلا .
ل دۆر ڤێ چەندێ لوقمان ئیبراھیم ئەندامێ دەستەیا کارگێریا یانا زاخۆ بۆ روژناما ئەڤرۆ دبێژیت : ھەتا نوکە ئەم چ تشتی ژ خوە نزانین و رۆژ بو رۆژێ چوونا یاریزانێن مە یێن تیما خولا عیراقێ یێ بەر ب زێدەبوونێ ڤە چن کو کو ل ماوێ بوری حەفت یاریزانان پشتی یاریا جەویە پێکھاتیێ تیمێ ب جە ھێلایە ئەوژی ئیبراھیم وحەیدر ومستەفا وحەیدر وعەلی عەلا اللە و ھەردیسان ھەردو یاریزانان ھونەر ئەحمەد و دیار یاخی ژێ ل گەل دا نە ل دو رۆژێن بوری دا ژێ ھەر ئێک جاسم محەمەد و دلوڤان مەھدی و حاتم زێدان و بیلال ژێ تیم ب جە ھێلایە نوکە رەوشا تیمێ گەلەک لاواز بوویە و چارەنڤێسێ تیمێ ئەم نزانین دێ چەوا بیت بۆ پشکداری کرنێ دخولا عیراقێ دا بتنێ مە چار یاریزان نوکە ماینە ئەوژێ عەباس عوبێد و ئەحمەد شرشاب ل گەل ھەردو پیشەکاران کو ب ڤێ چەندێ رەوش دێ گەلەک لاواز بیت.
ناڤبری ئاماژە ب وێ چەندێ ژێ کر دەستەیا راھێنەریا رومانی ژێ دوھی یانە ب جە ھێلایە و ھەتانوکە ئەم نزانین کا سەروکێ یانێ یێ نوو دێ چو بریار ھەبن بۆ پشکداری کرنێ دخولا عیراقێ دا .

ئەڤرۆ نیوز، ھەژارمەعروف:

ئێکەتیا تەپا پێ یا عیراقێ یێ بزاڤێن وێ چەندێ دکەن راھێنەرێ ھەلبژارتیێ عیراقێ رازی شنێشل رازیبکەم بۆ وێ چەندێ ئەنجامدانا یاریا ھەڤالینی ژ دەرڤەی وەلاتێ ئیرانی بھێتەکرن پشتی چەندین ھەلبژارتیا رەتکری یاریێ ل گەل ھەلبژارتیێ عیراقێ بکەن ل وەلاتێ ئیرانێ. سەروکێ ئێکەتیا تەپا پێ یا عیراقێ مەسعود عەبدولخالق د داخویانیەکێ دا بۆ رۆژناما ئەڤرۆ دیارکر ئەو یێ بزاڤێن کەن راھێنەرێ ھەلبژارتیێ ئێکێ رازیبکەن بۆ وێ چەندێ یاریەکا ھەڤالینی ل گەل ھەلبژارتیێ ئەزەربیجان بکەن ل باژێرێ باکو پشتی ئێکەتیا ئەزەربێجانی رازیبوو یاریەکا ھەڤالینی ل گەل ئەوان بکەت لێ ئەوژی ل وەلاتێ خوە. زێدەتر ناڤبری دیارکر ئەوان بزاڤێن مەزن ل گەل ھژمارەکا مەزن یا ھەلبژارتیێن ئاسیا وی عەرەبی کرن بۆ کرنا یاریەکا ھەڤالینی ل گەل ھەلبژارتیێ عیراقێ ل وەلاتێ ئیرانێ لێ ئەوان ھەمیا رەتکر ل وەلاتێ ئیرانێ یاریێ بکەن و راھێنەرێ ھەلبژارتیێ عیراقێ ژێ دخوازیت ل وەلاتێ ئیرانێ یاریێ بکەت بۆ وێ چەندێ پتر مفای ژ وەلاتێ ئیرانی بینت ژبەرکو یاریا وی یا بھێت ل وی وەلاتی ھێتەکرن. ناڤبری ئاماژە ب وێ چەندێ ژی کر ئەو دێ کومبوونەکێ ل گەل راھێنەری کەن دبیت بھێتە رازیکرن ل سەر کرنا یاریێ ل وەلاتێ ئەزەربیجان ژبەرکو کەش ھەوایێ وی وەلاتی گەلەک نێزیکی یێ ئیرانێ یە .

ئەڤرۆ:

راپورتێن رۆژنامەڤانی یێن نێزیکی یانا بەرشەلۆنا ئاشکرا کرینە یاریزانێ وێ یێ بەرازیلی رافینا ئەلکانتارا دێ بۆ ماوەکی ژ یاریگەھێن تەپا پێ دورکەڤیت ژبەر ئەو ھنگافتنا توش بوویێ ل شەڤا شەمبیا بوری بەرامبەر یانا ئەتلەتیکو مەدرید پشتی یاریزانێ ناڤبری ب گولچیێ تیمێ یێ بەرشەلۆنا شتیگێن کەڤتی .

ئەوان رۆژناما ئاشکراکریە راپورتا نوژداری یا بەرشەلۆنا وەسا دیارکریە رافینا بوو دەمێ چەند حەفتیان ژ یاریگەھان دورکەڤیت ژبەرکو ھنگافتنا وی یا سڤک نینە کو زیان ب سەروچاڤێن وی کەڤتیە ھەردیسان دڤنا ئەوی ژێ زیان ڤێ کەڤتی یە و شکەستی یە .

ئەوان راپورتێن رۆژنامەڤانی ئاماژە ب وێ چەندێ ژی کریە یاریزانێ ناڤبری بۆ یاریا بھێت بەرامبەر ئەتلەتیکو مەدرید یێ ئامادە نابیت ژ قارەمانیا کاسا ئیسپانیا .

زاخۆ.ھشیار دوبانکی:

ناڤەندا چالاکیان و لاوان ل باتیفا رابو ب رێکخستنا بەریکانەکا ترومپێلا دناڤ بەفرێ دا بۆ گەنجێن دەڤەرێ کو ھەڤرکیێن وێ ل دەڤەرا گولیا ھاتنەکرن کو ئەڤە دبیتە جارا ئێکێ بریکانەکا ب ڤی شێوەی ل زاخۆ دھێتە رێکخستن دناڤ بەفرێ دا، پشتی ھەڤرکیەکا خوش دناڤ پشکدارێن ڤێ بەریکانێ دا یاریزان مەروان ئەحمەد شیا رێزا ئێکێ بھێت و عەبدوللا سالح رێزا دویێ ھات و دلوڤان شاھین رێزا سیێ ھات .

حەمید سەلمان بەرپرسێ ناڤەندا بالا یا ئێکەتیا لاوێن دیموکراتا کوردستانێ ل زاخۆ بۆ روژناما ئەڤرۆ دبێژیت : ب ھەلکەفتا ١٨ێ شوباتێ سال روژا دامەزراندنا ئێکەتیا لاوێن دیموکراتا کوردستانێ ناڤەندا چالاکیێن باتیفا ب فەر دیت چەند چالاکیان بۆ گەنجێن دەڤەرێ رێکبێخیت و ژ ئەوانا ئەڤ بەریکانە بوو کو ئەڤە دبیتە جارا ئێکێ بەریکانا ھاژوتنا ترومپێلا دناڤ بەفرێ دا دھێتە رێکخستن مەرەم ژێ ب ڤێ بەریکانێ ئەو بوو پتر گەنجێن دەڤەرێ فێری ڤێ بەریکانێ بەن کو ل چەندین وەلاتان ئەڤ بەریکانە ھەیە .