ئەڤرۆ نیوز، حکمەت زێوکی:
بەرپرسێ پەیوەندی و راگەھاندنا رێڤەبەریا پۆلیسێن پارێزگەھا دھۆکێ بۆ رۆژناما ئەڤرۆ دیار کر کو ئەڤرۆ سپێدێ 30ى كانوونا دويێ2017 ب ئەگەرەکێ نەدیار کورێ سەرۆکێ باژێرڤانیا دھۆکێ ب دەبانجێ دووماھیێ ب ژیانا خوە ئینا.
رائید ھێمن سلێمان بەرپرسێ پەیوەندی و راگەھاندنا رێڤەبەریا پۆلیسێن پارێزگەھا دھۆکێ خویا کر کو ناڤێ ڤی گەنجی (چ ڕ) و تەمەنێ وی 17 سالن و قوتابیێ ئامادەیی بوو و ل مالا خوە ب گولەکا دەبانجێ دووماھی ب ژیانا خوە ئینایە و ھەتا نوکە چ پێزانین ل بەر دەست نینن کا بۆچی خوە کوشتیە.
بەرپرسێ پەیوەندی و راگەھاندنا رێڤەبەریا پۆلیسێن پارێزگەھا دھۆکێ گۆت “تەرم بۆ پشکا نوشداریا داد ھاتە ھنارتن بۆ دیارکرنا ئەگەرێ مرنێ و مە ژی ژ ئالیێ خوەڤە بادەکا ڤەکۆلینێ ڤەکریە و ڤەکۆلین ل سەر بوویەرێ دێ یا بەردەوام بیت”.
ل دووڤ ھندەک پێزانینێن ئەڤرۆ نیوز کو دەربارەی ئەگەرێ خوە کوشتنا وی بدەست خوە ئێخستین، دیارە ئاریشەکا قوتابخانێ ھەبوویە و وی ژی ب دەلیڤە زانیە کو کەس ل مال نەبوو و ب دەبانجێ دووماھی ب ژیانا خوە ئینا.
نووترين نووچه
- نەخوەشخانەیا پەنجەشێرێ ب ئاست و كوالێتییەكا بلند دێ كەڤیتە د خزمەتا وەلاتییاندا
- پەرلەمانتارەك: ئەمریكا و ئۆپێك فشارێن ل ئیراقێ دكەن بۆ هنارتنا پەترۆلا هەرێما كوردستانێ
- ل نێزیك پارتی دێ بارەگەهێ مەكتەبا رێكخستنێ ل كەركووكێ ڤەكەت
- دەلیڤەیا سەختەكاریێ ب رێكا تەكنەلۆژیایێ یا هاتیە كێمكرن و دەنگ ب دەستی ژی دێ هێنە هەژمارتن
- پێدڤییە نیازپاكی و ئیرادەیەكا راستەقینە بۆ چارەسەركرنا كێشەیان هەبیت
- پێدڤییە هەوا هەلبژارتنان د سەقایەكێ ئازاد دا و دوور ژ گرژیێ بهێنە ئەنجامدان
- مەسرور بارزانی: ب هێزبوونا پارتی ب هێزبوونا كوردستانێیە
- گرنگە پڕۆژەیێ (هەژمارا من) بەردەوام بیت
- سەرۆكێ حوكمەتا هەرێمێ بۆ گوپیتكا جیهانییا سەقای هاتە ڤەخواندن
- پترییا كێشەیان دێ هێنە چارەسەركرن
سهرهكى Twitter
پێلەکا دی یا بەفر و بارانێ دێ ھەرێمێ ڤەگریت
ئەڤرۆ نيوز:
رێڤەبەریا گشتیا کەشناسی و بیڤەلەرزێ ل ھەرێما کوردستانێ راگەھاند کو ل سپێدەیا رۆژا ٣١ێ ڤێ مەھێ فشارا دەریا سۆر دێ کارتێکرنێ ل سەر دەڤەرێن جودا جودایێن ھەرێمێ دروست کەت، ب ڤێ سەدەمێ ژی بەفر دێ ل دەڤەرێن چیایی یێن ھەولێر، سلێمانی، دھۆک و ھەلەبجە باریت.
راگەھاندنا کەشناسیا ھەرێما کوردستانێ کو دوھی 29/1/2017 بەلاڤ کریە تێدا ھاتیە، کو رۆژا دوشەمبی رێکەفتی 30ی کانوونا دویێ 2017 ئەسمان دێ عەورەکێ ناڤەندی بیت و دێ سار بیت و پلێن گەرمێ دێ ھێنە خوار و ل دانێ سپێدێ ژی جەمەد دروست بیت و ل سەنتەرێ پارێزگەھێن سلێمانی و دھۆکێ ئەگەرا بەفربارینێ دھێتە کرن، ھەروەسا ل ھەولێر و کەرکووکێ ژی بارانەکا کێم دێ باریت.
پشکا پێشبینیان خویا ژی کریە کو دێ ئاراستێ بای ژی دێ باکوورێ رۆژھەلات بیت ب رەنگەکی د ناڤبەرا 5 ھەتا 10کم دا و ماوێ دیتنێ ژی دێ د ناڤبەرا 8 بۆ 10کم دا بیت، پلێن گەرمێ ژی دێ د ناڤبەرا -3 بۆ 5 پلان دا بن
کەشناسیا ھەرێمێ ئاماژە ب وێ ئێکێ ژی کریە، کارتێکرنا ئەڤێ بەفر و بارانێ ھەتا رۆژا پێنج شەمبی ب لاوازی ل سەر ھەرێما کوردستانێ دێ مینیت.
هه‌تا نوكه ل دهۆكێ چه‌ند باران باريه؟
ئه‌ڤرۆ نيوز:
رێڤه‌به‌ريا گشتيا كه‌شناسى و بيڤه‌له‌رزێ د ئاماره‌كێ دا راگه‌هاند كو د ماوێ 24 ده‌مژمێرێن بۆرى دا ل ويستگه‌هێن جودا يێن هه‌رێما كوردستانێ ب رێژێن جودا باران باريه كو ب ره‌نگه‌كێ ل سه‌نته‌رێ پارێزگه‌هێ چو رێژێن باران بارينێ نه‌هاتينه تۆماركرن به‌لێ رێژا ئه‌ڤ ساله ب ره‌نگه‌كێ گشتى دايه دياركرن كو گه‌هشتيه 183.8ملم.
ھەرێما کەتالۆنیا دەست بەرھەڤیێن ریفراندۆمێ دکەت
ئەڤرۆ نيوز:
پشتی ھەرێما باسکێ ھەرێما کەتالۆنیا ژی دەست ب خوەنیشادانێن بۆ دیارکرنا مافێ چارەنڤیسێ دکەت و باژێرێ بەرشەلۆنا ب ھەموو پێکھاتێن خوە ڤە کەمپانیا راگەھاندنا دەولەتا سەربخوە یا کەتالۆنیا دەستپێ کریە.
ل دووڤ راگەھاندنەکا پارتا سۆسیالیستا کەتالۆنیا کو ئالیگرێ راگەھاندنا دەولەتا سەربخوەیە و دخوازیت ھەتا داویا ئەڤسالە ب ئەنجامدانا ریفراندۆمەکی چارەنڤیسێ خوە دیار بکەن، د داخۆیانیەکا نڤیسکی دا راگەھاندیە کو مافێ گەلێ کەتالۆنیایە وەکو ھەموو نەتەوێن ل جیھانێ دەولەتا خوە دروست بکەت و جھێ خوە د نەتەوێن یەکگرتی دا بگریت.
پارتا ناڤھاتی رەخنێن دژوار ل حوکمەتا ئسپانیا ژی گرتیە و دیار کریە کو دڤێت حوکمەتا ئسپانیا رێ بدەت ب رەنگەکی دۆستانە گەلێ کەتالۆنیا ریفراندۆمێ ئەنجام بدەت و ب ئیرادا خوە یا ئازاد پاشەرۆژا خوە دیار بکەت، ژ بەر کو ھەرێما کەتالۆنیا ب ھەر ئاوای ھێژایێ دەولەتەکا سەربخوەیە و د گەلەک واران دا ژ ئسپانیا پێشکەڤتی ترە وەک رەوشا ئابووری، جڤاکی و دیمۆکراسیا ناڤخوە.
ل ئالیێ دی چالاکڤانێن سازیێن سڤیل ل باژێرێ بەرشەلۆنا دەست ب کەمپینا ئازادیێ کرینە و ژ ئالیەکی ڤە ئیمزایان بۆ ریفراندۆمێ کۆم دکەن و ل ئالیێ دی ژی رۆژانە دێ داکەڤنە مەیدانان و دێ خوەنیشادان ساز بکەن دا کو دەنگ و رەنگێ گەلێ کەتالۆنیا بھێتە نیاسین و د ئاستێ نێڤدەولەتی دا پشتەڤانی بۆ دەولەتەکا سەربخوە یا کەتالۆنیا زێدەتر ببیت.
ھەر د ڤێ مژارێ دا حوکمەتا ئسپانیا ژی راگەھاند کو ل دووڤ دستوورێ ئیسپانیا ھەرێما کەتالۆنیا بێی رزامەندیا حوکمەتا ناڤەندی نەشێت ریفراندۆمەکا وەسا ئەنجام بدەت و دیار کریە کو ئسپانیا ب ھەرێما کەتالۆنیا و ھەرێمێن دی جوانتر و ب ھێزترە و د جھێ جودابوونێ دا دڤێت یەکگرتنا ئسپانیا بھێتە خورت کرن و ژ سەرکردێن کەتالۆنی خواست پێداچوونێ د سیاسەتێن خوە دا بکەن.
جێگرێ سەرۆک وەزیرێن تورکیا: ھەدەپە بۆ چارەسەریێ دەلیڤیەکا مەزن بوو
ئەڤرۆ نيوز:
جێگرێ سەرۆک وەزیرێن تورکیا راگەھاند کو نھا د رۆژەڤا وان دا چو تشتەکێ ب ناڤێ قۆناغا چارەسەریێ نینە و دێ شەرێ ل دژی تیرۆرێ ب ھەموو رەنگەکێ بەردەوام بیت و ل دۆر پارتیا دیموکراتیک یا گەلان ژی راگەھاند کو ھەدەپە بۆ چارەسەریێ شانسەکی مەزن بوو، لێ وان ئەو دەلیڤە ژناڤبرن و ئەڤرۆکە پرانیا ئەندامێن وان ژ بەر تومەتا تیرۆرێ ھاتنە گرتن.
نۆمان کورتولمیش جێگرێ سەرۆک وەزیرێن تورکیا پشکداری د بەرنامەکا تەلەفزیونا CNN Turk دا کر و ل دۆر رەوشا نھا یا تورکیا و چارەکرنا پرسا کوردی داخۆیانیێن گرنگ دان و راگەھاند کو ھەدەپە دشیا وەکو پارتەکا سیاسی ل تورکیا رۆلەکێ گرنگ بۆ چارەکرنا پرسا کوردی و پرسێن دی یێن تورکیا ب گێریت، لێ مخابن وێ پارتیێ نەشیا ب رەنگەکێ سەربخوە سیاسەتێ بکەت و ھەموو گاڤان فەرمان بۆ وان ژ قەندیلی دھات و ژ بەر ھندێ ژی ئەو دەلیڤا باش یا کو بۆ ھەدەپێ ھەبوو ژ دەستان چوو و گۆت: (مە وەکو حوکمەت گەلەک جاران داخواز ژ ھەدەپێ کربوو کو خوە ژ رێکخراوا تیرۆرستی دوور بکەت و ل گۆر قانوونێن سیاسی ل تورکیا سیاسەتێ بکەن و دەلیڤەکا گەلەکا باش ژی بۆ وان ھەبوو، لێ مخابن ھەدەپێ خوە ژ رێکخراوا تیرۆرستی دوور نەکر، ھەموو گاڤان فەرمان ژ قەندیلی بۆ وان دھات و ل گۆر وان فەرمانان ژی ھەدەپێ ھەلویستێ خوە دیار دکر و ژ بەر ھندێ ژی ئاستەنگی بۆ خوە دروست کرن و رەوشا نھا ژی نیشا ددەت کو ھەدەپێ نەشیا مفایێ ژ وان دەلیڤان وەربگریت).
جێگرێ سەرۆک وەزیرێن تورکیا د پشکەکا دی یا ئاخڤتنا خوە دا ئەو یەک ژی دیار کر کو نھا ل رۆژەڤا مە دا چو تشتەک ب ناڤێ قۆناغا چارەسەریێ نینە، بەلکو نھا ئەم ب ھەموو رەنگەکی شەرێ تیرۆرێ دکەین و تورکیا دانوستاندنان ل گەل رێکخراوەکا تیرۆرستی ناکەت، ھەدەپە دشیا خوە بکەتە ناڤەندەکا باش بۆ چارەسەریێ، لێ وان خوە ژ تیرۆرێ دوور نەکر و ئاستەنگی ل ھەمبەر خوە دروست کرن و گۆت: (ئەڤرۆکە ھوون ژی دزانن کو پرانیا ئەندام و سەرکردێن وێ پارتیێ ھاتینە گرتن و ل گۆر قانوونێن تورکیا دێ لێپرسین ل گەل وان ھێنە کرن و ھەکە تومەتێن ل سەر وان بھێنە سەپاندن دێ ھێنە سزا دان).
جێگرێ سەرۆک وەزیرێن تورکیا د دووماھیا ئاخڤتنا خوە دا ژی ئاماژە ب ریفراندۆما ل دۆر سیستەمێ سەرۆکاتیێ ل تورکیا کر و راگەھاند کو ئەم ھێڤیدارین خەلکێ تورکیا پشتەڤانیێ ل سیستەمێ سەرۆکاتیێ بکەت، چونکو سیستەمێ سەرۆکاتیێ دێ د بەرژەوەندیا تورکیا دا بیت و ئەز ب باوەرم د سیستەمەکا وەسا دا دێ ھەموو پرسێن تورکیا ھێنە چارەکرن و ئەنجامێ ریفراندۆمێ ھەر چ بیت ئەم دێ قەبوول کەین و رێزێ ل داخوازیێن خەلکێ خوە بگرین.
ترامب دێ عیراقێ داگیرکەت ؟
ئەڤرۆ نیوز:
سەرۆکێ ئەمریکی دونالد ترامب راگەھاندبوو کو وەلاتێ وی شاشیەکا مەزن کربوو دەمێ چوویە دعیراقێ دا و پاشی ئەو وەلاتە دایە دەستێ ئیرانێ و دیارکربوو کو وی چەندین چارە بۆ رەوشا عیراقێ یێن ھەین ژوان ژی چارەیێن لەشکری کو بەری وان چارەیان بجە نەئینیت، راناگەھینیت.
د دیدارەکا تۆرا (ئەی بی سی) یا تەلەڤزیۆنی یا ئەمریکی، ترامبی دلتەنگیا خوە ژ سیاسەتا سەرۆکێ بەرێ ئۆبامای ل عیراقێ بەرچاڤکر، دەمێ عیراق ب تنێ ھێلای وڤالاتیەک تێدا دروستبوی و ئیرانێ و داعشێ ئەو چەندە بۆ خوە ب دەلیڤە زانی.
گۆتبوو ژی، چو حوکمەت ل عیراقێ نینن پشتی ڤەکێشانا لەشکرێ ئەمریکی ژ عیراقێ و پێدڤی بوو ھەبوونا ئەمریکا ل عیراقێ یا بەردەوام با و پەترۆل کونترل کربا تاکو نەکەڤیتە ددەستێ داعشێ دا.
سایتێ ئەلخەلیج ئۆنلاین ژ فاروق زفیری پەیڤدارێ بزاڤا مللی یا سونی ل عیراقێ ڤەگوھاستیە کو ئاخڤتنێن ترامبی قەبارێ مەزن یا دەستھەلات و ھەبوونا ئیرانێ ل عیراقێ و کونترۆلکرنا وێ دیار دکەت و نەراستیا حوکمەتا بەغدا وسیاسیێن وێ ژی ئاشکرا دکەت کو ھەتا نوکە درەوان ل وەلاتیان دکەن ب داخۆیانیێن خوە ل دۆر ھەبوونا سەروەریا حوکمەتا عیراقی.
ل دووڤ زفیری، داخۆیانیێن سەرۆکێ ئەمریکی ترامبی نامەکە بۆ رۆسیا و ئیرانێ و عیراقێ کو رەوشەکا نوو ل دەڤەرێ دێ پەیدابیت و دڤێت ھەر لایەنەک ژوان یێ بەرھەڤ بیت بۆ وێ رەوشا نوو و پێدڤیە رۆسیا بھێتە لایێ ئەمریکا و ئیران بھێتە دوورخستن.
دیارکر ژی، ژبەرکو ترامب بزنسمان بوو، لەوما ل دووڤ بەرژەوەندیێن ئابووری و دراڤی کاردکەت و ب ڤەکێشانا وێ ژ عیراقێ و دەلیڤە دان بۆ ئیرانێ کو رەفتارێ ل عیراقێ بکەت، ئەمریکا تووشی زیانێن مەزن بوو و پەیوەندیێن وێ ل گەل سعودیێ و ھندەک وەلاتێن دەڤەرێ بەر ب ئالۆزیێ چوون، ھەبوونا رۆسی وئیرانی ل سەر کیستێ ستراتیژیەتا ئەمریکی بوو و ئەمریکا ل سەر دەمێ ترامبی دخوازیت کونترۆلا پەترۆلێ بکەت ب تایبەتی پەترۆلا عیراقێ، پشتی کو ئیرانێ کونترۆل ل سەر کری و دەستھەلاتا خوە ل سەر ھەموو عیراقێ چەسپاندی.
ب دیتنا شرۆڤەکارێ سیاسیێ عیراقی ئەیاد دلێمی، داخۆیانیێن ترامبی ل دۆر ئیرانێ رەنگڤەدانا پەیرەوکرنا سیاسەتەکا نوویە ژلایێ ئیدارا ئەمریکی یا نووڤە و دیارکر کو ترامبی و ھەر ژ دەستپێکا بەربژارکرنا خوە بۆ سەرۆکاتیا ئەمریکا نەرازیبوونا خوە ل سەر رۆلێ ئیرانێ ل رۆژھەلاتا ناڤین دیارکر و ب ئاشکرایێ ژی گۆتیە کو وی ل بەرە رێککەفتنا ئەتۆمی ل گەل ئیرانێ ب ھەلوەشینیت.
دلێمی خویا دکەت کو ئیرانێ مەترسیا داخۆیانیێن ترامبی ل دژی رێککەفتنا ئەتۆمی دزانی، لەوما بزاڤا خۆرتکرنا ھەلویستێ خوە ل عیراقێ دکر ب رێیا لەزکرنێ ددەرکرنا قانوونا حەشد شەعبی دا و پێشنیارکرنا پرۆژێ رێََککەفتنا دیرۆکی ل عیراقێ کو ب رێیا عەمار حەکیم سەرۆکێ ھەڤپەیمانیا نیشتمانی یا شیعی و سەرۆکێ جڤاتا بلند یا ئیسلامی ل عیراقێ بەرچاڤکری.
گۆت ژی، ترامب دێ دوبارە دەستھەلاتا ئەمریکا ل عیراقێ و دەڤەرێ زڤرینیت ب تایبەتی ھێزەکا ئەمریکی کو ھژمارا وێ دگەھیتە حەفت ھزار سەربازان یا ل عیراقێ ھاتیە بەلاڤکرن.
ژلایێ خوەڤە یەحیا سوھەیب، شرۆڤەکارێ سیاسیێ عیراقی ب زەحمەت دبینیت رەفتار ل گەل ھەبوونا ئیرانی ل عیراقێ بھێتە کرن، چونکی ئیران یا شیای بچیتە دناڤ ھەموو دەزگەھێن دەولەتا عیراقێ دا و بنگەھەکێ جەماوەری دناڤ شیعێن عیراقێ دا یا بۆ خوە دروستکری و مەترسی ئەوە ئەو بنگەھە یێن ھاتینە چەکدارکرن و دسەر قانوونێ دانە و یێن ژ لەشکرێ عیراقێ ب ھێزترن.
زێبارى : شه‌رێ لايێ راستێ يێ مووسل دێ دژوارتر و خوێناوى تر بيت
ئه‌ڤرۆ نيوز:
سوپاسالارێ به‌رێ يێ عيراقێ راگه‌هاند، شه‌رێ لايێ راستێ يێ مووسل دێ دژوارتر و خوێناوى تر بيت، به‌لێ هنده‌ك پێشهاتێن نوو هه‌نه وه‌كو وێ يه‌كێ كو داعش گه‌له‌ك ژ چه‌ك و ترۆمبێلێن خوه يێن بۆمرێژكرى ل شه‌رێ چه‌پێ يێ مووسل ژ ده‌ستداينه.
بابه‌كر زێبارى سوپاسالارێ به‌رێ يێ عيراقێ سه‌باره‌ت پرسا پێك ئێنانا فه‌رمانده‌كا هه‌ڤپشك بۆ كۆنترۆلكرنا ده‌ڤه‌رێن ل شنگالێ ل بن ده‌ستهه‌لاتا داعش ماين د ناڤبه‌را په‌كه‌كێ و هێزا پێشمه‌رگه‌ى گۆت: ئه‌و هێزا نوكه پێشمه‌رگه‌ى ل شنگال هه‌ى، شيانێن وێ يه‌كێ هه‌نه كو وان ده‌ڤه‌ران ئازاد بكه‌ن، له‌وما بۆ كۆنترۆلكرنا وان ده‌ڤه‌ران، پێشمه‌رگه پێدڤى ب په‌كه‌كێ نابيت.
لژنا روو ب رووبوونا گه‌نده‌ليێ سوبه دێ كۆم بيت
ئه‌ڤرۆ نيوز:
برياره سوبه لژنا روو ب رووبوونا گه‌نده‌ليێ ب سه‌رپه‌رشتيا قوباد تاله‌بانى جێگرێ سه‌رۆكێ حوكمه‌تا هه‌رێما كوردستانێ كۆم ببيت و چه‌ند پرسێن گرنگ دانوستاندنان ل سه‌ر بكه‌ت.
فرسه‌ت سوفى ئه‌ندامێ په‌رله‌مانێ كوردستانێ دياركر كو ئه‌و هاتينه راسپاردن كو كار ل سه‌ر چه‌ند پرسێن وه‌كو روو ب رووبونا گه‌نده‌ليێ ل دام و ده‌زگه‌هێن حكومى بكه‌ن و سوبه رۆژا دوشه‌مبى دێ راپۆرتێن خوه راده‌ستى قوباد تاله‌بانى جێگرێ سه‌رۆكێ حوكمه‌تێ كه‌ن.
ئه‌ڤ پرسێن گه‌نده‌ليێ ئه‌وێن كار ل سه‌ر هاتيه كرن پێكهاتينه ژ پرسا نه‌فت و داهات و كێشێن وه‌به‌رهێنانێ و پرسا چاكسازى و پاشخستنا مووچه و خانه‌نشينێ و ته‌جاوزاتان بۆ سه‌ر مولكێ ده‌وله‌تێ.
زارڤه‌كه‌را ده‌نگێ ئه‌فسۆنێ به‌حس ل رۆلێ خوه دكه‌ت
ئه‌ڤرۆ نيوز:
شانا عەلی، ئەو کچا زارڤەکرنا دەنگێ (ئەفسۆنێ) دزنجیرا تورکی یا وەرگێرا بۆ زمانێ کوردی (ئەو ژیانە یا منە) دا دکەت، د دیدارەکێ دا بۆ ئەڤرۆ دیارکر: ب دیتامن ھەکە ئەفسون دناڤ وێ زنجیرێ دا نەبا ھەتا رادەکی دا یا بێ زەوق بیت، لەورا دوبلاژکرنا دەنگێ ئەفسۆنێ نەکارەکێ ب ساناھی یە، لێ ئەز یا رازی مە ب رولێ رابوویم.
شانایێ گۆت: ئەفسۆن کچەکە بریارێن خوە زوو ددەت، لێ زوو پەشێمان نابیت ھەتا پشت راست دبیت کو ئەو یا خەلەتە، و دراستیێ دا ئەفسۆن حەزژ ھەموو یان دکەت، لێ بۆ ھەموو یان دیار ناکەت، ئەز وەک شانا ھەتا نوکە بەرنیاس نەبوویمە ب ڤی رۆلی و ل دەڤ من تشتەکێ نۆرمالە ب رۆلێ ئەفسۆنێ بەرنیاس بم، لێ ھندەک جاران ئاخفتن و لڤینێن وێ ب دلێ من نینن، بەلێ گەلەک حەزژ وێ دکەم.
زێدەتر گۆت: مالا من گەلەک ژ من درازینە ل سەر ھەرکارەکێ ئەز دکەم و چو کارێ ئەز دکەم دبەرژەوەندیا خوە مالا خوە دا دکەم و ڤی رۆلی چو کارتێکرن ل من نە کریە.
ل دووماھیێ گۆت: ھەتا نوکە د سێ دراما دا من پشکداری کریە، یا ئێکێ (لێم ببورە) ب رولێ ھاندانێ ، و دراما (ئەو ژیانە یا منە) ب رۆلێ ئەفسۆنێ ، و دراما (ئەشقی شێتانە) ب رۆلێ ڤیلدانێ ئەز رابوویمە.
تره‌مپ نه‌هێلا حسێن حه‌سه‌ن بچيته ئه‌مريكا
ئه‌ڤرۆ نيوز:
دەرھێنەرێ کورد یێ فلمێ (رەشەبا) بۆ رۆژناما ئەڤرۆ دیار کر، ژ ئەگەرێ بڕیارەکا نوو یا ترامپی ئەو نەشێت پشکداریێ د فیستیڤالەکا نێڤدەولەتی دا بکەت، بەلکو ب تنێ دێ فلمێ وی ھێتە نیشادان.
حسێن حەسەن، دەرھێنەرێ فملێ رەشەبا ئاشکرا ژی کر، وەسا ژڤانبوو فلمێ وان د فیستیڤالا مەیامی یا سینەمایی یا نێڤدەولەتی دا ل وەلاتێ ئەمریکا بھێتە نیشادان، لێ ئەو نەشێت پشکداریێ تێدا بکەت و گۆت: “ئەگەر ژی ئەوە کو سەرۆکێ نوو یێ وی وەلاتی بڕیارەک دایە کو نابیت ڤیزە ب چەندین وەلاتێن کیشوەرێ ئاسیا ژ وان ژی عیراقێ بھێتە دان کو بچنە ئەمریکا، لەوڕا ئەز نەشێم بچمە وی وەلاتی و ل رێورەسمێن فیستیڤالێ بەرھەڤ ببم، بەلکو ب تنێ فلمێ رەشەبا دێ لێ بەرھەڤ بیت و ھێتە نیشادان”.
حسێن حەسەنی ئاماژە ب وێ چەندێ ژی کر، (لابلانت) کو سەرۆکێ فیستیڤالا مەیامی یە ل وەلاتێ ئەمریکا داخواز ژ سینەماکارێن ئەمریکا کریە، نەرازیبوونا خوە بەرامبەری وێ بڕیارا ترامپی نیشا بدەن، چونکو ئەو بڕیارەکا شاشە و دێ کارتێکرنێ ل سەر نەریتێن کەلتۆری ل وی وەلاتی کەت.
فملێ رەشەبا یێ دەرھێنەرێ کورد (حسێن حەسەن) بەری چەند ھەیڤان ل ھەموو جیھانێ ھاتیە نیشادان و چەندین خەلاتێن نێڤدەولەتی ب دەستڤە ئیناینە، فلم ل سەر نەخوشیێن کوردێن ئێزدی ل شنگالێ ھاتیە دروستکرن.
نيشاندان
WP Facebook Auto Publish Powered By : XYZScripts.com