ئه‌ڤرۆ نيوز:

پشتى پێنج سالان ژ جودابوونێ، جاره‌كا دى شه‌ر و پێكدادان ل باشوورێ سودانێ ده‌سپێكرن و ب گۆره‌ى دووماهى ئامار د وى شه‌رى دا زێده‌تر ژ 300 كه‌سان هاتينه‌ كوشتن كو د ناڤ وان دا سڤيل و كارمه‌ندێن نه‌ته‌وێن ئێكگرتى ژى هه‌نه‌.

ب گۆره‌ى داخۆيانيه‌كا به‌رپرسێن سه‌ر ب نه‌ته‌وێن ئێكگرتى ڤه‌ شه‌ر و پێكدادان ل رۆژا پێنجشه‌مبى د ناڤبه‌را هێزێن ئۆپۆزسيۆن و حوكمه‌تا سودانێ دا ل باشوورێ جوباى پايته‌ختێ وى وه‌لاتى ده‌سپێكرينه‌ و د ڤان دو رۆژێن بۆرى دا پێكدادانێن ب هێز رووداينه‌ و بالوێزێ ئه‌مريكا پشكه‌كا ژ ستافێ خوه‌ ڤه‌كێشايه‌.
ژ ئه‌گه‌رێ  پێكدادانا هێزێن سه‌ر ب سه‌لڤاكير، سه‌رۆكێ وى وه‌لاتى و چه‌كدارێن ريك مه‌شار، جێگرێ سه‌رۆكێ وى وه‌لاتى گه‌له‌ك ژ خه‌لكێ سڤيل بووينه‌ قوربانى توندوتيژيان و كارمه‌ندێن UN ژى د ناڤ دا هه‌نه‌ كو ژێده‌رێن ده‌نگوباسان كوشتنا 300 كه‌سان هه‌تا نوكه‌ راگه‌هانديه‌.

ئه‌ڤرۆ نيوز:

ئاشتون كارته‌ر وه‌زيرێ به‌ره‌ڤانيا ئه‌مريكا سپێده‌هيا ئه‌ڤرۆ رۆژا دوشه‌مبى گه‌هشته‌ به‌غدا.

كه‌نالێ سكاى نيوز د نوچه‌كێ ب له‌ز دا به‌لاڤكر كو ئاشتون كارته‌ر وه‌زيرێ به‌ره‌ڤانيا ئه‌مريكا گه‌هشته‌ عيراقێ و مه‌ره‌م ژ سه‌ره‌دانا وى كومبوونه‌ ل گه‌ل به‌رپرسێن عيراقى و فه‌رماندێن له‌شكرى يێن ئه‌مريكا.
هێشتا ديار نه‌بوويه‌ كا دێ د ڤێ سه‌ره‌دانا خوه‌ دا، سه‌ره‌دانا هه‌رێما كورستانێ ژى كه‌ت يان نه‌.

ئەڤرۆ نیوز:
جارا یەکێیە کو ل دادگەھەکا تورکیا بەحسێ پەیوەندیێن د ناڤبەرا دەزگەھێ ھەوالگیریا میڵی یا تورکیا و رێکخستنێن تیرۆرست یێن وەک داعش و ئەلنوسرا دھێتە کرن و چەکدارەکی داعشێ یێ ب ئەسلێ خوە تورک ب بەلگەیان سەلماند کو وان گەلەک چالاکی ب ھەڤکاریا (میت) ئێ ئەنجام داینە.
چەکدارەکی داعشێ یێ ب ناڤێ ئەرسان چەلیک پشتی ل باژێرێ عەنتابێ ھاتیە گرتن ل دادگەھێ راگەھاند کو ب رێیا دەزگەھێ ھەوالگیریا تورکیا ژ باژێرێ کیلیسێ ڤە بەری شەرێ کۆبانێ دەربازی رۆژئاڤایێ کوردستانێ بوویە و گەھشتیە رێزێن ئەلنوسرا و گۆت: (رۆژانە من ل سەر پێشھاتێن د ناڤ ئەلنوسرا و شەرێ ل گەل کوردان زانیاری ددا میتێ و فەرمانێن میتێ ژی من و ھژمارەک ھەڤالێن خوە بجیە دکر، پەیوەندیا مە ب رێیا تەلەفۆن و واتساپێ بو و د مۆبایلا من دا ھەموو نڤیس ھەنە).
د پشکەکا دی یا ئاخڤتنا خوە دا ژی راگەھاند کو ئەرکێ وی یێ سەرەکی فول کرنا چەکدارێن ئەلنوسرا ل دژی کوردان بوو و ھژمارەک بەرپرسێن ئەلنوسرا بەردەوام دەربازێ تورکیا دبن و دیسا ڤەدگەریان سووریێ و گۆت: (ئەز دشێم بێژم پرانیا بزاڤێن ئەلنوسرا ب زانیاریا میتێ دھاتە کرن و مە ژی فەرمانێن تایبەت یێن ئیستخباراتێ بجە دئینا و ئاگاھیا من ژ کۆمبوون و پەیوەندیێن ھەردو ئالیان ھەبوو لێ من نەدزانی ل سەر چ کۆمبوونان ساز دکەن و دەمێ من دیت د ناڤا ئەلنوسرا دا ھژمارەک فەرماندار ناخوازن شەرێ کوردان بکەن و ل گەل کوردان پەیمانان ئیمزا کرن ب زانیاریا میتێ ئەز ژ ناڤ ئەلنوسرا دەرکەڤتم و ل جەرابلوسێ گەھشتمە رێکخراوا داعشێ).
ل سەر ئەرکێ خوە یێ د ناڤ داعشێ دا ژی چەکدارێ تیرۆرست ئەرسان چەلیک راگەھاند کو ناڤی وی یێ د ناڤ داعشێ دا ئەبو موسا بوویە و ژ بەر زانیاریێن وی یێن ل سەر تەکنۆلۆجیا د کاروبارێن تەکنیکی دا ھاتیە ئەرکدار کرن و گۆت: (د ناڤ داعشێ دا ھەموو فەرماندار نە ل گەل تورکیا بوون و ھندەک ژ وان ب نھینی پیلانێن چالاکیان پەقاندنێ ل دژی تورکیا دروست دکرن و من ئەو پیلان ب رێیا واتساپێ ژ بۆ میتێ ئاشکرا کرن و ژ بەر کو ئەز ب ئامادەکرنا بۆمبەیان ھاتبوومە ئەرکدار کرن من بۆمبەیان پوچ دکر و ب سایا من بۆمبێن کو فەرماندارێن داعشێ دشاندنە تورکیا نە د پەقیان و ئاگاھیا میتێ ژ ھەموو کار و چالاکیێن داعشێ ھەبوون).
چەکدارێ داعشێ یێ گرتی د پشکەکا دی یا ئاخڤتنا خوە یا ل دادگەھێ راگەھاند ژی گەلەک زانیاریێن دی یێن تایبەت ل گەل وی دا ھەنە و گۆت: (ھەکە دادگەھا مەزن دەلیڤێ بدەتە من ئەز ئامادەمە ھەموو زانیاریێن خوە پارڤە بکەم و ئەز جھێ گەلەک مادەیێن پەقاندنێ و بۆمبە و چەکێن ڤەشارتی دزانم و ئەز ل ڤێدەرێ ئاشکرا دبێژم کو د دەستێ داعشێ دا چەکێن کیمیاوی ژی ھەنە و پرانیا ڤان چەکێن خوە ئیناینە جەرابلوسێ و ل پێشبەری کلیسێ بجە کرینە و ھژمارەک فەرماندارێن داعشێ دخوازن ڤان چەکان ل دژی تورکیا بکار بینن لێ ھندەک فەرماندار ژی ل دژی ڤێ یەکێ نە).
د داویا ئاخڤتنا خوە دا ژی ئەرسان چەلیک یێ تیرۆرست راگەھاند ژی کو ئەو ژ دادگەھێ دخوازیت وی سەربەست بەردەن ژ بەر کو بێ تاوانە و فەرمانێن میتێ بجە ئینایە و گرێدایێ میتێیە و گۆت: (ئەز بۆ شەرێ پەکەکێ و کوردان چوومە سووریێ و من ئەرکێن خوە بجە ئینانە و دڤێت میت خوەدان ل من دەرکەڤیت ژ بەر کو گەلەک زانیاری ھەنە دڤێت ئەز بدەمە میتێ کو ئەڤ زانیاری د بەرژەوەندا تورکیا دانە).