ئه‌ڤرۆ نيوز:
نۆشدارەکی ل نەخۆشخانا گشتی یا شێخان دیار کر کو سێ تەرم دو ژ وان ژن بوون و ئێک زەلام ل رۆژا 10ى كانوونا ئێكێ 2016ێ ل دەمژمێر 6:00ی سپێدێ گەھشتنە نەخۆشخانا گشتی یا شێخان.
نۆشدارەکێ نەخۆشخانا گشتی یا شێخان کو نەڤیا ناڤێ وی دیار بیت بۆ رۆژناما ئەڤرۆ ئاشکرا کر کو پشتی ئەو سێ تەرم گەھشتینە نەخۆشخانا گشتی یا شێخان پشکنین بۆ ھاتنە کرن و تەرمێن وان بۆ نۆشداریا داد ل دھۆکێ ھاتنە رەوانەکرن و گۆت: “ل دووڤ گۆتنێن کەسوکارێن وان وی زەلامی ب ناڤێ (ئ،ئ،م) د ژیێ 26 سالیێ دا ب چەکێ کلاشینکۆفێ دایکا خوە یا ب ناڤێ (ن،ئ،خ) د ژیێ 47 سالیێ دا و خویشکا خوە یا ب ناڤێ (ی،ئ،م) د ژیێ 21 سالیێ دا د خەوێ دا کوشتینە و دووڤ دا گۆللەیەکا کلاشینکۆفێ ل سەرێ خوە ژی دا و گیانێ خوە ژ دەست دا”.
ھەمان ژێدەر ئاماژە دا وێ چەندێ کو کەسوکارێن (ئ،ئ،م) گۆتیە وان کو وی نەخۆشیەکا دەروونی ھەبوو ژ بەر ڤێ چەندێ دایک و خویشکا خوە کوشتینە و دووڤ دا دووماھی ب ژیانا خوە ژی ئینایە و گۆت: “ئەڤ خێزانە ئێزدی بوون و خەلکێ باشیکێ بوون و ئاوارە ببوونە قەزا شێخان و ل تاخێ شێخ مەند ئاکنجی ببوون”.
نووترين نووچه
- هیڤیدارین ئەنجامێن هەلبژارتنان د خزمەتا ڤەژاندنا هەرێمێ دا بن
- پێدڤییە وەلاتی ژ ململانێیا هەرێمی دووربێخین
- كۆمبوونا مەسرور بارزانی و سۆدانی دێ ئەنجامێن باش هەبن
- سەرۆكێ هەرێما كوردستانێ و قونسلێ ئەلمانیا پێكئینانا حوكمەتا هەرێمێ گەنگەشەكر
- نێچیرڤان بارزانی پێشوازی ل قونسلێ مسرێ كر
- مەسرور بارزانی بۆ سۆدانی: پێدڤییە مووچە ژ ناكۆكییا سیاسی بهێتە دوورئێخستن
- گۆتن و کریارێن دەستهەلاتێ ل دۆر پرسا کوردی گەلەک ژێک دوورن
- سەرۆك بارزانی: دانیێل میتێران رۆلەكێ گەلەك مەزن د بەرگریكرنێ ژ دۆزا گەلێ كورد دا هەبوو
- نێچیرڤان بارزانی: پێکڤە دێ شێین روو ب روویێ گوهۆڕینا سەقای بین
- پێدڤییە سەرژمێری بۆ مەبەستێن سیاسی نەهێتە بكارئینان
سهرهكى Twitter
سەرۆکێ بەرێ یێ زانکۆیا نەورۆز ھاتە دەستەسەرکرن
ئه‌ڤرۆ نيوز:
رائیدێ مافپەروەر ھێمن سلێمان، بەرپرسێ پشکا پەیوەندی و راگەھاندنێ ل رێڤەبەریا پۆلیسێن پارێزگەھا دھۆکێ بۆ رۆژناما ئەڤرۆ ئاشکرا کر، کو ل دووڤ فەرمانا دادوەرێ نەزاھێ سەرۆکێ بەرێ یێ زانکۆیا نەورۆز ل دھۆکێ د. ئازاد ئەحمەد سەعدون ل دووڤ ماددێ 340 ژ قانوونێن سزای ژ لایێ پۆلیسان ڤە ھاتە دەستەسەرکرن.
د. ئازاد ئەحمەد سەعدون 10 سالان سەرۆکێ زانکۆیا نەورۆز بوو و ئێك ژ دامه‌زرێنه‌رێن وێ بوو.
ئەمریکا ئێدی دێ راستەوخوە چەکان دەتە ھێزێن کوردی
ئەڤرۆ نيوز:
پشتی کو سەرۆکێ ئەمریکا ئاستەنگیێن ل ھەمبەر شاندنا ھاریکاریێن راستەوخوە بۆ ھێزێن کوردی و کۆمێن چەکدارێن ئۆپۆزسیۆنا سووریێ راکر، تورکیا و روسیا نەرازیبوونێن دژوار نیشا دان و دیار کرن کو ئەڤ بریارا ئۆباما دێ رەوشا سووریێ ئالۆزتر کەت.
باراک ئۆباما سەرۆکێ ئەمریکا ئاستەنگیێن ل ھەمبەر شاندنا راستەوخوە یا چەکان بۆ کۆمێن کو د ئۆپەراسیۆنێن ئەمریکا دا پشتەڤانیێ دکەن راکر، وەسا دھێتە چاڤەرێکرن کو ئەمریکا ئێدی ب رەنگەکی لەزتر چەکێن گران بۆ ھێزێن کوردی و ئۆپۆزسیۆنا سووریێ بشینیت و ئەو یەک دێ رژێما سووریێ د مەیدانا شەری دا تەنڤگاڤ کەت.
د ڤێ مژارێ دا حوکمەتا تورکیا راگەھاند کو ئەو ل دژی ھاریکاریێن ئەمریکا بۆ یەپەگێ نە و ئاشکرا کر کو بریارا ئۆباما دێ رەوشا سووریێ ئالۆزتر کەت و داخواز ژ ئەمریکا کر کو ھەڤکاریا ھێزێن کوردی ئانکۆ یەپەگێ نەکەت چونکو ئەو یەپەگە وەکو رێکخستنەکا تیرۆرست دبینن.
د ھەمان مژارێ دا پەیڤدارا وەزارەتا دەرڤە یا روسیا ژی راگەھاند کو ئەمریکا ب بریارا خوە یا شاندنا چەکان بۆ کۆمێن دژبەرێن سووریێ خزمەتا ئارامیێ و چارەکرنا قەیرانا سووریێ ناکەت و گۆت: (دڤێت ئەمریکا ل گەل مە بزاڤا چارەکرنا قەیرانا سووریێ بکەت نە کو ھەول بدەت زێدەتر رەوشێ ئالۆز کەت، ژ بەر کو دانا راستەوخوە یا چەکان بۆ کۆمێن چەکدار دێ رەوشا ژیانی و بزاڤێن بۆ ئارامکرنا سووریێ لاواز کەت).
ل ئالیێ دی ھژمارەک زێدە ئاژانسێن نووچەیان بریارا ئۆباما وەسا شیرۆڤە دکەن کو ئەمریکا دخوازیت چەکێن ل دژی فرۆکێن شەری و سارۆخێن سترنگ یێن ل دژی فرۆکان بدەتە ھێزێن کوردی و ئەو یەک دێ کوردان ب ھێزتر کەت و وەسا دبینن کو ئەمریکا دخوازیت یەپەگە و ھێزێن سووریا یا دیمۆکراتیک ب تەمامی راکێشتە ل گەل خوەدا.
ھەروەسا ل دووڤ ئاژانسێن نووچەیان ئەمریکا دخوازیت ئۆپەراسیۆنا رزگار کرنا ناڤەندا باژێرێ رەققە بدەتە دەستپێکرن و بۆ ب ھێزبوونا یەپەگێ و ھێزێن سووریا یا دیمۆکراتیک دخوازیت ھەموو چەکێن گران یێن پێدڤی بگەھینتە دەستێ وان.
رێیا چارەیا پرسگرێکێن ھەرێمێ ئاڤاکرنا دەولەتا کوردیە
ئه‌ڤرۆ نيوز:
ل سیناتۆیا فرەنسا کۆنفرانسێ کوردی دھێتە سازکرن و د روونشتنا کۆنفرانسێ دا رەوشا کوردان د قۆناغا نھا دا ھاتە نرخاندن و ھاتە دیار کرن کو رێیا چارەیا پرسگرێکێن رۆژھەلاتا ناڤین ئاڤاکرنا دەولەتا کوردی و فەلستینێیە و دڤێت دەولەتێن زۆردار نەمینن.
د کۆنفرانسێ کوردی کو ل سیناتۆیا فرەنسا ھاتە گێران رەوشا کوردان ھاتە گەنگەشە کرن و د ڤێ مژارێ دا ئیریک کۆگوئیریل پەیڤدارێ پارتا چەپ یا فرەنسا راگەھاند کو رێکخستنا داعش وەک پرۆژەکا ھەرێمی ل دژی کوردان و گەلێن ھەرێمێ ھاتیە ئاڤاکرن و گۆت: (کوردان خوە ل ھەمبەر داعشێ ل سەر پیان گرتن و پرۆژێ داعشێ ژناڤ چوو و ئێدی کوردان سەلماندن کو خوەدان کیانەکا سەرکەڤتینە و ئەز وەسا دبینم کو یێ دەولەتەکا کوردی یا سەربخوە یا دوور ژ مەزھەبی بھێتە ئاڤاکرن).
پەیڤدارێ پارتا چەپ ھەروەسا راگەھاند ژی کو حەتا دەولەتەکا سەربخوە یا کوردان و فەلەستینیان ل رۆژھەلاتا ناڤین نەھێتە دروستکرن پرسگرێکێن ھەرێمێ چارە نابن و گۆت: (ئەگەرێ بەردەوامیا ئالۆزیان ل رۆژھەلاتا ناڤین نە چارەکرنا پرسگرێکا کوردی و فەلەستینیانە و ئێدی دەمێ وێ ھاتیە دەولەتا سەربخوە یا کوردستانێ بھێتە ئاڤاکرن و وەلاتێن دەوروبەرێن کوردان نەچارن رێزێ ل دەولەتەکا کوردی بگرن).
ئیریک کۆگوئیریل پەیڤدارێ پارتا چەپ د پشەکەکا دی یا ئاخڤتنا خوە دا ژی داخواز ژ نەتەوێن یەکگرتی کر کو کوردان کوردان وەک ھەڤپەیمانێ خوە ل ھەرێمێ ببینیت و گۆت: (دڤێت ھەڤپەیمانا نێڤدەولەتی و نەتەوێن یەکگرتی ب چاڤەکی ھەڤپەیمان ل کوردان بنێرن و د ئاڤاکرنا دەولەتا کوردی دا ببنە پشتەڤان و بۆ رۆژئاڤایێ کوردستانێ ژی چارا گونجای ئاڤاکرنا فیدراسیۆنا ل گەل سووریێیە و دڤێت نەتەوێن یەکگرتی وەکو فیدراسیۆنێ سەرەدەریێ ل گەل رۆژئاڤایێ کوردستانێ بکەت).
د داویا ئاخڤتنا خوە دا ژی پەیڤدارێ پارتا چەپ داخواز ژ حوکمەتا فرەنسا و ئێکەتیا ئورۆپا کر کو پارتا کارکەرێن کوردستانێ ژ لیستا تیرۆرێ دەرخینن و پشتەڤانیێ ل چارەکرنا پرسگرێکا کوردی ل تورکیا بکەن و گۆت: (ب سالانە شەرەکێ دژوار ل تورکیا ھەیە و نھا شەر کەفتیە ناڤ باژێران و مخابن رۆژانە مرۆڤ دھێنە کوشتن و ژ بەر شەری رەوشا ناڤخوەیی یا تورکیا ژی رۆژ ب رۆژێ خراب دبیت و بارێ ئابووری یێ تورکیا ژی گەلەک خراب بوویە، ژ بەر ھندێ ژی ھەکە تورکیا پرسا کوردی دوور ژ شەری چارە بکەت دێ رەوشا ناڤخوەیی و ئابووری یا تورکیا گەلەک باش ببیت و ئەزموونێن بۆری ژی سەلماندینە کو تورکیا ب شەرێ نەشێت کوردان ژناڤ ببەت، ڤێجا پێدڤیە زوو کار بۆ چارەکرنا پرسا کوردی بھێتە کرن).
نووترين كليپا په‌روازێ
ئينفوگراف: وه‌لاتێن نه ئه‌ندامێن ئوپێك، ب ڤێ رێژێ هنارتنا نه‌فتا خوه كێم كر
پێنج هزار ئه‌ندامێن هه‌ده‌پێ د زيندانێ دانه
كه‌شناسيا هه‌رێمێ: به‌فر دێ ل دهۆكێ باريت
ئه‌ڤرۆ نيوز:
رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ راگه‌هاند كو ل ڤێ حه‌فتيێ دێ به‌فر ل پارێزگه‌ها دهۆكێ باريت.
پشكا پێشبينيان ل رێڤه‌به‌ريا گشتى يا كه‌شناسى و بيڤه‌له‌رزێ ل هه‌رێما كوردستانێ د راگه‌هاندنه‌كێ دا كو دانه‌ك بۆ ئه‌ڤرۆ نيوز ره‌وانه كريه راگه‌هاند: هه‌رێما كوردستانێ دێ كه‌ڤيته بن كارتێكرنا پێله‌كا به‌فر و بارانان كو ژ ئه‌نجامێ درێژبوونا فشارێن نزمێن وه‌لاتيێ توركيا و هاتنا هه‌وايه‌كێ سارێ سێبيريايه و دێ ژ رۆژا سێشه‌مبى 13ى كانوونا ئێكێ 2016 ل دانێ پشتى نيڤرۆ ده‌سپێكه‌ت.
ل گه‌ل ده‌سپێكرنا ڤێ پێلێ ئه‌سمان دێ بۆ ئه‌وره‌كێ ناڤه‌ندى و پاشان بۆ ئه‌وره‌كێ ته‌مام هێته گوهۆڕين و باران ل ده‌ڤه‌رێن چيايى يێن پشكا باكوور و رۆژئاڤايێ هه‌رێمێ ده‌سپێكه‌ت.
پشكا پێشبينيان دايه زانين ژى كو ل گه‌ل زێده‌بوونا كارتێكرنێ ل رۆژێن چارشه‌مبى و پێنجشه‌مبى باران بارين دێ ل ده‌ڤه‌رێن جودا يێن هه‌رێما كوردستانێ باريت و ل هنده‌ك جهان ژى باران دێ ب دژوارى باريت و به‌فر بارين ژى دێ ل پتريا ده‌ڤه‌رێن چيايى باريت و ل سه‌نته‌رێ پارێزگه‌هێن دهۆك و سلێمانيێ ژى پلێن گه‌رمێ دێ گه‌له‌ك هێنه خوار و ئه‌گه‌رێ به‌فر بارينێ ل وێرێ ژى هه‌يه و له‌زاتيا هه‌وايى ژى دێ گه‌له‌ك زێده بيت.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌له‌رزێ ل هه‌رێما كوردستانێ دايه زانين ژى كو كارتێكرنا ڤێ شه‌پۆلێ هه‌تا رۆژا ئه‌ينى دێ ل سه‌ر هه‌رێما كوردستانێ يا به‌ره‌ده‌وام بيت.
ب وێنه: دژى چوونا مالكى بۆ به‌سرا خوه‌نيشاندان دهێنه كرن
ئه‌ڤرۆ نيوز:
وه‌لاتيێن باژێرێ به‌سرا ل باشوورێ عيراقێ داخوازا ده‌ركرنا جێگرێ سه‌رۆك كۆمارێ عيراقێ ژ باژێرێ خوه دكه‌ن.
شه‌ڤا شه‌مبى 10ى كانوونا ئێكێ يا 2016ێ ب سه‌دان وه‌لاتيێن باژێرێ به‌را ل به‌ر ده‌رگه‌هێ پارێزگه‌ها به‌سرا خرڤه‌بوونه‌ك ئه‌نجام دا و دژاتيا خوه بۆ سه‌ره‌دانا نورى مالكى جێگرێ سه‌رۆك كۆمار و سه‌رۆك وه‌زيرێن به‌رێ يێن عيراقێ نيشان دا.
وه‌لاتيێن به‌سرا هيتاف ل دژى مالكى ددان و د گۆت: “مه‌لعون.. مه‌لعون نورى مالكى”، هه‌ڤده‌م به‌حس ل وێ چه‌ندێ دكر كو مالكى ب خرابترين ره‌نگ حوكمرانى ل عيراقێ كريه و بوويه ئه‌گه‌رێ داگيركرنا پشكه‌كا زۆر ژ ئاخا وێ ژ لايێ تيرۆرستێن داعش ڤه.
د خرڤه‌بوونه‌كێ دا، وه‌لاتيێن به‌سرا به‌رپرساتيا گه‌نده‌لى و هه‌ده‌ردانا سامانێ عيراقێ خسته ستوويێ مالكى و ژبلى وێ چه‌ندێ كو تاوانبار كر ب ئه‌گه‌رێ كوشتارگه‌ها سپايكه‌ر كو نێزيكى 1700 له‌شكرێ عيراقێ تێدا ب ده‌ستێ چه‌كدارێن داعش هاتنه كوشتن.
پێشتر وه‌لاتيێن باژێركێ ناسريه و ميسان ژى سه‌رۆك هه‌ڤپه‌يمانيا ده‌وله‌تا قانوونێ و حزبا ده‌عوه يا ئيسلامى نه‌چار كربوو كو باژێرێ وان ب جهـ بهێلن و ب به‌ر و پێلاڤان هێرش كربوو سه‌ر كاروانێ ترۆمبێلێن وى.
به‌سرا
ديمه‌نێن پێشتر يێن پارێزگه‌ها ناسيره و ميسان
قووناغا ئێكێ يا ئۆپه‌راسيۆنا مووسل ب دووماهى هات
ئه‌ڤرۆ نيوز:
هێزێن عيراقێ پشتى گه‌هشتينه رووبارێ “الخوصة” ل به‌رێ چه‌پێ يێ مووسل دووماهى ب قووناغا ئێكێ يا ئۆپه‌راسيۆنا خوه بۆ كونترۆلكرنا باژێرێ مووسل ئينا.
ليوا روكن سامى عارز فه‌رماندێ هێزێن بژاره يێن دژه تيرۆرێ بۆ ئاژانسا “أين” راگه‌هاند، هێزێن وان گه‌هشتنه رووبارێ خه‌وسه ل به‌رێ چه‌پێ يێ باژێرێ مووسل و دووماهى ب قووناغا ئێكێ يا ئۆپه‌راسيۆنێ ئينا.
هه‌ر د ڤێ ده‌ربارێ دا گۆت: “ب ئێكگه‌هشتنا هێزێن عيراقى پێنگاڤه‌كا گرنگه بۆ ئۆپه‌راسيۆنا له‌شكرى و ب له‌ز رزگاركرنا باژێرێ مووسل”.
هێزێن دژى تيرۆرا عيراقى هه‌ر ئه‌ڤرۆ چوونه ناڤ تاخێ فه‌لاحات ل لايێ چه‌پێ يێ باژێرێ مووسل.
ئۆپه‌راسيۆنا كونترۆلكرنا مووسل ل 17ى چريا ئێكێ 2016 ب فه‌رمانا فه‌رماندێ هێزێن چه‌كدارێن عيراقێ حه‌يده‌ر عه‌بادى و ب پشكداريا نێزيكى 100 هزار كه‌سان ژ هێزێن عيراقى و كوردستانى و تيمێن تايبه‌ت يێن ئه‌مريكا و پشته‌ڤانيا ئه‌سمانى يا هه‌ڤپه‌يمانان ده‌سپێكريه و هه‌تا نوكه زێده‌تر ژ نيڤا تاخێن لايێ چه‌پێ يێ مووسل كونترۆل كرينه.
ئه‌وى فه‌رماندێ له‌شكرى يێ دژى تيرۆرێ ئاماژه ب وێ چه‌ندێ ژى كريه كو هێزێن وان رۆژا شه‌مبى هه‌رچار تاخێن قادسيه يا ئێكێ، نمور، مه‌شارق و شه‌خچيه‌يان ل رۆژهه‌لاتێ مووسل كونترۆل كرينه و هه‌تا نوكه 33 تاخ كۆنترۆل كرينه.
- ل دووڤ ڤان گۆتنێن ئه‌ڤى فه‌رماندێ دژى تيرۆرێ ب تنێ 10 تاخ ل لايێ چه‌پێ يێ باژێرێ مووسل دمينن كو نه‌هاتبنه كونترۆل كرن.
نيشاندان
WP Facebook Auto Publish Powered By : XYZScripts.com