ئەڤرۆ نيوز:
جان برنان سەرۆکێ دەزگەھێ ھەوالگیریێ ئەمریکا د داخۆیانیەکێ دا راگەھاند کو د ھەوا ھەلبژارتنێن سەرۆکاتیێ ل ئەمریکا دۆنالد ترامپی دیار کربوو دەمێ ئەو ببیتە سەرۆکێ ئەمریکا دێ رێککەڤتنا ئەتۆمی یا ل گەل ئیرانێ ھەلوەشینیت و گۆت: (ئەز ھیڤیدارم ئەو گۆتنێن وی دەمی یێن ترامپی تنێ د چارچۆڤێ پرۆپگاندێ ھەلبژارتنان بن و نھا ترامپ ھزرا وێ چەندێ نەکەت).
ناڤھاتی ھەروەسا دیار کر کو ئەڤرۆکە ھێزێن نەرم ل ئیرانێ دشێن گوھۆرینان بکەن و ھەکە ترامپ رێککەڤتنا ئەتۆمی یا ل گەل ئیرانێ ھەلوەشینیت ئەو یەک دێ ئەنجامێن خوە یێن گەلەک خراب بۆ دەڤەرا رۆژھەلاتا ناڤین و جیھانێ ھەبن و ئیران دشێت مەترسیێن مەزن بۆ بەرژەوەندیێن ئەمریکا دروست بکەت و ئەو یەک د بەرژەوەندیا ئەمریکا دا نینە و گۆت: (ئێک ژ خالێن دی یێن کو دێ بیتە مەترسی ژی ئەوە دێ ھشکباوەر ل ئیرانێ جارەکا دی ب ھێز کەڤن و ب ھێزبوونا وان دێ رەوشا ناڤخوەیی یا ئیرانێ و رۆژھەلاتا ناڤین تێک بدەت، ژ بەر ھندێ ژی دڤێت ترامپ وان راستیان باش بدەتە بەرچاڤ و نابیت ھزر ل ھەلوەشاندنا رێککەڤتنا ئەتۆمی ل گەل ئیرانێ بکەت).

ئەڤرۆ نيوز:
ل گۆر راپۆرتەکا مالپەرێ نێرینا ئازاد دوھی فرۆکێن شەرێ یێن ئیسرائیلێ ھێرشی دەڤەرا سابورا یا شامێ کرینە کو دھێتە گۆتن چەندین بنگەھێن حزبوللا لوبنانێ ل وێ دەڤەرێ بووینە و د ئەنجاما ھێرشێ دا چەندین ئەندامێن حزبوللاھێ ھاتنە کوشتن و بریندار بووینە.
د بەردەوامیێ راپۆرتێ دا ھاتیە دیار کرن کو تەلەفزیونا فەرمی یا دەولەتا سووریێ ژی ھێرشا فرۆکێن ئیسرائیلێ بۆ دەڤەرا سابورا پشتراست کرینە لێ دیار کرینە کو د ئەنجاما ھێرشێ دا چو زیانێن جانی نەبووینە و تنێ چەند ئاڤاھی ل وێ دەڤەرێ خراب بووینە و فرۆکێن ئیسرائیلێ پشتی دەمەکێ کورت ڤەگەریناینە جھێ خوە.
ل ئالیێ دی چەندین دەزگەھێن راگەھاندنا عەرەبی دیار کرن کو ھەفتیا بۆری ژی فرۆکێن ئیسرائیلێ ب رێیا ئاخا لوبنانێ ھێرشی چەندین بنگەھێن حزبوللا لوبنانێ ل سووریێ کرینە و زیانەک مەزن گەھاندنە وان، لێ دەزگەھێن راگەھاندنا سووریێ ژ بەر رەوشا شەرێ نھا ل وی وەلاتی ب چو رەنگەکێ بەحسێ وێ ھێرشێ و زیانێن وێ نەکرینە.