ئەڤرۆ نيوز:
ل گۆر راپۆرتەکا ئاژانسا فرانس پرێس دوھی ئەنجامێ ھەلبژارتنێن پارتیا کۆماری یا فرەنسا بۆ دیار کرنا بەربژێرێ وێ پارتیێ بۆ پۆستێ سەرۆک کۆمارێ دیار بوو و فرانسوا فیون سەرۆک وەزیرێن بەرێ یێ فرەنسا شیا ل ھەمبەر ھەڤرکێ خو ئالین ژوپی سەرکەڤیت و ئالین ژوپی ژی ب رەنگەکێ فەرمی پیرۆزباھی ل فرانسوا فیون کر و ھیڤی خواست کو بشێت د ھەلبژارتنان دا ببیتە سەرۆک کۆمارێ نوو یێ فرەنسا.
د بەردەوامیا راپۆرتێ دا ھاتیە دیار کرن کو جارا ئێکێ یە ل دیرۆکا فرەنسا پارتیا کۆماری ل دەە دەڤەرێن جودا جودا بنگەھێن دەنگدانێ بۆ دیارکرنا بەربژێرێ پارتیا خوە دانابوون و پتر ژ ٤ ملیۆن کەسان پشکداری دەنگدانێ کرن و د ئەنجام دا فرانسوا فیون کو سالا ٢٠٠٧ ھەتا ٢٠١٢ سەرۆک وەزیرێن فرەنسا بوو شیا ٧٠% ژ دەنگێن ئەندامێن پارتیا خوە وەربگریت و نھا بەربژێرەکی ب ھێزە بۆ وەرگرتنا پۆستێ سەرۆک کۆماریێ ل فرەنسا.
ل ئالیێ دی ئاژانسا رویتەرز یا نووچەیان ژی دوھی د راپۆرتەکێ دا راگەھاند کو فیونی گەلەک جاران دیار کریە ئەو دێ گرنگیێ دەتە باشکرنا رەوشا ئابووری یا وەلاتی، چونکو فرانسوا ھۆلاند سەرۆکێ فرەنسا ب سیاسەتا خوە یا شاش یا ئابووری گەلەک زیان گەھاندینە ئابوورێ فرەنسا و ژ بەر ھندێ ژی دھێتە چاڤەرێ کرن فیون بشێت د ھەلبژارتنێن سەرۆک کۆماریا فرەنسا پشتەڤانیا خەلکی ب دەستڤە بینیت.
د بەردەوامیا راپۆرتا ئاژانسا رویتەرز دا ئەو یەک ژی ھاتیە دیار کرن کو پارتیا سوسیالیست یا فرەنسا پێگەھێ خوە یێ جاران نەمایە و چو بەربژارێن وێ پارتیێ نەشێن دەنگێ خەلکی ب دەستڤە بینن و دھێتە پێشبینی کرن د ھەلبژارتنێن سالا بھێت یا سەرۆک کۆماریا فرەنسا ھەڤرکی پتر د ناڤبەرا بەربژێرێ پارتیا کۆماری فرانسوا فیون و بەربژێرا پارتیا راستگر مارین لوپین بیت کو شیایە جەماوەریەکێ باش ل فرەنسا بۆ خوە پەیدا بکەت.
ل دووماھیا راپۆرتا ئاژانسا رویتەرز دا ئەو یەک ھاتیە دیار کرن کو د گەرا یەکێ یا ھەلبژارتنێن سەرۆک کۆماریا فرەنسا دا چو بەربژێرەک نەشێت پرانیا دەنگان ب دەستڤە بینیت و پێشبینی دھێتە کرن ھەلبژارتن دەربازی گەرا دویێ بن و ل وی دەمی دێ شانسێ فرانسوا فیونی بۆ سەرکەفتنێ زێدەتر بیت.

ئەڤرۆ نیوز:
رۆژنامەکا لوبنانی د راپۆرتەکی دا دیار دکەت کو ئەمریکا و ئورۆپا ل سەر ئاڤاکرنا دەولەتا سەربخوە یا کوردستانا مەزن ل ھەڤکرینە و یەکەم وەلاتێ کو ڤێ دەولەتێ ناس بکەت ژی ئیسرائیل و وەلاتێن ئورۆپا نە و ئەمریکا دێ تورکیا ل سەر ئاڤاکرنا دەولەتا کوردی رازی کەت.
ل دووڤ راپۆرتا رۆژناما ئەلدیار یا لوبنانی سنورێن ل رۆژھەلاتا ناڤین وەکو بەرێ نامینن و ئەمریکا و ئورۆپا ژی دخوازن پشتەڤانیا دەولەتەکا سەربخوە یا کوردستانێ بکەن و بۆ ئاڤاکرنا دەولەتا مەزن یا کوردستانێ رێککەڤتینە و سنورێن دەولەتا کوردی ژ سنورێ ئیرانێ ئانکۆ رۆژھەلاتێ کوردستانێ دەستپێ دکەت و پشکەک ژ ئاخا تورکیا (باکورێ کوردستانێ)، پشکەک ژ ئاخا سووریێ ئانکۆ رۆژئاڤایێ کوردستانێ و ھەرێما باشورێ کوردستانێ دگریتە ناڤا خوە.
رۆژناما ئەلدیار یا لوبنانی چاڤکانیا راپۆرتا خوە ژ تەڤگەرا (عون) یا لوبنانێ کو میشەل عون سەرۆکێ نھا یێ لوبنانێ سەرۆکێ وێیە وەردگریت و ئەنجاما ڤەکۆلینا خوە ل سەر چاوانیا ئاڤاکرنا دەولەتا کوردستانێ بەلاڤ دکەت.
ل دووڤ راپۆرتێ دەولەتا کوردستانێ دێ سیستەمێ بازارا بەرھەم ئینانا کوردستانێ وەکو سیستەمێ کالیفۆرنیا یا ویلایەتا ئەمریکا ئازاد بیت و ھێزێن ئەمریکا و ئورۆپا دێ بنگەھێن خوە ھەبن و سیستەمێ پاراستن و ئاسایشا وێ ژی وەکو دەولەتا ئیماراتێ و دوبەی بیت و ئیسرائیل ژی ھەمان دەمێ دێ کوردستانێ پارێزیت.
د راپۆرتا رۆژناما ئەلدیار دا ھاتیە دیار کرن ژی کو دێ یەدەکا پەترۆلا کوردستانێ ژ پەترۆلا وەلاتێن کوێت، عیراق و ئیرانێ زێدەتر بیت. ھەروەسا ھەتا نھا وەلاتێ ھەری زێدە ل دژی ئاڤاکرنا دەولەتا سەربخوە یا کوردستانێ، دەولەتا تورکیایە و ئەمریکا دێ تورکیا ژی ب پەترۆلا ئەرزان یا کوردستانێ رازی کەت و ٣٠ سال پەترۆلا کوردستانێ ژ نرخێ وێ گەلەک ئەرزانتر بدەتە تورکیا. ھەروەسا ئاماژە ب وێ یەکێ ژی دکەت کو ژ نھا ڤە ٥٠٠ کۆمپانیێن ڤەکۆلینێ ل سەر ئاڤەدانکرنا ناڤچەیێن کوردستانێ دکەن یێن کو د شەری دا وێران بووینە.
ھەروەسا د پشکەکا دی یا راپۆرتێ دا ژی ھاتیە دیارکرن کو ئەمریکا دخوازیت دەولەتا کوردستانێ ببیتە میناکا دیمۆکراسیێ و ژ نھا ڤە ئیسرائیل و گەلەک وەلاتێن ئورۆپا ئامادەنە دەولەتا سەرخوە یا کوردستانێ ناس بکەن.
د دووماھیا راپۆرتا رۆژناما لوبنانی ژی ئەو یەک ھاتیە دیار کرن کو پشتی شەرێ مووسلێ دێ کورد ل عیراقێ ل گەل حوکمەتا ناڤەندی ل دۆر ئاڤاکرنا دەولەتا کوردی دانوستاندنان کەن و بەری نھا گەلەک دەزگەھێن راگەھاندنا عەرەبی ژی دیار کربوون کو سەرۆک وەزیرێن عیراقێ دیار کریە ئەو ل سەر ھندێ رازی نە کورد بریارا خوە بدەن.