ئەڤرۆ نيوز:
یانا میلان یا ئیتالی یا بزاڤان دکەت ھەڤبەستێ ل گەل یاریزانێ ئێنگلیزی ھاری کین ھێرشبەرێ یانا توتنھام ل ماوێ بھێت ئیمزا بکەت.
کین یێ ٢٣ سالی نوکە د ئاریشەیان دایە لگەل کارگێریا یانێ ل دور بابەتێ نووکرنا ھەڤبەستێ و زێدەکرنا موچێ بو بو زێدەتر ژ ١٠٠ ھزار جونەیھێن ئسترلینی د حەفتیەکێ دا و ژبو ڤێ ئارمانجێ بریکارێن وی ل دووماھیا وەرزی دێ لگەل کارگێریا یانێ کەن.
راپورتێن روژنامەڤانی ئاماژەکریە کو یانا مانچستەر یونایتد حەزەکا مەزن یا ھەی ژبو ب دەستڤەبرنا ڤی یاریزانی و یانا میلان ژی کەفتیە د ھەڤرکیا ب دەستڤەبرنا شیانێن وی دا ھەر چەندە ھەڤبەستا وی ل گەل یانا توتنھام ھەتا ٢٠٢٠ یە لێ خودانێن یانا ئیتالی یێن چینی دخوازن ل ماوەکێ نێزیک ڤەگوھێزنە ناڤا یانا خوە.
ئەف یاریزانە شیایە ببیتە جھێ گرنگی دانا یانەیێن مەزن یێن ئوروپی پشتی شیای ل ھەردو وەرزێن بوی ٢٠ گولان توماربکەت و ھەر ژبەر ڤێ چەندێ یانا وی یا نوکە دخوازیت ھەڤبەستا وی نوو بکەت داکو دوپات بکەت نە بو فروتنێ یە.

ئەڤرۆ نيوز:

یانا مانچستەر سیتی یا ئێنگلیزی یا بەرھەڤیا پێشکێشکرنا داخوازیەکێ بو ستێرا یانا بەرشەلونە یا ئسپانی لیونێل میسی یێ ئەرژەنتینی دکەت بو ھاڤینا بھێت ب کوژمێ ٢٠٠ ملیون جونەیھێن ئسترلینی.
ل دووڤ راپورتەکا روژنامەیا سەندەی میرور ئاشکەراکریە کو ل گەل ڤی کوژمێ پیڤای یێ یانا مانچستەر سیتی پێشکێشی یانا کاتالونی بکەت ھەمبەر دەستبەردانێ ژ میسی دێ موچەکێ حەفتیانەژی بو میسی تەرخان کەن کو دگەھیتە ٥٠٠ ھزار جونەیھێن ئسترلینی.
ژلایەکێ دووڤە ژێدەرەکێ نێزیک ژ یانا ئێنگلیزی ئاشکەراکریە کو پشتی ھەڤبەستا راھێنەرێ یانێ پیپ گواردیولا یێ ئسپانی ھاتیە ئیمزاکرن وەسا دھێتە پێشبینیکرن کو دەلیڤا ھاتنا میسی بو یانێ گەلەک ب ھێز کەفتیە ھەکە میسی ل دووماھیێ بریارا ب جە ھێلانا بەرشەلونە بدەت و زێدەتر ژ وێ چەندێ کو ھەتا نوکە یانا بەرشەلونە نەشیایە میسی رازی بکەت بو نووکرنا ھەڤبەستا وی ئەوا دێ ل ٢٠١٨ ب دووماھی ھێت.
یانا مانچستەر سیتی ژ وان یانێن کێم دھێتە ھژمارتن یێن شیانێن مەزن یێن دارای ھەین و دشیان دا یاریزانێن ل ئاستێ میسی ھەڤبەستێ ل گەل ئیمزا بکەت و ھەکە ئەف بزاڤێن وان سەرگرتن دێ نمرا پیڤای یا ھەڤبەستا یاریزانێ مانچستەر یونایتد بول بوگبای ب ١٠٥ ملیون یورویان ھێتە شکاندن و ھەر ل دووڤ ڤێ روژنامێ چەند یانێن دی ژی ھەنە گرنگیێ ب یاریزانێ بەرشەلونە میسی دەن مینا پاریس سان جێرمان یا فرەنسی و چێلسی و مانچستەر یونایتد یێن ئێنگلیزی.

ئەڤرۆ نيوز:
راھێنەرێ پرتوگالی یێ یانا مانچستەر یونایتد یا ئێنگلیزی جوزێ مورینھو یێ دووڤچونا بەرەڤانێ یانا بایرن میونخ یا ئەلمانی و ھەلبژارتیێ نەمسا دیڤێد ئالبا دکەت وەکو بەرھەڤی پێخەمەت ب ھێز ئێخستنا ھێلا بەرەڤانیا یانێ.
ل دووڤ پەیامەکێ روژنامەیا سەندە بیبول یا بریتالنی ئاشکەراکریە کو یانا مانچستەر نوونەر دەستنیشانکریە ژبو دووڤچونا ڤی یاریزانێ ٢٤ سالی تایبەت د ھەردو یاریێن نێڤدەولەتی دا ل ھەمبەر ئایرلەندا و سلوڤاکیا.
ل گەل ڤێ بزاڤا یانا مانچستەر یونایتد ھەردو یانێن بەرشەلونە و ریال مەدرید ژی حەزا ئیمزاکرنا ھەڤبەستێ لگەل دا یا ھەی ل ڤەگوھاستنێن زڤستانێ، ئەف چەندە د دەمەکی دایە کو یانا ئەلمانی راگەھاندبوو دەستا ژ یاریزانێ خوە بەرنادەت ھەکە ھەمبەر کوژمەکێ مەزن یێ پارەی نەبیت چونکو ھەڤبەستا وی ل گەل یانا نوکە ھەتا ٢٠٢١ یە.

ئەڤرۆ،ھەژار مەعروف:
نوونەرێن باکورێ کوردستانێ دخولێن تورکیا یێن پلا دو سێ دا ژ سەرجەمێ حەفت یانا و حەفت یاریا بتنێ دو یانا شیان سەرکەفتنێ توماربکەن ئەوژی دیاربەکر سپور و باتمان پترول دخولا پلا سێ دا و سێ وەکھەڤی ل گەل دو خوسارەتیا تومارکرن .
دخولا پلا دو دا یانا ئامەد ژ دەرڤەی یاریگەھا خوە خوسارەت بوو ل گەل یانا کوجەعەلی بیرلیک سپور ب گولەکێ بێ بەرامبەر و سەرارای ڤێ خوسارەتیێ نوونەرا باکورێ کوردستانێ ئامەد سەرێ لیستەیا خولا پلا دو پاراست ب ٢٧ خالان و د یاریێن خولا پلا سێ یا تورکیا دا د یاریێن کوما سێ دا یانا دیاربەکر سپور شیا سەرکەفتنا سێ ل دیڤ ئێک توماربکەت و یا حەفتێ ل وەرزێ ئەڤ سالە ژ سەرجەمێ ١٣ یاریان پشتی ب سەرکەفتی ل سەر یانا دەرنجە گەنجلەربیلی سپور ب سێ گولان بێ بەرامبەر و خالێن خوە گەھاندنە ٢٤ خالان پێشڤە ھاتە رێزا سیێ و د ھەمان کوم دا بینگول ل یاریگەھا خوە وەکھەڤ بوو ب گولەکێ خالێن بینگول گەھشتە ١٣ خالان ل رێزا ١٣ دھێت.
د یاریێن کوما ئێکێ دا خولا پلا سێ یانا ھەردو نوونەرێن کوردستانێ وەکھەڤ بوون د یاریێن خوە یێن ڤێ حەفتیێ یانا ڤان سپور مفا ژ ئەرد و جەماوەرێ خوە نەدیت پشتی وەکھەڤبووی ل گەل یانا گولچوک سپور ب گولەکێب ھەمان ئەنجام جزیرە سپور ژێ ل یاریگەھا خوە ل گەل ئەنقرە دەمیر وەکھەڤ بوو، د یاریێن کوما دوێ دا باتمان پترول ب سەرکەفت ل سەر جەتەلجە ب گولەکێ بێ بەرامبەر و دێرسم سپور بەردەوامی دا ئەنجامێن لاواز ل وەرزێ ئەڤ سالە توشی خوسارەتیا خوسارەتیا ھەشتێ بوو ژ سەرجەمێ ١٣ یاریان ئەڤ جارە ل گەل مانیسا ب گولەکێ بێ بەرامبەر .

ئەڤرۆ، زنار زوبێر:

سەرەرای ئەوان مەزاختنێن زور و ئینانا یاریزانێن خودان شیان بۆ تیما خوە ھەتا نوکە پشتی بورینا سێ یاریان یانا زێرەڤانی د خولا پێشمەرگەی کوردستانێ دا نەشیایە سەرکەفتنێ دەستخوە ڤە بنت و شروڤەکار ھوسا خویا دکەن ئاستێ تیمێ لاوازە و نەشێت نانساڤی دەستخوە ڤە بینت و ئەنجام ب پارەی ناھێن، بەرامبەر راھێنەرێ تمیێ خوە بەرپرسیار دبینت ھەمبەر ڤان ئەنجامان.

نە یاریزان و نە راھێنەرێن پارێزگەھێ  مفای ژ وەرزشا ڤێ یانێ نابینن

ل دۆر ئەنجامان سەلاح مستەفا شروڤەکارێ وەرزشی بۆ رۆژناما ئەڤرۆ گۆت: ھێشتا دەم مایە بریارەکێ ل سەر راھێنەر سەمیر بابوی و ئەنجامێن وی یێن لاواز بدەین لێ جھێ پرسیارێ یە ئەڤ کوژمێن مەزن یێن یانا زێرەڤانی سەخمەراتی ناسناڤێ خولا ھەرێمێ کو چو مفا د پشکداریا وێ دا و چو خەلات بۆ تیما سەرکەفتی نینن دیسان کەس نزانت ل سەر چ بنیات کارگێریا یانێ ئەڤ کوژمێن مەزن بۆ یاریزان و راھێنەران مەزاختین بێ لێپرسین د ڤێ قەیرانێ دا و مەرەم ژ ڤێ چەندێ چیە ژبەرکو نە یاریزانێن  پارێزگەھێ یێن گەنج و نە راھێنەر مفای ژ وەرزشا ڤێ یانێ نابینن تنێ بازرگانیەکە ب ڤێ یانێ دھێتە کرن و ئەو یاریزان ئینان ژی ل ئاستێ پێدڤی نینن پیشەکارێن وێ ژێ نە ل ئاستێ پێدڤی نە تایبەت یێ ھولەندی کو دووماھی یانێن یاری لێ کرین دخولێن ئورۆپی دا ل خولێن نورمال کرینە و ئاستێ وی پاشڤەزفریە گەلەک ل دو سالێن بوری

ناڤبری ئەو چەندە ژی دیارکر شێوازێ یاریا یێ دیار نینە دیسان ھەتا نوکە تیم بشێوەکێ دروست نەشێت تەپێ ڤەگوھێزت ناڤبەرا ھێلنێن خوە دا سەرەرای کو بۆ ماوێ زێدەتر ژ سێ ھەیڤان بەرھەڤی کرینە و کەمپەکێ راھێنانێ ژی ل وەلاتێ تورکیا دانایە و ھوسا دبینم یانا زێرەڤانی ل ڤی وەرزی نەشێت ناسناڤێ خولا ھەرێما کوردستانێ دەستڤە بینت.

وەحید رەشید: ھەر راھێنەرەکێ نافخوی ئەڤ شیانێن پارەی ل بەر دەستی بن یێن یانا زێرەڤانی دێ ئەنجامێن باشتر ب دەستخوڤە ئینت

ژلایێ خوە ڤە وەحید رەشید راھێنەر و شروڤەکارێ یاریا تەپا پێ بۆ رۆژناما ئەڤرۆ گۆت: تنێ پارە ناسناڤان بۆ یانێ دەستڤە نا ئینت بلا کارگێریا یانا زێرەڤانی دوبارە ھزرا خوە د دروستکرنا تیمێ دا بکەت و پشتەبستنێ ل سەر ئەوان یاریزانێن خوە یێن گەنج بکەت یێن تیمێ دا ھەین و دەلیڤە وەرنەگرتی کو سەمیر بابو ب خوە ژی گوتبۆ دێ پشتەبەستنێ ل سەر یاریزانێن گەنج کەم و یاریزانێن ب تەمەن ھاتنە دورخستن لێ مخابن ل شونا وان ھەمان یاریزانێن ب تەمەن ژ یانێن دی ئینان دیسان ئەگەر ب کوژمێن پارەی بیت گەلەک راھێنەر ل سەر ئاستێ پارێزگەھێ ھەنە دێ شێن ڤان شیانێن دارایی یێن مەزن و ڤان مەزاختنا د ڤێ قەیرانێ دا دێ تیمێ باشترین شێوە ب رێڤەبەن جھێ داخێ یە چەندین یاریزان بەری نوکە ل ڤێ یانێ کار کربیت نوکە دەلیڤە بۆ نەھێتە دان کار بکەت کو ئەڤە مەزنترین خەلەتیە کارگێریا یانا زێرەڤانی کری.

ناڤبری ل دۆر شێوازێ یاریا راھێنەر سەمیر بابوی ژی گۆت: شێوازێ یاریا وی ھەتا نوکە یێ دیارنینە و خاندنا وی بۆ یاریێ ھەتا نوکە نە یێ دروستە و چەندین خەلەتی د پێکھاتێ تیما وی دا پەیدابوینە دیسان یاریزان دروست ل جھێ وان بکارنائینت دیسان نیڤا یاریگەھێ ژی تەپە نە یا جێگیرە بەردەوام دھێـتە برین ئەو گۆلێن ھەتا نوکە ژی سەر تیمێ ھاتین باشترین گروڤە سەر ڤێ چەندێ.

سەمیر بابوی نەشێت چو ناسناڤ و ئەنجامێن باش بۆ زێرەڤانی دەستڤە بینت

ژلایێ خوە ڤە وەرزشڤانێ دێرین نعمەت مەحمود بۆ رۆژناما ئەڤرۆ  گۆت: مادەم یانا زێرەڤانی راھێنەرێ خوە گوھارت پێدڤی بوو راھێنەرەکێ خودان شیان بۆ تیما خوە ئینابا و راھێنەرەکێ گەنج وەکی سەمیر بابوی نەشێت چو ناسناڤ و ئەنجامێن باش بۆ زێرەڤانی دەستڤە بینت ژبەرکو شارەزایا وی یا کارێ راھێنەراتیێ یا کێمە و یانەکا وەک زێرەڤانی بەری نوکە بکێمترین مەزاختی ژ وەرزێ ئەڤ سالە شیا سێ سالان ناسناڤێ خولا ھەرێمێ ببەت کو نوکە یانە ھزرەکا مەزن بۆ زێرەڤانی دکەن لێ بلا بۆ کارگێریا یانا زێرەڤانی یا رەوا بیت ئەو ل ڤی وەرزی ناسناڤێ خولا ھەرێمێ دەستڤە نا ئینن ھەمی تشت ب پارەی ناھێتە کرن و سەمیر بابو نەشێت ب ڤان یاریزانان ئەنجامێن باش ڤی وەرزی دەستڤە بینت ژبەرکو تنێ ھندەک یاریزان ژ یانێن دھۆک و ھەولێر ئیناینە کو چەندین سالە ئاستێ وان وەک خویە و ئەو شیان دەف ڤی راھێنەری نینن بشێت ئاستێ وان ب گوھۆریت و ھەمی د زانن ئەنجام ب ڤان یاریزانان نائێن.

راھێنەرێ زێرەڤانیێ: ئەنجام نەدباشن و ئەز بەرپرسم ژێ 

بەرامبەر ڤان گۆتنان سەمیر بابو راھێنەرێ یانا زێرەڤانی بۆ رۆژناما ئەڤرۆ گۆت: ھەمی بوچون دروستن و راستە ئاست و ئەنجامێن یانا زێرەڤانی لدیف داخوازیا من نینن و ئەز بەپرسیارم ژ ڤان ئەنجامان لێ من دڤێت دیاربکەم ٨٠% تیم ھاتیە گوھۆرین و ھێشتا نێزیکبون د ناڤ بەرا یاریزانا دا دروست نەبویە ژبەرکو بەری نوکە ڤێ یانێ چو بنیات نەبوو یە دیسان چەندین یاریزانێن گەنج د تیمێ دا بون لێ ئاستێ وان یێ باش نینە ئەو نەشێت پشتبەستنێ بەردەوام لسەر شیانێن وان بکەت لێ بۆ یاریێن بھێت دێ گوھۆرین د تیمێ دا پەیدابن ژلایێ ھونەری و تەکتیکی ڤە و ئەنجام دێ باشتربن و بەری نوکە دا وان کار لسەر خەلەتیێن خوە کریە کو چارەسەر بکەن.

ناڤبری ئەو چەندە ژی دیارکر کو وی بەری دەسپێکرنا خولێ کارگێریا یانێ ئاگەھدارکربوو کو ئەڤ یاریگەھە لدیف شێوازێ یاری وی نا گونجیت لێ ئەڤە نە رامانا وێ چەندێ یە ئەو ژبەر پرسیارەتیا ڤێ کاری د رەڤیت.

دەربارەی یاریزانێن نوکە یێن تمیێ ناڤبری دیارکر کو ئەو نەچاربوو ڤان یاریزانا بینت و ئەو یاریزانێن وی دڤیان نەشیا دەستڤە بینت لەورا نوکە گڤاشتنێن مەزن لسەر کارگێریا یانێ و یاریزانا پەیدابویە ژبەر وێ قەبارا مەزن دایە ڤێ تیمێ کو ئەو تیم نینە ڤی رولێ زێدە و فشارێ لسەر بھێتە پەیداکرن ژلایێ راگەھاندن و جادا وەرزشی ڤە.

ل دوماھیێ بابوی گۆت: ئارمانجا وی ئەوە نوکە تیم ب گەھیتە قوناغا چارگوشا زێرین و ل وی دەمی دێ من بوچونەکا دی ھەبیت دەربارەی دەستڤە ئینانا ناسناڤێ خولا ھەرێمێ.