ئه‌ڤرۆ نيوز:

ھەکە وەزارەتا ناڤخۆ داخوازێ بکەت، ئەو کامیرێن بەری 10 سالا ھاتینە دانان دێ بۆ ھێنە ڤەگەراندن، چونکو چو مفا ژێ ناھێتە وەرگرتن، کامیرێن ب ترافیکا ڤە ھاتینە دانان ژبەر نەدانا پارێ کومپانیێ نەکەتینە کاری، بەلێ بڕیارە 15 کامیرێن جێگیر ل سنورێ پارێزگەھێ بھێنە دانان، پتری چار ترۆمبێلێن میری د 11 ھەیڤێن دەستپێکا ئەڤ سالە دا سەرپێچیێن ھاتن و چوونێ کرینە، رێڤەبەرێ ھاتن و چوونا دھۆکێ دیاردکەت ترۆمبێلا وی یا تایبەت ژی دو جارا ھاتیە سزادان.
ل سالا 2009ێ ھزرا دانانا کامیرا ھاتە کرن و سالا 2010 کەتە د وارێ بجھئینانێ دا، کامیرێن وی دەمی ب دەستی وێنە دھاتنە گرتن و پولیسێن ل سەر کامیرێ دشیان وێنەی دیلێت بکەت، بەلێ کامیرێن نوکە ھەر وێنەکێ بھێتە گرتن ب شێوەیەکێ ئوتوماتیک دکەڤیتە د سیستەمی دا و دشێن شەش وێنەیان پێکڤە بگرن و چو کەش و ھەوا کارتێکرنێ ل کێشانا وێنەی ناکەن، رێڤەبەرێ ھاتن و چوونا دھۆکێ دیاردکەت کامیرێن کەڤن نەماینە د کاری دا و د کوگەھان ڤە د ھەلگرتینە و چو دەمێ وەزارەت ناڤخۆ داخواز بکەت ئەو دێ وان کامیرا بۆ ھنێرن.
عەمید فەخری ئەحمەد، رێڤەبەرێ ھاتن و چوونا دھۆکێ دیارکر گەلەک کامیرێن چاڤدێریێ ھەنە کو ل ھەر ئێک ژ سەنتەرێ باژێرێ دھۆک و زاخو و شێخان و ئاکرێ دو کامیرە دھێنە دانان و ل کەلەکێ و ئامێدیێ ئێک دھێتە دانان و گۆت: نوکە ئەم کاردکەین 15 کامیرە یێن جێگیر ب تایبەت ل جھێن بێ کارەب بھێنە دانان و ل دووڤ پرۆژێ مە پێنج بۆ سەنتەرێ باژێرێ دھۆکێ و یێن دیتر ل ناڤ قەزا و رێیێن سەرەکی ب تایبەت ل جھێن گەلەک روودان لێ پەیدادبن وەک بەردەرەش و شێخان و رێیا نوو یا دناڤبەرا بەردەرەش و سێریانا حسێنیێ دێ ھێنە دانان و تا نھا مە ھەیکەلێن پێنج کامیرا دروست کرینە.
رێڤەبەرێ ھاتن و چوونا دھۆکێ دیارکر ژی، جوداھی دناڤبەرا کامیرێن جێگیر و گەرۆک دا ئەوە کو کامیرێن جێگیر ل وان جھێن گەلەک روودان لێ ھەبن دھێنە دانان و یێن گەرۆک لەزاتیێ کێم دکەن و ھەستەکێ بۆ شوفێری پەیدادکەت کو ھەموو دەما یێ ل ژێر چاڤدێریێ و گۆت: مەبەستا مە سزادانا شوفێری نینە، بەلکو مەبەستا ئەوە روودان و قوربانی کێم دبن و پشتی دانانا کامیرا رێژا روودانا ل ھەمبەر سالێن بۆری گەلەک یا کێم بووی و جورێ روودانا یێ ھاتیە گوھورین، بۆ نموونە ل سالا
2013 ھژمارا کەسێن گیانێ خوە ژ ئەگەرێ روودانێن ترۆمبێلا ژ دەست دای 260 کەسبوون، بەلێ د 10 ھەیڤێن بۆری دا ژ سالا 2016 ھژمارا کەسێن گیانێ خوە ژ دەستدای 26 کەسبوون و ھندی کامیرێن چاڤدێریێ پتر بن روودان دێ کێمتر ھەبن و کێمتر کەس دێ بنە قوربان.
عەمید فەخری ئەحمەد دیارکر، ل دەستپێکا سالا 2016 و تا نوکە 377 ھزار و 341 سەرپێچی ل دھۆکێ ھاتینە تومارکرن کو کامیرێن ھاتن و چوونێ ھژمارا ھەرە مەزن تومارکرینە کو دبنە 141 ھزار و 820 سەرپێچی و گۆت: چار ھزار و 125 ترۆمبێلێن حوکمەتێ ژی کەتینە ل بەر سزایێن ھاتن و چوونێ و کەس ناھێتە لێبورین، چونکو سزا دچنە د سیستەمی دا و ھەکە ئێک ژێببەت پێدڤیە پارا ل پێشڤە بدەین ب تنێ ترۆمبێلێن ئەمبولانس و پۆلیس کو د دەمێ کاری دابن دھێنە لێبورین، بەلێ پێدڤیە نڤیسارەکێ بینن کو د کاری دا بوون.
رێڤەبەرێ ھاتن و چوونێ دیارکر ئەو ژی ل بەر سزایێن ھاتن و چوونێ دکەڤیت و گۆت: دو جارا مال سەرپێچی ب ترۆمبێلا من یا تایبەت کرینە و من سزا یێ دای و ل دەمێ دەستپێکا دانانا سیستەمی من ل سەر ترۆمبێلا خوە جەرباند و مەسج بۆ من ھاتن و یێن جەرباندنێ ژی من پارە پێشڤە دان، چونکو چوو بوونە د سیستەمی دا.
عەمید فەخری ئەحمەد دیار کر، کەسێ ماف نینە سەرەدەریێ ل گەل داھاتێ کامیرا بکەت، ھەموو دچیتە گەنجینا حوکمەتێ و گۆت: سالا 2010ێ پشکەک ژ ڤی پارەی وەکو پاداشت بۆ پۆلیسا دھاتە تەرخانکرن، بەلێ چونکو خەلکی دگۆت پۆلیس مە سزا ددەن دا پارە بگەھنە وان، لەورا مە ئەو سیستەم راکر، نوکە ژی نیازا مە نینە ئەم داخازا وی پارەی بکەین.
دەربارەی ئەو ئەو کاغەزێن د دەستێ پولیسێن ھاتن و چوونێ دا و نڤیسینا ھژمارێن ترۆمبێلا دیارکر ئەو بۆ وان ترۆمبێلانە یێن دھۆک نەبن، نەچارن سیستەمێ کەڤن ب کاربینن، بەلێ یێن دھۆکێ ب رێیا SMS کو د ماوێ نیڤ خولەکێ دا دھێتە ئاگەھدارکرن، دیسا ل سایتێ ھاتن و چوونێ ژی شوفێر دشێن سەرەدانێ بکەن و سەرپێچیێن خوە بزانن.
گۆت ژی: گازندا مە یا رێڤەبەریا ھاتن چوونێ ئەو بوو کو سزا ب تنێ بۆ ترومبێلێن عیراق دھۆکن، لەورا مە داخاز ژ وەزارەتا ناڤخو کر و رازی بوو ئەو ترۆمبێلێن عیراقی یێن دەرڤەی ھەرێمێ یان ژمارە (فحص)، ھەر پارێزگەھەک ب ھەماھەنگی دگەل ئاسایشێ پشتی کو مە پشت راست دکەن چو ل سەر نینە، ئەم باجەکێ بۆ چێدکەین وەکو سەنەوی و وەکو ترۆمبێلێن دھۆکێ دھێنە سزادان و سزایێ خوە ژی ددەن.
دەربارەی سەرپێچیێن ترۆمبێلێن دەرڤەی عیراقێ ژی گۆت: مە یێ کارکری کو ل خالا ئیبراھیم خەلیل پشکەکا ھاتنوچوونێ بدانین و مە گرێدانەکا ب کێبلی دڤێت و ھەکە ب دووماھی ھات ھەر سەرپێچیەکا ئەو بکەن و وەختێ دەردکەڤن دێ سزایێ خوە دەن و ھەر دەمێ تورا ئەنترنێتێ ب دووماھی بھێت ئەم دئامادەینە دەست ب وی کاری بکەین.
دەربارەی کامیرێن ب ترافیکا ڤە ھاتینە دانان، رێڤەبەرێ ھاتن و چوونا دھۆکێ دیارکر ئەو کامیرە ژلایێ کومپانیەکێ ھاتینە دانان و ژبەر قەیرانا دارایی سیستەم ب دووماھی نەھاتیە و ھەکە کەتنە کاری دێ وەکو یێن دیتر بن و شوفێرێ پێگیریێ نەکەت دێ ھێـە سزادان.
ل دور ھەڤبەندیێن پارێزگەھێن ھەرێمێ دیارکر کو رێڤەبەریێن ھاتن وچوونێ ل ھەرێمێ ھەموو پێکڤە ھاتینە گرێدان و ھەموو پێزانینێن ھەولێر و سلێمانیێ ئەو دشێن ببینین، بەلێ نەشێن دەستکاریێ تێدا بکەین و سەرپێچی ژی ھەکە ھەبن شوفێرێن ھەر پارێزگەھەکێ ل جھێ خو سزای ددەت.