ئه‌ڤرۆ نیوز:
ل دووڤ ئامارێن كوچكرنێ ل ماوێ 35 سالێن بوورى، ملیونه‌ك و 300 هزار كه‌سان هه‌رێما كوردستانێ بجه هێلایه و رێژا كوچكرنێ بۆ 21 % بلندبوویه.
نه‌زهه‌ت حسێن به‌رپرسێ پشكا په‌نابه‌ران و ره‌ڤه‌ندا كوردى ل رێڤه‌به‌ریا كوچ و كوچبه‌رێن هه‌رێما كوردستانێ ئاشكرا پشتى هه‌رفینا رژێما به‌عس ل 2003 ێ رێژا كوچكرنێ د ناڤبه‌را 7 بۆ 10% بوویه‌ن به‌لێ پشتى هاتنا داعش و دروستبوونا قه‌یرانا دارایى ل سالا 2013 بۆ 2016 رێژا كوچكرنێ بۆ 21% بلند بوویه.
نه‌زهه‌ت حوسێن ئاماژه ب وێ یه‌كێ ژى كر كو هاولاتیێن عیراقێ 8% ژ هه‌موو كوچبه‌رێن جیهانێ پێك دئینن و ژ ڤێ رێژێ پشكه‌ك به‌ر ب هه‌رێما كوردستانێ ژى دكه‌ڤیت.
ئه‌ڤرۆ نیوز:
مه‌سرور بارزانى راوێژكارێ جڤاتا ئاسایشا هه‌رێما كوردستانێ د پێشوازیكرنا سێر ئالن دانكن په‌رله‌مانتارێ پارتا پارێزگارێن به‌ریتانیا و شاندێ ل گه‌ل دا ئاماژه ب وێ یه‌كێ كر كو وه‌ك هه‌ر نه‌ته‌وه‌یه‌كێ ل جیهانێ، گه‌لێ كوردستانێ ژى مافێ ده‌وله‌تا سه‌ربه‌خویا هه‌ى كو ب هه‌بوونا ڤێ ده‌وله‌تێ، دێ بیته فاكته‌ره‌ك بۆ بهێزكرنا سه‌قامگیریێ و هه‌ڤده‌م گرنتیه‌ژى بۆ خوپاراستن ژ هه‌ر هه‌ره‌شه‌كێ كو ل ئاینده‌ى دێ روو ب روو بیت.
هه‌ر گرێداى ب مافێن سروشتى یێن گه‌لێ كورد، راوێژكارێ جڤاتا ئاسایشا هه‌رێما كوردستانێ دیاركر كو هه‌رێما كوردستانێ پشتى ژ ناڤچوونا رژێما سه‌دام، ئه‌وا د شیاندا بیت بۆ ئاڤاكرنا عیراقێ دیموكراتى و فیدرالى یا كرى، ب وى مه‌رجى كو هه‌ڤبه‌ش بیت، به‌لێ ره‌فتارێن به‌غدا و فه‌راموشكرنا ده‌ستوورى و برینا قیتێ خه‌لكێ و دروستكرنا ئاسته‌نگان ل هه‌مبه‌ر پێشكه‌فتنا هه‌رێما كوردستانێ، به‌رۆڤاژى ڤێ چه‌ندێ سه‌لماند.
مه‌سرور بارزانى گوت ژى: ئه‌گه‌ر عێراق هه‌رێما كوردستانێ ب هه‌ڤپشكا خوه یا راسته‌قینه قه‌بوول نه‌كه‌ت، هه‌رێما كوردستانێ ژى پاشگویا وێ ره‌ت بكه‌ت، ئانكو دڤێت د ناڤبه‌را هه‌ردو ئالیان دا میكانزمه‌ك بهێته دیتن بۆ وێ یه‌كێ ببنه دو هه‌ڤسوویێن باش، چونكه نابیت هه‌رێما كوردستانێ باجا شاشیێن خه‌لكه‌كى دى بده‌ت.
ئه‌ڤرۆ نیوز ، نه‌وزاد زاده هلۆرى:
سپێده‌یا ئه‌ڤرۆ د روودانه‌كا ترافیكێ دا ل ناحیا بجێل دوو ترومبێلان لێكدا و د ئه‌نجام دا كه‌سه‌كێ گیانێ خوه ژ ده‌ست دا و كه‌سه‌كێ دن ژى برینداربوو.
رێكه‌فت زاهێر به‌رپرسێ راگه‌هاندنا هاتن و چوونا ئاكرێ دڤى واریدا بو ئه‌ڤرۆ نیوز گۆت : ( ئه‌ڤرۆ 22 ئایارا 2016 ل ده‌مژمێر 9:35 خوله‌ك روودان دناڤبه‌را دوو جورێن ترومبێلا تویوتا كرولا بارهه‌لگرا بچوك ره‌نگێ زه‌ر و هوندا ئه‌لنترا تایبه‌ت ره‌نگێ ره‌ش كو لسه‌ر رێیا گشتى یا جاددا قه‌ندیل بو دوریانا گوندێ نێروه ل ناحیا بجێل یا سه‌ر ب قه‌زا ئاكرێ ڤه درۆستبوویه به‌لێ ب مخابنیڤه دوو كه‌س بوونه قوربانى كو ژ وان ژى كه‌سه‌كێ گیانى َخوه ژ ده‌ستدا )
زێده‌تر گۆت : ( بریندارێ روودانێ ژى بوو نه‌خوشخانا ئاكرێ هاتیه ڤه‌گوهاستن )
ئەڤرۆ نيوز:
ڤەکۆلەران ل بەلچیکا د ڤەکۆلینەکا نوو دا ئاشکەرا کر کو وەزرشکرن پشتی تێشتێ ئەگەرەکە بۆ قەلەویێ.
ئەڤ ڤەکۆلینە ل سەر ژمارەکا گەنجان بۆ ماوێ شەش حەفتیان ھاتە ئەنجام دان، کۆمەکا گەنجان رۆژانە پشتی تێشتێ وەرزش دکر و کۆمەکێ ژی بەری تێشتێ دکر، ھەردو کۆمان ژی ھەمان جورێ خوارنێ دخوار و ھەمان وەرزش دکر.
ئەنجامێ ڤەکۆلینێ ب ڤی رەنگی بوو؛ پشکداربوویێن کۆما ئێکێ رۆژانە پشتی تێشتێ وەرزش دکر، کێشا وان بلند بوو ب رێژا ئێک بۆ دو کیلۆیان زێدە کر و رێژا ئەنسولینێ د ناڤ خوینا وان دا بلند بوو و ئەو کەسێن رۆژانە بەری تێشتێ وەرزش دکر، کێشا وان زێدە نەببوو و رێژا ئەنسۆلینێ ژی د ناڤ خوینێ دا ھەر وەکو خوە بوو.
رۆژانە وەرزشکرن یان ب رێڤەچوون بۆ ماوێ 20 دەقیقان مرۆڤی ب رێژا 16 بۆ 30% ژ مرنا پێشوەخت دوور دئێخیت.
ئه‌ڤرۆ نيوز:
جێگرێ سەرۆکێ لژنا ناڤخوە یا پەرلەمانێ کوردستانێ ڕاگەھاند، ژ لایێ وەزارەتا ناڤخوە پێداچوون ل سەر مووچێ زێرەڤانێن تایبەت دھێتەکرن و دوبارە دێ رێژا بڕینا مووچێ وان دێ ھێتە دیارکرن ڤە، گۆت: ئاریشا گیرۆبوونا مووچێ زێرەڤانان دێ ب دووماھی ھێت.
نازم کەبیر، جێگرێ سەرۆکێ لژنا ناڤخوە یا پەرلەمانێ کوردستانێ بۆ رۆژناما ئەڤرۆ گۆت: “پشتی کێمکرنا مووچێ فەرمانبەران، رێژەکا زۆر ل مووچێ زێرەڤانێن تایبەت ژی ھاتیە بڕین، کو بوویە جھێ دلگرانیا ئەڤان زێرەڤانێن تایبەت، ھژمارەکا زۆرا خەلکی کارێ وان زێرەڤانن و ژ بەرکو ئەڤە بادەکەکا ئەمنیە ناخوازم ھژمارا وان ئاشکرا بکەم، بەلێ پشتی گازندێن زێرەڤانێن تایبەت، مە وەکی لژنا ناڤخوە دەست ب دووڤچوونێ کریە و نوکە ژ لایێ وەزارەتا ناڤخوە ھاتیە پێکئینان بۆ پێداچوونێ ل سەر مووچێ زێرەڤانێن تایبەت و کارکرن تێدا یێ بەردەوامە”.
کەبیری ئاماژە ب وێ چەندێ ژی کر، ل گورەی زانیاریێن گەھشتینە وان، لژنا بلند کار ل سەر راستڤەکرنا مووچێ زێرەڤانان دکەت و بڕیارە د دەمەکێ نێزیک دا پێداچوون ب دووماھی بھێت و مووچێ وانژی بھێتە راستڤەکرن و گۆت: “ھێشتا بڕیارا دووماھیێ ل سەر مووچێ وان نەھاتیە دان، کانێ دێ رێژا بڕینا مووچێ زێرەڤانێن تایبەت چاوا بیت، ب تنێ ئەوێن مووچێ وان گەلەک ژێ دھاتە بڕین و دێ ژ نوکە باشتر بیت، ئەڤەژی ئەگەربوو مووچێ وان یێ ھەیڤانە گیرۆ ببیت، ئەگەر ڕاستڤەکرن ب دووماھی بھێت، ئاریشا گیرۆبوونا مووچێ وانژی دێ ھێتە چارەسەرکرن”.
نيشاندان