ئەڤرۆ نيوز:
رێکخراوەکا ئەمریکی ل ھەرێما کوردستانێ کو ب تایبەت د ناڤ کەمپێن ئاواران دا کار دکەت ئاشکرا کر کو بازرگانی ب ئەندامێن لەشێ مرۆڤی و لەشفرۆشی د زێدەبوونێ دایە ب تایبەتی د ناڤ کەمپێن ئاواران دا کو ژ ھەیڤێن کانوونا دویێ و شواتا سالا 2016 زێدەترین کرین و فرۆتن ب گۆلچیسکان ھاتیەکرن و بھایێ وان ژی د ناڤبەرا حەفت بۆ 12 ھزار دۆلاران بوویە.
ل دووڤ راگەھاندنەکا وەزارەتا خواندنا بلند و ڤەکۆلینێن زانستی یا حوکمەتا ھەرێما کوردستانێ د.یوسف گۆران، وەزیرێ وەزارەتا ناڤھاتی دوھی رۆژا 18/5/2016 کۆمبوونەک ل گەل شاندەکێ رێکخراوا (ھارت لاند ئەلایندس) یا ئەمریکی ئەنجامدایە و د وێ کۆمبوونێ دا مەیس مەساعدی، رێڤەبەرا پرۆژێن رێکخراوا ناڤھاتی ل کوردستانێ بەحسێ وێ چەندێ کریە کو ژ ئەگەرێ بلندبوونا ھژمارا ئاواران د ناڤ کەمپان دا بازرگانی ب ئەندامێن لەشێ مرۆڤی و لەشفرۆشی د زێدەبوونێ دایە.

ئەڤرۆ نيوز:
وەزارەتا کارەبێ یا حوکمەتا ھەرێما کوردستانێ ل دۆر دانا کارەبێ بۆ کەرتێ تایبەت رۆنکرنەکێ ددەت و وەلاتیان ژی پشتراست دکەت کو بھایێ کارەبا نشتیمانی زێدە نابیت، پەیڤدارێ وەزارەتێ ژی دبێژیت: ئەم د ئامادەکاریێن خوە دا بۆ ڤێ چەندێ دبەردەوامین و ھەرێما کوردستانێ کریە 14 زۆن و ھەر زۆنەکێ ژی 100 ھزار پشکدارێن کارەبێ بەردکەڤن.
حوکمەتا ھەرێما کوردستانێ کارەبا نشتیمانی دیچ ڕادەستی کەرتێ تایبەت کەت و ل دووڤ زانیاریان ژی، ھەتا دووماھیا ئەڤ سالە ب فەرمی دێ دەتە ھژمارەکا کۆمپانیان، پشتی ھینگی کارەب ژ لایێ کۆمپانیان دێ ھێتە ب رێڤەبرن.
محەمەد ئەمین ھەورامی، پەیڤدارێ وەزارەتا کارەبێ یا حوکمەتا ھەرێمێ ڕاگەھاند، ھەتا نوکە ب فەرمی چ ژڤان بۆ دانا کارەبێ ب کەتێ تایبەت نەھاتینە دیارکرن و بۆ SNN گۆت: “د نوکە دا ل دووڤ جوگرافیا تۆرا کارەبا ھەرێما کوردستانێ، ئەم ل سەر ئامادەکاریێن خوە دبەردەوامین، ھەرێما کوردستانێ کریە 14 زۆن و ھەر زۆنەکێ ژی 100 ھزار پشکدارێن کارەبێ بەردکەڤن، چونکو مە ل ھەرێمێ ملیۆنەک و 350 ھزار پشکدارێن کارەبێ ھەنە، دڤێت وان ژی جودا بکەین، دا کو بزانین چەند ژ وان حکومی و بازرگانی و پیشەسازی نە”.
گۆتژی: “زانیاریێن ھوور ل سەر پشکداران ھاتینە کۆمکرن، لێ ھێشتا ھندەک کارێن دی ماینە، ب تایبەت ژ لایێ ڕادەستکرنا ئامیران بۆ کۆمپانیان، بۆ ھندێ ئەو کۆمپانیا کەرتێ کارەبێ وەربگریت بەرپرسیارەتیا ئامیران ژی ب ستوویێ خوە ڤە بگریت”.
دەربارەی شێوازێ پلانا وەزارەتێ ژی ھەورامی گۆت: “پلان ئەوە، ستافێ وەزارەتا کارەبێ ل دووڤ حەزا خوە دێ کار د گەل کۆمپانیان کەن و مووچێ وان ژی ھەر ژ لایێ کۆمپانیان ڤە دێ ھێتە دان”.
دەربارەی زێدەکرنا بھایێ کارەبێ، پەیڤدارێ وەزارەتا کارەبێ گۆت: “بھایێ کارەبێ دێ ھەر وەکو نوکە مینیت و بھایێ وێ دێ ل بن کۆنترولا حوکمەتێ بیت ب ھاماھەنگی ل گەل کۆمپانیان، ژ لایێ حوکمەتێ ڤە رێنمایی دێ دەرکەڤن و چ پلان بۆ زێدەکرنا بھایێ کارەبا نشتیمانی نینن”.

ئەڤرۆ نيوز:
وەزارەتا خاندنا بلند و ڤەکۆلینێن زانستی ل بەرە سیستەمێ وەرگرتنا قوتابیان ل زانکۆ و پەیمانگەھێن ھەرێمێ ب گوھۆڕیت.
د. یوسف گۆڕان دوھی ل گەل نوونەرا رێکخراوا ئایرێکس ل عیراقێ کۆمبوو و دیارکرن، کو گوھۆرین ب سەر سیستەمێ وەرگرتنا قوتابیان ل زانکۆ و پەیمانگەھان ھێتە کرن و ھەڤ شێوەیێ جیھانی ل دووڤ حەز و خواستا قوتابیان دێ ھێتە بجھئینان و رێکخراوا ئایرێکس دێ ھاریکاریا ھەرێمێ بۆ بجھئینانا ڤی سیستەمی کەت.

ئه‌ڤرۆ نيوز:

رێڤه‌به‌ريا به‌ره‌ڤانيا باژێرى راگه‌هاند كو دوهى ئێڤارى گه‌نجه‌ك ل نێزيك بێدارێ كه‌فته‌ د ناڤا ئاڤێ دا و جانێ خوه‌ ژ ده‌ست دا، ل باتيفا ژى شوفێره‌ك د ترۆمبێلێ دا ما ئاسێ.

رائيدێ مافپه‌روه‌ر بێوار عه‌بدولعه‌زيز، به‌رپرسێ راگه‌هاندنێ ل رێڤه‌به‌ريا به‌ره‌ڤانيا باژێرى ل دهۆكێ بۆ ئه‌ڤرۆ نيوز گۆت: “دوهى رۆژا سێشه‌مبى رێكه‌فتى 17ى گۆلانێ و ل ده‌مژمێر 5:00ى ئێڤارى گه‌نجه‌ك ل ناڤێ ئوزان حه‌جى حسێن د ژيێ 18 ساليێ دا ب مه‌ره‌ما ماسيگرتنێ دچيته‌ سه‌ر ئاڤا گۆندێ خێله‌خى ل نێزيك بێدارێ و كه‌ڤيته‌ د ناڤ ئاڤێ دا و نقۆم دبيت”.

به‌رپرسێ راگه‌هاندنێ ل رێڤه‌به‌ريا به‌ره‌ڤانيا باژێرى ل دهۆكێ زێده‌تر گۆت: “تيمێن نقۆمڤانێن به‌ره‌ڤانيا باژێرى ل زاخۆ به‌رده‌وام يێ ل لاشێ وى گه‌نجى دگه‌ريێن، به‌لێ ب مخابنى ڤه‌ هه‌تا نوكه‌ نه‌هاتيه‌ ديتن”.

رائيدێ مافپه‌روه‌ر بێوار عه‌بدولعه‌زيز دا زانين ژى كو هه‌ر دوهى ئێڤارى و ل ده‌مژمێر 6:00 ئاگر به‌ربوو ترۆمبێله‌كا بارهه‌لگر و شوفێر د ناڤ ترۆمبێلێ دا مابوو ئاسێ، “به‌لێ خۆشبه‌ختانه‌ تيمێن به‌ره‌ڤانيا باژێرى ل باتيفا شيان كۆنترۆلێ ل سه‌ر ره‌وشێ بكه‌ن و شوفێرى ب سلامه‌تى قورتال بكه‌ن”.

رێڤەبەرێ گشتی ل وەزارەتا دارایی یا حوکمەتا ھەرێما کوردستانێ راگەھاند، ھەر فەرمانبەرەکێ بەری نھا مۆلەتا بێ مۆچە یا سالەکێ یان پێنچ سالی وەرگرت بیت و پشتی ھینگی داخوازا ھەلوەشاندنا وێ مۆلەتێ بکەت، داخوازیا وی ناھێتە قەبوولکرن و مۆلەت ب چو رەنگان ناھێنە ھەلوەشاندن.

یاسین عەبدولواحد، رێڤەبەرێ گشتی ل وەزارەتا دارایی یا حوکمەتا ھەرێما کوردستانێ بۆ ئەڤرۆ راگەھاند، ل گۆرەی رێنمایێن نوو یێن وەزارەتا ھەر فەرمانبەرەکێ بەری نھا داخوازا مۆلەتا بێ مۆچە بۆ سالەکێ یان پێنچ سالان کربیت، دڤێت ماوێ مۆلەتا خۆ ب دووماھی بینیت و ژ نوو داخوازا دەستبکاربوونا دەواما خوە یا میری بکەت و گۆت: د ماوێ بۆری دا ھژمارەکا مەزن یا فەرمانبەرێن حوکمەتێ داخوازا مۆلەتا بێ مۆچە ژ حوکمەتێ کریە، گەلەک ژ وان ژی پشتی ھینگی داخوازا ھەلوەشاندنێ کریە، بەلێ داخوازیا وان ب چو رەنگان ناھێتە قەبوولکرن و ھەتا ئەو دەمێ مۆلەتێ ب دووماھی نەئینن، نەشێن جارەکا دی بڤەگەرنە سەر دەواما خوە یا میری.

ناڤبری ئاماژە دا وێ چەندێ، دەمێ فەرمانبەرەک مۆلەتا بێ مۆچە وەردگریت و د وی دەمی دا دچیت د خوونیت و باوەرنامەکێ وەردگریت، ئەو باوەرنامە ژ ئالیێ حوکمەتێ ڤە ناھێتە قەبوولکرن، خوە چو جۆرێ باوەرنامێ بیت و گۆت: چو وەزارەت و فەرمانگەە د پابەند نینن وێ باوەرنامێ قەبوول بکەن.

رێڤەبەرێ گشتی ل وەزارەتا دارایی ئاشکرا کر، دەمێ فەرمانبەرەک مۆلەتا بێ مۆچە وەدرگیت، چو مۆچە بۆ ناھێنە دان، بەلێ سالێن وی بۆ خزمەتکرنێ دھێنە ھژمارتن و ئەو ژی ب تنێ بۆ مەسەلا خانەنشینیێ نە و گۆت ژی: ئەو فەرمانبەرێن ژ نوو ھاتینە دامەزراندن سۆزنامە ئیمزاکرینە کو داخوازا چو مۆلەتا نەکەن ھەتا پێنچ سالان ژ دامەزراندنا خۆ ب دووماھی نەئینن. ل گۆرەی بریارا ھژمارە 38 ئەوا ل 5/4/2015 ژ ئالیێ ئەنجوومەنێ وەزیرێن ھەرێما کوردستانێ دەرچووی، دەستھەلات داینە وەزیر و سەرۆکێن دەستەیان کو مۆلەتا بێ مۆچە بدەنە فەرمانبەران، ب مەرجەکی ژ پێنچ سالان زێدەتر نەبیت.