ئه‌ڤرۆ نيوز:
وه‌زاره‌تا دارايى و ئابوورى يا حوكمه‌تا هه‌رێما كوردستانێ خشته‌كێ نوو يێ به‌لاڤكرنا مووچه‌ى راگه‌هاند.
1- رۆژا ئێكشه‌مبى 9ى چريا ئێكێ 2016 مووچێ ليوا و ديوانا وه‌زاره‌تا پێشمه‌رگه‌ى دێ هێته به‌لاڤكرن.
2- رۆژا دوشه‌مبى و سێشه‌مبى رێكه‌فتى 10 و 11ى چريا ئێكێ 2016 مووچێ يه‌كێن 70 و 80 يێن پێشمه‌رگه‌ى دێ هێته به‌لاڤكرن.
3- رۆژا چارشه‌مبى و پێنجشه‌مبى 12 و 13ى چريا ئێكێ 2016 مووچێ فه‌رماندا پێشمه‌رگێ زێره‌ڤانى و فه‌رماندا پێشمه‌رگێ به‌ره‌ڤانى و هه‌وارهاتنێ دێ هێته به‌لاڤكرن.
ئه‌ڤرۆ نيوز:
به‌نكا رافيده‌ين يا ميرى ئه‌ڤرۆ رۆژا دوشه‌مبى راگه‌هاند كو د ڤێ حه‌فتيێ دا پێشينه‌يا 10 مليۆن دينارى دێ ب كارمه‌ندێن حوكمه‌تێ هێته دان، دايه زانين ژى كو ژ به‌ر داخوازيا زێده ل سه‌ر ڤێ پێشينێ.
به‌نكێ ب رێيا به‌ياننامه‌كێ كو ئه‌ڤرۆ نيوز دانه‌ك ب ده‌ست خوه خستيه راگه‌هانديه: “فه‌رمانبه‌رێن رێڤه‌به‌ريێن ميرى ئه‌وێن پێشتر داخوازى بۆ پێشينه‌يان پێشكێش كرين، دشێن فۆرمێن ئه‌لكترۆنى يێن ل سه‌ر مالپه‌رێ به‌نكێ هه‌ين پڕ بكه‌ن”.
هه‌ر د ئه‌ڤێ به‌ياننامێ دا دايه زانين ژى كو دێ به‌نك دووباره ئه‌وان فورمان ڤه‌كه‌ت و پێداچوونێ د سه‌ر دا كه‌ت بۆ ئه‌نجامدانا يا پێدڤى.
به‌نكا رافيده‌ين ئاماژه ب وێ چه‌ندێ ژى كريه كو د ماوێ ڤێ حه‌فتيێ دا دێ پێشينه‌يا 10 مليۆن دينارى ده‌نه فه‌رمانبه‌رێن رێڤه‌به‌ريێن ميرى، “وه‌زاره‌تێن ساخله‌ميێ و ناڤخۆ و به‌ره‌ڤانيێ ژى دشێن ڤێ پێشينێ وه‌رگرن”.
به‌نكا رافيده‌ين ل 31ى ته‌باخا 2016ێ مه‌رجێن دانا سولفا تايبه‌ت ب فه‌رمانبه‌رێن رێڤه‌به‌ريێن ميرى ڤه راگه‌هاند بوو كو دێ كۆژمێ 10 مليۆن ديناران وه‌كو پێشينه ده‌ته فه‌رمانبه‌ران و ده‌سپێك ژى بۆ وان فه‌رمانبه‌رايه يێن هه‌لگرين ناسناما زيره‌ك “البطاقة الذكية”.
ئه‌ڤرۆ نيوز:
ژێده‌ره‌كى ژ هه‌ڤپه‌يمانيا نشتيمانى راگه‌هاند كو مه‌سعود بارزانى سه‌رۆكێ هه‌رێما كوردستانێ د دووماهى سه‌ره‌دانا خوه دا بۆ به‌غدا داخوازا پۆستێ وه‌زيرێ ژده‌رڤه كريه.
ئه‌ڤى ژێده‌رى بۆ سومه‌ريه نيوز گۆت: “سه‌رۆكێ هه‌رێما كوردستانێ مه‌سعود بارزانى ته‌كست ل سه‌ر گرنگيا كه‌ساتيه‌كا كورد و ب تايبه‌ت ژ پارتيا ديموكراتا كوردستانێ كر كو پۆستێ وه‌زيرێ ژ ده‌رڤه وه‌رگريت ل جهێ ئيبراهيم جه‌عفه‌رى ئه‌وا بۆ لێپرسينێ ل جڤاتا نوونه‌ران هاتيه گازيكرن”، ته‌كست ژى كر، “بارزانى ئه‌ڤه ب مه‌رجه‌كێ سه‌ره‌كى بۆ ڤه‌گه‌ريانا په‌يوه‌نديان د ناڤبه‌را حوكمه‌تا ناڤه‌ندى و هه‌رێمێ دا دانايه، ديسان گرنگى ب وێ چه‌ندێ ژى دايه كو هه‌ڤسه‌نگيه‌كا هه‌موو پێكهاته‌يان د حوكمه‌تا عيراقێ دا هه‌بيت”.
ئه‌ڤى ژێده‌رى ناڤێ خوه ئاشكه‌را نه‌كرى ئاماژه ب وێ چه‌ندێ ژى كريه كو بارزانى نه‌رازيبوونا خوه ل هه‌مبه‌ر وێ چه‌ندێ دياركر و ب “سياسه‌تا پشتگوهـ هاڤێتن و دوورخستنێ” وه‌سفكر ئه‌وا نوكه وه‌زيرێ ژ ده‌رڤه يێ عيراقێ يێ نوكه ئيبراهيم جه‌عفه‌رى ئه‌نجام دده‌ت د ده‌رحه‌قا كوردان دا، “هه‌ر وه‌كو ڤێ دووماهيێ د كۆمبوونێن هه‌ڤپه‌يمانيا نێڤده‌وله‌تى دا ل واشنتۆن ره‌تكرى كو كوردان نوونه‌ر ل گه‌ل شاندێ عيراقێ هه‌بيت”. هه‌ر ديسان گازنده‌يا وێ چه‌ندێ ژى كر كو هنده‌ك پێرابوونێن دژوارێن به‌رامبه‌ر هنده‌ك بالوێزێن كورد ل وه‌زاره‌تا ژ ده‌رڤه ده‌ركرينه.
ئه‌ندامێ جڤاتا نوونه‌ران عادل نورى ژ هه‌ڤپه‌يمانيا كوردستانى داخوازيه‌ك بۆ گازيكرنا وه‌زيرێ ژ ده‌رڤه ئيبراهيم جه‌عفه‌رى پێشكێش كريه پشتى كو شيايى ئيمزايێن پێدڤى يێن نوونه‌ران كۆم بكه‌ت ب به‌هانه‌يا فايلێن گه‌نده‌ليێ و ب هه‌ده‌ردانا سامانێ گشتى ل وه‌زاره‌تا ژ ده‌رڤه.
ئه‌ڤرۆ نيوز، سالار دوسكى:
ئەڤرۆ سپێدێ 3/10/2016 ھەژمارەکا مامۆستایێن پارێزگەھا دھۆک خرڤەبوونەک ل بەردەرگەھێ رێڤەبەریا گشتی پەروەرێ ل پارێزگەھا دھۆکێ کرن وخواستن رێڤەبەریا گشتی یا پەروەردێ پێداچوونێ د رێنمایێن دەرکرین یێن ڤە گوھاستنێ بکەت و بھێنە ڤەگوھاستن بۆ پەروەردێن سەنتەرێ قەزا دھۆک.
ھەڤدەم مامۆستا خرڤەبووی کو پتریا وان ل پەروەردێن قەزایێن ئاکرێ و شێخان و ئامێدیێ و زاخو و سێمێلێ دەوامێ دکەن و خوجھێن قەزا دھۆکن و رۆژانە ھاتن و چوونێ دکەن و ژ بەر کاودانێن ئابووری ئێدی نەشێن بەردەوامیێ بدەنە پرۆسێسا خواندنێ، لەوما خواستن بەَنە ڤە گوھاستن بۆ سەنتەرێ پارێزگەھێ.
ھەڤدەم رێڤەبەرێ گشتیێ پەروەردێ ل پارێزگەھا دھۆک ب وەکالەت، ل دور خواستێن مامۆستایێن خرڤەبووی گۆت: مە ئاگەە ژ ئێش و ئازارێن ھەوە ھەیە و مە خواستێن ھەوە بلندکرینە بۆ وەزارەتا پەروەردێ و بۆ کارگێریا پارێزگەھا دھۆک و ئەم ل گەل ھەر پێنگاڤەکێ ینە کو تێدا ژین و ژیارا مامۆستا بھێتە خوەشکرن.
عومەر عەلی تاھا رێڤەبەرێ گشتیێ پەروەردێ پارێزگەھێ ئەو ژی گۆت: داخاز ژ مامۆستا دکەین پێگیربن ب چوونا دەوامێ چونکە نە چارەسەری یە ھەر رێکەکا ھەبیت و دڤچوونێن مە ل گەل وەزارەتێ دبەردەوامن و ھیڤی خوازین ب زووترین دەم چارەک بۆ ھەوە بھێتە دیتن.
ئه‌ڤرۆ نيوز:
ب گۆره‌ى ئاماره‌كا هنارتيێن نه‌ته‌وێن ئێكگرتى بۆ هاريكاريا عيراقێ “يونامى” كو دانه‌ك بۆ ئه‌ڤرۆ نيوز ره‌وانه‌كريه، ژ ئه‌نجامێ كريارێن توندوتيژى و تيرۆرستى و پێكدادانێن چه‌كدارى ل هه‌يڤا ئيلۆنا 2016ێ 1003 وه‌لاتيێن عيراقى هاتينه كوشتن و 1159 ژى بريندار بووينه.
هه‌ر بگۆره‌ى هه‌ما ئامار ژمارا كوشتيێن مه‌ده‌نى ل هه‌يڤا ئيلۆنێ 609 كه‌س بووينه و بريندارێن مه‌ده‌نى ژى 951 كه‌س بووينه.
ئه‌ڤه و د سه‌ر هندێ را 394 كه‌س ژى هاتينه كوشتن و شه‌هيدكرن و 208 كه‌س ژى بريندار بووينه كو هه‌ر ئێك ژ پێشمه‌رگه و هێزێن سوات و ميليشياتێن مل ب ملێ سۆپايێ عيراقێ شه‌رى دكه‌ن. به‌لێ ئه‌ڤ ئاماره قوربانيێن ئۆپه‌راسيۆنێن له‌شكرى يێن پارێزگه‌ها ئه‌نبار ب خوه ڤه ناگريت.
ئه‌ڤ ئاماره وێ چه‌ندێ ژى د سه‌لمينن كو به‌غدا خويناويترين پارێزگه‌هـ بوويه ب 1127 قوربانيێن سڤيل “289 كوشتى و 838 بريندار” و ل دووڤ وێ پارێزگه‌ها نه‌ينه‌وا دهێت ب “42 كوشتى و شه‌هيد و 55 بريندار” پاشان ژى هه‌ر ئێك ژ سه‌لاحه‌دين و كه‌ركووك و پاشان ژى بابل دهێن.
ب گۆره‌ى ئه‌و پێزانينێن ب ده‌ست يونامى كه‌فتين ژ رێڤه‌به‌ريا ساخله‌ميا پارێزگه‌ها ئه‌نبار ل وێ پارێزگه‌هێ 254 قوربانى هه‌بووينه “219 كوشتى و 35 بريندار” ئه‌ڤ ژماره هه‌تا 28ى ئيلۆنێ هاتينه تۆماركرن.
ئه‌ڤرۆ نيوز:
بابا شێخ مه‌رجه‌عێ ئاينێ ئێزديان د به‌ياننامه‌كێ دا ب دژوارى تاوانا كوشتنا دو فه‌رمانبه‌رێن رێڤه‌به‌ريا سه‌خبێركرنا رێك و پران ل دهۆك شه‌رمزار كر كو ژ لايێ كه‌سێن نه‌نياس ڤه هاتينه ره‌ڤاندن و رۆژا 2ى چريا ئێكێ ته‌رمێن وان ل چيايێ شنگال هاتينه ديتن.
دايه زانين ژى كو ئه‌ڤ كارێ ترسنوك د به‌رژه‌وه‌نديا دوژمنێن مرۆڤاتيێ دايه و دروستكرنا فيتنێ د ناڤبه‌را گه‌لێ كورد ب هه‌موو ئاينێن خوه ڤه.
داخواز ژ لايه‌نێن ئمنى يێن په‌يوه‌نديدار كر كو رێ و جهێن پێدڤى بگرنه به‌ر بۆ ڤه‌ديتنا تاوانباران دا كو راده‌ستى قانوونێ بكه‌ن و ئاسايش و ئاراميا وه‌لاتيان ب پارێزن.
بۆ پێزانينێن زێده‌تر ل سه‌ر روودانێ ڤێره كليك بكه: ته‌رمێ دو فه‌رمانبه‌رێن دهۆكێ ل چيايێ شنگال هاته ديتن
ئه‌ڤرۆ نيوز:
سەرۆکا لژنا ساخلەمیێ ل پەرلەمانێ کوردستانێ دیارکر، کو بەری دو سالا حوکمەتا ھەرێما کوردستانێ گوژمەکێ پارەی بۆ کڕینا دەرمانان بۆ سنورێ پارێزگەھا دھۆکێ مەزاختیە و گومان ل سەر کەیسێ کڕینا ئەڤان دەرمانان ھەیە گەندەلی تێدا ھاتبیتەکرن و پسوولە نینە ئەڤ دەرمانە چاوا ھاتینە کڕین.
زۆلفا مەحموود، سەرۆکا لژنا ساخلەمیێ ل پەرلەمانێ کوردستانێ بۆ رۆژناما ئەڤرۆ گۆت: “گەندەلی د کڕینا دەرمانادا ھەیە ل ھەرێما کوردستانێ و بەری دو سالا گوژمەکێ پارەی بۆ کڕینا دەرمانا ژ لایێ حوکمەتا ھەرێما کوردستانێ بۆ پارێزگەھا دھۆکێ ھاتیە مەزاختن ھەتا پێدڤیێن دەرمانا بھێنە تژیکرن، بەلێ پشتی پارە ھاتیە مەزاختن و دەرمان ھاتیەکرن، گومان ل کڕینا ئەڤان دەرمانان ھەیە، چۆنکو ب رێیا چەند کەسان ئەڤ دەرمانە ھاتینەکڕین، بەلێ ل دووڤ زانیاریێن مە وەکو لژنا ساخلەمیێ کڕینا ئەڤان دەرمانان بشێوەیەکێ ئاسایی نەبوویە و دەرمان ھاتینە ھنارتن بۆ پارێزگەھا دھۆکێ و پسوولە نینە بوھایێ وێ چەندیە و چاوا ھاتینەکڕین”.
زۆلفایێ گۆتژی” مە چەندین جارا دوڤچوون بۆ پرسا کڕینا ئەڤان دەرمانا کریە و ھێشتا ئەم نەگەھشتینە ڤێ باوەریێ ئەڤ دەرمانە بشێوەیەکێ ئاسایی ھاتبنە کڕین و گومان ل سەر کڕینا وان ھەیە، ھەرچەندە دەرمان ھاتینە کڕین و گەھشتینە پارێزگەھا دھۆکێ، بەلێ دڤێت سەرۆکایەتیا جڤاتا وەزیران و وەزارەتا ساخلەمیێ ھووردبینی و دوڤچوونێ بۆ کڕینا ئەڤان دەرمانان بکەن، ھەتا بگەھینە ئەنجامەکی کو چو گەندەلی تێدا نەھاتینەکرن”.
ئەڤرۆ نيوز:
رێڤەبەرێ گشتی یێ پەروەردا پارێزگەھا دھۆکێ ب وەکالەت ئاشکرا کر کو ل سالا بۆری 42 قوتابخانێن بنەرەت ل سنوورێ پارێزگەھا دھۆکێ بۆ سالا خواندنێ یا ئێکێ خواندن تێدا ببوو ئینگلیزی، بەلێ ئەڤ سالە ئەڤ ھژمارە گەھشتە 900 قوتابخانان.
عومەر عەلی تەھا، رێڤەبەرێ گشتی یێ پەروەردا پارێزگەھا دھۆکێ ب وەکالەت دیار کر کو ل سالا بۆری خواندن ل ھەموو باخچێن زارۆیان بوویە ئینگلیزی و بۆ ئەڤ سالە ژی خواندن ل بەھرا پتریا قوتابخانێن بنەرەت بۆ سالا خواندنێ یا ئێکێبوویە ئینگلیزی بۆ دوارۆژ گۆت: “رێژا پێدڤی یا پرتووکان ژی بۆ ڤێ مەرەمێ ھاتیە چاپکرن و دێ مفا ژ رێژەکا پرتووکێن سالا بۆری ژی ھێتە وەرگرتن”.
ئه‌ڤرۆ نيوز:
رێڤەبەرێ گشتیێ کاروبارێن ئێزدیان دیار کر کو ب ھەلکەفتا ھاتنا جەژنا جەمایێ حوکمەتا ھەرێما کوردستانێ بڕیار دا کو حەفتیا بھێت بۆ ھەموو فەرمانبەرێن ئێزدی ل ھەرێما کوردستانێ ببیتە بھێنڤەدانا فەرمی و گۆت: “ل رۆژا 7/10/2016ێ دێ رێورەسمێن جەژنا جەمایێ ل پەرستگەھا لالش دەست پێ کەن و ھەتا رۆژا 13/10/2016ێ دێ رێورەسم د بەردەوام بن و ل رۆژا 14/10/2016ێ دێ دەواما فەرمی یا فەرمانبەرێن ئێزدی یێن ھەرێمێ دەست پێ کەت”.
خەیری بۆزانی، رێڤەبەرێ گشتیێ کاروبارێن ئێزدیان ل ھەرێما کوردستانێ بۆ رۆژناما ئەڤرۆ دیار کر کو ل ھەموو ئێڤارێن جەژنێ چرایێن ئاقد و نیشانگەھێن خاسا دھێنە ھەلگرن و ئەڤ چەندە ژی نیشانا پیرۆزیا رۆناھیێ و ئاگری یە ل دەف ئێزدیان و گۆت: “ھەر ئێزدییەکێ قەستا پەرستگەھا لالش بکەت د سەر پرا سەلاتێرا دەرباز دبیت ئەڤە ژی نیشانا پاقژکرنا نەفس و جانی یە ژ گۆنەھان”.
ناڤھاتی ئاماژە دا وێ چەندێ کو ھەر حەفت رۆژێن جەژنێ رێورەسمێن ئایینی ل پەرستگەھا لالش دھێنە گێران و ھەر ئێزدییەکێ نە مۆرکری بیت ب ئاڤا کانیا سپی دھێتە مۆرکرن و ئەڤە ژی فەرزەکە ژ فەرزێن تەریقەتێ و نیشانە بۆ پاقژکرن و حەلالکرنا مرۆڤی زێدەباری ڤێ چەندێ چەندین رێورەسمێن دی یێن ئاینی ل پەرستگەھا لالش دھێنە گێران”.
ئەڤرۆ نیوز:
شارەزایەکێ ئابوری ئیماژە ب کاریگەریێن رێکەفتنا ناڤبەرا ھەرێما کوردستانێ و عێراقێ دکەت لدۆر پرسێن دارایی و دبێژیت، ئەگەر رێکەفتن بھێتە بجە ئینان ئاریشەیا گیرۆبوونا موچەی دێ چارەسەربیت و سالا داھاتی دێ سالا نەمانا قەیرانا دارایی بیت، ھەروەسا دیارکر، گرتنا مووسلیً ژی دێ کاریگەری لسەر دەربازکرنا قەیرانا دارایی ھەبیت.
ئیدریس رەمەزان، شارەزایێ ئابووری بۆ رۆژناما ئەڤرۆ گۆت” ئەگەر بھێت و رێکەفتنا ناڤبەرا ھەرێما کوردستانێ و حوکمەتا عێراقێ بکەڤیتە بیاڤێ بجە ئینانێ دا، لدۆر ئاریشەیێن دارایی دێ کاریگەریەکا زۆر لسەر رەوشا ئابوورا ھەرێما کوردستانێ ھەبیت، ژبەرکو ھەرێما کوردستانێ ھەرێما کوردستانێ ئەزموونەکا تال ھەیە دگەل حوکمەتا عێراقێ بۆ بجە نەئینانا رێکەفتنان، ڤێجارێ لسەر ئاستێ بلند رێکەفتن ھاتیەکرن و قۆناغا نوکە وەسا دخوازیت ھەردولا پێدڤی ب ئێک ھەیە، نە تنێ ھەرێما کوردستانێ کەفتیە د قەیرانێ دا بەلکۆ حوکمەتا عێراقێ ژی توشی قەیرانا دارایی بویە ل کورت ئینانا بودجێ، راستە ھەرێما کوردستانێ دێ مفای ژ بودجا عێراقێ بینیت، د ھەمان دەمدا عێراقژی دێ مفای ژ پتڕۆلا ھەرێمێ بینیت بۆ تژیکرنا کورت ئینانا بودجا خوە، دێ ئەف کورت ئینان ھێتە قەرەبوکرن ب پتڕۆلا ھەرێما کوردستانێ، عێراقژی ب مەزاختنا موچێ فەرمانبەرێن ھەرێمێ دێ مفای گەھینیتە خەلکێ ھەرێما کوردستانێ.
ئەڤی شەھرەزایێ ئابووری دیارکر” نەشێم بێژم بڤێ چەندێ دێ قەیرانا دارایی لھەرێما کوردستانێ ب دوماھی ھێت سەدێ سەد، بەلێ بڤێ رێکەفتنێ ھەتا رادەیەکێ زۆر ئەف گرانیا نوکە لسەر حوکمەت و خەلکێ ھەرێما کوردستانێ وەکی بەرێ نامینیت و وەک سالێن بۆری ئەم دڤێ قەیرانا گرانا ئابووریدا ناژین و سالا بھێت دێ سالا گەشەکرنا رەوشا ئابوورا ھەرێما کوردستانێ بیت.
ئیدریس رەمەزانی گۆتژی” گرتنا مووسلژی دێ کاریگەریێن خوە لسەر رەوشا ئابووری ھەبن، لسەر دەربازکرنا قەیرانا دارایی، راستە شەڕێ مووسل دێ شەڕەکی سەربازی و سیاسی بیت، بەلێ د ھەماندەمدا دێ شەڕەکێ ئابووریژی بیت، گرتنا مووسل چەند یا گرنگە ژلایێ سەربازیڤە ژلایێ ئابووریڤەژی ھند یا گرنگە و دێ کاریگەریێن خوە ھەبن لسەر قەیرانا دارایی ل ھەرێما کوردستانێ، نابیژن بۆدەمێ ئێک دو ھەیڤان دێ قەیرانا دارایی چارەسەربیت، بەلێ پێشبینی دکەم بۆ سالا داھاتی قەیرانا دارایی ل ھەرێما کوردستانێ زۆر کێمببیت و ئاریشەیێن کێمیا موچەی و گیرۆبوونێ دێ چارەسەربیت.
نيشاندان