ئەڤرۆ نیوز:
دەولەتا تورک دخوازیت د ئۆپەراسیۆنێن ئازادکرنا مووسل و رەققە دا جە بگریت و بۆ ڤێ مەرەمێ ژی پەرلەمانێ تورکیا د روونشتنا خوە یا خولا نوو دا ب پرانیا دەنگێ پەرلەمانتاران بۆ سالەکی مافێ پێکئینانا ئۆپەراسیۆنێن سەربازی ل سووریێ و عیراقێ پەسەند کر.
پەرلەمانێ تورکیا ب ئاخڤتنا سەرۆک کۆمار ئەردۆگان دەست ب خولا نوو کر و ئەردۆگانی د ئاخڤتنا خوە دا راگەھاند کو دێ باندۆرا وان د گوھۆرینێن ل سووریێ و عیراقێ دا ھەبیت و گۆت: (تورکیا ل جیھانێ خوەدان پێگەھەکا مەزنە و وەک جاران رۆلێ تەماشەڤانان نابینیت و دێ د ھەر گوھۆرینەکا سیاسی دا دەنگێ تورکیا ژی ھەبیت و ئەم دێ ب ھێزا خوە یا مەزنا سەربازی د ئۆپەراسیۆنێن ئازادکرنا مووسلێ و رەققەیێ دا پشکدار بین و دێ وان باژێران ژ دەستێ داعشێ دەرخینین).
ل ئالیێ دی دەمێ ئەردۆگان ھاتە پەرلەمانی پەرلەمانتارێن ھەدەپێ رانەبوونە سەر پییان و ھەڤسەرۆکێن ھەدەپێ د روونشتنا پەرلەمانی دا ئامادە نەبوون و دەنیز بایکالێ سەرۆکێ بەرێ یێ پارتا کۆماریا گەل و ھژمارەک پەرلەمانتار ژ ھۆلا پەرلەمانی دەرکەڤتن.
پشتی ئاخڤتنا ئەردۆگانی حوکمەتا ئاکپارتی بۆ پێک ئینانا ئۆپەراسیۆنێن سەربازی ل سووریێ و عیراقێ ب دەنگێ ھەرسێ پارتێن ئاکپارتی، پارتا کۆماریا گەل و پارتا بزاڤا نەتەوەپەرست ھاتە پەسەند کرن و د دەنگدانێ دا ب تنێ ھەدەپێ و ھژمارەک پەرلەمانتارێن سەر ب پارتا کۆماریا گەل دەنگێ نە ل دژی ئۆپەراسیۆنێن ل دەرڤەیێ سنورێ تورکیا بکار ئینان.
پشتی دەنگدانێ ئدریس بالوکەن جێگرێ ھەڤسەرۆکێن ھەدەپێ راگەھاند کو چو رۆلێ پەرلەمانێ تورکیا نەمایە و ھەر داخوازیەکی ئەردۆگانی وەک فەرمان دھێتە قەبوول کرن و ھەرسێ پارتێن سیستەمێ تورکیا بووینە خولامێ دەستھەلاتدارێن تورکیا و ب دەنگێن خوە وەلات ئاڤێتنە د ناڤ ئاگری دا و گۆت: (د ڤێ قۆناغێ دا پێدڤیا تورکیا نە ب بریارێن سازکرنا ئۆپەراسیۆنان و شەری ھەیە، بەلکو ب بریارێن دەستپێکرنا قۆناغێن ئاشتیێ ھەیە و مەرەما حوکمەتا تورکیا گەلەک ئاشکرایە کو دخوازیت پێگەھێ خوە یێ سەربازی و سیاسی ل عیراقێ و سووریێ ب ھێزتر کەت و ل ھەمبەر ب دەست خستنا دەستکەڤتێن کوردان ببیتە ئاستەنگ).
تورکیا دخوازیت ب ھێزەکا مەزن پشکداری ئۆپەراسیۆنا مووسل ببیت
نيشاندان