ئه‌ڤرۆ نيوز:
بڕیارە ل ڤێ حەفتیێ پارێزەرەک ل دادگەھێ سکالایەکێ ل سەر وەزیرێ خواندنا بلند یا حوکمەتا ھەرێما کوردستانێ تۆماربکەت، ئەو ژی بۆ قەدەغەکرنا دیاردەیا گرێدانا نیقابێ ژ لایێ قوتابیێن ئافرەت و پارێزەری ئاشکراکر، گرێدانا نیقابێ دبیتە ئەگەرێ بەلافبوونا ھزرا داعش.
پارێزەر رێبین سەباح بۆ رۆژناما ئەڤرۆ گۆت: “من بڕیاردایە ل دادگەھا ناوچەیا ھەولێرێ سکالایەکا قانوونی ل سەر وەزیرێ خواندنا بلند و ڤەکۆلینێن زانستی تۆماربکەم، ئەو ژی بۆ قەدەغەکرنا دیاردەیا نیقابێ ژ لایێ قوتابیێن ئافرەت، ژبەرکو خوە ڤەشارتن لبن پەردێ گرێدانا نیقابێ دبیتە ئەگەرێ بەلاڤکرنا ھزرا داعش ل ناڤ زانکۆ و پەیمانگەھێن ھەرێما کوردستانێ، ئەم ھەموو دزانین داعش ب ڤێ رێکێ ھزرا خوە بەلاڤ دکەت و گومان ل سەر ئەڤان قوتابیان ھەیە، بەلێ ژدەرڤەی زانکۆیێ ھەرکەسەک یێ ئازادە چو جلکا لبەر خوە بکەت و زانکۆ جھەکێ فەرمیە نابیت قوتابی ب حەزا خوە ئەڤان جلکا لبەر بکەت، ئەف مۆدێلە ژی نوکە ل ھەرێما کوردستانێ پەیدابوویە”.
رێبینی گۆتژی: “ل ھژمارەکا وەلاتێن جیھانێ نیقاب ل زانکۆ و پەیمانگەھان ھاتیە قەدەغەکرن و دخوازم ب ڤی شێوەی رێگریێ ل مەترسیا تیرۆرێ بکەم ل ھەرێما کوردستانێ و ڤێ حەفتیێ دێ سکالایێ تۆمار بکەم ئەگەر سکالایا من سەربگریت و دادوەر بڕیار د بەرژەوەندیا من دا بدەت، ئەڤە من خزمەتەکا مەزن پێشکێشی زانکۆیێ و ئاسایشا نەتەوەیی کر، چۆنکو خویایە لبن پەردێ زۆر تشتا داعش رھێن خوە بەلاڤکرینە و بوویە مەترسی بۆ سەر ژیانا مرۆڤایەتیێ”.
سکالا دێ ل سەر وەزیرێ خواندنا بلند ھێتە تومارکرن
نيشاندان