ئەڤرۆ نیوز:
دبەیاننامەکا ڕۆژنامەڤانی دا، د.بێریڤان خەیلانی ئەنداما جڤاتا نوونەرێن عیراقێ ھوشداری دایە حەیدەر عەبادی سەرۆک وەزیرێن عیراقێ سەبارەت کودەتایا ل سەر ھەڤپشکیا دستووری و مافێن مللەتێ کورد ب بھانەیا ھەلبژارتنا حوکمەتا تەکنوقرات دۆر ژ حەزا مللەتێ کورد و فراکسیۆنێن کوردستانی، ھەڤدەم حێبەتیا خوە یا مەزن دیارکر ژ ڕێیا ب ڕێڤەبرنا چاکسازیان د چارچۆڤێ ھەلوەشاندنا ئەنجامێن ھەلبژارتنان و پێکئینانا حکومەتێ دۆر ژ ھەلبژارتنێن مللەتێ عیراقێ و ئەندامێن جڤاتا نوونەران، ل شوونا دەستەسەرکرنا نەھنگێن گەندەلیێ و سزادانا گەندلکاران و ڕادەستکرنا وان بۆ دادگەھێ و ڤەگەراندنا سەروەت و سامانێ گشتی ئەوێ ھاتیە ڕەڤاندن بۆ دەرڤەی وەلاتی.
بێریڤان خەیلانی دھوشداریا خوەدا گۆت” کودەتایا ل سەر ھەڤپشکیا دستووری و مافێن مللەتێن کورد ب بھانەیا پێکئینانا حوکمەتەکا تەکنوقرات دۆر ژ حەزا مللەتێ کورد و فراکسیۆنێن کوردستانی کارەکی مەترسیدارە” خەیلانی ھەروەسا ئاماژەدا” درووشمێ چاکسازیێ یێ بوویە شیرەک ددەستێن بەغدا دا بۆ پتر پشتگوھخستن و پەراوێزکرنا مافێن کوردان و نەھێلانا دووماھی خالێن پەیوەندیان و ھەڤپشکیێ د ناڤبەرا بەغدا و ھەرێما کوردستانێ دا” . دیسا ھوشداری دا کو لادانا وەزیرێن کوردان بێی وەرگرتنا بۆچوونا کوردان دێ دووماھیێ ب ھەڤپشکیا ئێکگرتنا نیشتمیانی ئینیت.
بێریڤان خەیلانی دیارکر، کورد وەکو پێکھاتەکێ رەسەن و سەرەکی یە ددستوورێ عیراقێ دا ھاتیە پەسەندکرن، ھەتا نوکە ژی یاریکەرەکی سەرەکی یە د پێکئینانا ھەر حکومەتەکێ دا کو دەنگدان ل سەر بھێتە کرن دجڤاتا نوونەرێن عیراقێ دا.
ناڤبریێ پرسیارەک ئاراستەی عبادی کر و گۆت” ئەرێ پشتگوھخستنا پێکھاتێ کوردان و دەست ب سەرداگرتنا دەنگ و پۆستێن مللەتێ کورد کو نەتەوا دویێ یە ل عیراقێ دبیتە چاکسازیا سیاسی یان ژی پتر پەراوێزکرن و پشتگوھخستن و لادانە مافێن وانە ؟.
ھەر دبەردەوامیا پرسیارا خودا دبێژیت” ئەرێ سەرۆک وەزیران تو دێ گوھۆڕینێ ل سەر خوە قەبوول کەی و پۆستێ خوە بجە ھێلێ ل گەل وەزیرێن کوردان ژ بۆ ھەلبژارتنا حوکمەتەکا تەکنوقرات یا بێ لایەن؟ “.
ڤێ ئەنداما کورد دجڤاتا نوونەرێن عیراقێ دا، حێبەتیا خوە دیارکر ب ڤی ڕەنگێ چاکسازیان و پەنابرنا ل بەر ھەلوەشاندنا ئەنجامێن ھەلبژارتنان بیێ وەرگرتنا بۆچوونا مللەتێن عیراقێ و ھەتا جڤاتا نوونەرێن عیراقێ ژی.
ل دووماھیێ ھوشداری دانە عەبادی کو پێکھاتێ کوردان دێ ڕەنگڤەدان و ھەلویستێن ب ھێز ھەبن دژی ڤی کاری، دووپاتکر ژی کو پشتگوھخستنا کوردان دێ ڕەنگڤەدانێن نەرێنی بۆ ھەبن ل سەر ئێکگرتنا عیراقێ و پرۆسا سیاسی ل عیراقێ و پێگەھێ عیراقێ ل ڕۆژھەلاتا ناڤین و جڤاکێ نێڤدەولەتی و نەتەوەیێن ئێکگرتی دا ھەبن.

ئه‌ڤرۆ نيوز:

وەلاتیێن باکورێ کوردستانێ نەرازیبوونا خوە ل ھەمبەر شەرێ ناڤ باژێرێن باکورێ کوردستانێ دیار دکەن و رادگەھینن کو پێدڤی بوو PKK شاشیەک وەسا ستراتیژی نەکربا، چونکو شەرێ نھا د خزمەتا دەولەتێ و ھێزێن تاری دایە و زەرەرمەندێ ئێکێ یێ ڤی شەری ژی کوردن و باژێرێن کوردان وێران دبن و خەلک بێکار دمینیت و رەوشا ژیانا وان زەحمەت دبیت.
پشتی شەرێ ل باژێرێن سور، نسێبین و گەلەک باژێرێن دی یێن باکورێ کوردستانێ شەر گەھشتە وانێ بارێ نەئاسایی ل باژێرێ سلۆپی ژی ھاتە راگەھاندن و وەلاتیێن باکورێ کوردستانێ ژی دیار دکەن کو دێ پرانیا باژێرێن باکور ببنە مەیدانا شەری و خەلکێ مەدەنی ھێنە کوشتن و شاشیا کو PKK کری ژی نھا باجا وێ خەلکێ مەدەنی ددەن، چونکو پێدڤی بوو وێ پارتیێ نەھێلابا کو شەر بھێتە ڤەگۆھاستن بۆ ناڤ باژێران.
عەلی گولەر چاڤدێرێ سیاسی یێ باکورێ کوردستانێ بۆ رۆژناما ئەڤرۆ دیار کر کو دەمێ کوردان شیان ٨٠ کورسیان ل پەرلەمانێ تورکیا بدەستڤە بینن وی دەمی رۆژا سەرکەڤتنا مە بوو و دڤیا پارتیا دیموکراتیک یا گەلان ل گەل ئاکپارتیێ حوکمەتا نوو ئاڤا کربان، چونکو د دەمەکێ وەسا دا پرانیا پرسێن مە دھاتنە چارەکرن و پرسا کوردی ژی دێ کەفتبا قۆناغەکا نوو و براستی ژی ئەردۆگانی بزاڤێن مەزن کرن دا پرسا کوردی چارە بکەت، لێ PKK و ھێزێن تاری و شەرخوازێن ناڤ دەولەتێ ئەو قۆناغا گرنگ ژناڤ برن و نھا ژی جارەکا دی شەر بەرفرەھتر لێ ھاتیە و گۆت: (لێ مخابن شەرێ ڤێجارێ ژی وەک یێن بەرێ نینە، چونکو شەرێ بەرێ ل چیا دھاتە کرن و باژێرێن مە د پاراستی بوون، بەس مخابن نوکە باژێر بووینە مەیدانا شەری و خەلکێ مەدەنی دھێنە کوشتن. قوتابخانە و جھێن کارێ خەلکێ وێران بووینە و مرۆڤ دشێت بێژیت کو براستی نھا ژیان ل باکورێ کوردستانێ ھاتیە راگرتن).