ئه‌ڤرۆ نیوز:
به‌هزاد زێباری ئه‌ندامێ لیژنا باژێڕڤانیان ل په‌رله‌مانێ كوردستانێ ئاشكرا كر پشتى حوكمه‌تى بڕیارا داى پارچێن ئه‌ردی به‌لاڤ بكه‌ت ل نێزیك دێ كارێ لیژنێن په‌یوه‌ندیدار یێن هاتیه راسپاردن ب دووماهی هێت، پارێزگه‌ها دهۆكێ ژی ئه‌رد هاتیه به‌رهه‌ڤكرن و حه‌فت ناحیان ماسته‌ر پلانێن خوه ب دووماهی ئیناینه و چاڤه‌ڕێ سه‌رۆكایه‌تیا جڤاتا وه‌زیرانن.
ئه‌ڤرۆ نیوز:
زیره‌ك تاهر دۆسكى، سه‌رۆكێ ئێكه‌تیا به‌لنده‌رێن كوردستانێ تایێ دهۆك بۆ ئه‌ڤرۆ دیار كر وان داخواز كربوو هه‌یڤانه هنده‌ك پاره بۆ به‌لێنده‌رێن دهۆ بهێته مه‌زاختن ب تایبه‌ت ئه‌وێن گه‌له‌ك ته‌نگاڤ، چونكى ل پارێزگه‌هێن دى یێن هه‌رێمێ جوداهى هه‌یه و چه‌كێن وان بۆ دهێنه مه‌زاختن، به‌لێ ل دهۆكێ ناهێنه مه‌زاختن و هه‌تا نوكه كۆژمه‌كێ پاره‌ى ب رێژا 15% هه‌یه و بۆ پارێزگه‌هێن (دهۆك، هه‌ولێر، سلێمانیێ) هاتیه مه‌زاختن، به‌لێ هه‌تا نوكه 20% ژ به‌لێنده‌رێن دهۆكێ ماینه و ئه‌ڤ پاره نه‌وه‌رگرتیه”.
ئه‌ڤرۆ نیوز:
عه‌مار حه‌كیم سه‌رۆكێ جڤاتا بلندا ئیسلامى راگه‌هاند: بانگه‌شه‌كرن بۆ پێكئینانا حوكمه‌ته‌كا سه‌ربه‌خو، دڤێت سه‌رۆك وه‌زیران ژى ڤه‌گریت.
عه‌مار حه‌كیم دوهى د كۆنگره‌یه‌كێ رۆژنامه‌ڤانى دا راگه‌هاند” هه‌ڤركیه‌كا سیاسى یا بهێز یا هه‌ى بۆ پێداچوون و پشتراست بوون ژ ناڤێن وه‌زیرێن به‌ربژار بۆ كابینا نوو یا عه‌بادى”.
عه‌مار حه‌كیم ئاماژه ب وێ یه‌كێ ژى دا كو ده‌رچوونا هێزێن سیاسى ژ رێره‌وا سیاسى دێ مه‌ترسیێ بۆ سه‌ر سیسته‌مێ دیموكراسى و ئاڤاكرنا ده‌وله‌تا پشتى سالا 2003 ێ دروست كه‌ت.
ئه‌ڤرۆ نيوز:
پشتى عه‌بادى كابينا خوه پێشكێشكرى، كورد ژ پێنگاڤێن عه‌بادى د رازى نينن و كوم دبن و دبێژن نه ژ دوور نه ژ نێزيك ئه‌وان هاش وان كه‌سان نينه يێن ب ناڤێ كوردان هاتينه كانديدكرن و ده‌ربڕينێ ژ فراكسيۆنێن وان ناكه‌ن.
لايه‌نێن سياسى گۆمانێ ژ ئێكدو نابه‌ن د وێ چه‌ندێ دا كو د پشت ئێكدو را كانديدان پێشكێشى عه‌بادى بكه‌ن، ئارام شێخ محه‌مه‌د، جێگرێ سه‌رۆكێ جڤاتا نوونه‌رێن عيراقێ د ڤێ ده‌ربارێ دا راگه‌هاند: “فراكسيۆن هه‌موو يێ ل ڤێره و د راگه‌هاندنێن وان ژى دا يا دياره كو كانديدان پێشكێش ناكه‌ن و ل دوو و نێزيك په‌يوه‌ندى ب وان ڤه نينن”.
پارتى ژى ته‌كست ل سه‌ر وێ چه‌ندێ دكه‌ت كو چو كه‌س د حوكمه‌تا عه‌بادى دا كانديد نه‌كرينه، خسرۆ گۆڕان، سه‌رۆكێ فراكسيۆنا پارتى ديمومكراتى كوردستان ل جڤاتا نوونه‌رێن عيراقێ دبێژيت: “مه ب فه‌رمى چو ناڤ ره‌وانه نه‌كرينه ئه‌و ناڤێن هاتينه جڤاتا نوونه‌ران چ كاك هشيار يان كاك نزار يان ئه‌ڤێن دى ب تنێ نوونه‌راتيا خوه دكه‌ن”.
ئێكگرتوو ئيسلامى كوردستان كو چار كورسى يێن ل جڤاتا نوونه‌رێن عيراقێ هه‌ين، د هه‌ر گوهۆڕينه‌كێ دا داخوازا وه‌زاره‌تان دكه‌ت و جه‌مال كۆچه‌ر سه‌رۆكێ فراكسيۆنا ئێكگرتوو ل جڤاتا نوونه‌رێن عيراقێ دبێژيت: “ژ به‌ر كو دێ گۆڕانكاريێن مه‌زن روو ده‌ن، ئێكگرتوو پۆسته‌ك دڤێت”.
فراكسيۆنا ئێكه‌تيێ ژى عه‌بادى ب كه‌سه‌كێ تاكڕه‌ۆ دزانن، ئالا ته‌له‌بانى سه‌رۆكا فراكسيۆنا ئێكه‌تى نشتيمانى كوردستان ل جڤاتا نوونه‌رێن عيراقێ دبێژيت: “وه‌سان دبينين كو سه‌رۆك وه‌زيران سه‌رپێچى يا ل سه‌ر وان هه‌موو رێكه‌فتن و كۆمبوون و به‌ياننامان كرى كو مه وه‌كو كورد و لايه‌نێن دى ژى د چه‌ند رۆژێن بۆرى دا پێشكێش كرى، دا كو دير ژ ئيرادا مه ناڤ نه‌هێنه گۆتن، به‌لێ ل به‌رچاڤێن هه‌موويان ناڤ ئينان”. گۆتژى: “دشێن ره‌ت بكه‌ت، به‌لێ ئه‌ڤه خوه لادانه ژ پره‌نسيپێن ته‌وافقێ”.
ئه‌ڤه هه‌موو د دده‌مه‌كى دايه كو بڕياره ئه‌ڤرۆ جڤاتا نوونه‌رێن عيراقێ كۆمبوونا خوه يا ئاسايى بكه‌ت.
ئه‌ڤرۆ نيوز:
رێڤه‌به‌ريا كه‌شناسى و بيڤه‌له‌رزێ ل دهۆكێ راگه‌هاند كو سوبه‌هى رۆژا ئێكشه‌مبى رێكه‌فتى 3ى نيسانا 2016ێ هنده‌ك ئه‌ورێن كێم دێ ل ئه‌سمانى هه‌بن و ئه‌ڤه ئه‌وه‌ره دێ زێده بن هه‌تا ل دانێ ئێڤارى دبنه ئه‌ورێن ته‌مام و ب شه‌ڤ ل ده‌ڤه‌رێن چيايى ئه‌گه‌رێن بارينا بارانه‌كا كێم هه‌يه.
پشكا پێشبينيان ل رێڤه‌به‌ريا گشتيا كه‌شناسى و بيڤه‌له‌رزێ ل هه‌رێما كوردستانێ د نڤيساره‌كێ دا كو دانه‌ك بۆ ئه‌ڤرۆ نيوز ره‌وانه كرينه راگه‌هاند كو ژ ئه‌نجامێ فشارێن بلندێن وه‌لاتێ توركيا و نێزيكبوونا فشارێن نزمێن ده‌ريا ناڤه‌راست بۆ سه‌ر هه‌رێما كوردستانێ دهێته پێشبينيكرن هنده‌ك ئه‌ورێن كێم ل ئه‌سمانى هه‌بن و ئه‌ڤه ئه‌وه‌ره دێ زێده بن هه‌تا ل دانێ ئێڤارى دبنه ئه‌ورێن ته‌مام و ب شه‌ڤ ل ده‌ڤه‌رێن چيايى ئه‌گه‌رێن بارينا بارانه‌كا كێم هه‌يه.
پشكا پێشبينيان دايه زايه زانين كو دێ ئاراستێ باى ژى دێ باكوورێ رۆژئاڤا بيت ب ره‌نگه‌كى د ناڤبه‌را 5 هه‌تا 15كم دا و هنده‌ك و ماوێ ديتنێ ژى دێ 10كم بيت، پلێن گه‌رمێ ژى دێ د ناڤبه‌را (7 بۆ 20) پلان دا بيت.
ئەڤرۆ:
لژنا بلند یا رۆژا پاقژیا دھۆکێ، دوھی 30/3/2016 کۆمبوو، تێدا بڕیار ھاتە دان رۆژا دوشەمبیا بھێت 4/4/2016 و ل ژێر درووشمێ (پاقژی گیانێ شەھیدێن کوردستانێ شاد دکەت) وەکو رۆژا پاقژکرنا پارێزگەھا دھۆکێ بۆ ئەڤ سالە ھاتە دەستنیشانکرن و ھەموو دام و دەزگەھێن پارێزگەھێ دێ پشکداریێ تێدا کەن.
ئەندازیار ھەڤال محەمەد، رێڤەبەرێ گشتیێ باژێرڤانیێن پارێزگەھا دھۆکێ د کۆمبوونێ دا دیار کر کو ئەڤە سالا دویێ یە ل پارێزگەھا دھۆکێ ئەڤ ھەوە دھێتە ئەنجام دا، ل سالا بۆری ئەو شیابوون گلێش و بەرمایکێن چەند سالان ڕاکەن و گۆت: “بۆ ئەڤ سالە ژی بڕیارە ل سنوورێ ھەموو باژێرڤانیان رۆژا پاقژیێ بھێتە کرن، ب تایبەت پشتی سەیرانێن بھار و نەورۆزێ ب دووماھی ھاتین ئەو جھێن سەیرانیان قەستکریێ دێ ژ گلێشی ھێنە پاقژکرن”.
ھەروەسا ئەندازیار ھەڤال ئاشکرا ژی کر، کەرستە و پێدڤیێن ھەوا پاقژکرنێ ل چەند جھان دێ ھێنە بەلاڤکرن، وەکو: گەلیێ دھۆکێ، بێسرێ، باجلۆرێ، گەلی کۆرتکی و چیایێ زاوا و پشکدارێن ھەوێ دشێن ل وان جھان وان کەرەستێن پێدڤی دبنێ ب دەستخوڤە بینن.
د لایەکێ دی یێ کۆمبوونێ دا ئەندازیار ئیحسان یەحیا، سەرۆکێ باژێرڤانیا دھۆکێ دیار کر، مەرەم ژ ھەوا رۆژا پاقژیا پارێزگەھا دھۆکێ نە ب تنێ پاقژکرنە، بەلکو ھشیارکرنا وەلاتیانە ژی ل دۆر پاقژیێ و گۆت: “رۆژانە دھۆک دھێتە پاقژکرن و ھژمارەکا زۆر یا گلێشی دھێتە ڕاکرن، لێ ئەڤ رۆژە یا جودایە”.
سەرۆکێ باژێرڤانیا دھۆکێ ئاماژە ب وێ چەندێ ژی کر کو رێکخراوێن نەحکومی و نەتەوێن ئێکگرتی ژی دێ پشکداریێ د ھەوا رۆژا پاقژکرنا پارێزگەھا دھۆکێ دا کەن و گۆت: “ژ بلی سەنتەرێن قەزا و ناحیان، کەمپ ژی دێ ھێنە پاقژکرن، و خواست ھەموو لایەن و دەزگەھێن ڕاگەھاندنێ ل گەل د ھاریکار بن بۆ سەرکەفتنا ڤێ رۆژێ”.
ئه‌ڤرۆ نيوز:
فراكسيۆنێن كوردستانى ل په‌رله‌مانێ عيراقێ ئێڤاريا ئه‌ڤرۆ رۆژا ئه‌ينى رێكه‌فتى 1ى نيسانا 2016ێ ل سه‌ر چه‌ند خالێن گرنگ كۆمبوون دا كو دانوستاندنێ بكه‌ن و بگه‌هنه چه‌ند خالان ژ بوو كۆمبوونا سوبه‌هى يا جڤاتا نوونه‌رێن عيراقێ دا كو بێخنه به‌ر سه‌رۆكاتيا جڤاتا نوونه‌ران.
ب گۆره‌ى پێزانينان كۆمبوونا فراكسيۆنێن كوردستانى ماوێ دو ده‌مژمێران ڤه‌كێشايه و رێكه‌فتينه ل سه‌ر چه‌ند خالان و گرنگترين ژى ئه‌وه د چارچۆڤێ وان گورانكاريان ژى ئه‌وان دڤێت عه‌بادى ب خوه ژى بهێته گوهۆڕين.
ئەڤرۆ نیوز، مەحمود نھێلی:
بەرپرسێ پشکا پولیسێن ھاتن و چوونا ئەمێدیێ بۆ ئەڤرۆ نیوز خویاکر کوژ، کوپشتی نیڤرویا ئەڤرو ئەینی 1\4\2016 و ژئەنجامێ روودانەکا ھاتن و چونێ ل نیزیک گوندێ باوان ل سەر یێا دێرەلۆک ـ شێلادزێ 9 کەس بوونە قوربانی.
راید مەھدی بەرپرسێ پشکا پولیسێن ھاتن و چوونا ئامێدیێ بۆ ئەڤرۆ نیوز گۆت ؛ کو ئەڤ روودانە ددەمەکی دا چێبوویە کۆ ترومبێلەکا ژ جورێ بی ئێم ل گەل ترومبێلەکا جورێ پیکاب لێک ددەن کو ھەشت کەس تێدا بوون و ھەر ھەشت کەس برینداربوون .
ناڤبری ئاشکرا ژی کر کو شۆفێری بی ئێمێ پشتی گەھاندیە بنگەھێ ساخلەمیا دێرەلۆک ب مخابنی ڤە گیانێ خوە ژ دەست دا و بریندارێن رەوشا وان نە باش ژی بۆ نەخوشخانا ئامێدیێ ھاتنە ڤەگوھاستن. و دیار کر ژی کو لێکولین ل سەر روودانێ د بەردەوامن.
ئه‌ڤرۆ نيوز:
پشکا سامانێ ماسیان ل رێڤەبەریا سامانێ گیانەوەری یا سەر ب رێڤەبەریا گشتی یا چاندنێ ڤە ل پارێزگەھا دھۆکێ د نڤیسارەکێ دا کو دانەک بۆ رۆژناما ئەڤرۆ ھنارتیە، تێدا دیار کریە، گرتنا ماسیان ھەر ژ سوبەھی و ھەتا دو ھەیڤێن دی، ب ھەموو رەنگەکی قەدەغەیە.
د وێ نڤیسارێ دا ئاماژە ب وێ چەندێ ژی کریە، د وەرزێ زاوزێ یێ ماسیان دا بۆ سالا 2016 بڕیار ھاتە دان کو گرتنا ماسیان ھەر ژ 1/4 ھەتا 30/6/2016 ب ھەموو رەنگەکێ نەقانوونی یێن وەکو تۆرێن ھوور، کارەبێ، ماددێن ژەھراوی و تەقەمەنیان بھێتە قەدەغەکرن و ھەر کەسێ سەرپێچیێ بکەت دێ ھێتە سزا دان.
خویا ژی کریە، مەرەما وان ژ ڤێ بڕیارێ پاراستنا سامانێ ماسیانە ل پارێزگەھێ.
نيشاندان