ئه‌ڤرۆ نيوز:

رێڤەبەرێ پەیوەندی و راگەھاندنێ ل رێڤەبەریا گشتی یا پەروەردێ ل پارێزگەھا دھۆکێ دیار کر کو سالا نوو یا خواندنێ دێ ل دەمێ خوە یێ دیارکری دەست پێ کەت، ب پشتەڤانی و خوەشکرنا ژین و ژیارا مامۆستا و فەرمانبەرێن پەروەردێ و گۆت: “ل دەمەکێ نێزێک دێ کۆنفرانسەک دناڤبەرا وەزارەتا پەروەردێ و وەزارەتا خواندنا بلند دا ھێتە گێران ل سەر چەوانیا وەگرتنا قوتابیان ل زانکۆ و پەیمانگەھان
ئەحمەد عەبدوللا زبێر، رێڤەبەرێ پەیوەندی و راگەھاندنێ ل رێڤەبەریا گشتی یا پەروەردێ ل پارێزگەھا دھۆکێ ئاشکرا کر کو تەوەرێ گرنگێ کۆمبوونا دوھی رۆژا 23/8/2016ێ یا جڤاتا پەروەردێ بەحسێ ڤەگوھاستنا مامۆستایان بوویە و گۆت: ” 31 /8/2016 دێ رێنمایێن نوو بۆ ڤەگوھاتسنا مامۆستایانن دەرچن و پرۆسا ڤە گوھاستنێ دێ ل دووڤ دا دەست پێ کەت”.
ناڤھاتی ئاماژە دا وێ چەندێ کو رێنمایێن نوو دێ ل سەر گوھۆرینا ناڤ و نیشانێن فەرمانبەریێ بۆ مامۆستایان دەرکەڤن و وەزارەتا پەروەردێ مژوولی دانانا رێنمایێن نوویە و گۆت: “د ڤێ کۆمبوونێ دا بەحسێ وەرگرتنا قوتابیان ھاتیەکرن ب تایبەتی ل خواندنگەھێن نموونەی و ل دووڤ رێنمایان ھاتیە دیارکرن، ھەر قوتابخانەک ل سنوورێ خوە چو نموونەی بیت یان ئاسایی دێ قوتابیان وەرگریت و زارۆیێن شەھیدان بێ مەرج دێ ھێنە وەرگرتن ل ھەر قوتابخانا ئەو داخواز بکەن ھەروەسا قوتابیێن نەخوەشیێن گران ھەین ئەو ژی دێ بێ مەرج ھێنە وەرگرتن و سیفەتێ نموونەی بتنێ دێ قووناغێن ئامادەیی ھەبیت و قوتابخانێن بنەرەت سیفەتێ ناڤبری نەمایە”.

ئەڤرۆ نیوز:
ئەندامەکێ سەرکردایەتیا ئێکگرتووی ئیسلامی کوردستان راگەھاند، نوکە ڤەکێشانا ئێکگرتوو یا بوویە جدی و ھەکە رەوش ھوسا بیت، دێ خوە ڤەکێشیت و وەزیرێن ئێکگرتوو ژی د حوکمەتا ھەرێما کوردستانێ دا دەست ژکار کێشانا خوە یا رادەستی ئەمیندارێ گشتیێ ئێکگرتوو کری ونوکە ژی پرۆژەک بۆ لێک نێزیکبوونا لایەنێن ئیسلامی ل کوردستانێ یێ ھەی.
جەمال کۆچەر بۆ روژناما ئەڤرۆ گۆت”ئێگگرتووی ئیسلامی کوردستان پشکەکە ژ حوکمەتی و ھندەک وەزارتان ب رێڤە دبەتو ئێکگرتوو ل بەرامبەر ڤان ئاریشێن نوکە ل ھەرێمێ ھەین خوە دبینیت شەرمەزار، بەلێ ھەر تنێ کار بھێتە کرن کو مووچێ خەلکی بھێتە دان و ھەکە وەزارەت وەلێ ھات کو نەشێت مووچێ فەرمانبەر و وەلاتیان بدەت، دڤێت وەزیر خوە ڤەکێشیت و نوکە وەسا ژیان ب رێڤە دچیت وئەڤە واقعەکە نەتنێ ئێکگرتوو کەفتیێ، بەلکو ھەموو لایەنێن دی یێن کەفتینە دڤێ رەوشی دا” .
جەمالی گۆت ژی”چار بژاردە ل دەڤ ئێکگرتووی بۆ خووشکرنا ڤێ رەوشی یێن ھەین ئەوژی، ئێک (مووچێ خەلکەکێ بھێتە دان و حکومەت بەرپرسە و دڤێت مووچە بھێتە دابین کرن ژلایێ حوکمەتێ ڤە و ھەکە نەشێت، دڤێت حوکمەتا نوکە بەر ب گوھۆرینێ بچیت، دو (ئەو لایەنێن دحوکمەتێ دا پشکدار، دڤێت فشارێ پەیدا بکەن ل سەر مافێ خەلکی و ھەکە ئەڤ لایەنە نەشێن وێ چەندێ بکەن و ھەکە وەزیرەک ژی ھەبیت، دڤێت خوە ڤەکێشن، یان ژی دڤێت ئەو رەوشا نوکە دبۆریت قەبوول نەکەن).
ناڤبری خویاکر ژی”ئەڤرۆ خەلک نە حوکمەتێ و نە لایەنێن سیاسی ل سەر جادێ رەوشا نوکە قەبوول ناکەت ، ژبەر ھندێ ل کورستانێ باج زێدە بیت و موووچە کێم دبیت و دبیتە ئەگەرێ دروستبوونا ئاریشێن مەزن، لەوما دڤێت گوھۆرین لێ بھێتە کرن و ھەکە گوھۆرین ل حوکمەتێ نەھێتە کرن، دێ گوھۆرین ل ئێگرتوو ھێتە کرن” .
دیارکر ژی کو ئەو لایەنێن سیاسی کو فعلی ڤێ حوکمەتی ب رێڤەدبەن بەرپرسن، بەلێ لایەنێن دی یێن خودان ئێک دو وەزیر د حوکمەتێ دا چو گونەھا خوە نینە و دڤێت ئەو کەس و لایەنێ کار ب دروستی نەکربێت باوەری ژێ بیتە وەرگرتن و یێ گەندەل ژی بیت، دڤێت بچیتە دادگەھێ وئەڤرۆکە لایەنەکی دی ھەیە ئەو ژی گۆڕانە کو پشکەکە ژ ئاریشان و ئاریشە قولتر کرین ل ھەرێمی” .
جەمال کۆچەری ئاماژە کو ھەتا نوکە پرۆژەک بۆ رێککەفتنێ د ناڤبەرا لایەنێن ئیسلامی دا یێ ھەی، ئەو ژی بۆ ھندی یە کۆ دەنگێ ئیسلامی لێک نزیک بیت و چونکی چەند لایەنین ئیسلامی نزیک ئێک بن، دی گۆتارەکا سەردەمانە وگونجای ل ھەرَیمێ ھەبیت وئامارنجا سەرەکی ئەوە لایەنێن ئیسلامی نزیکی ھەڤ ببن و چو لایەنێن دی دپشکدار نینن دڤێ پرۆژەی دا، بەلکو تنێ ھەرسێ لایەنێن ئیسلامی دپشکدارن”.

ئه‌ڤرۆ نيوز:

رێڤەبەرێ گشتیی ساخلەمیا پارێزگەھا دھۆکێ دیار کر، ب مەرەما ژ نێزیک ئاگەھداربوون ل سەر رەوشا ساخلەمیێ ل دھۆکی و پشتەڤانیا کەرتێ ساخلەمیێ و ئاوارە و پەنابەرێ لێ ئاکنجیی و چاوانیا خوە بەرھەڤکرن بۆ پرۆسەیا رزگارکرنا مووسلێ و ھاتنا ئاواران بۆ دھۆکێ، شاندەکێ وەزارەتا ساخلەمیا عیراقێ ب سەرۆکاتیا د. حازم جومەیل جێگری وەزیری ساخلەمیا عیراقێ سەرەدانا پارێزگەھا دھۆکێ کرن.
د. نزار عسمەت تەیب، رێڤەبەرێ گشتیێ ساخلەمیا دھۆکێ خویا ژی کر، ساخلەمیا دھۆکێ ھەموو ئەو ئاستەنگ و ئاریشین کەڤتینە د رێیا کەرتێ ساخلەمیێ دا بۆ شاندی بەحسکرن و گۆت: “مە داخواز ژێ کر پتر ھاریکاریا کەرتێ ساخلەمیێ ل ھەریێ ب گشتی و دھۆکێ ب تایبەتی بکەن، چونکو ھژمارەکا زۆر یا ئاواران لێ ھەنە و دیسا دا کو بشێین خزمەتەکا باشتر پێشکیشی خەلکێ خوە و ئاواران بکەین”.
د. نزار خویا ژی کر، ئەڤە جارا دویێ یە بەغدا سۆزێ ددەت رێژا دەرمانان زێدە بکەت و دەرمانێن نەخۆشیا پەنچەشێرێ ژی زێدەتر بکەت و گۆت: “دەرمان ژ کەرەستێن سیادی نە و پێدڤیە بەغدا 100% رەوانە بکەت و پیدڤیە دەرمان ھەموو ب دروستاھی بگەھن، ھەروەسا پێدڤین نۆشداری و تاقیگەھێ ژی پێدڤیە ژ بەغدا بھێن، لی مخابن نوکە 40% وگەلەک جاران کیمتر ژی دھێن”.
د. نزار گۆتژی: “ساخلەمیا عیراقێ سۆز دانە مە رێژا دەرمانان بۆ دھۆکێ زێدە بکەن و دووڤ گوتنێن وان ئەو دشێن ب رێژا 65% دەرمانان دابین بکەن، ھەکە ئەڤ رێژە بگەھیتە مە ھەتا رادەیەکێ باش دەرمان دێ ھێنە دابینکرن”.
ژ لایێ خوڤە دکتۆر حازم جومەیل، جێگری وەزیرێ ساخلەمیا عیراقێ دیار کر، ل گەل ساخلەمیا دھۆکێ کار بۆ دارشتنا پلانا شەرێ ئازادکرنا مووسلێ ھاتە کرن و گۆت: “ھەموو بەرھەڤیێن ساخلەمیێ بۆ شەرێ ئازادکرنا مووسلێ یێن ھاتینە کرن و پلانەکا باش د ناڤبەرا وەزارەتا ساخلەمیا ھەرێمێ و عیراقێ دا ھاتیە دانان “.
جێگری وەزیری ساخلەمیا عیراقێ زێدەتر گۆ: “رێژەکا زۆرا ئاواران ل ھەرێمێ ھەنە و ساخلەمیا ھەرێما کوردستانێ رۆژانە خزمەتێن ساخلەمیێ پێشکیشی ئاوارە و پەنابەران دکەت، لەو پێدڤیە زێدەتر ھەڤکاریا ھەرێما کوردستانێ د وارێ ساخلەمیێ دا بھێتە کرن، ئەم دێ ھەموو ئاریشە و کێماسیێن ساخلەمیا ھەرێمێ گەھینینە بەغدا دا کو چارەبکەین و پتر خزمەتێن ساخلەمیێ بۆ بھنێرین”.