ئه‌ڤرۆ نيوز:
رائيدێ مافپه‌روه‌ر، ئازاد تاها، به‌رپرسێ راگه‌هاندنا هاتنوچوونێ ل پارێزگه‌ها دهۆكێ بۆ ئه‌ڤرۆ نيوز گۆت: “دوهى رۆژا شه‌مبى رێكه‌فتى 20ى ته‌باخا 2016ێ و ل ده‌مژمێر 4:00ى ئێڤارى ل سه‌ر جادا سه‌ره‌كى يا ده‌ركارێ بۆ گۆندێ شه‌رانش ترۆمبێله‌كا نيسان پيكئاپ بارهه‌لگر ره‌نگێ سپى د لوفێن شه‌رانش دا فرى و د ئه‌نجام دا شوفێرى گيانێ خوه ژ ده‌ست دا”.
ئەڤرۆ نیوز:
سەرۆکێ باژیرڤانیا زاخۆ دیار کر کو ب مەرەما کێمکرنا قەرەبالغێ و ب ساناھیکرنا ھاتنوچوونا وەلاتیان، وان بڕیار دا ھەموو رێیێن سەرەکی یێن ئوڤەر پاسا قەزا زاخۆ کو دکەڤیتە سەرێ گوندی ڤەکەن.
ئەندازیار بژار مونیب، سەرۆکێ باژیرڤانیا زاخۆ بۆ رۆژناما ئەڤرۆ ئاشکرا کر کو ئێدی ئەو قەرەبالغا ئەڤە دەمەک بوو خەلکێ باژیرێ زاخۆ کەڤتیە تێدا ب ڤەکرنا رێیێن سەرەکێ یێن ئوڤەر پاسا زاخۆ نامینت، چونکی ئەو رێیین سەرەکی یێن ژ دھۆکێ بۆ ناڤ بازاری و چوونا خەلکی بۆ دەرڤەی زاخۆ و رێیا ئیبراھیم خەلیل بۆ لایێ بانزینخانا دەلال ھەموو ھاتنە ڤەکرن.
ئەندازیار بژار ئاماژە ب وێ چەندێ ژی کر، ئەڤە دەمەک بوو خەلکێ زاخۆ ئەزیەتەکا مەزن دبینن ژ بەر دەست بکاربووڤان ڤان پرۆژین مەزن ددیت و گۆت: “ھاتنوچوونا خەلکی ب ترۆمبێلان گەلەک ب زەحمەت کەفت بوو، ڤەکرنا ڤان رێیێن سەرەکی گەلەک قەرەبالغا ھاتنوچوونێ دێ کێم بیت و ھاتنوچوونا خەلکی ب سەناھیتر کەڤیت”.
گۆتژی: “ئەم بەردەوام دێ دووڤچوونا پرۆژین خوە کەین ب تایبەت ئەوین بۆ باژیرێ زاخۆ د گرنگ”.
ئەڤرۆ نیوز:
ل باژێرێ حەسەکێ یێ رۆژئاڤایێ کوردستانێ ھێزێن رژێما سووریێ، سەربازێن ئیرانێ و چەکدارێن حیزبوللا لوبنانێ پێکڤە ھێرشی کوردان دکەن و ل ھەمبەر دا ھێزێن ئاسایشا رۆژئاڤا و ھێزێن یەپەگە ب دژواری بەرسڤا رژێما ئەسەدی و ھەڤپەیمانێن وێ ددەن و د ناڤا چار رۆژان دا پرانیا تاخێن ل ژێر کۆنترۆلا رژێما سووریێ ھاتنە ئازادکرن و ١٣٦ سەربازێن سووریێ ھاتنە کوشتن.
پشتی ئازادکرنا باژێرکێ منبیجێ و بەرھەڤیێن بۆ ئازادکرنا ھەرێما باب و عەزازێ ژ ئالیێ ھێزێن کوردی ڤە، ھێزێن رژێما سووریێ ل گەل سەربازێن ئیرانێ و حیزبوللا لوبنانێ ل باژێرێ حەسەکێ یێ رۆژئاڤایێ کوردستانێ دەست ب ھێرشەکا دژوار کرینە و جارا یەکێیە پشتی دەستپێکرنا شۆرەشا سووریێ فرۆکێن شەری یێن رژێما ئەسەدی دەڤەرێن کوردان بۆمبەباران کرن و د ئەنجام دا ٢٨ وەلاتیێ سڤیل جانێ خوە ژ دەست داینە و ب دەھان کەس ژی بریندار بووینە.
د ڤێ دەربارێ دا رێدور خەلیل پەیڤدارێ یەپەگێ د داخۆیانیەکی دا بۆ دەزگەھێن راگەھاندنێ دیار کر کو ھێرشێن رژێما سووریێ و ھەڤپەیمانێن وێ بەردەوام دکەن و گۆت: (رژێما سووریێ گەلەک تەنگاڤ بوویە و ناخوازیت باکورێ حەلەبێ بکەڤیتە د دەستێ ھێزێن دیمۆکراتیک دا و ل گەل ئیرانێ، حیزبوللا و تورکیا ھەڤپەیمانی دروست کرینە و ئارمانجا وان رێگرتنا ئازادکرنا باژێرێ بابێ یە و ھەتا نھا ب دژواری فرۆکێن شەری یێن رژێما ئەسەد تاخێن حەسەکێ بۆمبەباران دکەن و ئەو یەک دێ ببیتە داویا رژێما ئەسەدی و ھەڤپەیمانێن وێ ل رۆژھەلاتا ناڤین).
رێدور خەلیل ھەروەسا دیار ژی کر کو ھێزێن یەپەگێ و ھێزێن ئاسایشێ ب دژواری بەرسڤا ھێرشێن رژێما ئەساد ددەن و گۆت: (ئاگربەست د ناڤبەرا مە دا دروست نەبوویە و ھەتا پاقژکرنا حەسەکێ ژ سەرباز، سازی و زەلامێن رژێمێ دێ ئۆپەراسیۆنێن مە بەردەوام بکەن و ھەتا نھا ھێزێن مە شیاینە ١٣٦ سەربازێن رژێمێ و ھەڤپەیمانێن وێ بکوژین و ١٤٦ سەربازان ژی دەستەسەر بکەین و د ناڤا سەربازێن کو دیل ھاتنە گرتن دا سەربازێن ئیرانێ و حیزبوللاھێ ژی ھەنە).
ھەر د ڤێ مژارێ دا رۆژنامەڤان ھۆشەنگ حەسەن ژی ژ حەسەکێ بۆ تەلەفزیۆنا ستێرک راگەھاند کو ل ناڤا باژێر وەلاتیێن سڤیل ھێشتا ماینە و ھێزێن کوردی شیاینە سڤیلان ژ ناڤەندێن شەری ڤەگوھێزنە دەڤەرێن ئارام و گۆت: (ھەڤپەیمانیەکا دژوار ب پشکداریا تورکیا، ئیران، سووریێ و حیزبوللاھێ ل دژی فیدرالیا رۆژئاڤایێ کوردستانێ ھاتیە ئاڤاکرن و ئارمانجا ھێرشا دژوار یا رژێما ئەسەدی و ھەڤپەیمانێن وێ راوەستاندنا پێشکەڤتنا ھێزێن کوردی ل دەڤەرێن باکورێ حەلەبێ یە و ناخوازن باژێرکێن باب و عەزاز بکەڤیتە د دەستێ ھێزێن کوردی دا).
ھەروەسا فرۆکێن شەری یێن ئەمریکا ژی جار ب جار ل ئەسمانێ حەسەکێ دگەرن و ھندەک بنگەھێن رژێما ئەسەدی بۆمبەباران کرن و د ڤێ دەربارێ دا پەیڤدارێ کۆچکا سپی د داخۆیانیەکی دا راگەھاند کو ئەڤ ڤەکۆلینەکا جدی ل سەر ھێرشێن رژێما سووریێ بۆ سەر حەسەکێ دکەن و گۆت: (مە ھەتا نھا ل گەلەک دەڤەران ل دژی داعشێ پشتەڤانیا ھێزێن کوردی کریە و ئەم دێ بەردەوام بین د ھەڤکاری و ھارکاریا کوردان دا، ژ بەر کو شەرێ ل دژی تیرۆرێ برێڤە دبەن).
ل ئالیێ دی ب دەستپێکرنا ھێرشێن رژێما ئەسەدی ل حەسەکێ ل ھەردو تاخێن شێخ مەقسود و ئەشرەفیە ژی چەکدارێن ئەلنوسرا، ئەحرار شام، ھێزێن تورکمانی پێکڤە دەست ب ھێرشەکا بەرفرەە کرینە و د رۆژا دەستپێکێ دا ١٧ چەکدارێن تیرۆرست ل ئەشرەفیە و شێخ مەقسود ھاتنە کوشتن و ھێرشێن تیرۆرستان ھاتنە شکاندن.
ئەڤرۆ نیوز:
لژنا پەروەردێ و خواندنا بلند ناڤەرۆکا نڤیسارەکا جڤاتا وەزیران و وەزارەتا خواندنا بلند و ڤەکۆلینێن زانستی ئاشکرا دکەت، ئەندامەکا لژنێ ژی دبێژیت: مە داخواز یا کری کرێیا خواندنێ ل زانکۆیێن ئەھلی ژ رێژا 15% بۆ 30% بھێتە زێدەکرن، لێ زانکۆ ب مەج ل سەر ڤێ چەندێ درازینە.
شوکریا ئیسماعیل، ئەنداما لژنا پەروەردێ و خواندنا بلند ل پەرلەمانێ کوردستانێ ئاشکرا کر کو ئەو وەکو لژنا پەیوەندیدار ل سەر کرێیا خواندنێ ل زانکۆیێن ئەھلی، بۆ سالا بھێت یا خواندنێ 2016 – 2017 وان د دەمێ بۆری دا کۆمبوون کرینە و گۆت: “دەربارەی کرێیا خواندنێ بۆ سالا بھێت یا خواندنێ، مە نڤیسارەک ئاراستەی وەزارەتا خواندنا بلند و ڤەکۆلینێن زانستی جڤاتا وەزیران کرینە”.
ل دۆر ناڤەرۆکا وێ نڤیسارێ شوکریا خانێ گۆت: “مە د وێ نڤیسارێ دا داخواز کریە کرێیا خواندنێ ل زانکۆیێن ئەھلی، ھەر وەکو سالا بۆری ببیتە پێنج قست، ژ بلی ڤێ ژی قەیرانا دارایی ل بەر چاڤ بھێتە وەرگرتن و زانکۆیێن ئەھلی کرێیا خواندنێ ژ 15% بۆ 30% داشکاندنێ تێدا بکەن”.
ناڤبریێ خویا ژی کر، وان ل گەل سەرۆکێن زانکۆیێن ئەھلی دانوستاندن کرینە و داخواز ژ وان کرینەبۆ سالا نوو یا خواندنێ داشکاندنەکا باش د کرێیا خواندنێ دا بکەن کو د بەرژەوەندیا قوتابیان دا بیت و بۆ SNN گۆت: “ھەموو زانکۆیێن ئەھلی د بەرھەڤن داشکاندنێ د کرێیا خواندنێ دا بکەن ژ 15% بۆ 30%، لێ ب مەرجەکی ئەو رێژا قوتابیان یێن زانکۆیێن ئەھلی داخواز دکەن، وەزارەتا خواندنا بلند بۆ وان دابین بکەت و نەھێنە کێمکرن”.
وێ ئەنداما لژنا پەروەردێ و خواندنا بلند ل پەرلەمانێ کوردستانێ ئاماژە ب وێ چەندێ ژی کر، وان ئەو پێشنیارە بۆ جڤاتا وەزیران و وەزارەتا خواندنا بلند ھنارتیە و گۆت: “ئەم چاڤەرێ دکەین د کۆمبوونا بھێت یا جڤاتا وەزیران دا ئەڤ بابەتە بھێتە گەنگەشەکرن و د بەرژەوەندیا قوتابیان دا بھێتە پەسەندکرن”.
ئه‌ڤرۆ نيوز:
پشکداریا پێکھاتێن تورکمان و کریستیانان ل گوھۆڕینا کابینەیا حەیدەر عەبادی درازی نینە، و دلگرانیەکا مەزن ژ ئالیێ ھەردو پێکھاتان پەیدابوویە، ژێدەرەکێ نێزیکی حەیدەر عەبادی ئاشکراکر گڤاشتنا وەلاتێ ئیرانێ ل سەر سەرۆک وەزیرێن عیراقێ حەیدەر عەبادی کارتێکرن ل سەر پێکھاتا کابینا نوو کریە کو ھەموو پێکھاتان ژ حوکمەتێ و پرۆسا سیاسی ل عیراقێ دوور بکەت.
ئەرشەد سالحی سەرۆکێ بەرەیێ تورکمانی ل عیراقێ بۆ رۆژناما شەرق ئەلئەوسەت گۆت: پێدڤیە نەتەوەیا تورکمان نوونەرێ خوە دجڤاتا وەزیرێن عیراقێ دا ھەبیت، ب ڤی رەنگی عەبادی نەڤێت دەنگێ تورکمانان دناڤ جڤاتا وەزیران دا ھەبیت.
ژئالیەکێ دیڤە ( وەجیدە یاقو ھورمز) سەرۆکا فراکسیۆنا (کومکارا کلدانی سریانی و ئاشوری) ل پەرلەمانێ ھەرێما کوردستانێ بۆ ھەمان رۆژنامە گۆت: ل عیراقێ پێڤکەژیانا و ئاشتی نینە، بتنێ وەک دروشمێن پرۆپاگندێن ھەلبژارتنانە، ھەروەسا دیارکر، ب ھەموو شێوەکێ ڤی کاری ئەم رسوا دکەین، دوورخستنا کریستان و پێشێلکرنا مافێن کریستیانان چەندین جارە ژئالیێ حوکمەتا عیراقێ ڤە ئەم تووشی ڤێ پشتگوھخستنێ دبین، و ئەڤە دەستدرێژیە ل سەر پێکھاتا کریستیانان.
ئه‌ڤرۆ نيوز:
نوونەرێ کوردێن شەبەک ل جڤاتا نوونەرێن عیراقێ ئاماژەدا، ئێدی ئەو ل گەل پارێزگەھا نینەوا نامینن، و دێ ھێنە سەر بە ھەرێما کوردستانێ ڤە، ھەروەسا گۆت پەیاما عەبادی سەبەرات پارچەبوونا مووسل یا چەڤەرێکریی و نابیت ئەو پارێزگەھە وەکی جاران بمینیت.
سالم شەبەک ھەروەسا گۆت: ئەم وەک ئاکنجیێن دەشتا نەینەوا پشکەکێن ژ ھەرێما کوردستانێ و بلا کەس چو موزایەدێ ل سەر مە نەکەت، ئەم نوونەرێن خەلکێ خوینە ل بەغدا، ددەمەکێ دا نوونەرێن کریستیان و شەبەک ل پەرلەمانێ عیراقێ ئەم پشتەڤانیا پێشمەرگەی دکەین، ئەم وەک دەشتا نەینەوا و شنگال مە بڕیار دایە ئێدی نەڤەگەرین ل گەل رۆژێن رەشێن مووسلێ.
سالم شەبەک ئەو چەندە ژی نەڤەشارت و گۆت: نوکە ئەم دتۆڕین جڤاکیێن فیسبوکی دا، مە دەست بھەوەکا کومکرنا دەنگێن پشتەڤانیا جوداکرنا ل گەل مووسلێ و ھندەک فۆرمێن تایبەت ھاتیە ئامادەکرن بۆ کارێ راپرسیا دناڤ شەبەکان دا، کو پێکھاتا مە 90% ل گەل ھەرێما کوردستانێ دایە، مە دڤێت ب رێیا ریفرادۆمەکا تایبەت ب تەمام خوە ژ بەغدا ڕامالێن و ڤەگەرین بۆ سەر باوەشا ھەرێما کوردستانێ .
ئه‌ڤرۆ نيوز:
فەرماندەکێ پێشمەرگەی ئاشکراکر، داعش دەست ب لڤینان کریە ل دەوروبەرێ قەزا خورماتوو دخوازن بشێوەیێ پارتیزانی ل دەڤەرێن کوردستانێ چالاکیان ئەنجامبدەن، بەلێ ھێزەکا زۆرا پێشمەرگەی ل قەزا خورماتوو ھاتیە بجھکرن و گورزێن کوژەک ل تیرۆرستێن داعش داینە، ھەروەسا دیارکر، میلیشیاتێن حەشدا شەعبی بەردەومن ل چێکرنا ئالۆزیان و بەردەوام گەفا ل وەلاتیێن کورد دکەن.
عەبدولا بور، فەرماندێ میحوەرێ خورماتوو یێ ھێزێن پێشمەرگەی بۆ رۆژناما ئەڤرۆ گۆت” ڤێ دوماھیێ چەکدارێن داعش ل دەوروبەرێ قەزا خورماتوو دەست ب لڤینانکریە و ھژمارا چەکدارێن وانژی زێدەبویە، ئەڤە ژی پشتی شکەستنا وان ل دەڤەرێن دی یێن عێراقێ پتر سەنگا خوە ئێخستیە قەزا خورماتوو دخوازن بشێوەیێ پارتیزانی ل دەڤەرێ بمینن و جار جار چالاکی ھەبن، بەلێ ھێزێن پێشمەرگەی ل قەزا خورماتوو رێکێ نادەن داعش چالاکیان ل دەڤەرێ بکەت و بەری نوکەژی ل چەند رۆژێن بۆری سێ جارا ھێرشکرە سەر ھێزێن پێشمەرگەی، بەلێ پێشمەرگەی ب توندی بەرسیڤا ھێرشێن واندایە و زیانێن مەزن گەھاندن تیرۆرستان، سێ لیوا و چەند یەکەیێن پێشمەرگەی ل دەڤەرا خورماتوو یا کوردستانی ھاتینە ئاکنجیکرن و سەنگەر گرێداینە ھەتا داعش نەشێن بچنە ناڤا قەزا خورماتوو داگیربکەن، دگەل ڤێ چەندێ ژی دەڤەر یا بەرفرەھە و بشێوەیێ پارتیزانی ژلایێ خەلکی دھێنە دیتن، ئەڤەژی بۆیە جھێ ترس دەف خەلکێ دەڤەرێ، بتایبەتی مەترسیا وەلاتیێن کورد لدۆر خوە ڤەدزینا داعش بۆ ناف سەنتەرێ باژێڕی، چونکە بەری نوکە چەکدارێن داعش گەھشتە خالا پشکنینێ یا دەرازینکا باژێڕی و ھاتنە شکاندن.
عەبدولا بوری گۆت : ئاریشا مە ل گەل حەشدا شەعبیە ژلایەکی داعش ھێرشی سەر مە دکەت ژلایەکێ دیڤە میلیشیاتێن شیعە ئالۆزیان پەیدا دکەن بۆ وەلاتیێن کورد، ئەڤێ چەندێ ژی ئەرکێ مە گرانکریە، ھەرچەندە ئەف ئالۆزی وەک بەرێ نەماینە، بەلێ ھەر بەھرا ھندێ ھەنە وەلاتی بترسن و پشتڕاست نەبن ل ژیانا خوە، رۆژا دوشەمبی ژی ھەشت چەکدارێن شیعە ھێرشی سەر پێشمەرگەیەکی کر و دخواست بەرەف جھەکێ نەدیار بڕەڤینن، بەلێ ئەف پێشمەرگە شیا خوە دەرباز بکەت و نەکەفتە ددەستێ واندا، ئەڤان چەکدارێن شیعە سەقایەکئ وەسا چێکریە، بەردەوام وەلاتی ب گومانن دێ کەنگی ھێنە کوشتن و رەڤاندن، مە وەک ھێزا پێشمەرگەی دەروازەیێن باژێڕی گرتینە، بەلێ ناڤا سەنتەرێ باژێڕی ھێزا ھەڤبەش ھەیە.
ئەڤرۆ نيوز:
فەرماندێ گشتی یێ ھێزێن 70 یێن پێشمەرگەی راگەھاند، کو نوکە رەوشا پێشمەرگەی ژ ھەموو ئالیان ڤە باشە و د حالەتێ ھێرشبرنێ دایە، پێشمەرگە ل وان دەڤەرێن کۆنترۆلکری جھێن خوە لێ مۆکم دکەن، داکو ھێلا بەرگریێ ب ھێزتر ب کەڤت.
جەعفەر مستەفا ئاشکرا ژی کر کو ھەتا نوکە چو رێککەفتن ل گەل حوکمەتا عیراقێ نەھاتینە کرن بۆ پاشڤەزڤرینا پێشمەرگەی ژ وان دەڤەرێن کۆنترۆلکرین و بۆ ئاژانسا ئەنادول گۆت:( وەزارەتا پێشمەرگەی ب تنێ رێککەفتن ل گەل پنتاگۆنێ ھەیە و ل گۆر وێ رێککەفتنێ ھەر دەڤەرکا نوو بھێتە کۆنترۆلکرن ل سنۆرێ مووسلێ پێشمەرگە دێ خوە ژێ ڤەکێشیت، ژ بەرکو دەڤەرێن کوردان نەماینە و پرانیا وان یێن ھاتینە کۆنترۆلکرن).
ئه‌ڤرۆ، هه‌رهین محه‌مه‌د:
رێڤه‌به‌ریا ره‌وشه‌نبیرى و هونه‌رى ل پارێزگه‌ها دهۆكى دوهى ل هولا كونگره‌یان كونفره‌نسه‌ك ل دورچواره‌م فلمه فیسته‌ڤالا دهوكێ گێرا.
ئه‌یوب ره‌مه‌زان رێڤه‌به‌رێ رێڤه‌به‌ریا ره‌وشه‌نبیرى و هونه‌رى گۆت: د ئه‌ڤ ساله دا گوهورینه‌كا مه‌زن د فلمه فیسته‌ڤالا دهۆكێ دا هاتیه كرن كو رێڤه‌به‌رێ هونه‌رى هاتیه گوهورین و باوه‌رم د فیسته‌ڤالێن داهاتى دا دێ گه‌له‌ك تشتێن گرنگ تر هه‌بن.
رێڤه‌به‌رێ ره‌وشه‌نبیرى وهونه‌رى ل پارێزگه‌ها دهۆك ئاشكه‌راكرژى كو ژبه‌ركو فلمێ ڤه‌كرنێ گه‌له‌ك یێ گرنگه بۆ فیسته‌ڤالى له‌ورا براده‌رێن هونه‌رى بریاردایه كو فلمێ ره‌شه‌با كو ژده‌رهێنانا حسێن حه‌سه‌ن ببیته فلمێ ڤه‌كرنێ كو ل سه‌ر كاودانێن ڤێ دووماهیى نه ئه‌ویێن ب سه‌رهه‌رێما كوردستانێ دا هاتین.
بینا قه‌ره‌داغى رێكخه‌را فیسته‌ڤالى دیاركر كو وه‌كو هه‌رسال فلمه فیسته‌ڤالا دهۆكێ وه‌لاته‌كى مێهڤان دكه‌ت ئه‌ڤ ساله ژى دێ ئانكو سینه‌ما وه‌لاتێن ئسكه‌نده‌ناڤیا مێهڤان كه‌ت كو ژ سێزده فلمێن باش د پشكدارن و گۆت” ئه‌ڤ ساله فیسته‌ڤالا دهۆكى هه‌ڤپشكیه‌كا گه‌له‌كا گرنگ رادگه‌هینت كو ده‌زگه‌هێ سینه‌مایێ كو كار بۆ به‌لاڤكرنا ناما ئاشتى و مرۆڤایه‌تیێ دكه‌ت، دێ خه‌لاتێ سینه‌ما ئاشتیێ ده‌ته فلمه‌كێ”.
ئه‌ڤرۆ نيوز:
چاڤدێریا نەخۆشی دمال دا پشکەکا چارەسەریێ بخوڤە دگریت، دختور گەلەک دەرمانان و چارەسەریێ دنڤیسن، بەلێ ئەگەر مال نەزانن دێ چ کەن نەخۆش چارەسەرنابیت و ب تایبەت دەمێ تووشی نەخۆشیێن دومدرێژ دبن، لەورا فەرە ل ڤێرێ مە چەند دیتنەک ھەبن ل دور چاوانیا چاڤدێریا نەخۆشی دمالدا و دێ چاوا ھاریکاریا وی کەین کو ئێشانێن لەشێ وی سڤک ببن و ژلایێ دەروونی ڤە ئارام ببیت.
بۆ چاڤدێریا نەخۆشی دمالدا پێدڤیە جلکێن نەخۆشی بەردەوام د پاقژبن و ھەردەمێ پیسبوون باشترە بھێنە گوھۆرین، یا ھێشتا باشتر ژی ئەوە ب رۆژێ دەستەکێ جلکان و ب شەڤێ ئێکێ دی ل بەر نەخۆشی بکەن، پاقژیا لەشی گرنگیەکا تایبەت ھەیە و مەرەم ل ڤێرێ ئەوە کو نەخوش رۆژانە ب ئاڤێ و سابوونێ بھێتە شووشتن و ئەگەر کاودانێن وی نەخوازن کو رۆژانە بشوون، ئەم دشێین قولونیایێ ل لەشێ وی ب رەشینین ل دووڤ شیرەتێن نوژداری و باشترە کریارا پاقژکرنا نەخۆشی ھەموو سپێدەھیان دەست پێبکەین و ژوان تشتێن گرنک ژی پێدڤیە ھەموو دەرگەە و پەنجەرێن ژوورا وی ب دائێخین و ھەموو تشتێن پێدڤی ب پاقژکرنێ و ئاڤێ ل دەڤ جھێ وی ئامادەبکەین و جلکێن وی ل بەر بکەین و بدانینە جھەکێ پاقژ و بالیفکەکا بلند بدانینە ل بن سەرێ وی و پارچەیەکا پەروکی بینین و ب سابوونێ دێمێ نەخوشی و گوھێن وی پاقژ بکەین و پاشی ب ھشک بکەین و ب ڤی رەنگی دەست ب پاقژکرنا دەست و پێ و ئالیێن نەخوشی ھەموو یێ بھێتە کرن.
ھەروەسان گەلەک یا گرنگە چاڤدێریا دەڤ و ددانێن نەخۆشی بھێتە کرن و ئەگەر نەخوشی شیانێن وێ چەندێ ھەبوون باشترە پشتی ھەر خوارنەکێ فرچە و مەعجینا ددانا بۆ دابین بکەین و ئەو ب شووشتنا وان راببیت، بەلێ ئەگەر نەخوشی بخو شیان نەبن باشترە ئەو کەسێ چاڤدێریا وی دکەت بڤێ کریارێ راببیت.
نيشاندان