ئەڤرۆ نیوز:
ل رۆژئاڤایێ کوردستانێ ب تایبەتی ژی ل باژێرێن حەسەکێ و قامشلۆ رێکخراوەکا عەرەبی ب ناڤێ ئێکەتیا عەرەبان ھاتە ئاڤاکرن و ئارمانجا وێ رێکخراوێ ژی ژناڤبرنا دەستھەلاتا پارتیا ئێکەتیا دیموکراتیکە و شەرێ دو رۆژێن بۆری ل باژێرێ حەسەکی ژی دەستێ وێ رێکخراوێ تێدا ھەبوویە و کوردێن رۆژئاڤایێ کوردستانێ ژی دبێژن ھەتا پارتێن کوردی ل رۆژئاڤا نەبنە ئێک دێ مەترسیا عەرەبێن شوفینی ل سەر کوردان بەردەوام بیت.
ل گۆر راپۆرتەکا مالپەرێ نێرینا ئازاد یا تورکی دەمەکە ل رۆژئاڤایێ کوردستانێ رێکخراوەکا نوو دەست ب خەباتا خوە کریە و شیایە خوە زوو ب ھێز بکەت، ئەو رێکخراوە ب ناڤێ ئێکەتیا عەرەبان خوە رێکخستن کریە و ئەندامێن وێ رێکخراوێ ژی دیار دکەن کو ئەم ناھێلین پارتیا ئێکەتیا دیموکراتیک حوکمێ ل مە بکەت و ل گۆر زانیاریێن مالپەرێ ل حەسەکێ و قامشلۆ گەلەک عەرەب گەھشتنە وان و شەرێ چەند رۆژێن بۆری ل باژێرێ حەسەکێ ژی دەستێ وێ رێکخراوێ تێدا ھەبوویە.
د بەردەوامیا راپۆرتێ دا ھاتیە دیار کرن ژێدەرێن ل رۆژئاڤایێ کوردستانێ دیار دکەن کو سعوودیا ھاریکاریا وێ پارتا عەرەبی دکەت و ئارمانجا وان شەر کرنە ل دژی پەیەدێ، لێ ھەتا نھا چو بەلگەک وەسا ل بەر دەستان نینە کو ھاریکاریا سعوودی بۆ وێ پارتیا عەرەبی بسەلینیت.
ل ئالیێ دی کوردێن رۆژئاڤایێ کوردستانێ ژی دیار کرن کو پەیەدە ل سەر رێیەکا شاشە و گرتنا ئەندامێن پارتی دیموکراتی کوردستان- سووریا ئێکە ژ وان شاشیێن مەزن کو زیانێ دگەھینتە ئێکەتیا ناڤمالیا کوردی، چونکو نھا ل رۆژئاڤایێ کوردستانێ دەلیڤەکا دیرۆکی بۆ کوردان ھاتیە پێش و دڤێت کورد بەری ھەر تشتەکێ ئێکەتیا خوە ب ھێز بکەن، لێ مخابن سیاسەتا شاش یا پەیەدێ وەسا کریە کو گەلەک کەس ژ رۆژئاڤایێ کوردستانێ برەڤن و گرتنا سەرۆکێ ئەنجوومەنێ نیشتمانیا کوردێن سووریا و دەرخستنا وی ل رۆژئاڤایێ کوردستانێ ژی شاشیەکا مەزن و دیرۆکی بوو و دڤێت پەیەدە دەستان ژ سیاسەتا خوە بەردەت و ل گەل پارتێن دی ئێکەتیەکا ب ھێز ئاڤا بکەت دا بشێن ل ھەمبەر ھەر مەترسیەکێ بەرەڤانیێ ل کوردێن رۆژئاڤا بکەن.
ل گۆر زانیاریێن مالپەرێ نێرینا ئازاد ئەندامێن وێ رێکخراوێ نھا نێزیکی دو سەد کەسانە لێ بلەز خوە ب رێکخستن دکەن و گەلەک کەس ژی دگەھنە وان و ئەو یەک دێ مەترسیەکا مەزن بۆ پاشەرۆژا رۆژئاڤایێ کوردستانێ دروست بکەت. چونکو بەری نھا ئێکەتیا ھۆزێن تورکمان و عەرەبان ل رۆژئاڤایێ کوردستانێ دیار کربوون کو ئەو فیدراسیۆنا باکورێ سووریێ رەد دکەن و ناھێلن کو کورد حوکمێ ل وان بکەن و ژ بەر ھندێ ژی مەترسیەکا مەزن یا ھەی ئەو ھێزە پشتەڤانیێ ل پارتا نوو یا عەرەبی ل دژی کوردان بکەن.

ئه‌ڤرۆ نيوز:

چاڤدێرەکێ سیاسی کورد دبێژیت، ئیرانێ پێخوشترە باژێرێ مووسلێ ددەستیێن داعشێ دا بمینیت نەک بکەفیتە ددەستێن سونیان دا، ھەڤدەم ئاماژەدا ھەبوونا ھێزێن ئەمریکی ل فرۆکخانا گەیارە کو (60)کیلومەتران ل ژێریا مووسلێ دایە دێ بیتە رێگر و ئاستەنگ بۆ پشکداریا ھێزێن میلیشیاتێن حەشدا شەعبی د شەرێ ئازادکرنا مووسلێ دا، ھەروەسا دیارکر، چەکدارێن (PKK) وەک ئالترناتیفەکێ گونجایی ل جھێ وان میلیشیاتان پشکداری شەرێ ئازادیا مووسلێ بکەت.
شرۆڤەکار و چاڤدێرێ سیاسی نیاز حاجی بۆ مالپەرێ (باسنیۆز) راگەھاند، ھێزێن ئەمریکی حەزدکەن ب لەزترین دەم ئۆپراسیۆنا لەشکری یا ئازادیا مووسلێ دەستپێبکەت، ئاماژدەا ھندێ ژی، پێشبینی دکەم ئەو ئۆپرسایون ل گەلە ھەیڤا چریا ئێکێ بھێتە ئەنجامدان، و ئێدی ژڤی دەمی ناھێتە پاشخستن.
نیاز حاجی ئەو چەندە ژی ئاشکراکر و گۆت: سەدەما گیروکرن و پەیداکرنا ئاریشە و ئاستەنگان ل ھەمبەری ئۆپراسیۆنا ئازادیا مووسلێ، نەخاسمە ئاریشێن ڤێ دووماھیێ دناڤبەرا سەرۆکێ پەرلەمانێ عیراقێ و وەزیرێ بەرەڤانیا عیراقێ کو ھەردو سونی نە وەلاتێ ئیرانێ یە، مەرم ژێ پەیداکرنا ئاریشایە بەرامبەری وەزیرێ بەرەڤانیا عیراقێ بۆ ھندێ نەشێت ب کارێ ئۆپراسیۆنا ئازادکرنا مووسلێ رابیت و بھێتە گیروکرن.
چاڤدێرێ سیاسی یێ کورد ھەروەسا دووپاتکر، پیلانەکا ب مەترسیدار درێ ھەیە کو وەلاتێ ئیرانێ بۆ سونیێن عیراقێ بەرھەڤ دکەت، ب رێیا پەیداکرنا فتنەکەکێ دناڤ ھوزێن عەرەبی دا، چونکی ھۆزا عوبەیدی ل (تکریت و دیالی و ژێریا مووسلێ) پشتەڤانیا وەزیرێ بەرڤانیێ خالد ئەلعوبەیدی دکەن، ژ ئالیەکێ دیڤە ھۆزا (کەرابیلە) پشتەڤانیا محەمەد کەربۆلی دکەن، کو خەلکێ دەڤەرا رومادی یە، ئەڤە دێ بیتە دەستپێکەک بۆ پارچەکرنا دناڤبەرا ھۆزێن عەربێن سونی دا.
دبەردەوامیا گۆتنێن خوە دا نیاز حاجی گۆت: وەلاتێ ئیرانێ ھەروەسا دترسیت کەساتیەکا سونی بھێتە پێش و بەرچاڤ ببت، نەخاسمە خالد عوبەیدی د سەردەمێ وی دا لەشکرێ عیراقێ ھندەک سەرکەفتن ب دەستخوەڤە ئینان، و ژئالیێ ویلایەتێن ئێکگرتیا ئەمریکی ڤە جھێ رازیبوونێ یە، دشیان دایە ھژمارەکا زۆرا ئەفسەرێن بەرێ یێن لەشکرێ عیراقێ ڤەگەرینیت دناڤ رێزێن لەشکرێ عیراقێ و ب ڤی رەنگی سەرکێشیا کودەتایەکا لەشکری دژی دەستھەلاتا شیعی ئەنجام بدەت، لەورا یا حێبەتی نینە دەمێ ئیرانی بزاڤا دوورخستنا ژ دەستھەلاتێ پۆستێ وی بکەت.
زێدەباری وێ چەندێ ژی، دەرخستنا داعشێ ژ مووسل ئانکو دوورخستنا چەکدارێن داعشێ ژ سنۆرێن ھەرێما کوردستانێ، ھەروەسا گرنگیا ئازدکرنا باژێرێ مووسلێ سەبارەت وەلاتێ تورکیا و سعودیێ، وکنترۆلکرنا مووسلێ بشێوەکێ مەزن ددەستێن ھێزێن کاریگەر ل سەر ئەردی رامانا گوھوڕینا گەلەک روودانان ددەت، ھەروەکی روودانێن باژێرێ حەلەب یا سووری، کو ئەوژی ب ھەمان گرنگیا باژێرێ مووسلێ دایە، کا چەوا ئیران یا دلگرانە ب ئازادکرنا باژێرێ مووسلێ وەسا تورکیا و سعودیە ددلگرانن سەبارەت دۆرپێچکرنا باژێرێ حەلەبێ.
ل دووماھیێ نیاز حاجی خوەیاکر، ویلایەتێن ئێکگرتیا ئەمریکی کو نێزیکی مەرەمێن خوەیێن تایبەت بوویە، ب ھشیاری سەرەدەریێ ل گەل روودانێن رۆژھەلاتا ناڤێن دکەت، بتایبەتی ل عیراقێ و سووریا، رۆژ بۆ رۆژێ رەوشا دەڤەرێ بەر ب ئالۆزی دچیت، لەورا پێدڤیە ئەم وەکی کورد خوە بەرھەڤ بکەین، بۆ قۆناغێن نوو یێن پشتی دەرخستنا تیرۆرستێن داعشێ ل مووسل.